Acts 15

Ango Jelusalem uhu'mokumentohofofoho.

Hwe fihwa hwaho Jutiyanta'ango sohwa Antiyoukɨmne'no pmmentohofofoho. Osopo a'amu Jisasɨmo inɨngkamotofo somo hungkuno ole lutɨhwamentohofi, Sekwo Mousesɨye honɨngkano hungkuno a'apaho sɨhu kolo'nyo so'no tɨfi minɨngkayo'manji Anɨtu kako mosetɨmanefoho. Ose lutɨhwamotofofoho. Oso hungkuno hiso Poulɨ'nji Mponopasɨ'nji nupa'nonji a'amu Jutiya nta'ango so'nji yoka ikujoho hopa hnnɨmentohofofoho. Oso'no a'amuso ole ulɨmentohofi, Poulɨ'nji Mponopasɨ'nji nom'ne a'amu Antiyouknta'ango so'nji Jelusalemmne'no fisɨmno. Osopoapousel nom'ne sohwanji hwe engo sohwanji olo hungkuno hilo so'no ito'no womɨhwojantɨfeho.

Ose lontɨfi uhwatɨmentohofofoho. Nowentɨfi hwaho Founisiya'nji Someliya'nji osopono nohumantɨfi oso ango soponjo a'amu somo ulɨmentohofi, A'amu kengo sohwa Anɨtumo hofɨkoe sɨmeho uyalokwofo. Ose ulahonɨngkofi hofɨkoe sɨmeho wopɨngo umo'nɨmentisofoho.

Jelusalem i'mofopahonɨngkofi osopo a'amuapousel sohwanji hwe engo sohwanji isamoyoka ulahonɨngkofi Antiyouknta'angoso yo'mayo Anɨtu imentiso so'no ulɨmentohofofoho. A'amu Falisi fehohnjo Jisasɨmo inɨngkamotofo sohwa nolɨkafontɨfi ulɨmentohofi, A'amu kengoso Jisasɨmo inɨngkowalokwofoso hofɨkoe a'apaho sɨhu wakolo'nɨfe. Ole ulɨmno, Sekwo Mousesɨye honɨngkano hungkunomo tɨfi finɨngkamno. Ose ulɨmentohofofoho.

A'amuapousel sohwanji hwe engo sohwanji oso hungkuno hilo so'no ito'no melɨwejiyo'ne uhu'mokumentohofofoho. Oso hungkuno so'no ne'no lontɨfi lontɨfi Pita nolɨkafonto ulɨmento, Nje a'amufo, sekwo huno moi'wonoho. Hohonta Jisas kakoe syohoso nakumo nejapmmentisofoho. Osohonta a'amu kengo somo Anɨtuye hungkuno lutɨhwayo'ne nɨhwosopo'mentiso hwo'nyoho. Oso'no hofɨko nupa'nɨngkuji sɨmeho hi'ntnnono uyantɨfeho. Anɨtu kako a'amufe sɨmehomo huno uyɨwo'nɨngkiso hweho. A'amu kengo somo Anɨtu kako hofɨkine'no sɨmeho wopɨngo umo'nɨngkahonɨngki kakoe Towahuno Wopɨngo nakumo nejapmmentiso hopa uyɨwo'nɨngkiso hweho. Anɨtu nakumo a'amu kengo so'njimo yahino afa nelohofalofoho. Hofɨko sɨmeho hi'ntnnono Anɨtumo uyahonɨngkofi oseso Anɨtu kako hofɨkoe wonyo wae yaofalofoho. 10 Sekwo Anɨtuye sɨmehomo tango peho'no umokalokwofo. Mousesɨye honɨngkano hungkuno tango engo'njofoho. Oso tango hiso ajuyohwosanji nakwo'nji ito'no miyo'njo imotohwonefoho. Oso'no olo a'amu kengo somo oso tango hiso peho'no uyantɨfe'no yalokwofo. 11 O'o, Jisas kako nakumne'no hitoho ulofahonɨngki nakwoe wonyo'ne poyo pe'nɨmentisofoho. Oso hiso'no nakwo sɨmeho hi'ntnnono uyɨhwaso'no kako wonetɨma'mtonoho. Oso'nohinofoho. A'amu kengoso hungkuno homo somo inɨngkafijo so'no Anɨtu utɨma'mtonoho.

