Romans 15

ApeꞋ mila okom Kraisi

ApeꞋ epes mombaleꞋefana laꞋifipa, maol apeꞋinai anama ma migiambama epes isima baleꞋef owaꞋ laꞋifinai. Esis ina laꞋifisa sofaꞋ nimanimi asasimi, isima apeꞋ migiambamas mofaꞋ nimanimi asasimi molomas. ApeꞋ ina mila ukup apeꞋimi atom, owaꞋ. ApeꞋ hiapai atona etin mondaꞋ maol migiambama epes sape felefeleꞋma apeꞋ ma anona nemaf sofaꞋ waf buꞋunai sotaga laꞋifis. ApeꞋ mogawa Krais wapotiꞋ ina naila okom ananinai atona, owaꞋ. Waf aonai natagamana siꞋi Baibel naꞋi, Krais naꞋipa God naꞋi, “Epes saꞋi basef findiwama ineꞋ eaꞋ basef amama atom mafiꞋi maseꞋala aeꞋ.” DeiꞋ main, basef hiami fowaꞋ amam mandaꞋam mail Baibeli mandaꞋam mawalipa apeꞋ. Basef amama mondaꞋapa motaga laꞋifipa miꞋi endilisi God nigiambamapa ma mope andeandeꞋ. ApeꞋ mofaꞋ pepel ma God atona nandaꞋapa mataga laꞋifipa mombaleꞋefana. AeꞋ aꞋi anan nigiambamepa pila waf Krais Jisasi endilisi pefaꞋ ukup etifim. Ama ipeꞋ pepe opalef etifim eaꞋ malogof etifim pefela agel Godi, anan Dembinai apeꞋinai Jisas Krais Ahalomana.

Krais nagiambama esis Juda saloma isima owaꞋ Judaisi wapotiꞋ

EaꞋ ipeꞋ hipei ukup mimila esis sahin owan peseꞋasa opalef esis siꞋi Krais wapotiꞋ naseꞋapa okom apeꞋ, ma epes hiesi sefela agel Godi luꞋuna. AeꞋ aꞋipipa naꞋama. Krais nafiꞋi nataga nandaꞋ maol nape owina nagiambama esis Juda. Anan nandaꞋam naꞋama ma nihiꞋambasa God naꞋi basef endilisimi atom. Basef amama endilisimi atom fowaꞋ naꞋiam naloma dambami bafasas akupas asasimi mandawalap alihim. Krais nandaꞋ maol anama ma nagiambama esis sololama Godi owaꞋ Judaisi wapotiꞋ sogawa God naꞋi esis uwahipisa sefela agel ananinai luꞋuna, siꞋi Baibel naꞋiam naꞋi. David naꞋipa God naꞋi,

“Anona nemaf aeꞋ ewalapa basef iꞋi agel ineꞋinai ma enis epes owaꞋ Judaisi sololama ineꞋi. EaꞋ endaꞋ anom awalef efela agel ineꞋinai.”
10 EaꞋ anom basef Baibeli maꞋiam naꞋama wapotiꞋ maꞋi,

“IpeꞋ epes fowaꞋ peloloma Godi, pendanifel peloma esis wambota Ananinai.”
11 EaꞋ anom basef Baibelimi maꞋiam naꞋama wapotiꞋ maꞋi,

“IpeꞋ hipei fowaꞋ peloloma Godi, pefela agel Dembinai. PendaꞋ anom awelef pefela agel Ananinai.”
12 EaꞋ Aisaia wapotiꞋ naꞋiam naꞋi,

“Anona nemaf anona aman notaga wambota Jesi. Aman anama notaga nope Dembinai ma esis sololama Godi numafias eaꞋ sombaleꞋefana siꞋi endilisi anona nemaf anan nigiambamas.”
13 ApeꞋ mogawa endilisi God nagiambamapa ma mope andeandeꞋ. God anan ofagonama amama. DeiꞋ aeꞋ aꞋi ipeꞋ pembaleꞋefana nondaꞋ danifel luꞋunai noloma opalef awanemi motaga siꞋima ipeꞋ. EaꞋ aꞋi pepel Ambal BuꞋunai Ananinai nondaꞋepa pegawa endilisi God nigiambamepa eaꞋ piti pepel Ananinai.

14 IpeꞋ alupipei aeꞋipei, opaf aeꞋanai egawa endilisi ma ipeꞋ pandaꞋ waf buꞋunai laꞋelaꞋef eaꞋ pegawa gawa hianai naninani. EaꞋ ipeꞋ wila ma peseꞋasa nomonas buꞋwami sahin owan. 15 EaꞋ anom basef aliꞋ aꞋipipa amama laꞋifimi atom. EaꞋ aeꞋ ina umbamahe ma aꞋipipa basef amama, owaꞋ. AꞋi efela ukup ipeꞋimi. DeiꞋ main, God naseꞋe okoma aeꞋ nagiambame naꞋa. 16 EaꞋ anan nandaꞋe ape andaꞋ maola Krais Jisas andaꞋam laꞋafena esis sololama Godi owaꞋ Judaisi. AndaꞋ maol siꞋi amam mondolali ma Godi awalapa basef buꞋwami ananimi. AeꞋ aꞋi efaꞋai epes isima owaꞋ Judaisi sifiꞋmai Anan eaꞋ Ambal BuꞋunai Ananinai nondaꞋas sotaga epes Godi etis boꞋwes andeandeꞋ eseꞋanas Anan siꞋi ofa anan okom naꞋiami endilisi.

