Mark 13

Jisas Nakli Kipaichi Elpech Eke Chichicheh God Ananitu Nebetali Wilpat

(Matyu 24:1-2; Luk 21:5-6)

Douk Jisas napeli numun God ananitu nebetali wilpat naitak nakli nutoglu aduk, ali ananu ananinu disaipel naklipanu nakli, “Nebenyali Tisa! Nyak tik ogudak dudukog wilag douk chalog dudukabal atubal utabal uli.” Ali Jisas naklipanu nakli, “Nyak nyatik ogudak wilag ali nyakli dudukog. Wakuli kamanami kipaichi eke chunaki chichichehog ali eke kobi chukutuk anam atum utam mutemaguk chihahim umu kipaimi utam, wak. Blunatimaguk eke chubolunik blubih blukus atap atugun.”

Jisas Nakli Wolobainyi Enenyi Enen Hevi Eke Nyutoglu

(Matyu 24:3-14; Luk 21:7-19)

Ali Jisas nalto nakih nape agundak woblahahinamu maunten Oliv. Ali Pita nanu Jems uli Jon hanu Andru amam atum hanak hatoglomanu ali hasalikanu hakli, “Apak makli nyuklipapamu ahudak nyumnah douk eke echudak dukwechuk nyaklipopomech uli chutoglomu. Ali chopuk eke moneken nyulik nyutoglomu apak mutulin ali mudukemech mukli, echudak douk ahalakatimu chutoglu?”

Ali Jisas naklipam nakli, “Ipak pugamu punenek yologimu kobi anam almom hunaki hunek lohumepu hunekepu pugipech amomin balan, wak! Wolobaimi almom eke hunaki ali amom atunu ati eke hunek lohumepu huklipepamu yekin yeul hukli, ‘Yek Krais douk God natalihe ali nokoge yanaki uli.’ Ali amom eke hunek loh umu wolobaichi elpech. Ipak eke pumnek balan umu wanoh hwutaglu kipailubi lougunilub walub umu. Ali chopuk eke pumnek chupe chulpak halakatimu ipak papemu. Wakuli ipak kobi elgeipu, wak. Adul wanoh eke hwutaglu, wakuli hugikuk uli nyumnah eke kobi kebes hutoglu. Ali enen kantri eke chitak chunu kipainyi kantri chulpak. Ananu king nunu ananich eke chitak chunu kipainali king nunu ananich chulpak. Ali anagun apudak atap eke enyik kutuk, ali anagun eke nebehi nyulbiah hech ali wolobaichi eke chugak nyulub. Enyudak nyunatimaguk nyulik uli hevi eke nyutoglu kobi douk ehudak halik uli nyih, douk almatok kwalik kwomnekeh ali adakio kwolali batowin umu.

Douk namudak ali ipak yet imas punenek yologi. Echech eke chunaki chuhwepu chulawepamu nebemi douk hape hasuh kwotog uli. Ali chopuk, eke chuwich chuleyepu enech echudak gani numun echech Juda chape cheyagwleh balan ogwi wilag. Echech eke chuleyepu echudak umu agundak pasuh yekin balan pagipech yek umu. Ali echech eke chuhwepu chulawepamu amom nebemumali gavman uli hunu amom king hapemu umu puklipam God ananin yopinyi balan douk nyaklimu yek uli. 10 Ali susubuati, yekich elpech eke chunak blunatimaguk walub blape apudak atap uli chuklipech God ananin yopinyi balan iyuh, ali hugikuk uli nyumnah eke adakio hutoglu.