12 Ose ulahonɨngki a'amuso nupa'nontɨfi mampi'nyo humentanɨngkofi Poulɨ'nji Mponopasɨ'nji ulɨmentisi, Siko a'amu kengo so'nji nohumanji yo'mayo kengo wonyoangkafoso Anɨtu itɨhwamentiso so'no lutɨhwamentisiyefoho.

13 Moi'wo lahonɨngki Jemɨs ulɨmento, U, nje a'amufo, nje hungkuno upa'nɨmno. 14 Saimoun Pita ole nalohi, sɨmo'mo a'amu kengoso Anɨtuye a'amu ne mmo'nyo'njo imotofofoho. Olohonta Anɨtu hofɨkine'no honɨngkano imo'mentiso so'no hofɨko kakimo inɨngkowalokwofo. Oso'no hofɨko kakoe a'amu ne imo'nɨmalofofoho. 15 A'amu hohonta Anɨtuye hungkuno lutɨhwamotofo sohwa olo hilo so'no mtɨ'mokumentohofoso ole, Anɨtu lɨmento,

16 Hwangku ngko nopmne hwo'nyoho.
Ntefitɨye temtitofoso ango hopa pɨwahu'mentohofofoho.
Ngko wopɨngo imoku'mo ango songo hopa apa'no molɨmnefoho.
17 Osohonta a'amu kengoso ngkine'no tɨpɨfitnnefoho.
Oso a'amu kengo uhwosopo'mentoheso nje a'amu nefoho.
18 Oso hungkuno hohonta Anɨtu lɨmentisoso ne'no lalofoho.
19 Oso hungkunoso Jemɨs nulonto nom'ne hungkuno ulɨmento, Nje huno ole syofɨsyalokweno. A'amu kengoso Jisasɨmne'no huno uyahonɨngki sɨmeho uyalokwofo somo syoho tango'njo uhwaloho. 20 O'o, nakwo hofɨkine'no iyoswo ifalifaliyo ole womtɨ'mokano. A'amu hofɨko hwasyo anɨtu somo yɨhufo uyɨfijoso sekwo nonɨngkutoho. Sekwo a'mohufo ikutoho. Sekwo tongo honɨyo hi'njoso nonɨngkutoho. Tɨ'wangomo jilipopijoso nonɨngkutoho. 21 Hohonta Mousesɨye, honɨngkano hungkuno a'amu Jutafe ango uhu'mokiyo sopo sɨkuno iyoho humayo homo somo lutɨhwamotofo somta'angoso olohonta ose'nohini ne'no weho. Jemɨs ose ulɨmentisofoho.

A'amu temtitofo kengo Jisasɨmo inɨngkowawo'nɨngkohofo somne'no iyoswo mtɨ'mokumentohofofoho.

22 A'amuapousel sohwanji hwe engo sohwanji a'amu Jisasɨmo inɨngkowawo'nɨngkohofo so'nji hungkuno ole mtito'mentohofi, Nakwo Poulɨ'nji Mponopasɨ'ntnne'no hwe nom'ne sohwanji Antiyoukɨmne'no uhwojano. Ose mtitofontɨfi hofɨko hwe nom'ne hufa'u Jutasɨ'nji Sailasɨ'njimo uhwosopo'mentohofofoho. Oso hwe Jutas sohwo kakoe yofe nom'ne Mpasopasɨyoho. Oso hwe sohwa'umne'no a'amu hopi'nono ole lɨmotofofoho. Hwe wopɨngo hwa'uyoho.

23 Iyoswo mtɨ'mokontɨfi hofɨko'nji uyohotɨmentohofofoho. Iyoswo hiloso ole, Nakwoapousel sohwona'nnonji hwe engo sohwanji a'amu Jisasɨmo inɨngkowawo'nɨngkohofo so'ntnne sekwo'ne iyoswo mtɨ'mokalokuhwono:

