1 Timothy 1

Nje hwomu Timouti sohwohnne'no ngko Poulɨ'ni olo iyoswo loso kumtɨ'mokiyalokweno. Anɨtu kako nakwoe wonyomjo tohino somta'ni isɨhutofonemayo'ne sohwo'nji Kɨlais Jisas oso humne'no nakwo hontohumalohwone sohwonji siko ngkimo hungkuno yokumpohn'nyo ntonji siko ngkimo sikoe hungkuno lɨku'mofo (apousel) syoho ntapmmentisiyo hwo'nyoho. Kɨko Timouti sohwosi kɨko Anɨtumo sɨmeho wopɨngo umahnno so'no kɨko nje hwomu ne imo'nɨmentohino hwosoho. Ngko kikine'no olo'no nɨmo'nɨngkohoho. Nanɨkgkwohwo Anɨtu sohwo'nji nakwoe Hwe Engo Kɨlais Jisasɨ'nji siko'monta'i siko kikine'no hitoho ulofɨhwoso'no siko kikimo wopɨngo kilohofohosɨsi sɨmeho pompenjiyo wokijopanjiyoho. Oso'no nɨmo'nɨngkohoho.

A'amu Anɨtumne'no hwasyo hungkuno lɨwo'nɨngkohofo sofe hungkuno somne'no kɨko yoka ulohoho.

Hohonta ngko hwaho Masetouniya'no wawomonji oso hungkuno kilɨmentohe somta'angoso olohonta apa'no wakilɨmne'no yohono. Hungkunoso olenoho. Kɨko ango Efesos osopo ne'no nohumahoji a'amu oso hopo soponjo a'amu somo Anɨtuye hungkuno hwasyo lutɨhwalokwofo sohwamo kɨko ole uso, Sekwo olo a'amu lomo Anɨtumne'no hwasyo hungkunoso apa'no nolutɨhwafɨkutoho. Ose uso. Hofɨko mpohwosa ajuyohwosafe yofe so'no hungkuno ne'no hnnontɨfi hofɨkoe yofe ho'noma'nɨwo'nɨngkohofofoho. Hofɨko a'mane hungkuno kengo kengo sikinjo so'nji ne'no lutɨhunɨwo'nɨngkohofofoho. Oso hungkuno hiso hofɨkoe hunomo wonyo imokinɨwo'nɨngkohofofoho. Oso siki hungkuno huhwo sohwo Anɨtumne'no sɨmeho hi'ntnnono uyo somo mufo'manehoho. O'o, yoka ulɨkafɨwo'nɨngkisofoho. Kɨko ole uso, Sekwo olo hungkuno homo losomne'no nɨhu'nahone foho'naopmno. Ose ulohojo'no hofɨko jɨje hungkunomo tɨfi kinɨngkapɨfijo'manji hofɨko hofɨkoe yahino wonyo somo hohujo ikinjaofɨkuji huno wopɨngo'nohini syafɨsyɨkuji Anɨtumo sɨmeho hi'ntnnono nehopi uyantɨfeho. Ose ikuji hofɨko nom'ne a'amu somo nufo'mafɨkuji sɨmeho wopɨngo umo'nantɨfeho. A'amu fehohnjoso hofɨko Anɨtumo sɨmeho uyo yahinoso noho'nasyontɨfi hofɨkoe huno wopɨngo sohwo ehilofaofahonɨngki hofɨko siki hungkuno lomoyontɨfi hungkuno ne ane'njo hnnɨwo'nɨngkohofofoho. Hofɨko Anɨtuye honɨngkano hungkunoso wolutɨhwantɨfi ko yontɨfeso oso hungkuno hwapɨngo ne homo somo huno muyahonɨngki hofɨko hwasyo hungkuno lontɨfi ole lɨwo'nɨngkohofo, Nakwoe hungkunoso ne'njofoho lɨwo'nɨngkohofofoho.

