Acts 11

A'amu Jelusalemmjo somne'no Pita kakoe hungkuno ho'nahumentisofoho.

Nom'neapousel sohwanji a'amu Jutiya humamotofo so'nji ole upa'nɨmentohofi, A'amu kengoso hofɨko Anɨtuye hungkuno nupa'nontɨfi tɨfi inɨngkamentohofofoho. Pita Jelusalemne'no sahonɨngki a'amu Juta fehohnjo a'apaho sɨhu kolo'nyo yahino so'njo sohwa Pitamo yoka ulɨmentohofofoho. Oso a'amu sohwa Pitamo ole ulɨmentohofi, Kɨko a'amu a'apaho sɨhu makolo'nnyo sohwanji humanji wopayo nɨmahnno hwosoho. Oso wonyofoho.

Ose ulahonɨngkofi Pita yo'mayo imo'nɨmentiso so'no yoloho ulɨmentisofoho. Ole ulɨmento, Ngko ango Joupa sopo nohumanji Anɨtumo jomo ulonji wojo hopa uhwonɨmentoheso, hwapɨfe engo ahwomo mta'ango pmmentisofoho. Oso hwapɨfe tokwajo osofosofahu'nohino somo a'amu ahwomomjo sohwa nokemokoho'nowentɨfi ngko'njopo pmmentohofofoho. Nopahonɨngkofi hwapɨfe ajwomo'mo uhwonɨmaleso yo'mayo tongo, homa, yɨhufo somo uhwonɨmentohefoho. Ose uhwonɨmentoheso ahwomo mta'ni mampaho ole ho'nɨmento, Pita filɨkaho. Oso tongo yo'mayoso nofonjasyohoji hmnyo. Ose ho'nɨngkahonɨngki ulɨmentoho, Hwe Engofo, ngkilaho. Tongo manilongoso manɨwo'nɨngkiyohe hwo'nyoho. Ose ulahonɨngko mampaho apa'no ho'nɨmento, Yo'mayo Anɨtu wopɨngofoho lɨmentiso so'no wonyofoho eso nolohotoho.

10 Ose ho'nɨngkahonɨngki oso hopa hufa'u sɨhune imo'nɨngkahonɨngki nɨhu'nahone ahwomomno sɨmentisofoho. 11 Nosontanɨngki hwe hufa'u sɨhune nje ango humayo sopo i'mofapmmentohofofoho. Hwe fihwo Sisaliyanta'ango sohwo ngkiyepono hwe hufa'u sɨhune sohwamo uhwatɨmentisofoho. 12 Anɨtuye Towahuno Wopɨngo ntɨmento, Oso hwanji fɨwano. Huno pi'nɨngo engo syafɨsiyo'eno. Ose ntahonɨngki olo hwe aho hopi'nono fehohnjo anga'nohino sohwanji hofɨko'nji Sisaliya'no umentɨhwonefoho. Nowentani Kouniliyosɨye angomo humamentɨhwonefoho. 13 Kouniliyos nalɨmento, Hwe ahwomo mta'ango sohwo nje angomo nolohofonto ole ntɨmento, Kɨko ango, Joupa'no a'amu filɨhwajo. Hwe yofe hufa'u'njo Saimoun Pitamne'no filɨhwajo. 14 Oso hwe huhwo sohwo hungkuno waselono. Hungkuno hiso nupa'nɨngkohoji kɨko jɨje a'amu so'nji Anɨtuye honɨngkano ne wotɨpemantɨfeho. Ose nalɨmentisofoho. 15 Ngko Anɨtuye hungkuno ulɨmentanɨngko Anɨtuye Towahuno noponto uhula'mo'mentisofoho. Oso hiso nakune'no sɨmo'mo pmmentiso hopafoho. 16 Ose uhwononji Jisasɨye hungkunomne'no ole syafɨhu'mentoho, Joun a'amumo mijo'nohino kiyoma'mentiso so'no hwangku Anɨtuye Towahuno Wopɨngo wosehulo'afono. 17 Sɨmo'mo nakwo Hwe Engo Jisas Kɨlaisɨmo sɨmeho hi'ntnnono umentɨhwone sohonta kakoe Towahuno nejapmmentiso hopaso oso a'amu kengo somo umentisofoho. Oso'no ngko Anɨtumo pɨjwohumayoso pipilo. Awonoho, Ngko a'amu hwo'nyoho. Pita ose ulɨmentisofoho. 18 Oso hungkuno hiso oso a'amu yoka'njo sohwanji nupa'nontɨfi oso yokaso noho'naofontɨfi Anɨtumo isamoyoka ulontɨfi ulɨmentohofi, Anɨtu a'amu kengo somo sɨmeho uwolomokuwo'nɨngkiso hweho. Hofɨko honɨngkano wonyo ho'naofɨkujo'manji oso a'amu somo Anɨtu songo ne'no humayo'ne uyɨmtonoho. Ose ulɨmentohofofoho.

