Revelation of John 1

Aevo'i jajivare jöhoje.

Aveho urimo subivahuadoho Iesu Kerisohu huruohoromo röjahuijade jöhoje. Ëröjahuijade jöho God-ro Iesu bojamadeje huro hesi mu vaejaharue aribövioho röjahuijego noro garomo uvoröhego: God-ro nimo'ego majae ijonö ëhi ëhi jië'e muohuro nosi örire rue'ië'ajëjo. Ëijonö rueröhe mu hesi jöho Kerisoro nosi örire röjahui'i nimoromo hesi aneraho uavamu huro barueromo John God-are mu vaejahaje aho röjahijadeje. God-hu jövade jö Iesu Kerisohu mae röjahijamu John-hu gavadoho aho'o huhu mae jajivo barëjadoho aviaeje. Ae rahu ave surire jö adahë'oho o ave God-are örire jioromo rovade jö heromo rabe rabe jajivadoho ëho ejahë'oho iae huë mae bae'a'anue maja börömoho dunovë'ëro.

John-hu God-are ekaresiae amo göre göre raromaruoho jejëmijade jöhoje.

O asë'e ekaresiae aho'obëhe 7 Asia sa'a hesi uhure amo göre göre raromobe rovarujohumë John naro jemesi örire jejëmije. Na nege God mami'e ëhi jië'ëro hiemu hibe rovë'ëro jaruvohu'o ëhi hijaje röhu ijonö ëhi gemu hiemu hibe va'iröhe ë ahuro jemë huë baeromo ajëmijego maro raromo'irarijego. O na nege God-hu döre hijaje röho hesi nuninö raromarue Aru'ahe aho'obëhe 7 ëho jabu'o ëhi gemuoho jemesi örire ajëmi'iröhego. O na nege Iesu Kerisoro Vavu hesi jöhuremu ma-mae majahuibe rovë'ëro guomoromo huro aevo'ioho ri'öromo hijë'ëro a masijo ioro'ioro ave sa'a muebejaruoho iosirëmiromo böröme namiromo muebejëvaje ë aho hu'o ëhi gemuoho ajëmi'iröhego.

Keriso hu mabëheje. Huro nosi örire uehorovavuajëro jië'ëro hesi köho otehoromo guomorovoromo ëhuro nosi sisëho u'ovahuadeje.
U'ovahuoromo ajamuiromo nosi ihoho döro bamahuamu ëhuro no masije riravoromo priest muoho baejë'e javue noro Keriso-are Böröme o Vavue God-are muoho vaenövoröhëni. Ëhi ajamuijë'ego ëhuni uvo'ejo: Hesi ihoho gemu börömoho höjo. Daruge aho'o hesiriremu höjo. Ae aho'obëhe no ëhi uvemu uvobe va'ejarëjo. Iae mae.

Gare. Iae hu suehu'o gemu mae ruvebi'ië'e. Ruvebi'iramu ae aho'obëhe röhu hu anare aribövioho jabu'o nunëro garuomo'ë'e. Garomo sa'ae aho'obëhe nierusuburu'e bamoruomo'ë'e. Ëjöho iae mae. Iae ëhi jio'ë'e.

Bada God-ro uëve: Na urimo ni'i'ivevadoho röhu ijo tugoho'ioho ëhi gemuoho jevo'ajëjo. Mami'e jiobe rovadoho röhu avevejö'oho ëhi jioromo röhu ijonöhu'o ëhi jiobe va'iröhe aho daruge aho'o jië'e aho God-ro ëhi uëve.

John-hu nia'ovo'iraeromo Keriso gavade jöhoje.

Röhu John na jemesi agane gemuoho jeve. Jemë'o na'o Iesuare ae gemuohuro javuë'ëro na jemë'o havoromo huë vavaene baeromo God-are aharire jiajëro hesi ajoho baeromo baberumi namijajeje. Na motumotu hesi ihe Patmos ë remë'ejö rabëni God-hu jövade jö Iesuhu ma röjahuijadoho naehu majëhijajohuni. 10 Naro Patmos sa'are hiromo hura börömoho Bada uehorovarue majaho rovamu iae God-are Aru'ahohuro rumorovevoromo uehore bojemamu hi'i hejodeje nasi dejonö jö'o ögohuro hëgö va'ëne ma-darugo'o rovavamu. 11 Jö'o ögohuro ma-darugo'o rueromo uevavohijo: Mue gö gö ga'amanuoho suri surioro jajivonëjo. Jajivoromo ekaresiae aho'obëhe 7 jabesi öroro nugö'önego adahego hebe va'irarëjo. Ephesus amo rajo ekaresiae Smyrna amo raje Pergamum amo raje Thyatira amo raje Sardis amo raje Philadelphia amo raje Laodicea amo raje ëho jabumëro adahobe hebe va'irarëjo.

12 Ëhi jövamu hejë'i hunuorovodeje rahuhu na'o jöe jövajoho ga'i. Ë'i gavodeje iro bahijarue gije aho'obëhe 7 gold-ehu avoho'amë'oho ë momorö'öjamu 13 o iro bahijarue gije riravaje ririre a ma va'ëne aho niögu ëgobövi ba'amamu hörohu'o utahë'e gold-ehu avohë'e hisioho vinebire muoho taemë'e ëhi namijamu. 14 Ëa hesi simanohu'o simano uohu'o ajivoromo sa buse jahanovë'e jiohijo. Hesi nunoho vënëro höduvanovohijo. 15 Hesi höroho ajanie vënëro ravoromo ajivanovohijo. Huhu jö jövajoho jovëro ruomanovoromo ma-darugo'o uvavohijo. 16 Hesi övo mare jije aho'obëhe 7 jio'amohijo. Hesi jö'ore kaejö ëge anie ruë jio vië jië'e anio ma-ma'e jiohijo. Hesi nu ano'oho majaehu höröromo ajivego gavaruëhi ëhi ajivë'e jiohijo. 17 Ajivë'e jiamu gavë'i juhuonivoromo hesi höru'ere bejevoromo hesi bëhire ae guomë'ohuro raromanovodeje. Raromamu hesi övo mahuro nasi sinore bamehoromo uevadeje: Nadi juhuonivëjo. Na aevo'i jevadoho röhu ijo tugoho'i jevo'ajëjo. 18 Na biririvoromo hijaje ae jevajëjo. Urimo na guomevade höjo. Röhu gevëjo. Na ioro'ioremu hiemu hijajëjo. Ioro'ioremu hiromo darugoho baejë'ëro ëhu'ëro naehu uëvë'ohuro aëro vuovoromo vuovë'e ariböviehu va'o raromaruire ë va'o raromarue höjo. O bogo uëvë'oho bogajo. Na ëhi jië'e eni jevë'e ae jevajëjo. 19 Ëhuni jaruvo jiaje muohu'o ijonö rueröhe muohu'o jaehu ga'amanuoho ëho jajivo'amonëjo. 20 Röhu jije aho'obëhe 7 nasi övo mare jio'amamu gavane hesi jö subivahadoho o gold-ehu avoho'amë'e iro gije aho'obëhe 7 ga'amane ë hesi jö subivahadoho ë jöe niö'i jabesi bëhoho ma-sama'e huruoho majahi'ië'ajëjo. Jije aho'obëhe 7 jabesi bëhoho ekaresiae 7 jabumë muebejëvobe va'arue anerae jio'amajëjo. O iro gije 7 jabesi bëhoho ë ekaresia 7-ho jiobe va'ajëjo.

Copyright information for `AOM