Acts 20

Hwaho Masetouniya'nji Ngkɨlikɨ'nji osopo Poul kako hano emoyamentisofoho.

Nohumpeehonɨngkofi Poul a'amu Jisasɨmo inɨngkawowo'nɨngkohofo somne'no ngkiyepono wapɨfento joho ulɨmentisofoho. Nuhu'mokahonɨngkofi Poul Anɨtumne'no hungkuno ulonto hofɨkimo usosofito'mentisofoho. Ose yonto ulɨmento nje a'amufo woselɨko'ma'mne'no yohono. Sekwo mpanɨmno. Ose ulonto Masetouniya'no umentisofoho. Oso hwaho sopo uhwontawento a'amu Jisasɨmo inɨngkawowo'nɨngkohofo somo Anɨtune'no hungkuno ulonto a'amu homo somo usosofito'mentisofoho. Osohonta kako Ngkɨlik hwaho sopono umentisofoho. Osopo nohumentanɨngki hamno hufa'u sɨhune uyakolo'mentisofoho. Nohumanto kako yofayokinomo Siliya'no wamto yahonɨngki a'amu Juta sohwa Poulɨ'mo wofonjosyano lontɨfi yahonɨngkofi Poul kako nupa'nonto huno yɨwolo'mo lohofonto Masetouniya'no wamo lɨmentisofoho. Nom'ne a'amu Poulɨ'nji umentohofo sohwa hofɨkoe yofe ole, Soupata Pilosɨye hwomu Mpeliyanta'ango hweho. Tesolounikanta'ango hwa'u Alisɨtakosɨ'nji Sekuntosɨ'njoho. Ngkaiyos Ntepe mta'ango sohwo'nji Timouti'njoho. Hwaho Esiya mta'ango hwa'u Tikikosɨ'nji Tɨloufimosɨ'njoho. Oso a'amu sohwa sɨmo'mo nowentɨfi nakune'no ango Tɨlouas hontohumamentohofofoho. Nakwo ango Filipai nohumentanɨngkuhwoni oso Sɨkuno Engo a'amu hofɨko oso wopayo engo ka mo'nnyoso ane nyo'ne sɨkunoso moi'wo imo'nɨngkahonɨngki nakwo yofayokinomo nowentanɨngkuhwoni sɨkuno aho anga'no hopi'nono neyakolofahonɨngki ango Tɨlouas i'mofapmmentɨhwonefoho. Osopo nohumentanɨngkuhwoni sɨkuno aho anga'no hopi'nonohino nom'ne mta'ni hufa'u neyakolo'mentisofoho.

Ango Tɨlouas sopo Poul kako hwe Jutikos sohumo ulɨka'mentisofoho.

Salole sɨkuno'nji a'amu so'nji nakwo nuhu'mokontani wosopayo nɨmentɨhwonefoho.
20:7 A'amu pi'nɨngo engo huno'njoso hofɨko Jisasɨye mɨkufo'nji honɨyo'nji nyo'neso hofɨko huno syafɨhu'motofofoho.
Nonɨngkahonɨngkuhwoni Poul a'amu somo lutɨhwamentisofoho. Kako mo'nɨngkanta wamo lonto imentisoso hungkuno nom'ne nom'ne lutɨhwamentisoso kuntoliyopo imo'nɨmentisofoho.
Nakwo ango yokintahopo tokilonjwa'mjo somo nohumentanɨngkuhwoni sikiloho pi'nɨngo sijɨmentisofoho. Hwe songo fihwo kakoe yofe Jutikos osohwo kako ifofo hanopo nokehumentanɨngki Poul hungkuno ne'no lontanɨngki tɨmosaho unɨngkahonɨngki nɨhu'nahone saho poyo pa'nyo fosyawo'mentisofoho. Fosyawo'mentisoso ango tokilonjwa'mjo hufa'u sɨhune somta'ni pɨwahu'mentisofoho. Nopɨwesyahonɨngki a'amu hofɨko utɨmano lontɨfi kotawentɨfi uhwonɨmentohofoso kako poyo nto pe'nɨmentisofoho. 10 Poul nokotawento hwomu poyo sohwoe a'apahopo pisongki'namofonto kehutnnoma lohofonto a'amu somo ulɨmento, Sekwo yomo ikutoho. Kako songo humaho. 11 Oseso Poul angomo apa'no nokotasonto a'amu'nji wopayo kutɨkujo lohofontɨfi nɨmentɨhwonefoho. Nɨmentɨhwoneso Poul apa'no hungkuno ne'no lahonɨngki iyoho longkonɨngkahonɨngki Poul nulɨko'manto umentisofoho. 12 Oseso a'amuso hwomu pe'nɨmentiso sohumo songo humahonɨngki kakoe angomo ipemotawentɨfi hofɨko sɨmeho wopɨngo umo'nɨmentisofoho.

