Romans 6

ApeꞋ magaꞋ maloma Krais eaꞋ mofaꞋ ambal namunai malomana

Enis epes sambasoꞋmas saꞋi naꞋama. SaꞋi apeꞋ mondaꞋ waf aonai laꞋelaꞋef ma waf God nandahomapanai notaga luꞋuna. ApeꞋ miꞋiam naꞋama o owaꞋ? OwaꞋetin. Waf aonai atotona, deiꞋ apeꞋ magaꞋ. DeiꞋ maina apeꞋ ataꞋ mondaꞋ waf aonai atona? OwaꞋetin, hapainai. IpeꞋ pegawa apeꞋ emi egafipa mofaꞋ baptaisa mape laꞋifipa maloma Jisas Krais mofaꞋ baptaisa gaꞋ Ananinai. Baptais anama apeꞋ laꞋifipa maloma gaꞋ Jisasi, God nawapa maloma Krais hiꞋagif. Pepel buꞋunai Ahalomanai atona nafela Krais nohafel hiꞋagif. EaꞋ naꞋama etina apeꞋ mohafel wapotiꞋ mape laꞋifipa mandaꞋ waf dambainai ma ambal namunai etap anaeꞋ.

ApeꞋ mupe namipai moloma Krais mupe laꞋelaꞋef hihif

ApeꞋ laꞋifipa maloma Kraisa gaꞋ anama ananinai siꞋi Anan nagaꞋ. EaꞋ naꞋama etin anona nemaf apeꞋ motaga laꞋifipa mohafel wapotiꞋ molomana. ApeꞋ mogawa opalef apimi apeꞋimi magaꞋ mail lawag usiꞋinai tuꞋwanainai maloma Krais eaꞋ God natofa waf aonai nandaꞋ maol nape alop apeꞋinai. Amama atom deiꞋ apeꞋ ina mape owina waf aonai wapotiꞋ, owaꞋ. DeiꞋ main, anona aman nagaꞋi, ina ataꞋ nape owina waf aonai wapotiꞋ, owaꞋ.

ApeꞋ magaꞋ maloma Krais. EaꞋ mogawa endilisi aona nemaf mope ambal namunai molomana wapotiꞋ. ApeꞋ mogawa God nafela Krais nohafel hiꞋagif. Amama atom Anan ina anona nemaf nogaꞋ wapotiꞋ, owaꞋ. GaꞋ ina laꞋifina natofa Anan, owaꞋ. 10 Anan nagaꞋ nemaf atotona ma waf aonai apeꞋ mandaꞋanai eaꞋ maꞋum. GaꞋ anama atona Anan nahambombaga pepel anama ma waf aonai nafeꞋ hiꞋalana. Anan deiꞋ nape ambal namunai naila okom Godi atona. 11 EaꞋ naꞋama etina ipeꞋ wapotiꞋ ukup mopoma ipeꞋ pakwaha waf aonai siꞋi epes sagaꞋi. IpeꞋ ukup mopoma ipeꞋ pape laꞋifipa paloma Krais Jisas pape namipei paloma God.

12 IpeꞋ ina piꞋi ahoꞋma waf aonai nope notaga laꞋifina numafi ipeꞋ, owaꞋ. NaꞋama waf anama aonai nohondeꞋepa eaꞋ pila waf alop atonai. 13 IpeꞋ ina peseꞋ lagof boꞋwagah ipeꞋimi mefeꞋma pendaꞋ waf aonai, owaꞋ. PeseꞋ ipeꞋ pefeꞋma God atona moloma ukup ipeꞋimi hiꞋilama anan atona siꞋi epes sotanima sohafel hiꞋagif wapotiꞋ sape namisi. IpeꞋ peseꞋana alop waꞋana hiꞋilana Goda pendaꞋ waf buꞋunai. 14 IpeꞋ pegawa waf aonai ina ataꞋ nape luꞋunama ipeꞋ wapotiꞋ, owaꞋ. DeiꞋ main, ipeꞋ deiꞋ ina ataꞋ pape owina miꞋuli anama God fowaꞋ nasoꞋ Mosesanai ma pilana, owaꞋ. IpeꞋ pape owina waf Godi atona okom nainailapa ma nandahomapa.

ApeꞋ deiꞋ mape mandaꞋ maola waf buꞋunai

15 EaꞋ deiꞋ apeꞋ ataꞋ mondaꞋam miꞋimama? ApeꞋ ina mape owina miꞋuli anama God fowa nasoꞋ Mosesanai, owaꞋ. ApeꞋ deiꞋ mape owina waf anama God nandahomapa etin. EaꞋ deiꞋ apeꞋ mondaꞋ waf aonai? OwaꞋetin endilisi! 16 IꞋi ipeꞋ peseꞋ ipeꞋ etipa pendaꞋ maol pepe owina aman emi, ipeꞋ laꞋifipa ma pilana. IꞋi ipeꞋ peseꞋ opalefa waf aonai, ipeꞋ pape owina waf anama nondaꞋepa pegaꞋ. EaꞋ iꞋi ipeꞋ peseꞋ opalefa waf buꞋunai pepe owina God petaga buꞋupei ma naep ananimi. 17 Endilisi, fowaꞋ ipeꞋ pape owina waf aonai nandaꞋepa pandaꞋana. EaꞋ God nandaꞋepa pape owina basef ananimi pailam eaꞋ paseꞋana opalef hiꞋalama paila basef amama ipeꞋ pefaꞋami. EaꞋ apeꞋ manifela God. 18 Anan natagahepa ma pepel waf aonai, deiꞋ pataga epes pandaꞋ maol pape owina waf buꞋunai natagahepa ma waf aonai. 19 Ukup ipeꞋimi ina deiꞋ laꞋifim, owaꞋ. Amama atom deiꞋ aila ukup apeꞋ epesi aꞋiam alihim aꞋi. FowaꞋ ipeꞋ ataꞋ paseꞋ alop ipeꞋinai waꞋana pape owina waf aonai naninani naloma waf hianai sosambala miꞋuli Godi eaꞋ nandepa pandaꞋana. EaꞋ deiꞋ pesoꞋ alop waꞋana hiꞋilana pepe owina waf buꞋunai ma pepe epes Godi etipa.

20 FowaꞋ ipeꞋ ataꞋ pape owina waf aonai, nogota anama ipeꞋ ataꞋ pape peloloma waf buꞋunai. 21 IpeꞋ pefaꞋ amamaga maim buꞋwami ma waf aonai fowaꞋ pandaꞋanai, ma deiꞋ ipeꞋ ambagof aoma waf anama? OwaꞋetin. Waf anama nawalapai gaꞋ atona. 22 EaꞋ deiꞋ God natagahepa ma waf aonai nandaꞋepa pape pandaꞋ maola anan pape owina anan laꞋelaꞋef. Maol anama nola gwaꞋaimi amama. IpeꞋ pepe boꞋwepa ananipei etipa ma pefaꞋ ambal namunai pepe andeandeꞋ laꞋelaꞋef. 23 Waf aonai nagwamasa awami ma isima sandaꞋ maola waf aonai. Awami amama. Esis anona nemaf sogaꞋ etin higililas. EaꞋ God deiꞋ naseꞋapai presen buꞋunai etin, anama ambal namunai nape laꞋelaꞋefi ma mope laꞋifipa moloma Krais Jisas.

Copyright information for `AOJFILIFITA