2 Peter 2

Keriso-are jö huotohuotovoromo majëhijarue aribövi jabesi jöhoje.

God-hu bojëmade jöho mae majëhinövareje röhu ae göëro göëro ëma sarerëmiromo uënövareje: No jö God-aro baeromo majëhijarue ae javuajëromo sareri sareri'e jöho majëhinövareje. Jabesirire jionövadëhi jemesirire ëhi jië'e sareri'e aribövioho jioruomo'ë'e. Jioruomoromo ma-döëremu jö mae atanovoromo Iesuare jöho huotohuotovo majëhinövo'ë'ö. Majëhijamu mae höromo ejëhë'oho sisërëjëvo'ë'e. Bada Iesuro hesi köëro imëvoromo jabumë baejëvadeje hesi darugoro raromojöro. Ëhi ë'adeje röhu jaburo hu deje bojamiruomajeje. Ëhu'ëro jië'ëro sisë hesi manaho ma-majioho baeromo sisërëruomo'ë'e. Bogo ë'arue javoji'e mu sisëho vae'iramu ae aho'obëhe jabesi ijore ijore jijihonövo'ë'e. Ëhi'o'iramu God-are öri ma hesi ihoho sisërë'ë'e. Monie jabesiremu bae'i nimoromo sareri sareri'e jöho jabesi sivue ëma uehorovoromo majëhiruomo'ë'e jemëro heromo mae höromo ijo bajoho mana bojëmi'irarijego. Ëaribövioho God-ro mevëvoromo sisëre rëmö'ö'iröhoho mami gö'e aevoromo uehorovobe rovë'eje. Hu nune jiajëro i'uoho iae bojëmi'ë'e.

Rabëni anera ioro'iorehu mu sisë vaejaroho God-ro bogo ma-nunëremuoho gë'i a'i tövo'amoromo sisëro nugö'ö'amadeje jabumë ë ramoramo'ere va'o raromego huhu mevo gë'iröhe majaho rueröhego. O mami gö'e sa'are raromo jijihonövare aribövi jabesi sisëho God-ro bogo ma-nunëremuoho gë'i a'i hu bijönimoruomamu gëgorovo jovoho nugö'öjamu börömo bëhe rojomoromo ae aho'o baeniagëgadeje. A'i a ihe Noah mu ma hesi jö majëhinövade ahu'o röhu a ioro'ioroho aho'obëhe 7 ë ariböviohemu i'uoho bogo bojëmi'i avoho muebejëvadeje. O Sodom'o Gomorrah'o amo masije niö'i God-ro i'ue bojëmiromo vënëro bue'öjëvamu ravoromo ma-muomöe jëvadeje. Ëhi ë'ade hesi bëhoho God bijönimoruomaje ariböviohuro uvoruomoröhego: Ëhi jië'e i'uoho God-ro no'o bojamui'ajëjo. Iae ëhuni ëhi jië'e i'uoho bojëmijadeje. Ëamo rajo a ioro'ioroho i'uoho ëhi bojëmi'i a'i a maho Lot ajamamu hu Sodom amore jioromo mae rovadeje. Ëhesi bëhoho urimo Lot-ro amore hiromo ganövadeje amo rajoho jögoroho bogo e'irögoro ma-biriri'övoromo öëro ë'anovoruomo'ego gë'i hiromo bijönimo avohonövadeje. Ëaho a maëro jië'ëro ë amo rajohu'o gemuore hiromo majae ëhi heromo gëromo jabumëro mu sisë vae'ego bijönimoromo dë vövöbajo'e sisërëjadeje hu a maëro jië'ëro. Ëhi'amu God-ro amoho ijumo'irögoro Lot ajamamu mae rovadeje. God-ro sisë aribövioho ëhi ijumëvo'i a maho ëhi ajamijë'ëro ëhu'ëro hu uehorovarue aribövioho vavaeni'ere rireromavuo'ië'ego ajamui'iröhoho hu eni jie. A'i sisë'e aribövi taemëvo'iröhoho eni jie i'uoho baemu baejuvo hujeji mevëvoromo i'u ioro'ioremu bojëmi'iröhe majaho rueröhego. 10 Sisë'e aribövioho aho'obëhe jabesi örire ëhi ë'ë'e röhu garöhe aehu jabesi sinehu sisë nimajoho ömoromo öehu jijihanovoromo va'inumi'e mu vaeromo jögoru masijo bijönimamu gëvë'oho huro ë ariböviohu'o taemëvoromo i'ue bojëmijajeje.

