Romans 7

Basef womun etina waf sandasoꞋamainai naꞋipapa deiꞋ mandaꞋ maola waf buꞋunai ma opaf dambainai

IpeꞋ alupipei, ipeꞋ pegawa miꞋuli ma waf dasoꞋamainai eaꞋ. EaꞋ pegawa andeandeꞋma basef amama deiꞋ aꞋipipami. Nogota anama epen ataꞋ nape namin, enin ataꞋ nape owina miꞋuli anama. Basef ofagema ma miꞋuli anama amama. IꞋi anoꞋw nemataꞋw kwasoꞋ amani, ma anan ataꞋ nopan namunai, miꞋuli anama ataꞋ newaꞋana naloma akwaꞋw ataꞋ sape etifis. IꞋi waulunamaꞋw nogaꞋ, miꞋuli anama newaꞋasi peleꞋatana kwape wafifiꞋw. EaꞋ iꞋi anan aman ataꞋ nope ambal napaina ma wauluꞋmana kofeꞋ kweasoꞋ anona aman, sofalaꞋw siꞋi akwaꞋw kwandaꞋ waf aonai. EaꞋ iꞋi aman akwaꞋunai nogaꞋ, miꞋuli anama ina ataꞋ newaꞋas etifis wapotiꞋ, owaꞋ. AkwaꞋw kwandatagah kwape wafifiꞋw. Esis ina siꞋi basefa akwaꞋw siꞋi akwaꞋw kwandaꞋ soꞋa wauli, owaꞋ.

IpeꞋ alupipei aeꞋipei, aeꞋ aꞋi iꞋipipa basef amama ofagema. ApeꞋ hiapai mape laꞋifipa maloma Krais eaꞋ amama atom deiꞋ magaꞋ eaꞋ. DeiꞋ miꞋuli anama God fowaꞋ naseꞋ Mosesanai ina ataꞋ nowaꞋapa laꞋifipa wapotiꞋ, owaꞋ. ApeꞋ mape laꞋifipa paloma Jisas aman God nafelona nohafel hiꞋagif wapotiꞋ eaꞋ mondaꞋ maol ananinai atona. FowaꞋ ataꞋ mape laꞋelaꞋefa opalef apimi, miꞋuli anama God fowaꞋ nasoꞋ Mosesanai nafilai ukup awami ma alop apeꞋinai. EaꞋ mandaꞋ maola waf aonai nawalapai gaꞋ. EaꞋ apeꞋ deiꞋ magaꞋ maloma Krais makwaha amamaga mowaꞋapa laꞋifipa. EaꞋ miꞋuli anama ina ataꞋ nowaꞋapa wapotiꞋ, owaꞋ. Mape wafifipa. DeiꞋ apeꞋ ina ataꞋ mandaꞋ maol maila miꞋuli anama amam mandaꞋana nail buki, owaꞋ. ApeꞋ mandaꞋ maola waf dambainai Ambal BuꞋunai Godi nandaꞋanai.

Waf aonai nahambombaga apeꞋ

MiꞋuli anama God fowaꞋ nasoꞋ Mosesanai nape naꞋama. DeiꞋ apeꞋ ataꞋ miꞋiam miꞋimama? MiꞋi miꞋuli atona waf aonai o owaꞋ? OwaꞋetin! MiꞋuli anama God fowaꞋ nasoꞋ Mosesanai nihiꞋambe maina waf aonai ofagena ma egawana. Waf anama kowalasanai nape naꞋama. MiꞋuli anama naꞋiam naꞋama naꞋi,

“Ina kowalena ma anom amamaga anona amani, owaꞋ.”
IꞋi miꞋuli anama owaꞋ nihiꞋambe naꞋama, aeꞋ ina egawa waf aonai kowalasanai, owaꞋ.
MiꞋuli anama siꞋi anama eafa waf aonai nefela okom nandaꞋ aeꞋ kowalema amamaga hiami. IꞋi miꞋuli anama owaꞋetin, aeꞋ waf aonai aꞋe. FowaꞋ gani miꞋuli anama ataꞋ owaꞋ, nogota anama ataꞋ ape okom naseꞋe lolaiwi ma waf aonai. Anom nimeguf mafeꞋma eaꞋ basef ofagema ma miꞋuli anama mafiꞋmai aeꞋ eaꞋ waf aonai nohafel nafeꞋ ambal aeꞋanai eaꞋ nahe agaꞋma miꞋuli anama. DoꞋok liꞋ God nandaꞋ miꞋuli ananinai ma nefela ambal namunai eaꞋ aeꞋ ineꞋ efaꞋ ambal namunai ma miꞋuli anama, owaꞋ. MiꞋuli anama nahe agaꞋ etin. 11 DeiꞋ main, waf aonai nasopama eafa miꞋuli anama eaꞋ nambasoꞋme. MiꞋuli anama nafela okoma aeꞋ nihiꞋambe waf aonai nahe agaꞋ. 12 EaꞋ apeꞋ mogawa miꞋuli atona anan boꞋona andeandeꞋ. Basef amama hiami mape miꞋuli anama boꞋom wapotiꞋ.

