Acts 13

Hofɨko Mponopasɨ'nji Soulɨ'njimo Anɨtuye syoho iku'mofo'ne uhwatɨmentohofofoho.

A'amu Jisasɨmo inɨngkamotofo ango Antiyouk humamotofoso a'amu fehohnjo somo Anɨtu hungkuno uyahonɨngki lutɨhwamotofofoho. A'amu fehohnjoso a'amu nom'ne somo mesyolutɨhwamotofofoho. Hofɨkoe yofeso olenoho. Mponopas, Simeyoun hwe wonɨsa'nyo sohwo, Lusiyos ango Sailininta'ango sohwo, Manain osohwo hwe yofe engo'njo Helout Tetɨlak, sohwo'nji humamojo sohwo, Soulɨ'njoho. A'amu Jisasɨmo inɨngkamotofoso nuhu'mokontɨfi wopayo manyo'njo yontɨfi Anɨtumo jomo ulontanɨngkofi Anɨtuye Towahuno Wopɨngo ulɨmento, Sekwo Mponopasɨ'nji Soulɨ'nji nom'ne syoho uyɨmale so'no uhwosopopmno. Ose ulahonɨngki hofɨko wopayo humaho ne'no humantɨfi Anɨtumo jomo ulontɨfi hwe sohwa'umo aho kisusyontɨfi sikimo uhwatɨmentohofofoho.

Hwaho Saipɨlos sopo Anɨtuye hungkuno lutɨhwamentisiyefoho.

Anɨtuye Towahuno Wopɨngo hwe sohwa'umo uhwojahonɨngki siko Selusiya'no umentisiyefoho. Osopo siko yofayokinomo nokotosahonɨngki hwaho we'e Saipɨlosɨne'no motowako'mentisofoho. Nomotowekahonɨngki oso hwe huhwo sohwa'u Salomis ango sopo i'mofawenji a'amu Jutafe tajo ango hopi'nonohinomo Anɨtuye hungkuno lutɨhwamentisiyefoho. Joun Mak siko'nji nohumantɨfi ufo'ma'mentisofoho.

Siko Salomis ango sopo ulɨko'manji emoyonji, hwaho we'e nongkihnta'ni ango nom'ne Pafous sopo ifawo'mentisiyefoho. Oso ango hopo sopo a'amu Juta fihwo kakoe yofe Mpajisasɨyoho. Oso hwe huhwo sohwo kako ki'nyo'nji peefo'nji hwoso'nji imojo hweho. Kako Anɨtuye hungkuno hwasyo lɨmojo hweho. Mpajisas huhwo sohwo hwe yofe engo'njo Sesiyas Poulos sohwoe a'amufoho. Sesiyas Poulos sohwo hwe huno wopɨngo'njo hweho. Kako Anɨtuye hungkuno upa'nɨmo lonto Mponopasɨ'nji Soulɨ'njine'no joho ulɨmentisofoho. Mpajisas oso hiso'no nupa'nonto Mponopasɨ'nji Soulɨ'njine'no ngkilaho lonto sotofo ulɨmentisofoho. Kako hwe yofe engo'njo sohumo ulɨmento, Anɨtumo sɨmeho hi'ntnnono uyohotoho ulɨmentisofoho. Oso Mpajisas sohwo a'amu Ngkɨlikɨ'njoso yofe nom'ne ole mulɨmotofi Elimasɨyoho. Soul osohwo nom'ne yofe ole Poulɨyoho,
13:9 Oso yofe Soulɨyeso Hipɨlu hungkuno mta'ango imo'nyofoho. Oso yofe Poulɨyeso Ngkɨlik hungkuno mta'angofoho. A'amu fiso hofɨkoe huno ole, Soul sohwo Poulɨyeso kakoe huno mta'angofoho syafɨhu'mentohofofoho. Hwapɨngoso kako Anɨtuye hungkuno syoho a'amu Ngkɨlik ajwo so'mo yonto meehntɨmentisofoho.
ulɨmotofofoho. Mpajisasɨye Hungkunomo Poul nupo'nɨngkahonɨngki Anɨtuye Towahuno Wopɨngo kako Poulɨye hunomo ufohotofahonɨngki hwe hwoso sohumo sɨmano upento hungkuno yokumpohn'nyo ulɨmento.
10 Kɨko Setenɨye hwomu hwosoho. Kɨko yo'mayo honɨngkano wopɨngo sofe mango hwosoho. Hwasyo hungkuno so'nji honɨngkano wonyo so'nji yo'mayo hwahoponjo so'nji kɨko hwapɨngo hwosoho. Kɨko Anɨtuye hungkuno wopɨngo yɨwolo'mokonji hwasyo lutɨhwamotnno hwosoho. Olo yahino loso moho'naofeso peho'neto. 11 Kɨko upa'nyo. Olohonta Anɨtu wonyo wakumokumontonoho. Kɨko tɨmpi'nyo imo'nɨngkohoji mofehi'nyoso muhwonhnnehino. Hwangku apa'no nuhwonhnnefoho. Ose ulahonɨngki Elimasɨye tɨmo komo'no tɨmpi'nyo imo'nɨmentisofoho. Tɨmpi'nyo imo'nonto kako a'amu honɨngkano utɨhwayo'ne hafɨhafe tɨpmmentisofoho. 12 Oso hiso'no hwe yofe engo'njo sohwo nuhwononto Anɨtumo sɨmeho hi'ntnnono uyonto Anɨtuye hungkuno Poul lutɨhwamentiso so'no yomo imentisofoho.

