Romans 14

ApeꞋ ina mowaloga feꞋ esis sahin owani, owaꞋ

Emi egafis sembaleꞋefana, baleꞋef asasinai owaꞋ laꞋifina, isima ipeꞋ peseꞋas opalef ipeꞋimi pefaꞋas pifiꞋi piwisi amam nematawa Kristen. EaꞋ ina piꞋi pifitap pelomasa basef mamumami, owaꞋ. Enis epes sembaleꞋafana laꞋifis, saꞋ gwaꞋaimi mamumami hiami. EaꞋ baleꞋef enis epesi ina laꞋifina naꞋama ina saꞋ mafis maim, owaꞋ. EaꞋ epes isima saꞋ gwaꞋaimi mamumami, ina ukup aom mopoma epes isima owaꞋ seaꞋ mafisi, owaꞋ. EaꞋ epes isima owaꞋ seaꞋ mafisi ina ukup aom mopoma epes isima saꞋ gwaꞋaimi mamumami sandaꞋ waf aonai, owaꞋ. IpeꞋ ina pewaloga enin epen nandaꞋ maola enin epen, owaꞋ. IꞋi enin nitu laꞋifina maol ananinai o newa, amama maol anan Dembinai numafi epen inima. Enin anona nemaf nitu laꞋifin. DeiꞋ main, Dembinai ananinai atona nondaꞋan nitu laꞋifin.

Enin epen okom napoma anona nemaf luꞋunai endilisi nikilaꞋ anom nimeguf hiami. EaꞋ enin epen naꞋi nimeguf hiami naꞋama etin. Epes isima hiesi atona etin sowaloga ukup asasimi motamea. Emi egafis ukup miꞋi anona nemaf boꞋona endilisi, esis ukup maꞋ i Dembinai deiꞋ sandaꞋam naꞋama. EaꞋ emi egafis saꞋ gwaꞋaimi mamumami, esis ukup maꞋi Dembinai eaꞋ saꞋam. DeiꞋ main, esis sanifela God saꞋam. EaꞋ epes isima owaꞋ seaꞋ gwaꞋaimi mamumami hiami, ukup maꞋi Dembinai, deiꞋ sandaiwaꞋma anom gwaꞋaimi. Isima wapotiꞋ sanifela God.

ApeꞋ mogawa laꞋafena apeꞋ ina enin epen nape etap anaeꞋ naila okom ananinai atona nape, owaꞋ. EaꞋ ina enin epen naila okom ananinai atona nagaꞋ, owaꞋ. IꞋi apeꞋ mope, mondaꞋ maola mofela agel Dembinai. IꞋi mogaꞋ, mogaꞋma mofela agel Dembinai. EaꞋ iꞋi apeꞋ mope namepa o mogaꞋ, apeꞋ wambota Dembinai atepa. EaꞋ amama atom Krais nagaꞋ notanima ambal napaina nohafel wapotiꞋ ma nape Dembinai ma epes isima sagaꞋi saloma isima ataꞋ sape namusi.

10 DeiꞋ maina ipeꞋ pawaloga sahin owan ipeꞋisi ma waf asasinai eaꞋ paꞋipas basef nimanimi? NaꞋamai owaꞋ. IpeꞋ pegawa anona nemaf apeꞋ hiapai hiꞋilapa mitu gani God nope nowaloga epes hiesi eaꞋ nowaloga apeꞋ. 11 Amama siꞋi Baibel naꞋiam naꞋi,

“Dembinai naꞋiam naꞋama naꞋi, ‘AeꞋ aꞋi endilisi, anona nemaf epes hiesi sindiwa nembawa sotawa sondaꞋ lotuma aeꞋ hiꞋilas, eaꞋ sowalapa basef alihim siꞋiam siꞋi aeꞋ God endilisiwei.’ ”
12 EaꞋ apeꞋ mogawa apeꞋ hiapai atona etin anona nemaf miꞋipa Goda waf hiami ofagena apeꞋ mandaꞋanai.

ApeꞋ ina mondaꞋ anom amamaga mohambombaga sahin owan, owaꞋ

13 EaꞋ ipeꞋ ina pewaloga sahin owan ipeꞋisi ma waf esis sandaꞋanai wapotiꞋ, hapaimi. ApeꞋ ukup miꞋi naꞋama miꞋi apeꞋ ina mondaꞋ anona wafa mondaꞋ owalomapa apeꞋinai nowa nondaꞋ waf aonai, owaꞋ. 14 Dembinai Jisas nawalipi egawa amama. Ina anom amamaga gwaꞋaimi mafis maim aom, owaꞋ. Okom epeni atona naꞋi anom amamaga aom eaꞋ nendaiwaꞋma nogwaꞋam, amama motaga aoma anan. 15 IꞋi ipeꞋ peaꞋ anom gwaꞋaimi eaꞋ deiꞋ pehambombaga enis epes sahin owan ipeꞋisi, ipeꞋ pegawa, ipeꞋ ukup ina maimaila sahin owan ipeꞋisi, owaꞋ. Krais nagaꞋ ma nofaꞋai epes isima ipeꞋisi sahin owan. EaꞋ ipeꞋ ina pehambombagas ma gwaꞋaimi ipeꞋimi. 16 IpeꞋ ina pendaꞋ anona waf enis sahin owan Kristen sitilipa nendaꞋ ukup asasimi aom, owaꞋ. IꞋi ipeꞋ piꞋi waf anama buꞋunai, ipeꞋ ina pendaꞋana naep asasimi, hapainai. 17 Waf anama saꞋ gwaꞋaimi embelanai, anama ina ofagena ma siowis wambota Godi numafias, owaꞋetin. Anama waf buꞋunai naloma opalef awanemi maloma waf sandanifelamanai atona. Ambal BuꞋunai Godi naseꞋapai waf anama. 18 Emi egafis sape sandaꞋ maola Kraisi ma owaꞋ sondaꞋ anona waf nondaꞋ Kristen ukup aom, anona nemaf God okom boꞋona ma waf asasinai eaꞋ enis epes wapotiꞋ sogawa esis epes buꞋwasi.

19 DeiꞋ apeꞋ mila waf hianai nondaꞋ apeꞋ mope opalef etifim, eaꞋ waf buꞋunai hianai nondaꞋ baleꞋef sahin owani notaga laꞋifina. 20 Ina ukup mopoma gwaꞋaimi atom eaꞋ pehambombaga maol Godi, owaꞋ. Endilisi, amamaga hiami gwaꞋaimi buꞋwami. EaꞋ iꞋi ipeꞋ peaꞋ anom gwaꞋaimi mondaꞋ enin epen newa nendaꞋ waf aonai, ipeꞋ wapotiꞋ pandaꞋ waf aonai. 21 Ina andeandeꞋma peaꞋ mafis moloma embel wain gwaꞋaimi maim, o pendaꞋ maim amamaga mondaꞋ owalomepa nowa ma waf aonai, owaꞋ.

22 Ukup ipeꞋimi atom miꞋi moloma Goda amamaga amama mondaꞋ owalomepa nowa. Epes ukup mopoma anom amamaga buꞋwami, ukup asasimi ina mandaꞋ kotimasa amamaga gwaꞋaimi maim amama, owaꞋ. Esis sandanifel. 23 EaꞋ emi egafis ukup biefima seaꞋam, ofagema asasimi atom. DeiꞋ main, esis ina sombaleꞋef laꞋifis ma saꞋam, owaꞋ. Amamaga hiami epes owaꞋ sombaleꞋefa God sandaꞋami, amama awami.

Copyright information for `AOJFILIFITA