1 Corinthians 11

Sekwo ngkimo nohonɨmno. Kɨlaisɨye yahinomo inɨngkowalokwe hopaso sekwo ngkimo tɨfi nnɨngkapmno.

Moya'mi sofa hofɨko Anɨtumne'no uhu'mokukuji hofɨko hofɨkoe mnokinoso ufehu'mokohinantɨfeho.

Sekwo ngkine'no huno syanɨfɨsyɨwo'nontɨfi oso hungkuno nto sejapmmentohe somo sekwo hofiyo inɨngkowalokwofo. Oso'no ngko sekwoe yofe ho'nomalokweno. I oso'no sekwo olo nje hungkuno loso'no huno waseyono. Kɨlaisɨye mnokino engoso Anɨtuyoho. U nakwo a'amu hwahoponjo hn'nwi hwe hopi'nonohino sohwona'niye mnokino engoso Kɨlaisɨyoho. Oso pa'nyoso hwoya'mi sofafe mnokino engoso huhwafoho. Oso'no a'amu fihwo kako Anɨtuye hungkuno a'amumo ulɨhwosi kako Mpohumo jomo uloso sohwo kako kakoe mnokino manji'mofo so'nji lohofoso'manji kako wonɨmango unɨmontonoho. Sekwo a'amu Koulin sopo humalofo soku sekwo ole lɨwo'nɨngkohofi, A'amu mnokino manji'mofo'njo sohwo kako nom'nehumo enjwa'mo humunyo hweho. A'mu fisi kako mnokino manji'mofo ane lohofoso'manji kako a'amumo Anɨtuye hungkuno ulɨhwosi Mpohumo jomo uloso'manji kako wonɨmango unono. Hofɨko kakimo mnokino manji'mofo ane simo uhwonɨngkuji a'amu hofɨko ole wolantɨfeho, Olo a'mu losi kako wonɨmango unono. Kako yokumpohn'nyiyoho. Hwe sohwa hofɨko mnokino manji'mofo momanji'mo'nyo iwo'nɨngkohofo pa'nyiyoho. Oso'no kako hwoya'mi hwa'nte sofafe mijiyo hm'nɨwo'nɨngkohofo pa'nyo hm'nniyoho. U a'mu fisi kako kakoe mnokinomo hwapɨfe mopa'nyosimo a'amu nuhwonɨngkuji ole wolantɨfeho. Oso a'amu kako hwehumo enjwa'mo mohumuyoho. Kakoe yokumpohn'nyoso yakolo'nniyoho. Oso a'musi kako kakoe mijiyoso hwe sohwafe mijiyo hopa tɨfo wahm'nono. U kako oso a'musi kako mijiyo tɨfo so'no ngkilaho loso'manji e'wano kako nom'ne a'amu'nji Anɨtumne'no uhu'mokufijo so'no kakoe mijiyo somo hwapɨfe wopa'nono. Anɨtu sohwo kako Hwe Engo ne hweho. Kako nom'nehumo enjwa'mo mohumunyo hweho. Osohwo kako hwe hwahoponjo sohwona'nɨmo kako pa'nyo mtɨ'mokumentisofoho. Oso'no nakwo hwe sohwona'ni nakwoe mnokino somo nopo'nɨngkuhwaloho. I oso'no moya'mi sofa hofɨko hwehwamo enjwa'mo humalofo. Oso'no hwoya'mi sofa hofɨko hofɨkoe hwehwafe yofe ho'nomayo'ne hofɨkoe mnokino somo wopa'nɨfe.

Hwapɨngoso hohonta Anɨtu kako hwe mtɨ'mokumentisoso ape mta'ni yafo manto mtɨ'mokumentiso'maho. O'o, kako hwehumta'ni yafo anga'no manto ape mtɨ'mokumentisofoho. Anɨtu kako apeso hwehwamo ufo'mayo'ne mtɨ'mokumentisofoho. 10 Oseso moya'mi sofa hofɨko hofɨkoe hwehwamo enjwa'mo humalofo sofa hofɨko oso hiso'no a'amu ahwomomjo somo utɨhwayo'neso hofɨkoe mnokino somo wopa'nɨfe. 11 I oso'no nakwo Anɨtumo sɨmeho uyɨwo'nɨngkuhwone hn'nwi nakwo hwe sohwona'nnohini yo'mayo iyoso'no hopo'maho. I hwoya'mi sofamnohini yo'mayo iyoso'no hopo'maho. O'o, ose'maho. Hwe moya'mi nakwo nem'no majoku'nontani yokumpohn'nyo sosofito'nontani Anɨtuye yahino afa'no afa'no iwo'nɨngkuhwono. 12 Sɨmo'mo Anɨtu kako hwe sohwoe yafo nopemanto ape mtɨ'mokumentisofoho. I olohonta ape sofa hofɨko hwomu aswo mawo'nɨngkohofo so'no Anɨtu kako hwomu apefe sɨmehomo mtɨ'mokuwo'nɨngkohoho. I oso hiso'no hwe hwoya'mi yo'mayo hopi'nonohinoso Anɨtu kako hwapɨngo hweho.