Ango Antiyouk Pisitiya osopo syoho imentisiyefoho.

13 Poul hwe nom'ne kako'nji emmotofo sohwanji Pafous ango sopo nulɨko'mahonɨngkofi yofayokino nutɨmanto hwaho nom'ne Pamɨfiliya sopo ango Peka sopo kuhwojamentisofoho. I oso'no Joun Mak a'amu somo uhwotɨ'mofonto Jelusalemne'no umentisofoho. 14 Hofɨko ango Peka ulɨko'mantɨfi nosontɨfi ango Antiyouk hwaho Pisitiya sopo sɨ'mo'mentohofofoho. Sɨkuno iyoho humayo somo hofɨko a'amu Jutafe tajo ango somo noswontɨfi osopo humamentohofofoho. 15 Mousesɨye honɨngkano hungkuno so'nji a'amu Anɨtu hungkuno uyahonɨngki lɨmotofo sohwanjiye hungkuno so'nji atofo lontɨfi hwe engo tajo ango syoho'njo sohwa Poul kakoe a'amu ntnne'no lɨhwatɨmentohofofoho. Ole ulɨmentohofi, Nakwoe a'amu sohwasi, hungkuno yokumpohn'nyo nakwoe sɨmehomo sosofitofonesyohumayo'ne hi'njo hwasɨ'manji noho filɨmno. 16 Ose ulahonɨngkofi Poul nolɨkafonto aho ho'noma lohofonto ulɨmento, Sekwo a'amu Isɨlael soku sekwo'nji a'amu kengo Anɨtumo jomo ulɨwo'nɨngkohofo soku sekwo upa'nɨmno.

17 Anɨtu a'amu Isɨlael hn'nwiye Anɨtuyoho. Kako nakwoe ajuyohwosamo uhwosopo'mentisofoho. Hofɨko hwaho Ijip osopo kihn'nawo'nnyo hwafoho. I oso'no osopo nohumentanɨngkofi Anɨtu wopɨngo ulohofahonɨngki a'amu pi'nɨngo engo imo'nɨmentohofofoho. Hwangku Anɨtu kakoe yokumpohn'nyo engo'nji a'amu homo somo hwaho Ijip mta'ni ipemotawento hwaho nom'nepo uhwojamentisofoho. 18 Hwaho a'amu anepo emoyontɨfi yo'mayo wonyoso yahonɨngkofi Anɨtu nuhwononto sɨmeho tango umentisofoho. Osopo emoyontanɨngkofi soswofouti (40) uyokolofahonɨngki, 19 a'amu temtitofo kengo kengo aho fehohnta'ni hopi'nono nom'ne aho mta'ni hufa'u oso a'amu somo Anɨtu wae yaofonto hofɨkoe hwaho a'amu Isɨlael somo uyɨmentisofoho. Oso hwaho yofe Kenanɨyoho. 20 Hwaho hiso uyonto osopo a'amu hungkuno ito'no mɨhwajiyo'ne uhwosopo'mentisofoho. A'amu hungkuno ito'no mɨhwajiyo sohwa a'amu Isɨlael somo umokosyohumentanɨngkofi soswofoua hantɨlet fifɨti (450) uyakolo'mentisofoho. Uyokolofahonɨngki a'amu Anɨtuye hungkuno lutɨhwamojo sohwo Samuel imo'nɨmentisofoho.

