2 Corinthians 3

A'amu Anɨtu'nji mokotɨku'nnyo yahino songo somne'no lɨjwaofɨwo'nɨngkohofo sohwafe hungkunofoho.

Hungkuno hiso semtɨ'mokiyohe so'no sekwo huno ole losyofɨsyalokwofo. Poul kako nakwo kakoe yofeso apa'no ho'nonɨmayo'ne namtɨ'mokimasofoho. Ose losyofɨsyalokwofo. U a'amu fehohnjo sohwa syoho wopɨngo mayo'ne hofɨko iyoswo nom'ne a'amu sohwa hofɨkoe syohomo ho'nomayo'ne mtɨ'mokuyahotɨmentohofo somo setɨhwawo'nɨngkohofofoho. Nakwo oso a'amuso pa'nyofoho, losyonefɨsyalokwofo. U sekwo nakwoe syoho somo nahonɨmentohofo so'no sekwo nakwoe syoho homo somo ho'nonemayo'ne'ento hungkuno hiloso nemtɨ'mokiyalofoho. Ose losyofɨsyalokwofo. Nɨhu'no awonoho. Ose'maho. O'o, nje yofe ho'nonɨmane iyoswo hopaso sekwo'nohinoho. Nakwo Anɨtuye hungkuno losetɨhwamentɨhwone so'no sekwo yahino songo wonyoangkafo ma'mentohofo somo a'amuso nonahonontɨfi nakwoe syoho somne'no ho'nonemalokwofo. Ngko sekwo'nji nohumanji Anɨtuye hungkunoso losetɨhwahonɨngko sekwo oso hungkuno homo somo tɨfi inɨngkamentohofo so'no sekwo Kɨlais iyoswo mtɨ'mokumentiso hopaso utɨhwa'nyopo lohokwofo kuyoho. Kako titiso hwaho mijo'njo so'nji ifalifaliyo mtɨ'mokumentiso'maho. O'o, kako Anɨtu songo humaso sohwoe Towahuno'nji ifalifaliyo mtɨ'mokumentisofoho. Kako iyoswomo sojomo mtɨ'mokumentiso'maho. O'o, kako a'amufe sɨmehomo oso hungkuno hiso mtɨ'mokumentisofoho.

Oso hungkuno hwapɨngoso olenoho. Kɨlais kako nakwoe huno nefohotofahonɨngki nakwo Anɨtumo sɨmeho hi'ntnnono uyɨwo'nɨngkuhwono. Oso'no ngko huno niyohi, Anɨtu kakoe yokumpohn'nyo so'ne'no oso hungkuno ne imo'nyo'neso hoponoho. U nehopi. Nakwoe yokumpohn'nyoso olo syoho somne'no hoponoho eso nohnnɨngkuhwoloho. Nɨhu'no awonoho. Nakwo syoho yɨwo'nɨngkuhwoneso hoponoho syofɨsyɨhwaloho. O'o, Anɨtu kako'nohini kakoe yokumpohn'nyo'nji yososomo nakwo oso syoho hiso uyantanoho. Anɨtu kako kakoe yokumpohn'nyo songo songo ntapɨwo'nɨngkiso so'no ngko a'amu somo Anɨtu'nji makotoku'nyo'ne yahino songo so'no lutɨhwayoso ngko hopoenohino hwo'nyoho. Ole mulalokuyɨhwono. Sekwo hohontajo Mouses honɨngkano hungkuno mtɨ'mokumentiso somo nto'no minɨngkayo'manji sekwo poyo wape'nantɨfeho. Ose mulalokuyɨhwono. O'o, oso hohontajo yahinofoho. Yahino songo Anɨtu'nji makotoku'nyo'neso Anɨtuye Towahuno Wopɨngo mta'angofoho. Hohontajo yahino somo a'amu ito'no inɨngkayoso hopo'maho. Oso'no a'amu oso honɨngkano somo inɨngkafijo'manji poyo umo'nantɨfeho. Yahinyo songo somo inɨngkafijo'manji songo humayo'neso wotɨpemantɨfeho.

