1 Thessalonians 1

Ngko Poulɨ'ni olo iyoswo loso sekwo a'amu ango Tesolounika sopo Anɨtu'nji Hwe Engo Jisas Kɨlaisɨ'njimne'no sɨmeho uyɨwo'nɨngkohofo sokune'no mtɨ'mokalokuhwono. Sailasɨ'nji Timouti'nji oso hwa'u'nji ngko'nji humentani mtɨ'mokalokuhwono. Sekwo Anɨtu'nji Hwe Engo Jisas Kɨlaisɨye mehomi soku, siko sekumo yo'mayo wopɨngo selohofohosɨsi sɨmeho pompenjiyo wosejopanjiyoho.

A'amu Tesolounikaso Anɨtumo sɨmeho hi'ntnnono yokumpohn'nyo uyontɨfi wopɨngo humamotofofoho.

Nakwo Mpohumo jomo ulontane sohonta sekumne'no isamoyoka ulɨwo'nɨngkuhwonefoho. Nakwo sekumne'no Anɨtumo jomo ujoso'no piso'mo'nyo miyalokuyɨhwono. Sekwo Anɨtuye hungkunomo upa'nontɨfi hungkunoso aho yokumpohn'nyo kesyohumawo'nɨngkohofofoho. Oso'no sekwo siki mohumulofo. O'o, sekwo Anɨtumne'no syoho yokumpohn'nyo yontɨfi a'amu nom'ne somne'no sɨmeho hi'ntnnono uyontɨfi wopɨngo ulohofɨwo'nɨngkohofo kuyoho. Yo'mayo tango ko se'mayoso sekwo nakwoe Hwe Engo Jisas Kɨlais asomo peso'no hofiyo uhwontohumalofo. Oso'no sosyefɨsyontani Mpohumo isamoyoka ulalokuhwono. Nakwoe a'amu soku, olo so'no huno nayohoho. Anɨtu sekune'no hitoho engo sejapɨwo'nɨngkiso sokumo kakoe mehomi imo'nyo'ne nto sehwosopo'mentiso kuyoho.

Nakwo Anɨtuye hungkuno selɨmentɨhwone sohonta sekwo ole majofoho. Olo siki hungkunofoho. Ose majofoho. O'o, hungkuno hiloso upa'nɨngkahonɨngkofi Anɨtuye Towahuno Wopɨngo sohwo sekwoe sɨmeho mo'mo syoho yokumpohn'nyo yahonɨngki sekwo huno ole syafɨhu'mentohofi, Hungkuno ne'njofoho. Oso'nji sekwo nakwoe yahino humayo somo nahonontɨfi huno seimentisofoho. Honɨngkanoso wopɨngofoho. Nonefo'mawo'nɨngkohofɨhwafoho. Ou, hungkuno ne'njo hwafoho lɨmentohofofoho.

Nakwoe humayo somo sekwo nahonontɨfi nakwo pa'nyo sekwo imentohofofoho. Oso'no nakwoe Hwe Engo Jisasɨye honɨngkanomo inɨngkamentohofofoho. Inɨngkowentanɨngkofi a'amu nom'neso nosehonontɨfi nakwolaho lontɨfi tango sejapmmentohofofoho. I oso'no Anɨtuye Towahuno sohwo sɨmeho wopɨngo sejopahonɨngki nakwoe hungkunoso sekwo ma'mentohofofoho. Oso'no a'amu Anɨtumo sɨmeho hi'ntnnono uyoso hwaho Masetouniyanta'ango so'nji hwaho Ngkɨliknta'ango so'nji hofɨko sekwoe yahino wopɨngomo sehonontɨfi yahino homo somo senɨngkamentohofofoho. A'amu Masetouniya so'nji Ngkɨlik so'nji hofɨko'nohino'maho. O'o, sekwo Anɨtuye hungkuno a'amu somo lutɨhwahonɨngkofi ango'meemo ho'nɨngkahonɨngki a'amu hopi'nonohinoso sekwoe sɨmeho hi'ntnnono Anɨtumo uyoso'no upa'nɨmentohofofoho. Nakwo hano ango'meemo emoyontani sekune'no nelahonɨngkofi nakwo oso hiso'no hungkuno nom'ne mujo'njo yɨwo'nɨngkuhwonefoho. Ose nelalokwofo. Nakwo sekumo se'mahonɨngkuhwoni nakwoe hungkuno upa'nontɨfi sekwoe hwahoponjo hwasyo anɨtu somo ho'naofontɨfi sekwo Anɨtu songo ne'no humayo ne sohwoe syoho ulohofiyo imo'nɨmentohofo so'no nelalokwofo. 10 Nom'ne hungkuno ole nelalokwofo. Olohonta sekwo Anɨtuye Hwomu ahwomo mta'ango sohwo asomo peso'no hontohumalofo. Ose nelalokwofo. Oso hwomu sohwo Jisasɨyoho. Kako poyo pe'nɨngkahonɨngki Anɨtu ulɨka'mentisofoho. Oso'no hwangku Anɨtu kako a'amufe wonyo honɨngkano so'no tohino engo uyoso sohonta nakwo Jisasɨmo sɨmeho uyɨwo'nɨngkuhwone hn'nwiye tohinoso Jisas nto ma'mentisofoho.

Copyright information for `APZ