Revelation of John 18

Debeiburi Wabur Babilon Bananukuk Jurug

Douk enyudok nyanakuk aria eik yatigu kupainyi ensel nyakutukuk iruhw heven nyabuhi. Enyen douk nyarao debeinyi big aria enyenyih rupeh hatrugun abom aria ihigunum agundok atap gor nakusuk. Aria enyen nyahwar debeg nyakri,

“Abrudok wabur Babilon nyeigur nyato iruhw aburi douk
bananukuk jurug! Ababur bananukuk!
Aria douk ababur batogur yoweiburi wabur um
eshudok ihishmorim sagabehos shuni warehos shuni ogwuhudok
yoweiguhwi hwanabosusih abom iri armiguhw hwupeum.
Um maresh? Sabaishi arpesh shape ihigos-morim nahobigos iri shawok okwokwibar wainibar abar.
Abrudok abar douk shakri wobuwobren baraen um
okwokwih yoweihi aih um shani okwok shenek wehrur um.
Eshesh douk shatik arpesh shape Babilon iri esheshih yoweihi aih aria shagipeshesh shenekeh.
Aria amudok ihim-morim king hape agundok atap iri
hani abrudok waburishi arpesh shenek wehrur um.
Aria eshudok douk shenek bisnis agundok atap iri
sharao debeibori utabor um ehudok yoweihi aih douk
eshudok shape abrudok wabur iri shape shenekeh iri.”
Aria eik yemnek kupaihi mah gani iruhw heven. Aria enyudok nyeyagwrehi iri nyakri,

“Ipak eikishi arpesh, ipak pukutukuk abrudok wabur
aria putogrukuk um mare puni
abrudok waburishi arpesh punek eshudok yoweishi inahos eshesh shape shenekesh iri.
Ipak pukutubur-ukuk um ipak mare pumnek debeiri eriger douk ta eshesh shumnekar iri.
Um maresh? Eneshenesh yoweishi inahos
eshesh shape shenekesh iri douk
sabaishi abom shape kabi waripak kwagit nyubuhas kwoshem um.
Aria eshesh shakus shato gani iruhw heven
aria Iruhin natrish aria anan urkum moromesh.
Ipak padukemesh eshudok eneshenesh yoweishi inahos
okwok kwape kwenekesh iri douk sabaishi abom.
Douk namudok aria ipak ta pushanom-umok wosik atin
okwokwish yoweishi inahos aria peshopokesh shutoumok.
Okwok kwabadig nubutibari abar bor kap aria ipak pabarah.
Douk namudok aria ipak wata pubodig nubutibari abar
namudok atin aria pukok kwubarah um
kwumnek arudokmori atin debeiri eriger
okwok kwenek ipak pemnekar iri.
Aria pushopokor rutoumok shopunek.
Okwok douk kwatuk okwokwin nyeigur nyato iruhw
aria kwenek eneshenesh yoweishi inahos douk
okwok mishin nyakitak um kwunekesh iri.
Aria okwok nyeigur nyato iruhw kworao debeinyi amaen wosikumok um eshudok yoweishi inahos douk
riguk okwok kwape kwenekesh iri.
Aria okwok numun nanagunukuk aria kwakri,
‘Eik yape debeikwi kwin!
Eik kabi douk raminen madae nugokuk uwe um.
Aria eik ta mare enen amaen nyutogrume aria nyuneke ireh.
Adur atin ta uwok!’
Douk namudok aria atuh nyumnah meyoh
sabaishi yoweishi abom eshudok ta shutogurum abrudok wabur. Eshudok yoweishi inahos douk eshudok.
Eneheneh yoweihi arugeh ta hutogrumesh aria ta shureh debeg.
Aria debeirubi nyurub ta besh aria nyih shopunek ta hunish.
Um maresh? Debeini Iruhin apa nenek skelumesh
aria nawanamesh eneshenesh yoweishi inahos
eshesh shenekesh iri douk dodogowini abom.
“Aria amudok king hape agundok atap iri hani okwudok armatok shenek wehrur um aria shenek sabaishi eneshenesh yoweishi shopunek. Aria amam ta hutiku nyih hunuk aria nyugus supe sukih aria amam ta hurepok yowiyokuk. 10 Amam ta hunogugur abom um arudok debeiri eriger douk okwok kwemnekor iri aria ta hiyotu rougun aria hupe hukri,

