1 Thessalonians 4

Honɨngkano wopɨngo somo finɨngkamno.

Ou, nakwoe a'amu soku, hungkuno nom'ne woselantane'no yɨhwono. Nakwo Anɨtuye sɨmeho wopɨngo umo'nyo so'no yo'mayo honɨngkano yahino nto setɨhwamentɨhwonefoho. Oso yahino wopɨngo somo sekwo we'e inɨngkowalokwofo. I olohonta nakwoe Hwe Engo Jisasɨye sɨmano mofohi'nontani hungkuno yokumpohn'nyo woselantane'no yɨhwono. Oso honɨngkano yahino wopɨngo somo sekwo aho yokumpohn'nyo ne'no fɨkesyohumantokuno.

Yo'mayo hungkuno hopi'nono Jisas mta'ango selɨmentɨhwoneso sekwo huno moi'wonoho. Sekwo yahino wopɨngo somo inɨngkayo so'no Anɨtu ole umo'nalofoho. Honɨngkano wonyo ane'njo wopɨngo'nohinimo finɨngkamno. Yo'mayo yahino wonyo a'mohufo iyoso nɨhu'nahone fohu'meeopmno. Ape mayo yahino so'no honɨngkano ito'nohini fɨsyafɨhupmno. Ou, sekwo anga'no anga'nohino sohwasi, sekwo ape womano lɨkuji ape mayo yahino somne'no huno syafɨsyɨkuji sekwo ape ito'no mapmno. Sekwo sɨmeho noselɨkafɨhwoloho. Sekwo a'amu Anɨtu ne'no huno mosyafɨsiyo'njo sofe yahino nomafɨkutoho. Hofɨko hofɨkoe a'apahomnohini syafɨsyontɨfi apemne'no sɨmeho fefoyo u'mahonɨngki ape hufo hopa iwo'nɨngkohofɨhwafoho. Olo yahino loso'no sekwo nom'ne somo wonyo ulohofɨkutoho. Nom'ne sohwafe ape hufo nomafɨkutoho. Olo yahino wonyo loso'no Anɨtu tohino mɨkunɨmposo uyonefoho. Olo hilo so'no nakwo hungkuno yoloho nto selɨmentɨhwonefoho. Anɨtu kako nakumo honɨngkano wonyomo inɨngkayo'ne nahwosopo'mentiso'maho. O'o honɨngkano wonyo ane wopɨngo'nohini somo inɨngkayo'ne nahwosopo'mentisofoho. Olo ape ito'no mayo'ne hungkuno somo hwe fihwo hwotoho feso sohwo kako a'amufe hungkunomnohini mafewo'nɨngkiyohoho. O'o Anɨtuye hungkuno homo hwotoho fewo'nɨngkiso hweho. Anɨtu huhwo sohwo kakoe Towahuno wonyo ane wopɨngo'nohini nejapɨwo'nɨngkiso sohumo hwotoho fewo'nɨngkisofoho.

I a'amu nom'ne somo sɨmeho inyoso'no pehofo semtɨ'mokiyɨmnehono. O'o Anɨtu oso hiso'no nto setɨhwamasofoho. 10 Sekwo a'amu Masetouniyanta'ango Anɨtumo sɨmeho umotofo somo sekwo sɨmeho uyɨwo'nɨngkohofo kuyoho. I oso'no nakwoe a'amu soku nakwo hungkuno yokumpohn'nyo woselantane'no yɨhwono. Olo yahino loso sekwo yokumpohn'nyo ne'no fisyafɨsyɨkuno 11 Sekwo hungkuno tɨfi'njo so'no huno yokumpohn'nyo fɨsyafɨsyɨkuno. Sekwoe humayoso hofiyo nto'no fosyohumafɨkuji sekwo syoho yo'mayo so'no ito'no mokosyohumamno. Sekwoe wopayo syoho yo'mayo syohoso sekwoe aho'nji nto'no fiyɨkuno. Hohonta ose nto selɨmentohefoho. 12 Ose ifijo'manji a'amu Anɨtune'no mosyafɨsiyo'njoso sekwoe honɨngkanomo sehonɨngkuji hofɨko yofe wopɨngo womeselantɨfeho. Sekwo yokumpohn'nyo ifijo'manji sekwo umofonyo mifitnnehofo. Nom'ne somo yo'mayo so'no jomo mulɨfitnnehofo. O'o sekwo hoponoho.

Hwe Engo Jisas sohwo asomo pe-e'ne hungkunofoho.

13 U nakwoe a'amu soku a'amu poyo nto pe'nyoso'no sekwoe hunomo ito'no womesehwojantane'no yɨhwono. Huno ito'no syafɨhupijoso poyo pe'nyoso'no sekwoe sɨmeho tango maseyonehoho. A'amu Anɨtumo sɨmeho hi'ntnnono muyoso a'amu poyo pe'nɨngkahonɨngki ntɨ'mo kohumaho syafɨsyontɨfi humotaho latɨpewo'nɨngkohofofoho. Anɨtu nelɨkafone so'no mohontohumayo'njoso hofɨko poyo pe'nyoso'no hofɨkoe sɨmeho tango uyalofoho. 14 Jisas kako poyo pe'nonto apa'no songo lɨka'mentiso so'no syafɨsyɨwo'nɨngkuhwono. Oso hiso'no nakwo sɨmeho hi'ntnnono uyɨwo'nɨngkuhwonefoho. Oso'no olo so'no huno nayohoho. A'amu Jisasɨmo sɨmeho hi'ntnnono uyontɨfi pe'nɨmentohofoso hofɨko Jisasɨ'nji ufohi'nɨngkahonɨngkofi Anɨtu songo humayoso uyɨmentiso so'no Jisas asomo poso sohonta kako a'amu homo somo asomo ipemotaponefoho.

15 Nakwoe Hwe Engo Jisasɨye hungkuno woselantane'no yɨhwono. Hwangku Hwe Engo sohwo asomo poso sohonta nakwo hwe moya'mi songo humalohwone hn'nwi nakwo a'amu pe'nɨmentohofo somo sɨmo'mo mupeenehwono. 16 O'o Hwe Engo sohwo kako mampaho engo'nji joho lahonɨngkuhwosi a'amu ahwomomjo sɨmo'mta'ango sohwo joho lɨhwosi Anɨtuye kounoho yoka ho'nɨngkuhwoso'no osohonta Hwe Engo sohwo ahwomomo ulɨko'mahwosi noponefoho. Oso hohosohonta a'amu Jisas Kɨlaisɨmne'no sɨmeho hi'ntnnono uyontɨfi pe'nɨmentohofo somo Anɨtu songo ulɨkafonefoho. 17 Oso hohosohonta nakwo hwe moya'mi Jisasɨmo sɨmeho hi'ntnnono uyontani songo humalohwone hn'nwi Hwe Engo sohwo nakumo netɨmahwosi nakwo hi'nnonji poyo pe'nɨmentohofo so'nji himopo noswo'nɨngkuhwasi osopo Hwe Engo sohumo sɨ'mowanefoho. Osohonta nakwo Hwe Engo sohwo'nji engolopohamo ne'no humentɨhwanefoho. 18 Oso hiso'no sekwo senɨngkwa'wehwosamo ulɨkuji hofɨkimo yokumpohn'nyo usosofitopmno. A'amu poyo pe'nyoso'no sɨmeho tango uyalokunjo somo olo hungkuno hiloso ulɨkujo'no hofɨkoe sɨmeho wopɨngo umo'nɨmontonoho.

Copyright information for `APZ