17 AeꞋ ape laꞋifiwi aloma Krais Jisas eaꞋ andanifel ma andaꞋ maol Godi. 18 Krais atona naseꞋe pepel andaꞋ maol anama. Anan nagiambame nandaꞋe laꞋifiwi afeꞋ andaꞋ maol anama luꞋunai awalipa esis owaꞋ Judaisi ma silana someꞋ basef ananimi. AeꞋ andaiwaꞋma iꞋipipa anom basef, owaꞋ. Amama atom. 19 Ambal BuꞋunai Godi naseꞋe pepel ananinai nandaꞋe laꞋifiwi ma andaꞋ ikwaf laꞋifinai naninani. Epes hiesi sati maol anama eaꞋ sameꞋ basef Godi sailam. Damba damba andaꞋam Jerusalem awalapa basef buꞋwami ma Krais afeꞋ laogoma hiꞋalagon etambili etap hiagoma Ilirikum. 20 FowaꞋ damba damba afiꞋi ataga deiꞋ aeꞋ okom naꞋi endilisi ma endaꞋ maol Godi ewalapa basef Ananimi buꞋwami anagon esis ataꞋ owaꞋ sogawa Kraisi. AeꞋ andaiwaꞋma igiꞋ efeꞋ ewalapam anagon enis epes saliꞋ safeꞋ sawalipasam, owaꞋ. 21 EaꞋ aeꞋ aꞋi ewalapam siꞋi basef mail Baibeli maꞋiam,

“Epes isima owaꞋ enis sefeꞋ sieꞋipasa basefa Anan, anona nemaf semeꞋam sogawana. EaꞋ epes isima owaꞋ seameꞋ basefanai, anona nemaf semeꞋam sogawa Anan.”
22 FowaꞋ andaꞋ maol anama awalipasa basef Kraisi. Maol anama nahopa eaf aeꞋanai nimeguf hiami eaꞋ ina afeꞋmago ipeꞋ, ataꞋ owaꞋ.

Pol naꞋi nefeꞋ niti Rom eaꞋ nefeꞋ etap hiagoma Spen wapotiꞋ

23 EaꞋ deiꞋ maol aeꞋanai hiꞋalana naꞋae. Afagof hiami aeꞋ okom naꞋi endilisi ma efeꞋmago ipeꞋ. 24 Amama atom deiꞋ aꞋi ataꞋ iliꞋ efoꞋo iti ipeꞋ eaꞋ, efeꞋ etap hiagoma Spen. EaꞋ aꞋi ataꞋ ipan elomepa anom nimeguf nogota laona endanifel elomepa eaꞋ, ipeꞋ pigiambame pitumi pehapone eaf nafeꞋ Speni.

25 EaꞋ deiꞋ aꞋi efeꞋ Jerusalem endaꞋ maol igiambama esis amam nematawa Godi. 26 Esis Kristen sape etap hiagoma Masedoniai saloma esis Kristen Griki saꞋi basef sandameꞋmam eaꞋ ma sowala amamaga asasimi sondaꞋ tuꞋwanim mefeꞋ Jerusalem, sosoꞋ esis amam nematawa Godi amamaga aꞋasi. 27 Endilisi ukup asasimi atom maꞋiam eaꞋ deiꞋ sandaꞋam naꞋama. EaꞋ aeꞋ aꞋi esis sowaolamasa anona wiaf notaoma esis Kristen sape Jerusalemi. FowaꞋ esis Juda saliꞋ sawalipasa basef Godi ma sagiambama ambagof esis isima owaꞋ Judaisi sape etap hiagoma Masedonia saloma esis Grik sapoma. Amama atom deiꞋ andeandeꞋma esis sogwamasa wiaf anama esis Judai ma amamaga magiambama alopami. 28 EaꞋ aeꞋ aꞋi ataꞋ endaꞋ maol anama hiꞋilana niliꞋ. AꞋi ataꞋ eseꞋasa amamaga amama buꞋwami esis Jerusalem sofaꞋam andeandeꞋ, ila eaf Speni efoꞋo itilipa. 29 AeꞋ egawa nemaf anama efeꞋmago ipeꞋ, amamaga buꞋwami Kraisi mope siꞋima aeꞋ efoꞋo etagamepa iꞋipipam.

30 ApeꞋ mombaleꞋefa Dembinai apeꞋinai Jisas Krais, eaꞋ mogawa Ambal BuꞋunai Godi nafela ukup apeꞋimi ma maimaila esis sahin owan apeꞋisi. Amama atom deiꞋ aꞋipipa basef laꞋifimi aꞋi ipeꞋ pendaꞋ maol luꞋunai peloma aeꞋ ma pendaꞋ betena God ma aeꞋ. 31 IpeꞋ pendaꞋ betena Anan nigiambama aeꞋ notagahowe ma lagof enis epes sape etap hiagoma Judiai owaꞋ sombaleꞋefa Kraisi. EaꞋ ipeꞋ pendaꞋ betena God nondaꞋ epes Ananisi sape Jerusalemi sondanifel ma maol anama agiambamas asaꞋas otamba amama. 32 IꞋi God niꞋi aꞋe, efoꞋo etagamepa epe endanifel endilisi elomepa ataꞋ epoma nomaꞋw mope opalef awanem. 33 God Anan ofagonama opalef awanemi. AeꞋ aꞋi Anan nope nolomago ipeꞋ hipei. Endilisi.

Copyright information for `AOJFILIFITA