John 1

Jisas Krais Anan Douk Bawogos Umu Agundak Chunubu Chupe Ali Kobi Wata Chugak Umu

Seiwak God watak nunek apudak atap e ali anudak Alman chohwalanamu Balan uli douk anape. Nanu God hape. Ali Anan douk nanubu God. Seiwak wata bawogos umu Anan nanu God hape. God wo nunek enen enyudak anan atunu e, wak meyoh. God nakwu anudak alman Balan nenek ihechumali enechi enech echudak. Anan douk nanubu bawogos umu agundak elpech chunubu chupe ali kobi wata chugak umu. Chopuk anan douk kobi anatu taglak uli lait umu tuglak ali elpech chunatulugun umu. Atudak lait douk isave taglak agundak yomotokweh umu. Ali yomotokweh eke hubilak kobi hubuwehatu, wak.

God nakagasi ananu nalawali ananin balan uli alman nanaki. Ananin yeul douk Jon. Anan douk nanamali nuklipu elpech umu atudak lait. Umu chunatimaguk chumnek naklipech enyi balan ali chusuh anudak alman nape kobi laitumali ananin balan dadag chugipechen. Anan Jon douk wo atudak lait e, wak. Wakuli Jon douk nanamali nuklipech balan umu anudak alman nape kobi laitumali. Anudak alman douk nape kobi tanubu taglak uli laitumali douk nanamali atap umu nugakamu ihech elpech chudukemu God.

10 Seiwak God nakwu anudak alman Balan nenek apudak atap ali douk nanaki napenyup. Wakuli apudak atapichi elpech douk wo chutulunu ali chudukemanamu agundak anan douk nanubu monakanu alman umu e, wak. 11 Nanubu nanamali ananibul wabul, wakuli ananichi douk chokanaguk agabus chakli wakanu. 12 Wakuli enech douk chemnekanu ali chasuh ananin balan dadag chagipechen. Namudak ali echech douk nekech namba umu chutoglu God ananich batowich. 13 Wak chutoglu God ananich batowich meyoh umu mamechichig butog o echechin laik meyoh o enech chuklipech ali dakio chutoglu God ananich batowich e, wak meyoh. God anan yet nanaglahech ali chatoglu ananich batowich.

14 Anudak alman chohwalanamu Balan uli douk nalau elpenyihw yegenyihw ali nanaki nanapu mape. Apak douk amatik umu agundak anan nanubu dodogowinu atunu ali yeul nyakihanamu. God anan douk atunu nuganinu meyoh ali douk nagakomonu dodogowinu yeul nyakihanu ali nakaganu nanaki. Enyudak pasin umu chenelek elpech chagakomech meyoh umu nyanu cheyagwleh adulin atin balan umu douk nyanubu nyape anan. 15 Ali Jon douk naklipech umu anudak alman. Naklipech namudak. Nakli, “Alman likuk yaklipepu-manu uli douk anudak. Douk yaklipepu namudak. Yakli, ‘Anudak alman nugimali yek uli douk nanubu nebenali. Yek chokuweli meyoh. Umu moneken, yek wata chiyalali e ali anan douk aseiwak nape.’”

16 Anan douk nanubu yopuyopunali duldulinu alman ali nanubu nagakamapu meyoh. Ali wihluwehlu douk napemu nenekumapu yopinyi apak manatimaguk. 17 Seiwak God douk nakanali lo Moses nanaki naklipechen. Wakuli God nakagas Jisas Krais nanaki nagakamapu meyoh ali naklipapu adulin atinyi balan. 18 Wak kwalowi enen elpen nyutik God e, wak meyoh. Wakuli anudak ananinu Nuganinu douk nanubu nape huluk umu Aninu God uli, anan atunu natik God. Natulunu ali douk naklipapumanu. Namudak ali apak dakio madukemanu.

Jon Nenek Baptaisumech Uli Naklipech Yopinyi Balan

(Matyu 3:1-12; Mak 1:7-8; Luk 3:15-17)

19 Echech Juda echechim nebemi hakagas anam pris hanu anam apudak awilop Livai hatukemaguk Jerusalem ali hanak hatik Jon. Hanak ali hasolikanu hakli, “Nyak meinyali?” 20 Jon nemnek ali wo nuklimu nubechukumom balan ali kobi nuklipam e, wak. Nanubu nowoleh-enyumom. Naklipam enyi balan douk enyudak. Nakli, “Yek wo Krais e, anudak douk God naklimu eke nutalihanu ali nukaganu nunamali nunolau elpech uli e, wak.”

