Romans 5

God naꞋi apeꞋ epes buꞋupai

Basef ofagema mape maliꞋi amama, baleꞋef apeꞋinai atona deiꞋ God nofalapa epes buꞋupai. Amama atom deiꞋ Dembinai apeꞋinai Jisas Krais nandaꞋapa mape opalef etifim awanem maloma God. Anan atona eafa apeꞋ mombaleꞋefana mope nomona okom Godi nainaila apeꞋ endilisi nandahomapa nefaꞋapai deiꞋ mape andeandeꞋ. ApeꞋ mogawa endilisi mape mohafa anona nemaf God nofaꞋapa mope molomana miti nafifili Ananinai. BaleꞋef anama nandaꞋapa mandanifel ma amama. ApeꞋ ina mandanifela amama atom, owaꞋ. ApeꞋ mandanifela nimanimi meatagamapa wapotiꞋ. DeiꞋ main, apeꞋ mogawa mofaꞋama mondaꞋapa laꞋifipa. IꞋi apeꞋ mitu laꞋifipama amamaga amama meagwamba apeꞋi, God niꞋi ahoꞋmapa. Amama atom deiꞋ apeꞋ mogawa endilisi Anan naila basef ananimi andeandeꞋ ma nigiambamapa mope mohafa nafifili pepel ananinai anona nemaf neatagai. IꞋi apeꞋ mogawa endilisi naꞋama, baleꞋef apeꞋinai ina anona nemaf hegililana, owaꞋ. DeiꞋ main, God naseꞋapa Ambal BuꞋunai Ananinai eaꞋ waf okom nainailapa nape luꞋuna opalef apeꞋimi.

Amama naꞋama. FowaꞋ apeꞋ ina laꞋifipa ma mondaꞋ waf buꞋunai, nogota anama God nandandepana Krais nagaꞋma apeꞋ mowaꞋ alafugaha Godi. IpeꞋ ukup mape maꞋimama? Enin epen naꞋi negaꞋma nigiambama emi egalin naꞋi nila miꞋuli Godi? AꞋi ina enis siꞋi aꞋe, owaꞋ. EaꞋ iꞋi enin epen boꞋwen endilisi, enin wila ma negaꞋ nigiambama enin epen buꞋwani. ApeꞋ ataꞋ mandaꞋ waf aonai, Krais nagaꞋ nagiambamapa. EaꞋ deiꞋ God nihiꞋambapa okom luꞋunai nainaila apeꞋ nandawalap alihina.

Anan nagaꞋ esimbel ananimi malo deiꞋ God nofalapa epes buꞋupai. Amama atom deiꞋ apeꞋ mogawa endilisi Krais natagahepa ma okom wandafunai Godi. 10 FowaꞋ apeꞋ ataꞋ mape naumbih Godi, eaꞋ deiꞋ nandaꞋapa mataga alupipai ananipai opalef etifim malomana. Anan nandaꞋam naꞋama ma Nogalomana Ananinai nagaꞋma apeꞋ. Amama atom deiꞋ apeꞋ mape alupipai Godi mogawa endilisi Krais nape namona ma anona nemaf nofaꞋapa motanimani mofeꞋ molomana mope. 11 EaꞋ ina amama atom, owaꞋ. ApeꞋ mandanifel ma God. DeiꞋ main? FowaꞋ apeꞋ mape naumbih Ananipai eaꞋ deiꞋ Dembinai apeꞋinai Jisas Krais naliꞋamona naumbih apeꞋimi nandaꞋapa mataga alupipai malomana. EaꞋ deiꞋ mandanifel ma Anan.