Ëhi jië'e jö sareri röjëhijarue aribövie jemë'o raromaruohuro biriri'övoromo uvarueje: Noremuëremu masije javuajëjo. Masije javuajëromo bogo juhuonivo'i aji'e aribövie ö'idöre raromarue jabesi jöho sisë'i atarueje.
11 Ëhi ë'arueje röhu anera ma jabesi darugohuro jö sareri röjëhijarue aribövi jabesi darugoho iosiramiromo börömo bëheje. Ëhi jie röhu ë aneraho bogo Badare nuniroho riravoromo anera sisëho agëvoromo jabesi jö sisëho majahijarueje. 12 Bogo ëhioho ë'irögoro a'i ë jö sareri röjëhijarue aribövioho mahu urejo va'ëne jioruome. Urejoho bogo uehorovanovë'e jabesi ëma jijihego aëro rinovoromo muo'amoromo ujuoho va'arueje. Ëjö sareri röjëhijarue aribövioho ëhi jio'ame. Jabu'o bogo uehorovë'e jabesi ëma jijihoromo bogo ma hejarue gavarue jöho sisë'i atarueje ijonö mahu urejonö'e sisërë'amoröhëro. 13 Mu sisë vaejarohuni ëhuni i'ue mana bae'ë'ö. Jabumë uvarueje: Dë vövöbajo'o vuëvavuaje hesi bëhoho maja'e a nunire mahehu uruvanovë'oho ëhuro vuëvavuo'ajëromo ëhi ë'arueje. Mahëro uruvanovoromo jabesi sareri sareri'e muoho nimo avohoromo jemesi gemuore ö'oromo ioho ue'ahego evare niögu suhi'ere va'inumi jiajëhi jabesi aru'ahoho ëhi va'inumi'e jëvajeje. 14 Mu sisë vae'i öëro ë'anovoromo magonahoho majae ëhi ërimëharueje. Ëhi jië'e mu sisë vuonugo'ië'oho bogo eni jëve. O mu göho ë sisë ariböviohuro garöhe bogo biririvoromo mae uehorovarue aribövioho raromamu gëvë'oho jaburo jö sisë röjëhiromo rinëgoromo sö ujuoho va'ego guaro rireromanovajeje. Bövie bise'e ma-bae taemo'i nimoromo vajiohu mu biririvoromo ë'o gabe rovaroho jaruvoho ë muohuro ruaho'amëvë'eje. Ëaribövioho God-ro sisë bojëmi'ë'e. 15 Öri ahorirehu jijiharoho vuonugo'i aruëre anumëre ëma jijihë'ejö. Ëma jijihoromo a ihe Balaam Bosor-are harihoho Balaam-hu juvade öri sisëre va'ë'ejö. Ëhesi bëhoho Balaam jö God-aro baeromo majëhinövade ae jiadeje röhu hu mu sisë hesi manaho ijo baje bae'i nimadeje. 16 Ëhi nimamu God-ro ë a hesi uehoro sisëho ahahadeje. God-hu Balaam-are uehoro sisë ahahade hesi jöho aviëhije. Balaam-ro mu sisë vae'irögoro mi ihe donkey döro hiromo örire va'adeje. Va'amu God-ro ë donkey-oho uehoro maho bojamamu ë jö bogo jövajohuro ri'öromo a huënö'e jöe jövamu hegorovo ë jö God-aro baeromo majëhijaje ahuro simano rumo'e muoho vae'ië'oromo vuonugadeje. God-ro Balaam-are uehoro sisëho ëhi ahahadeje. Balaam-hu öri ma vuonugadëhi ë jö sareri'e röjëhijarue ariböviohuro ëhi ë'oromo mu sisë vaeromo ijo baje bae'i nimarueje.

17 Röhu ë sisë aribövioho jovehu sa'a gagore rojomoromo sinihajëhi jabumë muoho ëhi sisë'i sisë'i ömarueje. O buru börömehu rueromo sue huosihego arue anume va'oromo öri ari'e tugohego bogo gavaruëhi jaburo mu maho ëhi tugohahuego bogo gavarueje. Jabumë ëhi jëvë'ego ëhuni God-ro röhe nugëhë'eje jaburo ramoramo sisë ma jië'ire ë va'o raromoröhego. 18 Jö huhe ë'oromo simano rumo'e jöho ëma atarueje. Ëma atoromo öëro jijihanovoromo mu sisë ae röjëhiromo rinovo'amego ëhuro biriri rumo'e ariböviohuro sisë aribövi ioro'ioro jabesi öri avevejö'e vuonugaroho uvarueje: Jö mae höromo ejëhoromo röhu maho vuonorö'ö va'oromo ëhuro rireromarueje. 19 Jemë'o raromarue sisë ariböviohuro ae sarerëmiromo uëvarueje: Noro jemë ajëmi'iramu jemë bogo tövanovë'e aribövioho jëvanovo'i a'i jemë rabe rabe ömo'i nëgë'oho ëma ömonövo'arujëjo. Ëhi uëvarueje röhu jabumë tövëvanovë'eje. I'u'e mu hesi darugore jëvë'ëro mu sisëmu vaemu vaejarueje. Ëhesi bëhoho di mu sisëhu ruahö'öjavuë'ohuro ëhuro tövavuanovë'eje. 20 Ëhi tövëvanovoromo sisë bëhe jëvajeje. Ëhesi bëhoho nosi Bada Iesu Keriso no mare bamavuaje aho ae rahuhu mae garomo ëhuro sa'a hesi mu sisëmu vaejaroho vuonugo'i mae va'ojuvo röhu huotorovoromo sareri'e jöho mae höromo miehu viöre aeganovoromo sisërëjëvë'oho ëhi jië'e aribövioho urimo sisë jëvadoho majae ijonö rireromoromo sisërë'amo barë'ë'e. 21 Jabumë mu ma hesi öroho bogo ga'ibejo jabumë sisë jio'i röhu bisemu ma'e jëvanovo'ibejo. Röhu mu ma hesi öroho iae garomo God-are jögoroho bojëmamu vuonugë'ëro ëhu'ëro sisë mae jëvë'eje. 22 Simano ma'e jöe niö'i urimë'i uhunö'e jajivaroho huotovë'oho ëho ëhi jië'e aribövi jabesi jöeje. Jöho ëhi uvë'eje: Öhuro ëgubijiohadire vuonorö'ö rovaje höjo. O jö göho jovo eguahë'e mahohuro vuonorö'ö va'oromo sa'osa'oho muomorovaje höjo. Ëaribövi jabesi muoho ëhije.

Copyright information for `AOM