21 Ali hasolikanu hakli, “Namudak ali nyak douk meinyali? Nyak Ilaija, waka?”

Ali naklipam nakli, “Wak, yek douk wo Ilaija e.” Ali wata hasalikanu hakli, “Nyak douk ati anudak profet douk mape matimanamu eke nutogloluli, waka?”

Ali nebemom balan nakli, “Wak.”

22 Namudak ali hasolikanu hakli, “Namudak ali klipapu. Nyak douk meinyali? Umu apak wata musuh enen balan mutanamu muklipu amudak nebemi douk hakagapu manamali musolikenyu uli. Klipapu, nyak nyakli nyak douk nyanubu meinyali alman?” 23 Ali Jon naklipam nakli, “Yek anudak alman douk seiwak profet Aisaia nenyemaguk uli balan nyakliyanali. Balan Enyudak. ‘Enen elpen nyape nyohwalu gani wohigunmu elpech wak umu ali nyakli, “Gapech yah hupe duldul umu Diginali nugimoh nunakimu.” ’” 24 Amudak almam douk hanaki hasolik Jon enyudak balan uli douk amam Farisi hakagam hanaki hasolikanu. 25 Ali hasolikanu hakli, “Nyak douk nyakli nyak wak Krais e o Ilaija o anudak nebenali profet e, wak. Namudak ali omuni nyaklipenyu ali dakio nyenek baptaisumu elpech?”

26 Ali Jon wata naklipam nakli, “Yek yenek baptaisumech abal meyoh. Ali agundak nameitu ananu alman douk nanepu peyotu. Ipak douk wo pudukemanu e, wak. 27 Anan douk nagimali yek uli. Ali yek douk wo yopuwelimu ikwechihumanu nadululuh ananinyu su e, wak.”

28 Jon douk neyagwleh enyudak balan wabul Betani. Ababul douk blape gani woblahahibamu wolub Jodan douk anan nape nenek baptaisumech umu.

Jisas Anan Douk Kobi God Ananin Nugan Sipsip Umu

29 Wehluwih ali Jon natik Jisas nanakimu nutulunu. Ali Jon naklipech nakli, “Tik anudak alman. Anan douk kobi God ananin nugan sipsip umu. Anan douk nanamali nutal yowenyi manatimaguk mape apudak atap uli moneken ali God eke kobi nunohwen nupe, wak. 30 Alman anudak douk yaklipepumanu uli. Douk yaklipepumanu yakli, ‘Ananu nagimali yek uli alman douk nanubu nebenali. Yek wak chokuweli meyoh. Umu moneken, yek douk watak chiyalali e ali anan douk seiwak nalik nape. 31 Yek yet douk wo idukemech umu anan nanubu meinali alman umu e, wak. Wakuli yek douk yanaki yenek baptaisumech umu inouh nutoglu yopugunmu ali ipak Isrel putulunu pudukemanu.’”

32 Ali Jon naklipech enyudak balan umu chudukemu Jisas umu. Naklipech nakli, “Yek yatik God ananin Michin nyagluki iluh heven kobi enyudak almin manyun umu nyabihi nyape Jisas. 33 Yek yet douk wo idukemech umu alman douk God natalihanu ali nakaganu nanakili douk anan umu e, wak. Wakuli God douk nenek salimume yanamali inek baptaisumech uli naklipe nakli, ‘Eke nyutik yekin Michin nyibihi nyupe ananu alman ali nyuwichanu. Ali anabuk alman douk eke nukech yekin Michin nyuwich wolobaichi elpech ali nyupenyich.’ 34 Yek douk ayatik enyudak nyatoglu ali douk yaklipepu. Anan douk adul nanubu God ananinu Nuganinu.”

