1 Timothy 3

Amam Hape Debeimori Um Iruhin Ananish Arpesh Iri

Enyudok baraen douk adurin. Aria anan nukri nupe debeini um Iruhin ananish arpesh nutaurumesh um, anan douk nakri nurao yopinyi abom sagomatinyin mour. Aria nunek enyudok mour iri, anan ta nenek yopihi atih aih iri. Anan ta nunek yopinyi atin aria mare enesh arpesh shukri anan yoweini. Anan ta nurao atuk armatok. Aria anan ta nubo yoweipi urkwip pubuhuk aria anan mare urkum mur um nunek yoweishi inahos, uwok. Anan mare nuwok abar nugugak atin. Anan ta nutaurumesh nukesh eshudok eneshenesh um kupaishi arpesh. Anan ta nunek skulumesh nukripesh baraen wosik um shumneken aria shudukemesh. Anan mare juwehosin arigas atin um nini kupaishi shunitok, uwok. Anan nini eshesh shupe atugun. Anan mare nuhesh nukripesh debeg atin, uwok. Aria anan mare nunek urkum um nurao sabaibori utabor buni eneshenesh eshudok, uwok. Aria anan nunek yopinyi namudok um, anan wosik ta nunek enyudok mour. Anan ta nutaurumok wosik ananik armatok kwuni ananish batowish aria nunekesh shumnek ananin baraen. Aria batowish ta shumnek ananin baraen aria mare shagogonigan atin, uwok. Aria ta anan mare nutaurum um ananik armatok kwuni batowish wosik um, anan ta mare wosik um nunek mour um nutaurum Iruhin ananish arpesh. Aria ta anan seiwok natogur Kristen aria nasuhw Iruhin ananin baraen dodog nagipeshen arigaha douk um, anan wosik ta nupe debeini um Iruhin ananish arpesh. Aria nubokuhi atin natogur Kristen um, anan mare nupe debeini um Iruhin ananish arpesh, uwok. Um maresh? Ta anan nunek urkum nukri anan debeini nyeigur nyato iruh-uman nadukemesh um eneshenesh iri aria ta nukutukuk yopinyi baraen. Aria Iruhin ta nunek skeliman aria nukri anan douk yoweini nenek yoweishi inahos kabi douk seiwok anan nenek skelimum Satan um. Aria Iruhin ta nukri uwok abom um anudok arman kabi douk seiwok nakri uwok um yoweini Satan um. Anudok douk nupe debeini um Iruhin ananish arpesh iri ta nunek yopinyi um eshudok douk madae shusuhw Iruhin ananin baraen iri uwe shopunek. Anan nunekesh namudok aria arpesh ta shutrun shukri anan yopuni madae nunek enesh yoweishi inahos iri uwe. Um maresh, ta eshesh shukri anan yoweini aria anan nugipesh Satan ananin baraen aria Satan nusuwan nuweshikan dodog.

Mamudok Douk Hataurum Debeimi um Iruhin Ananish Arpesh Iri

Mamudok douk hataurum debeimi um Iruhin ananish arpesh iri shopunek ta hunek yopihi aih um ihishmorim arpesh shutrum aria shukri amam yopumi. Amam ta hunek ehudokmori yopihi aih. Amam ta hukripesh atin baraen ihishmorim arpesh. Mare hukripaguk enesh enen baraen aria enesh hukripeshuk kupainyi, uwok. Aria amam mare huwok abar hugugak atin. Aria mare hunek nyigiya um kupaishi esheshish eshudok eneshenesh shuni utabor, uwok. Baugenyum um Iruhin ananin baraen seiwok nyanabeshuk, aria douk Iruhin nakrip apak ananip madukemen. Aria amam ta hunek urkum um enyudok atin baraen husuwen dodog hugipeshen. Aria amam ta urkwip pur wosik aria mare purum hunek yoweishi inahos, uwok. 10 Sagomatin ipak Iruhin ananish arpesh ta putik mamudok douk hakri hutaurum amam douk hape debeimi um Iruhin ananish arpesh iri. Putrum um hugipesheh wosik ihihmorim aih iganigadae yakripepumeh iri um, ipak wosik pukripam um hunekeh abom. Aria uwok um, ta uwok.

11 Aria amamiyu armago
3:11 baugenyum baraen um oudok armago douk biyen. Enen nyakri hagok um debeimi iri amamiyu armago. Aria enen nyakri wataurum debeimi um Iruhin ananish arpesh iri.
owowin baraen enyudok. Owo ta unek yopihi aih um ihishmorim arpesh um shutru aria shukri owo yopuwori armago. Aria owo mare ukripesh enen rohwinyi baraen kupaishi um kupaishi arpesh shenekesh iri yoweishi inahos, uwok. Owo ta unodukem usu merik um owo kanak aria unek owowin mour wosik abom.

12 Mamudok douk hataurum amudok hape debeimi um Iruhin ananish arpesh iri ta hurao atuk atuk armago. Aria amam ta husuhw merik um amamiyu armago uni batowish hutaurumesh wosik. 13 Amam hutaurumam wosik amam hape debeimi um Iruhin ananish arpesh iri um, kupaishi arpesh ta shutrum shukri amam yopumi armam. Aria amam ta hudukemesh abom um amam douk hasuwen dodog abom Krais ananin baraen hagipeshen. Aria amam ta mare hunogugur um hukripesh enyudok baraen kupaishi arpesh um.

Baugenyum Baraen Um Iruhin Ananin Baraen

14 Eik yape yenyem apudok shup um, eik urkum mor yakri eik hurukatin um inaku itrin. 15 Aria ta mare dodogoiwe um inaku arigas um, nyak ta nyutik apudok shup aria putaurumen um nyudukemesh um ehudok yopihi aih douk ipak Iruhin ananish arpesh ta punekeh iri. Aria Iruhin douk nape ihih nyumneh iri douk nape numun ipakiruh aparuh. Ipak douk ananip um, atup awiropip douk patogur kabi ananit urupat iri um. Aria ipak douk pasuhw Iruhin ananin baraen dodog pagipeshen aria dodogowip atip pakripesh enyudok atin adurin baraen kupaishi um enyen mare nyubuhuk abom, uwok. Douk namudok aria ipak patogur kabi uroruh douk hosah urupat tatao dodog iri um. 16 Seiwok baugenyum Iruhin ananin baraen um agundok apak munek lotuman um douk nyanabeshuk abom. Aria ahudok nyumnah douk nyatogur yopugunum. Baraen douk enyudok.

Seiwok anan narao arpeshihw yegenyihw natogur adurin arman kabi apak um.
Aria Iruhin ananin Mishin nyawishan aria Iruhin neyabig
sabaishi arpesh shadukemesh shakri anan douk Iruhin ananin nuganin.
Aria sabaishi Iruhin ananish enselahos shopunek shatrun.
Aria ananish arpesh shanak sabaigosi nahobigos shakripesh ananin baraen ihishmorim arpesh.
Aria enesh shasuhwen dodog shagipeshen.
Aria Iruhin wata naran natoum iruhw heven aria ananin nyeigur nyato iruhw.
Copyright information for `AON