Hohonta oso honɨngkano hungkunoso Anɨtu sojopo mtɨ'mokonto kako Mousesɨmo uyɨmentiso sohonta Anɨtu kakoe pomponaho Mousesɨmo ifehu'mokosyahonɨngki Mousesɨye sɨmo'mangoso mofehi'nyo pa'nyo losyahonɨngki a'amu Isɨlaelɨso hofɨko ose uhwonontɨfi hofɨko Mousesɨye sɨmo'mango somo apa'no muhwonɨmmentohofofoho. Tɨfi sohonta Mousesɨye sɨmo'mango ponjo pomponahoso pijijo imo'nonto nɨhu'nahone sɨmpe'nɨmentisofoho. Oso hohontajo yahino somo a'amu hofɨko inɨngkawentɨfi poyo imo'nɨmentohofoso sɨmo'mo pomponaho engo'nji ko i'mofapmmentiso so'no nakwo huno ole nayohoho. Yahino songo Anɨtuye Towahuno Wopɨngo mta'angoso songo ne'no humayoso mawo'nɨngkuhwoneso hohontajo yahino pomponaho somo yakolo'nnyofoho. Olohontajoso pomponaho mɨkunɨmposofoho. Hohontajo honɨngkano hungkuno yahinoso pomponaho engo'njo ko i'mofapmmentisoso a'amu oso honɨngkano hungkuno homo somo upa'nontɨfi unɨngkohwano ko lontɨfi pɨwahu'mentohofofoho. Oso'no wonyo'nwoho syafɨsyontɨfi tɨkanomo umentohofofoho. Oseso olo yahino songo losomne'no a'amu fihwo inɨngkaweso'manji Anɨtu kako wopɨngo kuyoho uloneso oso yahino hisofe pomponaho engoso sɨmo'mjo somo yakolo'nnyofoho. 10 Ou nehopi. Olo yahino songo lomjo pomponaho mɨkunɨmpososo hohontajo sɨmo'mjo pomponaho engo somo pijijo imo'nonto sɨkwo'mjoho imokumentisofoho. I olohontajo yahino songo pomponahoso mofehi'nyo pa'nyo lalofoho. 11 Oso yahino hohontajo huhwo sohwo pomponaho'njo ko i'mofapmmentisoso we'enepi nowento moi'wo imo'nɨmentisofoho. Oseso nakwo huno nayohoho. Olohontajo yahino songo ne'no nowentɨhwone loso kakoe pomponahoso kakoe yokumpohn'nyoso sɨmo'mjo somo nɨhu'no yakolo'nnyofoho.

12 Oso yahino songomjo pomponahoso ne'no nowentɨhwone so'no nakwo huno neyahonɨngki nakwo iyoho monenalofiyohoho. O'o, nakwo Kɨlaisɨye hungkunoso utɨhwa'nyopo yokumpohn'nyo lɨjwaofalokuhwono. 13 Nakwo Mouses imentiso hopaso miyalokuyɨhwono. O'o, Mouses kako kakoe sɨmo'mangopo hwapɨfe pmpinyo'nnyoso oso sɨmo'mango ponjo pomponahoso pijijo imo'nontanɨngki a'amu Isɨlaelɨso muhwonɨfitnne'ento ifehu'mokahinɨmentisofoho. 14 Mouses kakoe sɨmo'mangopo hwapɨfe'nji ifehu'mokahinɨmentiso hopaso a'amu Isɨlaelɨso hofɨkoe hunomo pɨjwahinɨmentohofofoho. Oseso hofɨko Anɨtu'nji mokotɨku'nnyo'ne hungkuno somo atofo ne'no ko lɨkuji hungkuno hwapɨngo ne hiso hofɨkoe hunoso mehohosasyonehoho. O'o, hohontajo hungkuno hwapɨngo neso olenoho. Kɨlais kako oso hohontajo yahino somo moi'wo esojwao'mentisofoho. Oso'no hofɨko Kɨlaisɨmo inɨngkakujo'no hofɨkoe hunoso wehohososyantɨfeho. 15 I olohontajo hi'nji hofɨko Mousesɨye honɨngkano hungkuno homo somo atofo lɨkuji oso hwapɨfe Mouses kakoe sɨmo'mangopo ifehu'mokahinɨmentiso oso hopaso hofɨkoe hunomo pɨjwahinyofoho. Oseso oso hungkuno hiso hofɨkoe sɨmeho mo'mo momnawo'nnyofoho. 16 I oso'no oso a'amu huhwo sohwo hofɨko nakwo Hwe Engo sohumo sɨmeho uyɨfijo'manji Anɨtu kako oso hwapɨfe hofɨkoe hunomo pɨjwahinyoso wae yaofɨhwosi kako hofɨkoe hunomo huno wopɨngo yano uyɨmontonoho. 17 Oso Hwe Engo Anɨtu huhwo sohwo kako Towahuno hweho. Anɨtuye Towahuno sohwo kako a'amu fihumo humaso'manji yo'mayo wonyoso kako huhwo sohumo momotokilo'mokomokosyohumanehoho. O'o, yo'mayo wonyo somta'ni Anɨtuye Towahuno sohwo oso hwe huhwo sohumo isɨhutofoma'mentisofoho. Oso'no olohonta ito'no humaho. 18 Nakwo Kɨlaisɨmo inɨngkowalokuhwone so'nwi nakwoe sɨmo'mangopo hwapɨfe mufehu'mokahinyo'nwoho. O'o, nakwo Anɨtu'nji humawo'nɨngkuhwone so'no kakoe pomponahoso nakumo ifehu'mokonesosyahonɨngki a'amu nonahonontɨfi nakwo tɨmo honɨngkonyo hopa nahonontɨfi hofɨko Anɨtuye pomponaho somo uhwonalokwofo. Anɨtuye Towahuno sohwo nakwoe sɨmeho mo'mo syoho ne'no mjonaloho'mɨhwoso'no nakwo Kɨlaisɨye yahinoso ne'no mewo'nɨngkuhwaso'no a'amu nahonɨngkukuji nakwo Kɨlais hopa imo'nalokuhwone hn'nɨmo wonehonantɨfeho.

Copyright information for `APZ