‘O giha-mobur abrudok nyeigur nyato iruhw maburi wabur Babilon!
Giha-umep ipak arpesh pape abrudok dodogowiburi wabur iri! Douk banab nyutob, atin aua meyoh
aria ipak pemnek debeiri eriger jurug um
eneshenesh yoweishi inahos ipak pape penekesh iri!’”
11 “Aria eshudok arpesh douk shape shenek bisnis agundok atap iri ta urkwip purum abrudok wabur aria esheshiruh aparuh ta yoweruh aria shupe shureh. Um maresh? Ta mare wata enesh kupaishi arpesh shutor anah esheshih jah, uwok. 12 Ta mare enesh arpesh shutor ahudokmori jah. Gol iri siliwa, shuni yopubori utabor, buni yopubi abom weiyoub douk shatarub debeibori utabor iri. Shuni yopihi abom shigorihwihi rupeh huni eneh biyag yomogih owishiborihi rupeh, huni eneh yopihi abom wogeruhihi rupeh. Huni ihigosmorim rowos douk seisik yopuri unar wosik iri, suni ihishmorim eshudok douk shenekesh enen mahin douk shahwaren um elefan iri enyenyiruh naruh iri. Shuni eshudok douk shenekesh agusudok rowos douk shatoragos debeibori utabor iri, shuni eshudok douk shenekesh enen akitohinyi kapa nyeigurinum bras iri. Shuni eshudok douk shenekesh ainab iri, shuni eshudok yopishi abom douk shenekesh anabor yopubori utabor iri. 13 Eshudok shuni ahudokmori jah shopunek. Enyudok shanyoh iri rowog sinamon, nyuni enesh eshudok kabi douk yabro um, shuni enesh eshudok douk shesheh sheisik wosik iri. Shuni enyudok yopinyi sanda douk shahwaren um mer iri, shuni anas gris douk shahwaras um frankinsens iri. Eshudok shuni wain iri arudok sharah iri wel, shuni sabainyi abom plaua, shuni wit douk kabi douk rais um. Shuni bulmakauhos iri sipsip iri hwosahos shuni wilkarahos, shuni arpesh douk wata shape sharahaen iri. Eshudok douk shape shakamum kupaishi shenekumesh mour meyoh iri. Eshudok ihishmorim shuni arpesh
18:13 Enesh arpesh shape shakamum kupaishi shenekumesh mour meyoh iri. Kupaishi arpesh apa shatorish utabor kabi douk apak mator enesh eshudok shakus stuahas iri um.
ta mare wata shutorish atin, uwok.

14 “Aria eshudok douk shenek bisnis iri ta shukripok namudok shukri, ‘Eshudok eneshenesh ihishmorim douk nyak mishin nyakitakumesh um nyuraesh iri douk shanak shawishuk. Aria nyakish yopishi eshudok douk shatorish debeibori utabor iri shani eneshenesh yopishi eshudok douk shatrugun abom iri shopunek douk shanak shawishuk. Aria nyak ta mare wata nyutrish atin!’ 15 Aria eshudok douk shenek bisnis um shonakam um eneshenesh eshudok aria shatorish sabaibori utabor eshudok arpesh shape abrudok wabur Babilon iri ta shunogugur abom um arudok debeiri eriger douk ta abrudok waburishi arpesh shumnekar iri. Aria eshesh ta shunak shiyotuwi rougun aria ta shupe shurepobur. 16 Aria ta shukri,