Nakwo huno ole nayohoho. Anɨtu kako nakumo kakoe honɨngkano hungkuno nejapmmentisoso oso honɨngkano hungkuno homo somo nakwo nto'no inɨngkowaso'manji nakwo huno ole wotɨpemantanoho. Oso honɨngkano hungkunoso wopɨngofoho. I olo so'nji nakwo huno nayohoho. Anɨtuye honɨngkano hungkunoso a'amu honɨngkano wopɨngo'njo osomne'nohino'maho. O'o, a'amu honɨngkano wonyo yontɨfi hwe engo sohwamo enjwa'mo mohumayonjo somnefoho. A'amu hofɨko Anɨtumne'no hohujo ikinjaofontɨfi yahino wonyo iwo'nɨngkohofo so'ntnnefoho. A'amu hofɨko Anɨtuye hungkunomo hwotoho fentɨfi hwahoponjo honɨngkano osomo inɨngkawowo'nɨngkohofo so'ntnne'nefoho. I a'amu kanɨngkwohwo'ya'umo fonjasyonto nom'ne a'amu somo fonjasyɨwo'nɨngkohofo oso hwantnne'nefoho. 10 Anɨtuye honɨngkano hungkunoso a'amu apohufo'nji akngkilɨke'nji kifosyoho loho'nɨwo'nɨngkohofo so'ntnne'nefoho. A'amu nom'ne a'amufe mehomi hufo mawo'nɨngkohofo so'ntnne'nefoho. A'amu yo'mayoso hufo iwo'nɨngkohofo so'nji hwasyo hungkuno lɨwo'nɨngkohofo so'nji a'amu hofɨko hwasyo hungkuno nehopi yokintahopono lɨhwono lɨwo'nɨngkohofo so'ntnne'nefoho. Oso yo'mayo yahino wonyo homo somo hano pitofasiyo'ne Anɨtu kakoe honɨngkano hungkunoso nejapmmentisofoho. Yo'mayo yahino wonyo hiso Anɨtuye hungkuno ne'njo somne'no mangohwa imo'nɨwo'nɨngkohofofoho. I oso'no nakwo Anɨtuye hungkuno ne'njo so'no huno nto'no nayɨhwoso'no nakwo yo'mayo yahino wonyo somne'no i'waho nto'no wehumantanoho. 11 Anɨtu kako oso hungkuno neso nom'ne a'amumo lutɨhwayo'ne syohoso ngkimo ntapmmentisofoho. Oso'no ngko kakoe hungkuno wopɨngo hiso losetɨhwalokweno. Anɨtu huhwo sohwo kako wopɨngo'nohini iwo'nɨngkiso sohwo kako sɨmeho nto'no namokiyo'neso hwapɨngo hweho.

Anɨtu kako Poulɨmne'no hitoho ulo'mentiso so'no Poul kako Anɨtumne'no isamoyoka ulɨmentisofoho.

12 Nakwoe Hwe Engo Kɨlais Jisas kako huno ole syanɨfɨhu'mento, Poul kako nje syoho ntohofiyo imo'nyoso kako hoponoho. Ose syanɨfɨsyonto kako ngkimo kakoe syoho somne'no nɨhwosopento oso syoho homo somne'no kakoe yokumpohn'nyo ntapmmentisofoho. Oso'no ngko kakimo isamoyoka ulalokweno. 13 Hohonta ngko Jisasɨmne'no hwe wonyo hweho lonji ngko kakine'no yokumpohn'nyo imo'nɨtɨhwanji kakoe a'amu ne somo ngko hofɨkimo fonɨfonyo uloho'mentohefoho. Ngko oso yahino wonyo hiso ko imote sohwo'ni Anɨtu kako ngkine'no hitoho ulo'mentisofoho. Hwapɨngoso ngko Jisas kakoe hwapɨngo ne so'no huno nto'no manimmojofoho. I osohonta ngko kakimo sɨmeho hi'ntnnono mummotefoho. Oso hiso'no Anɨtu kako ngkine'no hitoho ulofahonɨngki ntɨma'mentisofoho. 14 Oseso Jisas kako ngkimo wopɨngo ntohofonto nontɨmanto kako'njopo ngkimo menɨhumatɨ'mentisofoho. Osopo kako ngkimo sɨmeho uyo so'no lontɨhwamentisofoho. Kako ngkimo sɨmeho mɨkunɨmposo ntapmmentiso so'no ngko kakimo sɨmeho engo uyalokweno.