13 Nakwoe yahinoso olenoho. Hwe fihwo kako kakoe mijiyo sawemo engoso mahm'nyoso oso wopɨngo'maho. I hwoya'mi sofa hofɨkoe mijiyo sawemo engoso oso wopɨngofoho. Hofɨkoe wokosofoho. Oso mijiyo sawemoso Anɨtu kako hofɨkoe mnokinomo ifehu'mokosyohumayo'ne uyɨmentisofoho. 16 Oso'no sekwo huno olo so'no fɨsyafɨhupmno. A'mu fisi kako Mpohwo Anɨtumo jomo ujo'ne tajo ango somo syuhwosi kakoe mnokinomo hwapɨfe mopa'nyo'njo iyoso oso wopɨngotaho. O'o, wonyofoho lɨwo'nɨngkuhwonefoho.

A'amu Koulinɨso hofɨko Kɨlaisɨmne'no syafɨsiyo'ne honɨyo'nji wosopayo'nji nɨmentohofo sohonta hofɨko yahino wopɨngo somo nto'no minɨngkammentohofofoho.

17 Jisas nakwoe wonyomne'no pe'nɨmentiso so'no syafɨsiyo'ne uhu'mɨngo so'no honɨngkano hungkuno waselɨmonne'no yohono. Ngko ole maselɨmnehono, Sekwo Anɨtumne'no nuhu'mokontɨfi sekwo Anɨtu kakine'no hwomtame ulohofo yahinoso wopɨngo yalokwofo. Ose maselɨmnehono. O'o, sekwo yahino wonyo yalokwofo. Sekwo yahino wonyo yalokwofo so'no sekwo mɨhu'mokiyo'njo yontɨfijontentesi oso wopɨngo'nesohilo. 18 Ole upa'nɨmalefoho. Sekwo nuhu'mokontɨfi sekwoe huno kengo kengo so'nji husilo husilofo lohofalokwofo. Sɨmeho afa minyofoho. Ngko oso hungkunoso upa'nɨmale so'no ngko huno ole syofɨsyalokweno. Olo hungkuno loso ne'njofoho syofɨsyalokweno. 19 Sekwo husilo husilofo lohofalokwofo so'no a'amu Anɨtuye hungkuno ne somo tɨfi inɨngkowalokwofo so'no utɨhwa'nyopo uhwonantanoho. Oso wopɨngofoho. I oso'no sekwo sɨmeho afa minyo'njo ikuji Anɨtumne'no uhu'mokufijoso oso wonyofoho. 20 Jisas kako sekwoe wonyomne'no poyo imo'nɨmentiso so'no huno syafɨsiyo'ne nuhu'mokontɨfi wopayo nonontɨfi sekwo nto'no mohumulofo. O'o, sekwo Kɨlaisɨmne'no mosyofɨsyalokuyohofo. Sekwo wopayo siki nalokwofo. 21 Ou, sekwo nuhu'mokontɨfi sekwo anga'no anga'nohino soku sekwo sekwoe wosopayo nomotoswapontɨfi sekwo nom'ne a'amu somne'no huno monosyafɨhu'nyo'njo yalokwofo. Fehohnjoso mijo nilohofalokwofo. I oso'no a'amu fehohnjoso hofɨko wosopayo'no umofonyo iyoso'no mijoho engo uyalofoho. 22 Sekwo oso a'amu hisomo wopayo muyo'njo peho'no yalokwofo. Sekwo Anɨtuye a'amu homo somo sɨmeho muyaloku liyohofo. Sekwo hofɨkimo wonɨmango ifɨsyɨmofalokwofo. U, sekwo wosopayo engo wonano lɨkuji sekwo sekwoe angomo humafɨkuji hmnɨmno. Sekwo Anɨtuye tajo ango somo peho'no motoswapohofo. I oso'no ngko peho hungkuno selɨmnehono. U, ngko sekwoe yofe woho'nosema'monntaho. O'o, nɨhu'no awonoho. Oso hiso'no ngko sekwoe yofeso moho'nosema'monnohono.

Nakwoe hwe engo Jisas kakoe inomokomoyo oso hwamo kakoe honɨyo'nji a'apaho'nji uyɨmentisofoho.