21 Samuel nohumentanɨngki a'amu Isɨlaelɨso Anɨtumo hwe yofe engo'njo sohune'no jomo ulɨmentohofofoho. Ose ulahonɨngkofi Anɨtu kako Kisɨye hwomu Soul sohumo uhwosopo'mentisofoho. Kakoe temtitofo Mpenyaminɨyoho. Soul yofe engo'njo a'amumo mokosyohumentanɨngki soswofouti(40) uyakolo'mentisofoho. 22 Uyokolofahonɨngki hwe huhwo sohumo Anɨtu wae yaofonto, nom'ne hwe songo Ntefitɨmo uhwosopo'mentisofoho. Osohune'no Anɨtu ole ulɨmento, Olo hwe lohwo Ntefit Jesiye hwomu sohumne'no nje sɨmeho nɨmo'nɨngkohoho. Yo'mayo ngko imesomo Ntefit wonnɨngka'mte hweho. 23 Ntefitɨye imu sohwo Jisasɨyoho. Jisas huhwo sohwo a'amu Isɨlaelɨfe wonyo engo tangoso Jisasɨmo kotasɨmentisofoho. Oso hiso'no hohonta Anɨtu Ntefitɨmo ulɨmentisoso olohonta ne imo'nalofoho.

24 Jisas mape sohonta Joun a'amumo mijo kiyoma'mojo sohwo a'amu Isɨlael somo lutɨhwamento, Sekwoe honɨngkano wonyo pi'nɨngo engoso foho'naopmno. Anɨtumo sɨmeho yɨwolo'mokukuji tɨfi finɨngkamno. 25 Joun nje syoho moi'wo umo'nono lonto a'amu somo ulɨmento, Sekwo ngkine'no huno pipi seyalofoho. Sekwo hwe fihune'no hontohumalofoso ngko'maho. I oso'no we'enepo nopone hweho. Ngko hwe wopɨngo hwo'ni kalohi oso hwe huhwo sohwe sɨfɨkwongo fosyo isɨhuto'mne'maho. Hwapɨngoso kakoe yofe yokintahoponoho. Ngko a'amu hwahoponjo hwo'nyoho.

26 Nje a'amufo. Apɨlohamɨye temtitofo so'nunonji a'amu temtitofo kengoso Anɨtumo jomo ulɨwo'nɨngkohofo soku, oso hungkuno hwe fihwo nakwoe wonyo so'no tango kotasone so'no nakune'no Anɨtu lɨhwatɨmentisofoho. 27 Oso hwe huhwo sohwo Jisasɨyoho. A'amu Jelusalem humamotofo so'nji hofɨkoe hwe engo sohwanji olo hwe sohumne'no huno ito'no muyofoho. Sɨkuno iyoho humayo homo homo Anɨtuye hungkuno lɨmotofo sohwafe hungkuno atofo lontɨfi haloho maposo'njo imentohofofoho. Anɨtuye hungkuno lɨmotofo sohwa ole mtɨ'mokumentohofi, Oso hwe huhwo sohumo yo'mayo wonyo ulohopitnnefoho. Ose mtɨ'mokumentohofofoho. Oso wonyo hiso hofɨko uloho'mentohofofoho. 28 Hofɨko Jisasɨye honɨngkano wonyo so'no huno ko tɨpentɨfi a'amuso Pailotɨmo ulɨmentohofi, Fonjinto'ofahumno. 29 Anɨtuye hungkuno lɨmotofo sohwa yo'mayo Jisasɨmo wonyo ulohopitnne so'no mtɨ'mokumentohofoso olo a'amu huhwo sohwa wonyo hiso yontɨfi iyo hwojiyafɨku'nnyo mta'ni motapontɨfi sokimo'mo ho'nahumentohofofoho. 30 I oso'no Anɨtu apa'no songo ulɨka'mentisofoho. 31 A'amu Ngkalilinta'angoso Jisasɨ'nji Jelusalemno umentohofoso hohosohonta sɨkuno pi'nɨngo engo Jisasɨmo uhwonɨmentohofofoho. Olohonta oso hwe huhwo sohwa hofɨko a'amu Isɨlael somo Jisasɨye hungkunoso lutɨhwalokwofo.