13 AꞋi miꞋuli anama buꞋunai nahe agaꞋ? OwaꞋetin! Waf aonai atona nahe agaꞋ. EaꞋ amamaga amama siꞋi anona eafa waf aonai nahe agaꞋ ma waf anama aonai ofagena nataga nandawalap. EaꞋ miꞋuli anama nihiꞋambapa waf aonai ofagena, waf anama aona endilisi.

Waf aonai nembaloꞋ ukup apeꞋimi

14 ApeꞋ mogawa miꞋuli anama nafiꞋi Ambal BuꞋunai Godi nihiꞋambapa okom Ananinai. EaꞋ aeꞋ okom apinai nape ina aila okom Godi, owaꞋ. Waf aonai nembaleꞋe andaꞋ maola waf anama aonai. 15 EaꞋ deiꞋ aeꞋ ina egawa waf ofagena andaꞋanai, owaꞋ. Waf aeꞋ okom naꞋinaꞋiana aꞋi endaꞋanai, anama ina andaꞋana, owaꞋ. 16 Okom aeꞋanai atona aꞋiam naꞋama aꞋi ahoꞋma miꞋuli anama buꞋunai ma emeꞋana ilana. OwaꞋetin. Ina ailana, owaꞋ. AeꞋ andaiwaꞋma endaꞋ waf aonai. EaꞋ andaꞋ waf anama atona. 17 EaꞋ ina aeꞋ atowe andaꞋana, owaꞋ. Waf aonai nape opaf aeꞋanai nomon, anama atona nandaꞋam. 18 AeꞋ egawa opaf aeꞋanai nomon, ina anom nomonas buꞋwami mape, owaꞋ. Opaf anama apinai aeꞋanai atona nahambombage. Endilisi, aeꞋ okom naꞋi endaꞋ waf buꞋunai atona, owaꞋ. Ina laꞋifiwi andaꞋana, owaꞋ. 19 Waf buꞋunai okom naꞋi endaꞋanai, anama ina andaꞋana, owaꞋ. EaꞋ waf aonai andaiwaꞋma eandaꞋanai, anama atona andaꞋana. EaꞋ aeꞋ egawa ina aeꞋ aila okom andaꞋ amama, owaꞋ. Waf aonai nape opaf aeꞋanai nomon, anama atona nandaꞋe andaꞋam.

21 Amama atom deiꞋ ati waf naꞋamainai nape aeꞋ. Okom naꞋi endaꞋ waf buꞋunai, eaꞋ waf aonai nape opaf aeꞋanai naꞋipi andaꞋam. 22 Okom atona aeꞋanai deiꞋ nainaila endilisi miꞋuli anama God fowaꞋ nasoꞋ Mosesanai andanifamana. 23 EaꞋ ati anona waf nape alop siꞋina waꞋana aeꞋanai nomon. EaꞋ waf anama napaꞋ naloma miꞋuli anama nape okom aeꞋanai. Waf anama atona nape alop waꞋana aeꞋanai nembaloꞋ aeꞋ nandaꞋe andaꞋ maola waf anama aonai. 24 EaꞋ uwahipiwi! AeꞋ epen danifel aꞋe, okom nimaninaiwei. Emi egalin netagahowe ma opaf apinai deiꞋ nahe agaꞋi? 25 AeꞋ anifela God! Anan atona nandaꞋ Jisas Krais Dembinai apeꞋinai natagahowe ape wafifiwi.

DeiꞋ ape naꞋama. Okom aeꞋanai atona, ape owin miꞋuli anama, eaꞋ opaf apinai ape owina pepel waf aonai.

Copyright information for `AOJFILIFITA