Hebrews 1

God-hu uavamu hesi Harihehu jö majahuijade jöhoje.

Urimoho God-ro mue gö gö majae göro göro vaebe rueromo ëhuro hesi jöho röjëhi'ego jö hesirire baeromo majëhinövare ariböviohuro baeromo nosi hijo miono'oho majëhinövareje. Ëhi'obe rovadoho avevejö'e ijo tugoho'i jioröhe majaho dunovamu God-ro uavamu hesi Harihohuro jöho majahuijë'eje. ËHarihoho God-ro uavë'ëro sa'ae bövie bise'e bamadoho ëho ijonö hesi bae barë'iröhohoje. Iae hu God-are aji maho baeromo ëhuro no ajivavuajeje. God jiajëhi hu ëhije. Hesi darugo'e jöho jövoromo ëhuro sa'aho bövioho bise'oho aho'o ma'eno titimajeje. Huro nosi sisëho u'ovahuonugoromo dö mare ajiomoromo God börömo jiaje a hesi övo manö hijadeje. Ëhu'ëro jië'ëro anerae aho'obëhe iosirëmiromo huro dö mare hijajeje. Göho hu God-are Harihëro jië'ëro hu iho bövi maho baejamu hesi ihohuro anera jabesiroho iosirëmijë'eje.

God-are Harihehu anera ömo'ömo iosirëmijaje jöhoje.

God-are Harihehu anera jabesi iho iosirëmiromo iho börömo baejade jöho God-are surire jajivadoho gavarueje. God-ro anerae bogo gemu vadu'oho ave jöho ua'i ma-hesi Harihoho gemu uavadeje:

Ja nasi Harihoho javajëjo.
Jaruvoho naro ja baejavë'e jevajëjo.
O God anerae bogo gemu vadu'o hesi jöho jövoromo ae uë'i ma-hesi Harihu hesi jöhemu uëvadeje:

Na hesi Vavuoho jevo'i
hu nasi Harihoho jio'a'ajëjo.
Jö göho God-hu hesi Harihu Muri sa'are nugö'öjadevare evare uvadeje:

Na negajëjo God nasi aneraho aho'obëhe jaburo ë aho gemu rajahiruomoröhego.
O anera bogo iho masijo jio'amaje jöho huro uvë'eje:

God naro nasi aneraho avohëvego bururae'amaje höjo.
Nasi mu ajemijarue aru'ahoho avohëvego vëni hödurae'amaje höjo.
Anera jabesi jöho ëhi uvo'i Harihu hesi jöho ëhi uvë'eje:

God ja böröme namijanuoho ëhi namiemu namibe va'a'anuëjo.
Böröme namiromo jero jasi öri ari'oho avoho muebejanue höjo.
Ja mu maho nimo'i mu sisëho bijönimanue höjo.
Ëhuni God jasi A Börömoho naro ja baejavoromo huë mabëhe bojamijamu
jero jasi aribövioho iosirëmijë'ëro ja börömoho javajëjo.
10 Röhu God-are Harihu hesi örire jö göho ëhi uvë'eje:

Bada ni'i'ivadiroho jero sa'aho bamane höjo.
Ö'idöhu'o jasi övëro avohane höjo.
11 Sa'ahu'o ö'idöhu'o barë'i a'i jero biririvoromo hiemu hi'a'anuëjo.
Sa'ahu'o ö'idöhu'o niögëro buraerovanovo'ajëjo.
12 Aehu niögu suhi'o muotoho bahijaruëhi ëhi ö'idöho sa'aho rori'o bahi'anuëjo.
Aehu niögu jijö boremi'ö'i i'o io'amaruëhi ö'idö mamioho sa'a mamioho ëhi mu'u'i i'e avoho'anuëjo.
A'i ja vadune manaere aho'o ëhi ma-jiemu jiobe va'a'anuëjo.
13 God-ro anerae bogo gemu vadu'oho ua'i ma-hesi Harihohemu uavadeje:

Nasi övo manö ro hijego
ja'o muorovarue aribövioho naro ruahö'öjëvego
hörëro vijuvo taemo'amo'irane höjo.
14 Harihoho ëhi böröme jio'i a'i anerae aho'o jabumë ma-God-are mu vaejaharue aru'ahe jio'ame. Ëhi jio'amë'ëro God-ro rëmö'öjego jaburo rueromo God-hu ijonö mare ramuo'iröhe aribövioho no ajamuijarueje. Ëhu'ëro jië'ëro God-are Harihohuro aneraho iosirëmiromo hu börömo mahoje.

Copyright information for `AOM