Poul kako ango Tɨlouas ulɨko'manto ango Miletos sopono womentisofoho.

13 Poul nalɨmento, sekwo yofayokinomo ukuji ango Asous sopo woswo'nano. Ngko honɨngkanomo wamo. Ose nelahonɨngki nakwo yofayokinomo umentɨhwonefoho. 14 Ango Asous sopo noswo'nontani Poulɨ'nji nakwo yofayokinomo nokotosontani ango Mitilinimne'no umentɨhwonefoho. 15 Mitilini nta'ni nowekentani mo'nɨngkanta hwaho we'e Kiyous mofonepo umentɨhwonefoho. Osopo nta'ni nowentani mo'nɨngkanta hwaho we'e Samousɨmne'no umentɨhwonefoho. Osopo nta'ni mo'nɨngkanta Miletos i'mofapmmentɨhwonefoho. 16 Poul nto nalɨmentisofoho. Sɨkuno EngoPentikousɨmo
20:16 Ap. 2:1 enjwa so'mo fehonolo'mongkomaho.
ngko Jelusalem wohumamonnoho. Oso'no ango Efesos mamnehono. Hwaho Esiya sopo sɨkuno pi'nɨngo engo moneyakolofonehoho.

A'amu ango Efesos sopo humamotofo sofe hwe engo sohwamo Poul kakoe hungkuno ae'uyo uyɨmentisofoho.

17 Ose nalɨmentiso so'no ango Miletos i'mofapmmentɨhwoneso Poul kako hwe engo a'amu Jisasɨmo inɨngkawowo'nɨngkohofo somo mokosyohumayo Efesosnta'ango sohwamne'no hungkuno ole lɨhwatɨmento, Sekwo nopɨkuji nohonɨmno. 18 Ose lɨhwojahonɨngki a'amu Efesosnta'ango i'mofopahonɨngkofi Poul ulɨmento, Ngko hwaho Esiya humamentohe sohonta nje yahinoso sekwo huno moi'wonoho. 19 A'amu Jutaso ngkimo wonyo ntohofane'entɨfi hungkuno ko hnnɨngkahonɨngkofi oso'no yo'mayo tango'nji nu'mahonɨngki ngko nje yofe hwotoho fenji sɨmeho tango'nji Anɨtuye syoho imentohefoho. 20 Sekwo huno seyohoho. Ngko iyoho mannɨngkahonɨngki yo'mayo sefo'mayo'no losetɨhwamentohefoho. Ango uhu'mokiyo utɨhwa'nyo sopono sekwoe ango so'mno Anɨtuye hungkuno hopi'nono losetɨhwamentohefoho. 21 Ngko a'amu Juta so'nji a'amu kengo so'njimo ole ulɨmentoho, Honɨngkano wonyo hopi'nonohinoso foho'naopmno. Anɨtumne'no sekwo huno fɨwolo'mokumno. Jisasɨmo sɨmeho hi'ntnnono uyɨmno. 22 Anɨtuye Towahuno Wopɨngo kɨko Jelusalemno fiso ntɨmaho. Ngko haloho yonji Jelusalemmne'no wasɨmonne'no yohono. Ango Jelusalem sopo peho wonɨ'ma'mtolo. Ngko huno maniyohoyohoho. 23 Olo'nohino Towahuno Wopɨngo hungkuno yokumpohn'nyo ole ntahonɨngki, Impo'angomo ho'nakohufijoso kɨko tango engo wotɨpema'monnoho.