Adam nawalapai gaꞋ, eaꞋ Jisas nawalapai ambal namunai

12 ApeꞋ mogawa amama. Aman atotona naliꞋ nandaꞋ waf aonai, deiꞋ waf aonai nape opalef amam nematawa etapasi hiesi. EaꞋ deiꞋ waf aonai nefaꞋai gaꞋ nafiꞋi, deiꞋ gaꞋ naha epes hiesi sagaꞋ. DeiꞋ main, epes hiesi sandaꞋ waf aonai. 13 FowaꞋ gani nogota anama God ataꞋ owaꞋ noseꞋanai miꞋuli Ananinai Moses, waf aonai naliꞋ nataga nape etap anaeꞋ. IꞋi basefa miꞋuli anama owaꞋetin, deiꞋ God ina nawaloga epesa waf aonai esis sandaꞋanai, owaꞋ. 14 EaꞋ gaꞋ nataga nape nogota anama Adami nafiꞋi nataga nogota Mosesi. Epes isima hiesi ina sogawa miꞋuli God fowaꞋ nasoꞋ Mosesanai, owaꞋ. EaꞋ gaꞋ natagamas sagaꞋ hiꞋalas. FowaꞋ God naseꞋana miꞋuli Ananinai Adam, eaꞋ Adam natopaꞋana. Enis epes ina satopaꞋana siꞋi Adam natopaꞋana, owaꞋ. EaꞋ gaꞋ natagamas sagaꞋ wapotiꞋ. Aman anama Adam nandaꞋ ikwafa aman anona nemaf neatagai. 15 Waf God nandahomapa anai ma Jisas Krais naloma waf aonai Adam nandaꞋanai ina naꞋama etin, owaꞋ. Aman anama Adam atotona nandaꞋ waf aonai, deiꞋ nandaꞋ epes hiesi sagaꞋ. EaꞋ God nandahomapa, waf anama nataga luꞋuna endilisi ma aman atotona Jisas Krais. EaꞋ apeꞋ deiꞋ mofaꞋ amamaga amama presen Godi nikilaꞋ gaꞋ anama eaꞋ nataga luꞋuna endilisi ma nandahoma epes hiesi. 16 Waf buꞋunai God nandahomapa anai anama ina nape etifigin naloma waf aonai aman anama atotona nandaꞋanai, owaꞋ. Aman anama nandaꞋ waf atotona aonai. EaꞋ God nawalogapa epes hiapai naꞋi, “IpeꞋ awepa hiꞋalepa endilisi.”

ApeꞋ mandaꞋ waf aonai hianai eaꞋ God okom nainailapa nandahomapa naꞋi apeꞋ epes buꞋupai.
17 Aman anama atotona nandaꞋ waf aonai. Amama atom deiꞋ gaꞋ nataga ma epes hiesi ma aman anama atona. EaꞋ maol aman anama atotona Jisas Krais nandaꞋanai luꞋuna endilisi nikilaꞋ gaꞋ ma nagiambama epes isima hiesi. Epes isima owagama sope namisi ma sope dembesi siꞋi king. Epes isima God nandahomas endilisi.

18 DeiꞋ apeꞋ mape naꞋama. FowaꞋ waf aonai atotona nandaꞋ apeꞋ hiapai higilalapa. EaꞋ naꞋama etin waf buꞋunai atotona natagahepa ma waf aonai nandaꞋapa deiꞋ mape namepa. 19 Aman atotona nosambala basef Godi deiꞋ apeꞋ hiapai mape mandaꞋ waf aonai. EaꞋ naꞋama etin aman buꞋunai atotona naila basef amama andeandeꞋ deiꞋ apeꞋ hiapai mataga epes buꞋupai ma naep Godi. 20 EaꞋ miꞋuli anama God fowaꞋ nasoꞋ Mosesanai natagama esis sogawa waf esis sandaꞋanai aona satopaꞋ miꞋuli anama. EaꞋ esis ina sakwaha waf anama aonai, owaꞋ. SandaꞋana hianai endilisi. EaꞋ eaf God nandahomasanai nataga luꞋuna endilisi ma esis. 21 FowaꞋ waf aonai nataga luꞋuna ma apeꞋ hiapai deiꞋ magaꞋ. EaꞋ deiꞋ waf God nandahomapa anai nikilaꞋ waf anama aonai. Anan nandahomapa eaꞋ nofalapa amam nematawa buꞋupai ma mofaꞋ ambal namunai nape laꞋelaꞋef ma Dembinai apeꞋinai Jisas Krais.

Copyright information for `AOJFILIFITA