Susubati Jisas Nalau 4-Poleim Disaipel Umu

35 Wehluwih ali Jon nanu biam ananim disaipel heyotu wolub Jodan. 36 Heyotu ali Jon natik umu Jisas nanakumali nichalak nunak. Ali nakli, “Tik anudak alman. Anan douk God ananin nugan sipsip.”

37 Douk ananim biam disaipel hemnekanu nakli namudak ali hanamu Jisas hanak. 38 Jisas natanamu natulum umu hagimanu hanak ali nasolikam nakli, “Pape paulimu moneken?” Ali amam wata hasolikanu hakli, “Rabai, nyak nyape agnumu?” Muwanamu enyudak balan Rabai umu douk nyakli Nebenyali Tisa. 39 Ali naklipam nakli, “Yowi puname munak ali putik agundak yek yapemu.” Ali hanamanu hanak hatik agundak napemu. Hatulugun ali hanubu hananu hape agnabuk ahabuk nyumnah. Umu moneken agagun douk ayawabigun 4 klok uli.

40 Amudak biam douk hemnek Jon ali hagipech Jisas hanak uli, ananu douk Andru. Anan douk Saimon Pita ananinu owaninu. 41 Ali Andru nenek wisnabul nanak naulimu ananinu saninu Saimon. Nanak nogwatanu ali naklipanu nakli, “Apak amogwatanu Mesaia.” Muwanamu enyudak balan Mesaia umu douk nyakli Krais, anudak douk God natalihanu ali nakaganu nanamali nunolau elpech uli.

42 Ali Andru nalau Saimon umu Jisas. Jisas natulunu ali nakli, “Nyak Saimon. Nyak douk Jon ananinu nuganinu. Kamanami douk eke wata chuhwalenyu Sifas.” Bawogenyumu balan umu echudak yeguh Sifas uli Pita douk chakli atin. Chakli Bulbuduk.

Jisas Nalau Filip Nanu Nataniel

43 Wehluwih ali Jisas nakli nunamu enyudak provins Galili. Nanak douk nogwatu Filip ali naklipanu nakli, “Yowi nyugipech yek.” 44 Filip nanu Andru uli Pita douk hanaki atubul wabul Betsaida. 45 Douk Filip nanak nogwatu Nataniel ali naklipanu nakli, “Anudak alman douk Moses nowemu balan okudak lo nyetemeyok uli buk nyanu enyudak enen amam profet henyemaguk ali hakliyuk umu eke nunakili douk amogwatanu. Anan douk Josep ananinu nuganinu chohwalanamu Jisas uli. Anan douk nanaki wabul Nasaret.”

46 Ali Nataniel nasolik Filip nakli, “Nyak nyakli deke wosik enech yopichi echudak chutoglu abuldak wabul Nasaret? Ati wak.” Ali Filip naklipanu nakli, “Orait, yowi wunak ali eke nyutulunu.”

47 Douk Jisas natik Nataniel nanakimu nutulunu ali neyagwleh-umanu enyudak balan. Nakli, “Anudak alman nape Isrel uli, anan douk ananu yopunali alman. Lohwotuhwin balan douk wo niyagwlehen ati e, wak.” 48 Ali Nataniel nasolik Jisas nakli, “Nyak nyadukeme malmu?”

Ali Jisas naklipanu nakli, “Filip watak nunaku nuhwalenyu e, ali yek douk ayatulinyu nyape chukamenyumu lowag fik.”
49 Ali Nataniel nakli, “Nebenyali Tisa, nyak douk God ananinyu Nuganinu. Nyanubu apak Isrel apakinyu King.” 50 Ali Jisas wata naklipu Nataniel nakli, “Ati nyak nyenek bilip umu yek umu douk eke nyenek bilip umu agundak yaklipenyamu yatulinyu nyape chukamenyumu lowag umu, waka? Yaklipenyu, kamanami eke nyutik enenyi enen God atunu neneken uli moul. Eke ineken nyichalakuk enyudak uli.” 51 Ali Jisas wata naklipam nakli, “Aduligu atugu yaklipepu. Kamanami ipak eke putik utagu tukalagu gunak giyotuk tiki tokon ali eke putik iluh heven. Eke putik God ananich ensel chunek luto bih chunamali yek Anudak Alman douk yatoglu aduligeinyi elpen uli.”

Copyright information for `APE