24 I oso'no ngko iyoho mannɨngkohoyohoho. O'o, nje a'apahomne'no huno masyofɨsyalokuyohono. Olo syoho nakwoe Hwe Engo Jisas ntapmmentisoso moi'wo esojwamofo so'no syofɨsyalokweno. Syoho hiloso Anɨtu a'amumo wopɨngo'nohini uyɨwo'nɨngkiso so'no wolutɨhwamne'no yohono.

25 Sekwo upa'nɨmno. Hohonta ngko nose'manji Anɨtu yokumpohn'nyo enemokosyohumayo so'no losetɨhwamentohefoho. I nom'ne sɨkunomo sekwo ngkimo manohonɨfitnnehofo. 26 Oseso olo sɨkuno lomo hungkuno yokumpohn'nyo waselɨmonne'no yohono. Sekwo tɨkanomo ufijo'manji sekwoe syohofoho. 27 Yo'mayo Anɨtu yoneso'no nto losetɨhwamentohefoho. Hungkuno fehohnjo hiyaso moho'nasiyofoho. O'o hopi'nonohino losetɨhwamentohefoho. 28 Sekwo ito'no fehumamno. Anɨtuye Towahuno Wopɨngo syoho nto sejapmmentisofoho. Sekwo a'amu Jisasɨmo inɨngkawowo'nɨngkohofo somo mokosyohumamno. Jisas kakoe honɨyo'nji hofɨkimo mpe imentisofoho. 29 Ngko huno ole nɨyohoho. Ngko sehwotɨ'mo'me sohonta a'amu sikisɨwojo pa'nyo sekwo'njo ajwo lopo nopɨkuji wonyo wosemokantɨfeho. 30 A'amu fehohnjo sekumta'ni nolɨkafɨkuji a'amu Jisasɨmo inɨngkawowo'nɨngkohofo somo hwasyomo ipesemotakuji hwasyo hungkuno woselantɨfeho. 31 Oso'no ito'no mokosyohumamno. Oleso inɨngo seyo'eno. Soswo hufa'u sɨhune neyakolofontanɨngki ngko imɨngo'nji sɨkuno'nji humotaho lonji a'amu anga'no anga'nohino sokumo Anɨtuye hungkuno losetɨhwamentohefoho.

32 Ngko Anɨtuye ahopo ho'nosesyalokweno. Kako a'amumo wopɨngo'nohini selohofɨwo'nɨngkiso hweho. Kakoe hungkuno yokumpohn'nyo esesyohumahwosi, kakoe a'amu somo honɨngkano wopɨngo inɨngkayo'ne yo'mayo wosejapmmentonoho. 33 Sekwoe hamniyoho hwapɨfe yo'mayo so'no hi manɨmo'nɨmmentisofoho. 34 O'o, sekwo huno moi'wonoho. Ngko sekwo'nji nohumanji ngko umofonyo iyo so'ne nje a'amumne'no mpe imentohefoho. 35 Nto setɨhwamentohefoho. Oso pa'nyo sekwo fiyɨmno. Sekwo syoho yokumpohn'nyo ifijoso a'amu po'nɨfo somo ufo'mafɨkuno. Olo hungkuno Jisas nalɨmentisoso sekwo inɨngo seyo'eno. A'amu nom'nemo yano'nohino uyɨwo'nɨngkohofoso hofɨkoe sɨmonyo iyoso nom'ne a'amu yo'mayo mawo'nɨngkohofo somo yakolonoho.

36 Poul oso hungkunoso moi'wo ulonto hofɨko'nji hwomtame ehumantɨfi Anɨtumo jomo ulɨmentohofofoho. 37 Ose yontɨfi hofɨko humotaho lontɨfi Poulɨmo kehutnnoma'mentohofofoho. 38 Sekwo apa'no manohonɨfitnnehofo ulɨmentiso so'no hofɨko sɨmeho tango umentisofoho. Hofɨko yofayokinomne'no ipemotawomentohofofoho.

Copyright information for `APZ