A'amu Antiyouk humamotofoso Anɨtuye syohoso kahopi imentohofofoho.

19 Sɨtifenɨmo fonjahumentohofo sohonta a'amu Jisasɨmo inɨngkamotofo somo a'amu Jisasɨmne'no nakwolaho lɨmotofo sohwa wonyo umokumotofofoho. Wonyo umokuwo'nɨngkahonɨngkofi hiyaso humpo'mentohofofoho. Nohumpentɨfi a'amu fehohnjo Founisiya sopo i'mofopahonɨngkofi nom'neso hwaho we'e Saipɨlos sopo i'mofopahonɨngkofi nom'neso ango Antiyouk sopo u'mofapontɨfi oso hopo sopo a'amu Juta'nohino somo Anɨtuye hungkuno lutɨhwamentohofofoho. 20 I oso'no a'amu fehohnjo Jisasɨmo inɨngkamotofoso hwaho we'e Saipɨlosnta'ango so'nji a'amu nom'ne ango Sailininta'ango so'nji hofɨko ango Antiyouk sopo uhu'mokontɨfi a'amu kengo somo Jisasɨye hungkuno lutɨhwamentohofofoho. A'amu Juta'maho. O'o, a'amu Ngkɨlik somo lutɨhwamentohofofoho. 21 Lutɨhwamentohofo somo Anɨtuye yokumpohn'nyo yano uyahonɨngki hwe moya'mi kengoso Jisasɨmo sɨmeho hi'ntnnono uyɨmentohofofoho. 22 Anɨtuye a'amu ne Jelusalem humamotofoso oso hungkuno hiso'no nupa'nontɨfi Mponopasɨmo ango Antiyoukɨne'no lɨhwatɨmentohofofoho. 23 Mponopas i'mofawento uhwonɨmentisoso Anɨtu a'amu kengo somo wopɨngo umokumentisoso uhwononto kako sɨmeho wopɨngo umo'nɨmentisofoho. Oseso kako a'amu somo hungkuno yano ole uyɨmento, Sekwo Anɨtuye hungkuno inɨngo seyo'eno Kakoe hungkunomo aho yokumpohn'nyo fɨkemokosyohumamno. Kakoe huyo'mo fosyohumamno. Ose ulɨmentisofoho. 24 Mponopas huhwo sohwo hwe wopɨngo hweho. Kakoe sɨmehomo'mo Anɨtuye Towahuno toyo yamo'nnyo hweho. Kakoe sɨmeho hi'ntnnono Anɨtune'no yokumpohn'nyo unyo hweho. Oso'no a'amu pi'nɨngo engo Anɨtumo inɨngkamentohofofoho. 25 Osohonta Mponopas nolɨkafonto Tasosɨmne'no nowento Soulɨmne'no hafɨhafe tɨpmmentisofoho. 26 Notɨpemanto ango Antiyoukɨmne'no womentisiyefoho. Osopo Antiyouk a'amu Jisas Kɨlaisɨmo inɨngkamotofo so'nji nohumantɨfi hwe moya'mi pi'nɨngo engo somo Anɨtuye hungkuno lutɨhwentanɨngki soswo anga'no uyakolo'mentisofoho. Antiyouk ango hopo sopo a'amu Jisasɨmo inɨngkamotofo somo yofe Kɨlais we'e'nwoho hnnoma'mentohofofoho.

27 Hohosohonta a'amu Anɨtuye hungkuno lɨmotofo sohwa Jelusalemnta'ango nulɨko'mantɨfi Antiyoukɨmne'no umentohofofoho. 28 Hwe fihwo Anɨtuye hungkuno lɨmojo sohwo kakoe yofe Akaposɨyoho. Osohumo Anɨtuye Towahuno hungkuno uyahonɨngki Akapos nolɨkafonto, ole ulɨmento, Hwangku hwaho hopi'nonohino lopo mijoho engo u'mofapmmonteponoho. Hwangku sohonta hwe Kɨloutiyos a'amu Loum somo mokosyohumamentiso sohonta oso mijoho engoso i'mofapmmentisofoho. 29 Antiyoukɨ'njo a'amuso oso hungkuno mijoho so'no nupa'nontɨfi a'amu Jutiya Jisasɨmo inɨngkamotofo somo ufo'mane'entɨfi hungkuno nano mtito'mentohofofoho. Ose mtito'mentohofoso hnnɨmentohofi, Hwe hamniyoho engo'njoso engo uyɨfe. Hwe hamniyoho we'e'njo sohwa we'e uyɨfe. Ose hnnɨmentohofofoho. 30 Oso hiso yontɨfi hofɨko Mponopasɨ'nji Soulɨ'nji hamniyohoso oso hwa'u uyohojɨku'mo'mojiyofoho. Jelusalem a'amu Jisasɨmo inɨngkamotofo sofe hwe engo sohwamo uyɨmentisiyefoho.

Copyright information for `APZ