1 Corinthians 11

Ipak imas pugipech yekin pasin kobi douk yek yagipech Krais ananin umu.

Chechukal Balagas Chenek Lotumu

Wihlu wehlu ipak ulkwip polomu yek ali pahwen dadag pagipechen yekin balan douk yaklipepeyen uli. Douk namudak ali nameitu yek yenehilau-mepu yatuk ipakich yeguh chakih.

Wakuli nameitu yek yakli ipak imas pudukemu enyudak balan umu ababuk nyultab ipak punak pupe punek lotu abali. Balan enyudak. Krais ananinu Diginali douk God. Ali hanatimaguk almam amaminu Diginali douk Krais, ali almatok okwokwinu nebenali douk okwokwinu alman. Douk namudak ali sapos ananu alman nichukal ananim boglom ali nunek beten o nuklipech enen balan douk God ananin Michin nyaklipanu-enyimu, anan douk naunih Krais ananin yeul nyabih. Wakuli sapos onok almatok kobi kwichukal okwokwim boglom ali kwunek beten o kwuklipech enen balan douk God ananin Michin nyaklipok-enyimu, okwok douk kwaunih okwokwinu alman ananin yeul nyabih. Okwok kwonek namudak ali okwok ablan nyeilok kobi douk kwohwalu okwokwim boglom umu. Ali sapos almatok kobi kwunechukal boglom umu, okwok imas kwubleam banam. Wakuli almagou isave ablanyi-geiwomu uble balagas banagas o wuhwalagas umu. Douk namudak ali owo iken wichukalugas. Ali almam kobi hichukal amamigas balagas, wak. Umu moneken, amam douk hagilapech umu agundak God nanubu dodogowinu nahiyatik umu. Ali almagou douk wogilapech agundak almam dodogowim hahiyatik umu. Umu moneken, seiwak God wo nulau anagun almatokwihw yegenyihw ali nunek alman e, wak. Anan nalau anagun almanihw yegenyihw ali nenek almatok. Ali chopuk, God douk wo ulkum mulomu almatok ali nunek alman umu nugakomok e, wak. Anan ulkum molomu alman ali nenek almatok umu kwugakomanu. 10 Douk namudak ali ipak pupe punek lotu abali, almagou imas wichukal balagas. Owo wichukalugas umu echudak God ananich yopichi enselahas douk chanepu chape uli chutulu ali chukli wosik, owo douk wape chakamomu owowim almam.

11 Apak douk monek pas apakinu Diginali ali mape chakamomu anan. Ali almatok okwok otuk deke kobi kwupe. Ali alman atunu ele, anan chopuk deke kobi nupe, wak. Echech biech chanaga-kogamu ali dakio chape. 12 God douk nalau anagun alman ananihw yegenyihw ali nenek almatok. Ali douk namudak ati, nameitu anan nenek almam ali almagou womlali. Ali God douk bawagas umu elpech chanu chanatimaguk enechi enech echudak.

13 Ipak yet punenek skelim umu enyudak balan umu ipak yet. Enyudak pasin umu almagou kobi wichukal owowigas balagas ali wunek beten umu God umu, enyen douk wo yopinyi e. 14 Ali apak elpech apakin save douk nyagilapepu namudak. Enyen douk wo kalbamu almam amamip bogolep putoglu nebepimu e, wak. 15 Wakuli sapos almagou owowip bogolep putoglu lowipumali, epep douk penekou wataglu dudukou. Umu moneken, God anan yet nakou lougasi balagas umu sichukal owowip bogolep. 16 Wakuli sapos enen elpen nyukli wak umu nyugipech enyudak balan umu, enyen imas nyudukemech umu apak douk wo mugipechuk enen kipainyi pasin e, wak. Apak douk magipech enyudak atin pasin douk chanatimaguk God ananich elpech chape ihalub silisili ilub walub uli chagipechen uli.