‘O giha mobur atubur abrudok nyeigur
nyato iruhw mobur iri wabur!
Seiwok ababur bananek yopihi abom shigorihwihi rupeh hani sabaihi owishiborihi rupeh shopunek.
Aria banaginohw gol rani yopubori abom utabor
bani weiyoub douk shatorish debeibori utabor iri!
Eshudok eshesh douk shatrugun abom iri.
17 Aria wata shopunek banab meyoh nyutob, atin aua meyoh
aria ihishmorim eneshenesh eshudok douk
shatorish debeibori utabor iri wata shanak shawishuk.’”
“Aria sabaimi hasuhw bodaeg kroruhiyor douk wahur youg iri hani sabaishi pasindia douk shator kroruhiyor aria sharahaen shanak kupairubi warub iri, hani amudok henek mour kroruhiyor iri, shani ihishmorim arpesh douk apa shenek esheshin mour youg iri eshesh ihishmorim ta shiyotuwi rougun um abrudok wabur Babilon.
18 Aria abudok nyutob ta shiyotu shutik wabur nyih hunubur aria nyugwus sukitak suto obi nyutob, eshesh ta shukri, ‘Douk madae anabur wabur bape agundok atap iri bupe kabi abrudok nyeigur nyato iruhw aburi wabur um uwe, uwok meyoh!’ 19 Aria eshesh ta shuhur nyupruk
18:19 Enyudok baraen um shunuwatom nyupruk barag um douk sheneken um shakri shiyabigesh um esheshiruh aparuh yoweruh abom um agundok abrudok wabur bananukuk um.
shunuwatom baragos aria ta shupe shureh debeg shukri,

‘O giha-mobur atubur abrudok wabur!
Eshudok ihishmorim arpesh douk shogrem kroruhiyor iri
sharao sabaibori utabor abrudok wabur.
Ipak pakri giha mobur abrudok wabur. Um maresh?
Douk banab nyutob, atin aua meyoh abrudok waburish
ihishmorim eneshenesh yopishi eshudok shanak shawishuk!
20 Aria ipak enselahos pape iruhw heven iri
puni ipak Iruhin ananish arpesh,
puni ipak aposel douk Iruhin nagraehep um
punak pukripesh ananin baraen iri,
puni ipak profet douk pakripesh
Iruhin nakripep-enyi baraen iri,
ipak ihishmorim ta punadudareh.
Um maresh? Iruhin nenek kwotimabur
aria nawanamobur yoweishi inahos abrudok wabur
aria bemnek debeiri eriger um agundok
seiwok ababur barik benek ipak pemnek debeiri eriger um.’”
21 Douk enyudok baraen nyanak nyatuhuk aria eik yatik enen dodogowinyi abom ensel nyohur onok debeikwi burbuduk
18:21 Enyudok baraen douk nyakrium okwudok debeikwi burbuduk iri douk nyakrium anam takweimi utom douk eshesh shape shemakwiyesh urubit wit um shaworishat um.
nyawashok kwagrukuk youg aria nyakri,

“Ta shuwashak abrudok debeiburi wabur Babilon bugrukuk debeg atin gani atap
kabi eik yawashok okwudok burbuduk kwagrukuk um.
Aria arpesh ta mare wata shutrubur atin, uwok.
22 Aria eshudok kabi douk gitahas-umori esheshih meh
huni eneshenesh douk shabirakesh shenek yopugi musik iri,
shuni buwaen iri aruruh esheshih meh
ta mare wata shumnekeh atin abrudok wabur, uwok!
Aria shopunek, eshudok douk shadukemesh um
shunek enenyenen mour iri ta mare wata shutrish atin.
Aria amudok utom douk arpesh shape shakwum shaworish urubit wit iri shopunek
ta mare wata shumnekam miyagwreh atin abrudok wabur, uwok.
23 Aria nyih lamhosih ta mare wata shutrish atin.
Aria eshudok arpesh douk shakri shunaraum iri esheshih meh shopunek ta mare shumnekeh atin.
Aria riguk arpesh shape shenek bisnis abrudok wabur
aria sharao sabaibori utabor
aria shatogur debeishi nyeiguhw abom shato-umeshi.
Aria douk uwok. Aria eshudok arpesh shape abrudok wabur iri
shenek anaruh subagwiruh aria shenek rohw um
ihishmorim arpesh douk shape ihigos-morim nahobigos iri.
24 Aria Iruhin natik um abrudok wabur benek yoweishi inahos
babo amam profet hani sabaishi Iruhin ananish arpesh shagok.
Douk namudok aria baraen abrudok wabur banasuwen.
Aria ihishmorim arpesh douk
kupaishi shaesh shagok iri shopunek,
baraen douk nyanak um abrudok atubur wabur banasuwen.”
Copyright information for `AON