11 Ali ababuk nyultab echech chuhwepu chulawepu chunak chunek kwotumepamu, ipak kobi elgeipu ali pukli kedeke punak ali piyagwleh malmu? Wak, nyunatimaguk balan God eke nukepeyen ababuk atubu nyultab ipak pukli piyagwleh umu. Douk namudak ali moneken balan ipak ulkwip pulomen uli, ipak imas pukliyen. Umu moneken, enyen douk wo ipak yet puklienyi e, wak. Enyen douk God ananin Michin nyepahul dakio paklienyi. 12 Ali enech elpech eke nyihihichih umu echechich sachich owachich ali eke chunekumech kwot chuwechikech ali chunak kipaichi chech chugak. Ali anam ahlim eke nyihihichim umu amamich batowich ali eke hunekumech kwot umu huwechikech ali chunak kipaichi chech chugak. Ali batowich chopuk eke nyihihichich umu echechich mamechich ali eke chunekumech kwot umu chuwechikech ali chunak kipaichi chech chugak. 13 Ali chunatimaguk elpech eke chukli wakepu chukepu agabus chukli ipak yowepalimu agundak pagipech yek umu. Wakuli echebuk douk chugipech yek dodogowich atich aliga chugak uli, God eke nunolawech chutanamali chupe kalbu.”

Jisas Nakli Nyanubu Nebenyi Hevi Eke Nyutoglu

(Matyu 24:15-28; Luk 21:20-24)

14 Ali Jisas balan nyeilen nakli, “Ali ipak eke putik kipaichi chulawali enyudak nyanubu yowenyi chunaki chuwich chinyubuk numun God ananitu nebetali wilpat ali eke nyunekatu tubosusih. Enyudak yowenyi God douk nanubu nakli wak umu nyukus numun ananitu nebetali wilpat uli.” Elpen
Enyudak balan Jisas wo nuklien e. Enyen douk Mak yet nenyemu.
nyutalih enyudak balan uli imas nyugamu nyudukemen kalbu. Ali ababuk nyultab elpech chape blanatimaguk walub blape provins Judia uli imas chulhwas chunamu mauntenab.
15 Ali chape aduk halakatimu echechig wilag uli, eke kobi chitak chuwich wilag umu chunahuli enech echudak, wak. Echech imas chunubu chulhwas chunak meyoh. 16 Ali echebuk douk cheyotu yawihas uli kobi wata chutanamu chusahul chunamu echechig wilag umu chunahuli echechig saketog, wak. 17 Ali mapiliu owobuk apaluhiwali almagou wunu owobuk douk wasuh batowich douk watak cheil chabah uli. Ahabuk nyumnah owo eke wunomnek nebehi nyih! 18 Ali ipak imas punek beten umu enyudak nebenyi hevi kobi nyutoglu ababuk nyultab nebehi echah hulomali, wak. 19 Ehebuk nyumneh, enyudak hevi eke nyutoglu ali elpech eke chumnek nebehi nyih. Ehudak nyih seiwak God nenek apudak atap panu enechi enech chanu elpech chatoglu chape chanaki aliga chataglali nameitu, wakuli enyudakmali hevi watak enen nyutoglu ali nyunek elpech chumnek ehudakmali nyih e. Ali kwali chopuk, elpech eke kobi wata chumnek eneh ehudakmali nyih, wak. 20 Sapos Diginali nutalih wolobaihi nyumneh umu enyudak hevi nyutoglu ele, deke kobi enech elpech chupeik, wak. Chunatimaguk deke chugak chutuh. Wakuli anan ulkum manubu molomu ananich elpech anan nanaglahech uli ali natalih gwodih meyoh nyumneh umu enyudak hevi nyutoglomu. 21 Ali sapos enech elpech chunaki ali chuklipepu chukli, ‘Ipak tik, Krais douk God natalihanu nokoganu nanaki uli anudak nape agundak o nani nape gani umu, ipak kobi punek bilipumech, wak.’ 22 Wolobaimi almom atunu ati eke hunaki hunek lohumepu hukli, ‘Yek Krais.’ Ali anam eke hunaki hunek lohumepu ali amom atunu ati eke hukli, ‘Yek onowe profet.’ Ali amom eke hunek enenyi enen God atunu neneken uli moul. Omom eke hunek namudak umu hukli hunek loh umu God nanaglahech uli elpech umu chukli adul amom God nagakamom. Ali sapos amom dodogowim ele, amom eke hunek lohumech. Wakuli eke wak. 23 Namudak ali ipak pugamu punenek yologimu ababuk nyultab enyudak nebenyi hevi nyutoglomu. Yek douk enyudak a yalik yaklipepaguk umu chanatimaguk echudak douk eke chutogloluli.”