Sekwo a'amu kengo soku Antiyouk, Siliya, Silisiya sokune'no nakwo nakwoe a'amufo selalokuhwono.
24 Ole upa'nɨmalohwono, a'amu fehohnjo oloponta'ango sohwa hungkuno tango'njo selɨmalofofoho. Hungkuno hiso'no sekwo nupa'nontɨfi huno pi'nɨngo engo syofɨsyalokwofo. Upa'nɨmno. Oso hungkuno hiso'no nakwo masejofoho. O'o hofɨkoe huno mta'nɨngo'nohinofoho. 25 Oso'no nakwo nuhu'mokontani hungkuno ole mtito'malohwono. Hwe engo hufa'u hwa'umo uhwosopentani, siko Poulɨ'nji Mponopasɨ'nji sekuye pone'no uhwojalokuhwono. Nakwo Poulɨ'nji Mponopas ntnne'no sɨmeho afa wopɨngo uyɨwo'nɨngkuhwonefoho. 26 Siko Jisasɨye hungkuno ango'meemo lutɨhwanji iyoho munyofoho. Anɨtumne'no poyo pe'nyo so'no iyoho munyofoho. 27 Nakwo Jutasɨ'nji Sailas ntnne'no uhwojalokuhwono. Siko olo hungkuno iyoswo lomjoso woselanjiyoho. 28 Anɨtuye Towahuno nakwo'nji olo hilo so'no sɨmeho afa inalokuhwono. Honɨngkano tango'njo mosejopalokuyɨhwono. O'o, olomnohini tɨfi finɨngkamno. 29 A'amu hwasyo Anɨtumne'no yahu yɨhufo peefo'ne uyɨfijoso sekwo nonɨngkutoho. Sekwo tongo honɨyo nonɨngkutoho. Tɨ'wangomo jilipopijoso nonɨngkutoho. Sekwo a'mohufo ikutoho. Olo wonyo hiloso sekwo miyo'njo ifijo'manji wopɨngo wohumantɨfeho. Osohopeho.

30 Oso iyoswo mtɨ'mokontɨfi a'amu sohwamo uhwatɨmentohofofoho. Antiyouk ango sopo i'mofapontɨfi a'amu Jisasɨmo sɨmeho umotofoso uhu'mokahonɨngkofi oso iyoswo umentohofofoho. 31 A'amu hiso iyoswo hiloso atofo lontɨfi, olo hungkuno hilo so'no sɨmeho wopɨngo umo'nɨmentisofoho. 32 Jutasɨ'nji Sailasɨ'nji Anɨtuye hungkuno lɨmojiyo sohwa'u hungkuno ne'no ulonji yokumpohn'nyo usosofito'mentisiyefoho. 33 Osopo ne'no humamentisiyefoho. Tɨfi sohonta uhwatɨmentohofo sopono asomo uhwatɨmentohofofoho. 34 [I oso'no Sailas Antiyoukɨmo wohumamo lonto humamentisofoho.] 35 Oseso Poulɨ'nji Mponopasɨ'nji ango Antiyouk sopo ne'no humanji a'amu nom'ne so'nji Anɨtuye hungkuno lutɨhwamentohofofoho.

Poulɨ'nji Mponopasɨ'nji siko mtampo'mentisiyefoho.

36 Hwangku sohonta Poul Mponopasɨmo ulɨmento, Oso ango ho'mo so'mo Anɨtuye hungkuno lutɨhwamentɨhwoyo sopo oso'mno wehwaho. Hofɨko wopɨngo ko humalofo. 37 Uhwonowaho. Ose ulahonɨngki Mpanopas ulɨmento, Nekwo Joun Makjanji wehwano. 38 Ose ulahonɨngki Poul ulɨmento, Hohonta Joun Mak nekwo'nji nowentani ango Pamɨfiliya osopo nta'ni elɨko'manto asomo umentisofoho. Nekwo'nji syoho moi'wo miyo'njo imentiso hweho. Oseso nekwo'nji mowanehwono. 39 Oso'no Poulɨ'nji Mponopasɨ'nji siko yoka hnnonji mtampo'mentisiyefoho. Siko nomtampenji Mponopasɨ'nji Mak'nji siko yofayokino nomanji hwaho we'e Saipɨlos sopo ne'no womentisiyefoho. 40 Poul Sailasɨmo utɨmanto siko kengopo nowahonɨngki a'amu Jisasɨmo inɨngkowawo'nɨngkohofoso ulɨmentohofi, Anɨtu siko'nji wesoso wosefo'ma'mtonoho. 41 Ose ulahonɨngkofi siko nowenji hwaho Siliya'nji Silisiya sopo nowenji a'amu Jisasɨmo inɨngkowawo'ningkohofo somo sosofitofosyohumamentisiyefoho.

Copyright information for `APZ