2 Thessalonians 1

Ngko Poulɨ'ni Sailasɨ'nji Timouti'nji nakwo nohumentani olo iyoswo loso semtɨ'mokiyalokuhwono. Sekwo Tesolounika soponjo soku Anɨtumo inɨngkowalokwofo soku sekwo nakwoe Mpohwo Anɨtu'nji nakwoe Hwe Engo Jisas Kɨlaisɨ'njiye a'amu kuyoho.

Mpohumo sekumne'no ole ulalokuhwono. Nanɨngkwohwo Anɨtu sohwo'nji Hwe Engo Jisas Kɨlaisɨ'nji siko'monta'i siko yo'mayo wopɨngo selohohosɨsi siko sɨmeho pompenjiyo wosejopanjiyoho.

Poul Anɨtumo isamoyoka ulalofoho.

Sekwo nakwoe Hwe Engo Jisas Kɨlaisɨmo sɨmeho hi'ntnnono uyɨwo'nɨngkohofo soku, nakwoe a'amu kuyoho. Sɨkuno engolopohamo sekune'no Mpohumo isamoyoka ulɨwo'nɨngkuhwantanoho. Oso yahino hiso wopɨngofoho. Hwapɨngoso olenoho. Sekwoe sɨmeho hi'ntnnono Anɨtumo uyoso engo imo'nalofoho. Sekwo nom'ne a'amu so'nji sɨmeho inyoso engo imo'nalofoho. Oso'no sekune'no Mpohumo isamoyoka ulalokuhwono. Oso hiso'no nakwo nom'ne a'amu Jisasɨmo sɨmeho hi'ntnnono uyɨwo'nɨngkohofo somo sekune'no ole ulalokuhwono. A'amu nom'neso wonyo selohofontɨfi tohino engo sejopahonɨngkofi sekwo Anɨtumne'no musɨkwajiyo'njo yokumpohn'nyo lohofontɨfi Anɨtumo sɨmeho hi'ntnnono engo uyalokwofo. Ose yalokwofo so'no a'amu nom'ne somo ulontani sɨmeho wopɨngo namo'nɨwo'nɨngkohoho.

Anɨtu kako a'amu hwahoponjofe honɨngkanomne'no hungkuno ikwolofonefoho.

Anɨtu hungkuno ikwolofo'ne hwapɨngo sohwo ito'nohini yɨwo'nɨngkiso hweho. Sekwo Anɨtuye yahino wopɨngoso malokwofo so'no a'amu nom'neso tango sejopalokwofo. Yo'mayo tango se'mahwoso'no hwangku sekwo Anɨtuye angopo humayoso hoponoho. Anɨtu oso a'amu sekumo wonyo selohofo somo kako aku tohino uyonefoho. Oso yahinoso ito'nohinoho. Sekwo tohino mawo'nɨngkohofo soku nakwo'nji Anɨtu usijo'no nehumajonefoho. Osohonta nakwoe Hwe Engo Jisas kako kakoe a'amu ahwomomo mta'ango yokumpohn'nyo so'nji nopahonɨngkuhwosi a'amu nuhwonɨfitnnefoho. Oso hohosohonta kako toho engo'nji nopɨhwosi a'amu Anɨtumne'no huno muyo so'nji nakwoe Hwe Engo Jisasɨye hungkunomo tɨfi minɨngkayo'njo somo Anɨtu kako aku tohino uyonefoho. Oso a'amu homo somo uhwonɨngkuhwosi sekwo nɨhu'nahone umo'nantɨfe kuyoho ulonefoho. Hwe Engo sohwoe sɨmano'nji kakoe yokumpohn'nyo pomponaho so'nji muhwonyo'njo ifitnnefoho. Nɨhu'nahone tohino ne'no nomapitnnefoho. 10 Kako asomo poso sohonta kakoe a'amuso kakoe yofe noho'nomapitnnefoho. A'amu Anɨtumo sɨmeho hi'ntnnono umotofoso sɨmeho wopɨngo'nji humafitnnefoho. Osohonta sekwo hofɨko'nji nohumafitnnefoho. Hwapɨngoso oso hungkuno selɨmentɨhwone somo sekwo sɨmeho hi'ntnnono uyɨwo'nɨngkohofofoho.

Poul kako a'amu Tesolounika somne'no Mpohwo ufo'mayo'ne jomo ulalofoho.

11 Oso hiso'no syofɨsyontani sɨkuno engolopohamo sekumo sefo'mayo'ne Anɨtumo jomo ulɨwo'nɨngkuhwonefoho. Ole ulalokuhwono. Anɨtu kako humayo wonyoangkafo so'no sehwosopo'mentiso oso hoponoho. Sekwo Hwe engo Jisasɨmo sɨmeho hi'ntnnono uyalokwofo so'no yo'mayo syoho wopɨngo uyano lɨfijoso Anɨtu kakoe yokumpohn'nyo wosejapono. Yo'mayo syoho wopɨngo Hwe Engo Jisasɨmne'no yalokwofoso moi'wo esojwaofɨkujo'no wosefo'mano. 12 Ose ifijo'manji sekwo Hwe Engo Jisasɨye yofe woho'nomantɨfeho. Oso'no Jisas kako sekwoe yofe aku woho'nosema'mtonoho. Hwapɨngoso ole, Anɨtu'nji nakwoe Hwe Engo Jisas Kɨlaisɨ'nji siko nakumo wopɨngo nalohofɨwo'nɨngkisiyo monta'iyoho.

Copyright information for `APZ