1 John 5

A'amu Jisasɨmo tɨfi inɨngkawowo'nɨngkohofoso yo'mayo hwahoponjo yahino somo hwotoho fewo'nɨngkohofofoho.

Hwe nakwoe wonyo wayo'ne Anɨtu uhwosopo'mentiso sohwo Jisasɨyoho. Oso hungkuno hiso a'amu fihwo huno nehopi uyoso sohwo Anɨtuye mehomi hweho. A'amu Mpohumo sɨmeho uyɨwo'nɨngkiso sohwo kakoe mehomi'ntnne'no sɨmeho uyɨwo'nɨngkiso hweho. Nakwo Anɨtumo sɨmeho uyɨhwasi kakoe hungkunomo tɨfi inɨngkowaso'manji nakwo huno ole wonayono. Nakwo Anɨtuye mehomi somo sɨmeho nehopi uyɨwo'nɨngkuhwone'nwoho. Nakwo Anɨtuye honɨngkanomo tɨfi inɨngkowaso'manji nakwo Mpohumo sɨmeho nehopi uyɨwo'nɨngkuhwonefoho. Anɨtuye honɨngkano somo tɨfi inɨngkayoso tango'njo'maho. O'o, kakoe yokumpohn'nyo nejapɨwo'nɨngkiso hweho. Anɨtuye a'amu neso yo'mayo hwahoponjofe yokumpohn'nyo somo hwotoho fe-e'ne yokumpohn'nyoso hi'njofoho. Oso yokumpohn'nyo hwotoho fe-e'neso hwapɨngo ole, Nakwo Jisasɨmne'no huno nayohoho. Kakoe yokumpohn'nyo nefo'mayo'ne sohune'no huno nayohoho. Yo'mayo hwahoponjo somo yakolo'nnyo tɨhwolo. A'amu fihwo kako huno ole uyososo, Jisas Anɨtuye Hwomu hweho. Huno ose uyahonɨngki kako yo'mayo hwahoponjo somo yakolonoho.

Anɨtu kakoe hwomumne'no hungkuno yoloho lɨmentisofoho.

Olo Jisas huhwo sohwo mijo wokiyonɨmano lonto, nje honɨyo usɨhuma'mo lonto nakwoe hwahopo pmmentisofoho. Mijo'nohini so'no pmmentiso'maho. O'o, mijo'nji honɨyo'ntnno pmmentisofoho. Anɨtuye Towahuno Wopɨngo hungkuno nehopi hwapɨngo sohwo kako Jisasɨmne'no olo hilo so'no yoloho lɨmentisofoho. Oso hufa'u sɨhune sohwa Jisasɨmne'no yoloho lalokwofo. Anɨtuye Towahuno Wopɨngo'nji mijo'nji honɨyo'nji oso hifoho lalokwofo. Oso hufa'u sɨhune sohwa hofɨkoe hungkuno afa'nohinoho. Jisas sohwo Anɨtuye Hwomu ne hweho. Ose lalokwofo. A'amu hwahoponjoso hungkuno lontɨfeso nupo'nontani nehopeho lɨwo'nɨngkuhwonefoho. Anɨtu lonte hungkunoso nehopeho. A'amu lontɨfe somo yakolonoho. Oso hungkuno hiso Anɨtu nto lɨmentisofoho. Kakoe Hwomumne'no linyofoho. 10 A'amu Jisasɨmo sɨmeho hi'ntnnono uyo sohwo kako huno ole uyohoho, Jisas Anɨtuye Hwomu ne hweho. A'amu nom'neso kako hungkuno hiloso sɨmeho hi'ntnnono muyo'njo yonto kako Anɨtu hwasyo hungkuno'njo hweho lɨwo'nɨngkiso pa'nyo hweho. Hwapɨngoso Anɨtu nalohoho, Jisas nje Hwomu hweho. 11 Olo hungkuno loso Anɨtu nehopi ole nalɨmento, Ngko songo ne'no humayo'neso nto sejapmmentohefoho. Ose nalɨmentisofoho. Oso songo ne'no humayo'ne hwapɨngo kakoe Hwomumo weho. 12 A'amu fihwo Anɨtuye Hwomumo humunyo sohwo Anɨtu'nji songo ne'no humayo'ne hweho. A'amu Anɨtuye Hwomumo mohumunyo sohwo kako Anɨtu'nji songo ne'no humayo'neso motɨpɨhwononefoho.

Nakwo huno ole wonayono, Nakwo songo ne'no fosyohumayo'ne hi'njɨ'nwoho.

13 Sekwo a'amu Jisasɨmo sɨmeho hi'ntnnono uyɨwo'nɨngkohofo soku, sekwo songo ne'no humayoso hi'njo kuyoho. Oso'no sekwo huno waseyonontnne'no semtɨ'mokiyalokweno. 14 Nakwo yo'mayo Anɨtu syonefɨsyalokunjo so'no namo'nɨngkohoho lontani oso'no jomo ulɨhwaso'no kako wonepa'nɨmontonoho. 15 Nakwoe hungkuno Anɨtu nepo'nalokunjo so'no huno ole nayohoho. Yo'mayo nakwo jomo ulɨwo'nɨngkuhwone so'no nejopalokunjoso olohifoho.

16 Honɨngkano anga'no wonyoso a'amu yososo Anɨtu kako wae mmofe'njo umtonoho. O'o, hi'nji pe'nɨngkuhwosi tɨkanomo wene hweho. Oso'no a'amu oso wonyo hiso yoso sohumo uhwonɨngkohoji oso a'amu huhwo sohumne'no Mpohumo jomo mujo'njo fiyo. Yo'mayo honɨngkano wonyo nom'neso a'amu yoso sohumo uhwonɨngkohoji oso humne'no Mpohumo jomo ulisoso Mpohwo kako wae yɨmofɨhwosi songo humayo'ne uyɨmtonoho. 17 Anɨtuye hungkuno mtohupeso hopi'nono wonyofoho. I oso'no fehohnjo so'no Mpohwo kako wae weeo'mtonoho. Anga'nohinoso tɨkanomo nɨhu'nahone wenefoho.

18 Anɨtuye mehomi ne sohwo kako honɨngkano wonyo miyo'njo yɨwo'nɨngkiso hweho. O'o, Anɨtuye hwomu osohumo yokumpohn'nyo mokosyohumawo'nɨngkiso hweho. Oso a'amu huhwo sohumo Seten mupm'mokonohoho.

19 Nakwo huno moi'wonoho. Nakwo Anɨtuye mehomi'nwoho. A'amu nom'ne sofe hwe engo mokosyohumayo sohwo Setenɨyoho.

20 Nakwo huno moi'wonoho. Anɨtuye hwomu nto pmmentono. Kakine'no huno ito'no uyo'ne huno nto nejapmmentono. Nakwo Anɨtumo ufohi'nyo'ne hwapɨngoso Jisasɨyoho. Jisas Kɨlais Anɨtuye hwomu sohwo kako Anɨtu ne hweho. Kako songo ne'no humayoso hwapɨngo hweho.

21 Nje mehomi soku, yo'mayo hwahoponjo jɨje sɨmeho mo'mo Anɨtumo uyohopo'mto yalokunjo so'no sekwo i'waho ito'no fiyɨmno. Osohopeho. Ngko Joun'ni mtɨ'mokohono.

Copyright information for `APZ