Echech Korin Chawak Diginali Ananigun Woligun Komunio Ali Chasagagun

17 Nameitu yek yakli iklipepu enen dodogowinyi balan. Wakuli yek eke kobi ituk ipakich yeguh chukih, wak. Umu moneken, ababuk nyultab ipak panak pape penek lotu ali peneken uli pasin douk wo kwalowi omi nyugakomepu ati e. wak. Enyen isave nyenekepu pape sisahw. 18 Susubati yek yakli iklimu enyudak. Ababuk nyultab ipak God ananipu elpech panak pape penek lotu abali, ipak isave papemu pakli puneyais umu ati. Ali yek yemnek balan umu ipak penek namudak umu ali yakli ati eke adul. 19 Adul, ipak imas puneyais-umomu echebuk elpech douk chagipech duldulin pasin God naklien uli chunowoleh chutoglu yopugunmu. 20 Douk namudak ali woligun ipak pahwogun panak ababuk nyultab panak penek lotu abali douk wo Diginali ananigun e. 21 Ipak panatimaguk atin ati isave penek wisnabul pahul ipakich kakwich pachah. Ipak wo pichukabal kipaichi elpech umu pukech enech kakwich e. Douk namudak ali enech nyulub blach chape, ali kipaichi chawak wolobaibali wainibal abal ali chagugaku. 22 Ati ipak wilag wakepamu pupe puwak kakwich uli abal umu waka? O ipak pechegeik God ananich elpech pakli echech yowechi ali ipak wo pukech enech kakwich echebuk kakwich wakechi e ali penekech ablan? Waka pakli yek eke ituk ipakich yeguh umu enyudak pasin ipak peneken uli?

Diginali Jisas Nakam Bret Uli Wainibal Abal Ananim Disaipel

(Matyu 26:26-29; Mak 14:22-25; Luk 22:14-20)

23 Enyudak balan yek yaklipepeyen uli, enyen douk Diginali anan yet nekeyen uli. Balan douk enyudak. Ababuk wab Judas nagilapu Jisas ananim biruamu Jisas abi, Diginali Jisas nohul bret nenek tenkyumu God ali nagwudukatu ali naklipu ananim disaipel nakli, “Atudak bret douk yekihw yegenyihw, yek douk yekepeyohw umu igakomepu. Ali ipak imas pupe punek namudak umu ulkwip pulomu yek.” 25 Douk amam hatowah heyatatu ali anan nohul kap wainibal abal bloleyopi ali nenek namobuk ati ali nakli, “Abaludak abal douk yekin nupolein dodogowinyi balan kontrak. Yekig butog douk eke gutukwlemu gutal ipak uli eke gwunek enyudak kontrak nyutoglu dodogowin. Ali ababuk nyultab ipak puwak abaldak abal umu, ipak imas puneken umu ulkwip pulomu yek.”

26 Ali ababuk nyultab ipak puwak atudak bret, ali puwak abal apudak kap umu, ipak puneken umu pugilapech umu agundak Diginali nagak umu. Ali ipak pupe punek namudak ati aliga punak putoglomu ahabuk nyumnah anan nutanamali ahi.

Apak Imas Munek Skelim Umu Apakin Tinytin Iyuh Ali Adakio Mulau Diginali Ananigun Woligun

27 Douk namudak ali sapos enen elpen enyenyin tinytin kobi nyulu duldul ali nyuwak Diginali ananigun woligun, atudak bret tunu abal meyoh umu, enyen douk nyenek yowenyimu Diginali ananihw yegenyihw hwanu ananig butog. Ali enyen douk balan nyapenyin umu nyenek enyudak yowenyimu. 28 Wakuli susubati, elpen imas nyunek skelim umu enyenyin tinytin iyuh ali adakio nyuwak atudak bret tunu abaldak abal. 29 Umu moneken, sapos enyen kobi nyudukemu bawogenyumu balan umu Diginali ananihw yegenyihw ababuk nyultab enyen nyuwak atudak bret tunu abaludak abal abalimu, agagun douk enyen yet nyenenekagu. 30 Ali ipak douk penek namudak ali wolobaipali wo dodogowipu e. Ali wolobaipali agasudak saepu ali enech chagak. 31 Wakuli sapos susubati apak munek skelim umu apak yet kalbu ele, Diginali deke nunek skelimumapu ali kobi nutik enen balan nyupenyupu, wak. 32 Wakuli sapos Diginali nunek skelim umu apakin pasin ali nugabeyapamu, anan douk nenekapu namudak umu nunekapu mutoglu duldulipali elpech umu kwali apak kobi munu apudak atapichi elpech munechagiuk munak muwichuk, wak.

33 Douk namudak ali ipak yekipu elpech. Ababuk nyultab ipak punak pupemu puwak Diginali ananigun woligun abali, ipak imas pichukabal kipaichi. 34 Ali sapos enen elpen nyulub blen umu, enyen imas nyichahi enyenyitu wilpat. Ali ababuk nyultab ipak punak pupe punek lotumu, ipak eke kobi punek enen yowenyi. Ali Diginali nunek skelim-umepamu, anan eke kobi nutik enen balan nyupenyipu, wak.

Ali enen balan yek douk wata iklipepeyen uli e, yek eke iklipepu ababuk nyultab yek inaku itoglomepu abali.

Copyright information for `APE