32 Oso'no olohonta Mponopasɨ'nji ngko'nji Anɨtuye hungkuno woselontayo'no pɨhwayo. Anɨtu neyakwosamo hungkuno nto ulɨmentisofoho. 33 Olo hungkunoso olohonta ne imo'nɨmasofoho. Hungkuno hiso ole, Anɨtu Jisasɨmo songo ulɨko'mentisofoho. Oso hiso'no Ta'njo Iyoswo 2 somo ole mtɨ'mokumento,

Kɨko nje hwomu hwosoho.
Olo sɨkuno lomo nje yokumpohn'nyo kijapm'mo a'amu hopi'nono yofe wakuhwopɨfe, ngko hnnɨngkwo hwo'nyoho.
Ose mtɨ'mokumentisofoho.
34 Nom'nepo Anɨtu kako Jisasɨmo songo lɨkafo'ne apa'no poyo mape'nyo'ne so'no Jisasɨmne'no ose ulɨmento,

Yo'mayo wopɨngoso uloho'mne'no Ntefitɨmo uyɨmentoheso wokijapmmonne'no yohono.
35 Anɨtu nom'ne Ta'njo Iyoswo somo ulɨmento,
Kɨko jɨje Hwe Wopɨngo Syoho Kilohofiyo sohumo ito'no esyohumusoso kako nope'nɨngkuhwosi pisakino mowanehoho.
Ose ulɨmentisofoho.
36 Nakwo Ntefitɨmne'no huno moi'wonoho. Kako nohumanto Anɨtuye hungkunomo tɨfi inɨngkamojo hweho. Kako poyo pe'nɨngkahonɨngki kakoe pijafoso ajuyohwosanjopo ijopijisyosyahonɨngkofi osopo pisakino wa'mentisofoho. 37 I oso'no hwe nom'ne sohumo Anɨtu ulɨko'mentiso sohwo pisakino mowasofoho. 38 Nje a'amu soku oso'no sekwo huno ito'no waseyono. Nakwo olo so'no hungkuno woselantane'no yɨhwono. Olo hwe huhwo lohwo kako sekwoe wonyo wae weesemo'mto pmmentiso hweho. 39 Mousesɨye honɨngkano hungkuno sekwoe wonyo wae yaofoso hopa'maho. O'o, oso hungkuno hiso a'amumo wopɨngo mmokiyofoho. I oso'no oso hwe huhwo sohwa Jisas kakoe hungkunomo tɨfi inɨngkafijoso sekwoe wonyo wae yasemofɨhwosi a'amu wopɨngo wasemokumontonoho. 40 I oso'no sekwo huno ito'no fisyafɨhupmno. Hohonta Anɨtuye hungkuno lɨmotofo sohwafe hungkuno mtɨ'mokumentohofoso sekumne'no ne imo'nonoho. 41 Hungkuno ole,

Sekwo yo'mayo uhwonɨwo'nontɨfi yo'mayo ne'njo so'no nakwolaho lalokwofo.
Sekwo oso'no huno syafɨhupɨfijoso poyo wope'nantɨfeho.
Sekwo nohumentanɨngkuji ngko yo'mayo wopɨngo yalokwe so'no a'amu losetɨhwafijoso sekwo haloho mupa'nɨfitnnehofo.
Hungkunomo sɨmeho hi'ntnnono muyɨfitnnehofo.
Oso hungkunoso Poul ulɨmentisofoho.