15 Olo hungkuno loso nɨhu'no nehopeho. A'amu hopi'nono hofɨko upa'nɨfijoso hofɨko sɨmeho hi'ntnnono uyɨfe. Oso hungkuno hiso olenoho. Nakwoe Hwe Engo Kɨlais Jisas kako nakwo a'amu honɨngkano wonyo'njo hn'nɨmo asomo netɨmayo'ne kako nakwoe hwaho lopo pmmentisofoho. Oso hungkuno hiso nɨhu'no nehopeho. I a'amu hopi'nonohino sofe honɨngkano wonyo somo ngko nje wonyoso uyakolo'mentohefoho. 16 Kɨlais Jisas kako kakoe yahino wopɨngoso a'amu hopi'nonohino somo ujo wehontojwahumo lonto kako ngko Poulɨ'nɨmo honɨngkano wonyo'njo sohwo'nɨmo kako sɨmo'mo wopɨngo ntoho'mentisofoho. Oso'no nom'ne a'amuso hofɨko ngkimo nonohonɨngkuji huno ole wosyofɨsyantɨfeho. Poul kako Anɨtumo wonyo ne'no ulohofahonɨngki Anɨtu kako oso wonyo hiso'no Poulɨmo tohino komo'no mummentisofoho. O'o, Anɨtu kako Poulɨmne'no hontohumayo uloho'mojo sohwo Poulɨmo wopɨngo umokumentisofoho. Oso'no hofɨko huno ole wosyafɨhinantɨfeho. Kɨlais kako oso hwe nɨhu'no wonyo sohumne'no wopɨngo umokumaso hopaso Anɨtu kako ngkimo oso hopa wanɨmokumontonoho. Anɨtu kako nakwoe wonyomne'no tohino komo'no monejape'njo hontohumayo inyo hweho. Hofɨko huno ose syafɨsyɨkuji hofɨko Kɨlais Jisasɨmo sɨmeho hi'ntnnono uyɨkuji hofɨko songo ne'no humantokutnnefoho. 17 Oseso Anɨtu kako yo'mayo wopɨngo'nohini iwo'nɨngkiso so'no nakwo kakoe yofe engo so'ntnne'no kakoe yokumpohn'nyo yakolo'nnyo so'ntnne'no engolopohamo nakwo woho'nomehwano. Hwapɨngoso Anɨtu huhwo sohwo kako nakwoe Hwe Engo engolopohamo ne'no nohumantɨhwone hweho. Kako poyo pe'nyoso mape'nonehoho. A'amu hofɨko kakimo muhwonɨfitnnehofo oso huhwo sohwo kako kako'nohini Anɨtu ne hweho. Oso hungkuno hiso nehopeho.

Poul kako Timoutimo Anɨtuye syoho yokumpohn'nyo fiyoho'nyo ulɨmentisofoho.

18 Nje hwomu Timouti sohwosi, nakwo kikimo olo syoho yalokuno loso yano kijapmmentɨhwone sohonta Anɨtu kako nakumo kikine'no hungkuno nalɨmentiso so'no ngko oso hungkuno homo somo huno syafɨsyonji hungkuno hiso apa'no kijopalokweno. Oso hungkuno homo somo kɨko aho yokumpohn'nyo kemokosyohumahoji Anɨtuye syohoso yokumpohn'nyo fiyoho'nyo. U a'amu nom'neso hofɨko Anɨtumo nakwolaho lɨfijoso hofɨko kikimo wonyo kilohofɨkujo'no Anɨtuye hungkuno hiso jɨje sampe mekino pa'nyofoho. 19 Kɨko Kɨlaisɨmne'no sɨmeho hi'ntnnono uyalokuno somo aho yokumpohn'nyo fɨkemokosyohumaho. Oso hungkuno wopɨngo Anɨtu kako jɨje sɨmeho mo'mo ho'nakisyɨwo'nɨngkiso somo kɨko hofiyo finɨngkayo. A'amu fehohnjoso hofɨko oso sɨmeho mo'mo hungkuno wopɨngo homo somo hwotoho fewo'nɨngkohofoso hofɨkoe sɨmeho hi'ntnnono Anɨtumo uyɨmotofoso wonyo imokinɨmotofofoho. 20 Oso hwe hufa'u Himeneyosɨ'nji Alekɨsanta'nji siko oso pa'nyo imo'nɨmentisiyo hwa'uyoho. Siko Anɨtuye hungkuno wopɨngo somne'no sitofo lonji hwasyo lɨwo'nɨngkisiyo so'no ngko sikimo Setenɨye ahomo uhumatɨ'malefoho. Oso'no oso hwe huhwo sohwa'umo Seten kako sikimo tango uyɨhwoso'no siko sikoe sɨmeho iwolo'mokohosɨsi Anɨtumne'no huno wopɨngo wotɨpemanjiyoho. Siko huno wopɨngo tɨpemahosisɨ'manji Anɨtuye hungkuno ne'njo somne'no sitofo hungkuno apa'no malɨsɨhnnisiyo.

Copyright information for `APZ