Yek Anudak Alman Douk Yatoglu Aduligeinyi Elpen Uli Eke Wata Itanamali

(Matyu 24:29-31; Luk 21:25-28)

24 Ali ehudak nyumneh umu enyudak hevi douk eke nyunek elpech chumnek nebehi nyih uli eke hunak hutuhuk, ali nyumnahinu nunu wabinu aub eke yomotokwehib. 25 Ali enechi enech chape iluh utogoluli chunu aub uli unib eke guldugolech ali unib eke unotuk ugluki atap.

26 Ali ababuk nyultab, Yek Anudak Alman douk yatoglu aduligeinyi elpen uli eke wata itukemaguk iluh heven inaki. Yek eke inubu dodogowiwe ihiyatiki ali ilali onog olug inaki. 27 Ali eke ikagas yekich enselahas chunak gnunatimaguk apudak atap ali chulawali chunatimaguk yek yonoglahech uli elpech chunaki chupe atugun.

Woblen Balan Umu Lowag Fik

(Matyu 24:32-35; Luk 21:29-33)

28 Ipak ulkwip pulomu enyudak lowag fik ali pudukemech. Ababuk nyultab enyen nyupe nyunaleh abali, ipak eke putulin ali pudukemech pukli douk ahalakatimu wah atuh hutau. 29 Ali douk eke namudak ati. Ipak eke putik enyudak nyunatimaguk hevi douk dukwechuk yaklipepamen uli nyutoglu nyunakuk, ali ipak eke pudukemch umu Yek douk ahalakatimu itanamali. 30 Aduligu atugu yek yaklipepu! Ipak doumeipali, enepu eke kobi kebes pugak, wak. Ipak eke wata pupe ali enyudak nyunatimaguk hevi douk dukwechuk yaklipepamen uli eke nyutoglu. 31 Chanatimaguk echudak douk chape iluh utagaluli chunu utagu agag yet, chunu chanatimaguk chape apudak atap uli chunu atap chopuk eke chunubu bulkwolech chunak chuwichuk. Wakuli yekin balan eke nyunubu nyupe eheh nyumneh.

Eke Kobi Enech Elpech Chudukemu Ahudak Nyumnah Echudak Chutoglomu

(Matyu 24:36-44)

32 Ali Jisas balan nyeilen nakli, Wak enen atin elpen nyudukemu ahudak nyumnah o aua e. God ananich enselahas chanu yek ananiwe nuganinu chopuk wak mudukemah e. Aninu atunu nadukemah. 33 Ipak douk wo pudukemu ahudak nyumnah douk eke echudak chutoglomu e. Douk namudak ali ipak imas punenek yologi ali pupe pubeyogun. Ipak kobi pupe chachip, wak. 34 Ahudak nyumnah echudak chutoglomu eke kobi enyudak woblen balan umu. Balan enyudak. Ananu alman nakli nutukemaguk ananitu wilpat nunak anabul lougunibul wabul. Anan naklimu nunak ali naitak nataliham-umaguk moul sulisuli amam atunu ati douk henekumanu moul meyoh uli. Ali naklipu anudak nape nenek was umu dua ulimu nunek was dua ali nupe nubeyogunmu anan wata nutanamalimu.

35 Douk namudak ali ipak imas punenek yologi ali punek was pupe putulugun. Umu moneken, ipak wak pudukemu ababuk nyultab douk eke wilpatinali nutanamali abali e. Anan eke nunaki wabigun o olokohunib umu wab o nunaki yoweg owotog gwitak umu o nunaki aglupil. Ipak wak pudukemech e, wak. 36 Kedeke wosik ati anan nunaki ahudak atuh ali nutulipamu ipak pichuh. Wakuli wak, ipak imas pupe pubeyogunmanu. 37 Ali enyudak balan yek yaklipu ipak enyi, nameitu yek yaklipu chanatimaguk elpech chopuk. Ipak pugabe punenek yologi ali pupe pubeyogunmu echudak douk dukwechuk yek yaklipepamech uli chutoglomu.”

Copyright information for `APE