(Matɨyu 26:26-29 Mak 14:22-25 Luk 22:14-20)

23 Ngko olo hungkuno Jisas ntapmmentiso loso nto selɨmentohefoho. Oso sɨkuno homo somo Jutas kako mango sohwafe ahomo Jisasɨmo ho'nahumentiso sɨkuno homo somo Jisas kako wopayo nomanto 24 Anɨtumo isamoyoka ulonto oso wosopayo hiso kutɨkujo lohofonto kakoe inomokomoyo sohwamo nuyonto ulɨmento, Olo wosopayo loso nje a'apahofoho. Ngko sekumo sefo'mayo'ne sejopalokweno. Olo ngko sekwo'nji humanji yo'mayo selohofalokwe loso sekwo hwangku huno syanɨfohupitnne'enji selohofalokweno. Hwangku sekwo olo hopa ne'no ikujo. Ose ulahonɨngki nɨmentohofofoho. 25 Oso wopayoso moi'wo nosojwaofahonɨngkofi Jisas kako oso noswanyo ipisayo mijo'njoso nomanto nuyonto ulɨmento, Olo ipisayo mijolo nje honɨyofoho. Ngko sekwo Anɨtu'nji makotɨku'nyo'ne yahino songo so'no nje honɨyo usɨhuma'monnoho. Hwangku sekwo nje poyo pe'nyo so'no syanɨfɨsyɨkuji sekwo olo pa'nyoso ne'no ikujo. Ose ulɨmentisofoho. 26 Ihwoni. Oso wopayo'nji mijo'nji nyo'ne yahino Kɨlais nejapmmentisoso sekwo ole lutɨhwalokwofo. Jisas nakwoe wonyomne'no poyo pe'nɨmentiso so'no nakumo huno nafohotofo'nefoho. Nakwo ose yontanɨngkuhwasi a'amu nom'neso nonahonɨngkuji hofɨko Jisas nakumne'no poyo pe'nɨmentiso so'no huno wotɨpemantɨfeho. Sekwo oso yahinoso ne'no mjɨmɨwentanɨngkuji Jisas kako asomo noponefoho.

A'amu fiso hofɨko Kɨlaisɨye a'apaho'nji honɨyo'nji siki nɨfijoso hofɨkoe honɨngkano wonyofoho.

27 Kɨlais oso yahino nejapmmentiso so'no olo so'no huno wonayono. A'amu fihwo kako Kɨlaisɨye sɨmeho wopɨngo mumokiyo'njo yoso sohwo kako Kɨlaisɨye a'apaho'nji honɨyo'nji siki nososohwo kako Kɨlaisɨye yahino losomo wonyo imokalofoho. Ose yososo'no kakimo tango engo u'malofoho. 28 Oseso a'amu fihwo kako Kɨlaisɨye a'apaho'nji honɨyo'nji wanɨmo lɨhwosi sɨmo'mo kako kakoe sɨmeho huno osomo nto'no syafɨhu'nɨngkuhwosi into'nohini imo'nɨngkuhwoso'no wanono. 29 Hwapɨngoso a'amu fihwo kako hwe engo Jisas nakumne'no poyo pe'nɨmentiso so'no huno nto'no muyo'njo sohwo kako Kɨlaisɨye a'apaho'nji honɨyo'nji siki nososohumo Anɨtu kako oso a'amu huhwo sohwoe yahino wonyo somne'no tohino uyɨmontonoho. 30 Sekwo oso yahino iwo'nɨngkohofo so'no hwe moya'mi pi'nɨngo hofɨko sekwo'nji humalofo fehohnjoso yokumpohn'nyo anefoho. Fehohnjo mnokino'njofoho. Fehohnjoso hofɨko poyo nto pe'nɨmentohofofoho. 31 U sekwo sekwoe honɨngkano somne'no huno nto'no syafɨhu'nɨngkuji nontɨfijontentesi u oso tohino hiso sekwo momafɨkutnnesohilo. 32 I oso'no Anɨtu kako nakwoe wonyo so'no huno syafɨsyɨhwosi kako nakumo tohino nejape'manji kako nakwo kakoe mehomi hn'nwiye honɨngkano somo nto'no imofonehwojalofoho. Anɨtu ose yoso'manji hwangku sohonta a'amu pi'nɨngo engoso hofɨkimo tɨkanomo mɨhwajoso sohonta nakwo tohino momanefoho.

33 U sekwo nje a'amu soku, sekwo wopayo nɨngkuji Kɨlaisɨye a'apaho'nji honɨyo'nji wonano lɨkuji sekwo nom'ne a'amu anga'no anga'nohino osomne'no hontohumafɨkuji hofɨko hopi'nono nto uhu'mokukujo'no osohonta sekwo wopayo'nji mijo'nji hmnomafɨkuno. 34 U a'amu fihwo kako mijoho uyɨhwoso'no kako kakoe ango'mo sɨmo'mo wanɨmontonoho. Tɨfi kako sekwo'nji humahwosi wanɨmontonoho. Sekwo Kɨlaisɨye honɨyo'nji a'apaho'nji nɨfijo so'no uhu'mokiyo yahino so'no tango mapitnnoho.

Hungkuno fehohnjoso mokosyohumaleno. Hwangku ngko sekwoe angopo se'mahm'mo wolosetɨhwamonnoho.

Copyright information for `APZ