42 Ose ulonto Poulɨ'nji Mponopasɨ'nji ango uhu'mokiyo somo woswopaho lonji yontanɨngki ulɨmentohofi, Nom'ne sɨkuno iyoho humayo somo olo hungkuno hiloso apa'no fonalinyo. 43 A'amu ango uhu'mokiyo somta'ni nohotoswopahonɨngkofi a'amu Juta fehohnjo so'nji a'amu kengoso Jutafe honɨngkanomo inɨngkamotofo so'nji Poulɨ'nji Mponopasɨ'nji womentohofofoho. Siko a'amu homo somo ulɨmentisiyo, Sekwo Anɨtuye hungkunomo tɨfi finɨngkamno. Kako wopɨngo semokosyohumane so'no sɨmeho ne'njo uyɨmno.

44 Oso nom'ne sɨkuno iyoho humayo somo a'amu pi'nɨngo engo ango uhu'mokiyo somo Anɨtuye hungkuno upo'nano lontɨfi uhu'mokumentohofofoho. 45 Ose uhu'mokahonɨngkofi a'amu Jutaso a'amu pi'nɨngo somo uhwonontɨfi hintotohino umnɨngkahonɨngki Poulɨ'nji Mponopasɨ'ntnne'no nakwolaho lontɨfi sitofo ulontɨfi sikoe hungkunomo hwotoho hmmentohofofoho. 46 Ose ko yahonɨngkofi siko iyoho munnɨmentisofoho. Siko ulɨmentisiyo, Sekwo a'amu Juta soku Anɨtuye hungkuno sɨmo'mo selɨmalohwoyo. Oso hiso sekwo nupa'nontɨfi hohujo ikinjao'malofofoho. Hohujo ikinjao'malofo kalohi songo ne'no mohumafitnnehofo. Sekwoe syohofoho. Upa'nɨmno. Olo hilo so'no nekwo a'amu kengo somo Anɨtuye hungkuno wolutɨhwantayoho.

47 Anɨtu ole nalɨmento,
Ngko a'amu kengo sofe pomponaho pa'nyo sehwosopehono.
Sekwo hwaho yawojo'meemo nje honɨngkano utɨhwamno.
Ngkimo nɨ'mayo'nefoho.
48 Ose ulahonɨngki a'amu kengoso nupa'nontɨfi Anɨtuye hungkuno so'no sɨmeho wopɨngo umo'nɨmentisofoho. Anɨtu hohonta oso a'amu songo ne'no humayo'ne uhwosopo'mentisoso oso sɨkuno somo Jisasɨmo sɨmeho hi'ntnnono umentohofofoho.

49 Oseso Anɨtuye hungkuno ango'meemo ho'nɨmentisofoho. I oso'no a'amu Jutaso Poulɨ'nji Mponopasɨ'njimo sitofo ulontɨfi hwe yofe engo'njo sohwanji moya'mi hamniyoho'njo Jutajafe tajo ango somo syuwo'nɨngkohofo so'njimo ulɨkofahonɨngkofi hofɨko sitofoso nupa'nontɨfi Poulɨ'nji Mponopasɨ'njimo wonyo uloho'mentohofofoho. 51 Poulɨ'nji Mponopasɨ'nji siko sɨfemjo hwaho wae yao'mentisiyoso a'amufe honɨngkano wonyo utɨhwayo'nefoho. Wayo yaofonji ulɨmentisiyo, Olo wonyo elohofohofoso Anɨtu uhwonɨngkohoho. Ose ulonji oso ango sopo nulɨko'manji Aikouniyamne'no womentisiyefoho. 52 Anɨtuye a'amu ne Antiyouk humamotofoso sɨmeho wopɨngo umo'nɨngkahonɨngkofi Anɨtuye Towahuno'nji humamentohofofoho.

Copyright information for `APZ