Acts 21

Poul kako Jelusalemne'no asomo umentisofoho.

Nakwo a'amu somo ulɨko'mentani yofayokinomo nokotosontani, nowekentani hwaho we'e Kous osopo i'mofapmmentɨhwonefoho. Mo'nɨngkanta nakwo hwaho Loutes i'mofapontani osoponta'ango ango Patola i'mofapmmentɨhwonefoho. I'mofapontani yofayokino nom'neso hwaho Founisiyamne'no wamonto yahonɨngki uhwonontani osohumo nokotasontani wekapmmentɨhwonefoho. Nowekapontani hwaho Saipɨlos uhwonontani oso hwaho sopo yofayokino hwonamonyo hohnta'ni uyokolofontani umentɨhwonefoho. Nowentani hwaho Siliya i'mofapontani ango Taiya sopo ifohohosahumentɨhwonefoho. Oso ango hopo sopo yofayokino ho'yango wojo'mesyamto umentisofoho. Osopo nohumentani a'amu Jisasɨmo inɨngkamotofo somo tɨpema'mentɨhwonefoho. Hofɨko'nji nohumentanɨngkuhwoni sɨkuno aho anga'no hopi'nono nom'ne mta'ni hufa'u neyakolo'mentisofoho. Anɨtuye Towahuno sohwo a'amu somo kakoe huno uyahonɨngki hofɨko Poulɨmo ulɨmentohofi, Kɨko Jelusalem sopono nowakehotoho. Ose ulɨmentohofofoho. Nakwoe sɨkuno hano iyoso'no imo'nɨngkahonɨngki nakwo angopono nulɨko'mentani umentɨhwonefoho. A'amu Jisasɨmo inɨngkamotofo sohwa hofɨkoe ape sofanji mehomi'nji nakumo mitɨmomɨngo sopo nehwojamentohofofoho. Osopo nakwo hwomtame ehumentani Anɨtumo isamoyoka ulɨmentɨhwonefoho. Ose ulontani nakwo hnnɨmentɨhwoni, Nakwoe a'amu soku mpanɨmno, hnnɨmentɨhwonefoho. Nakwo yofayokinomo nokotosahonɨngkuhwoni hofɨko angopono umentohofofoho.

Ango Sisaliya sopo hwe Akapos sohwo Poulɨmo hungkuno ulɨmentisofoho.

Nakwo ango Taiya ulɨko'mentani nowekontani ango Toulemes sopo i'mofapmmentɨhwonefoho. Osopo a'amu Jisasɨmo inɨngkamotofo so'nji noswo'nontani sɨkuno anga'no fosyawo'mentɨhwonefoho. Mo'nɨngkanta ango Toulemes ulɨko'mentani nowekentani ango Sisaliya sopono i'mofapmmentɨhwonefoho. Osopo nakwo Filipɨye angomo humamentɨhwonefoho. Filip huhwo sohwo Anɨtuye hungkuno lutɨhwamojo hweho. A'amu Jisasɨmo inɨngkamotofo ango Jelusalemmo humamotofoso Filipɨ'nji nom'ne hwe aho fehohnjo hopi'nono nom'ne mta'ni anga'nohino sohwanjiapousel sohwamne'no ufo'mayo'ne uhwosopo'mentohofofoho. Filip kakoe mehomi musijo osofosofahu'nohino fafoho. Hofɨko Anɨtuye hungkuno lutɨhwamotofofoho. 10 Osopo nohumentanɨngkuhwoni sɨkuno fiso neyokolofahonɨngki hwe fihwo Anɨtu hungkuno uyahonɨngki lɨmojo Jutiyanta'ango sohwo kakoe yofe Akaposɨyoho. Kako i'mofapmmentisofoho. 11 Nonetɨmanto Poulɨye ahuloho nomanto kakoe sɨfe aho'nji kilo'nonto ulɨmento, Anɨtuye Towahuno Wopɨngo ole ntohoho. Olo ahuloho lo'nji kakwo'yohwo sohumo a'amu Jutaso Jelusalem ango sopo olo pa'nyolo nokilohofɨkuji a'amu temtitofo kengo sohwafe ahomo woho'nokisyantɨfeho. 12 Ose nelahonɨngki upo'nontani nakwo a'amu Jisasɨmo inɨngkamotofo nom'ne so'nji Poulɨmo yokumpohn'nyo ole ulɨmentɨhwone, Kɨko Jelusalemne'no nosohotoho. 13 Ose ulahonɨngkuhwoni Poul nalɨmento, Sekwo humotaho peho'no sontantɨkwofo. Nje sɨmeho tango nɨyohoho. Jelusalem ango sopo ngkimo impe intofanɨhufijoso Jisasɨye yofe ho'nomayo'ne pe'nɨmeso wopɨngofoho. 14 Ose nelahonɨngki nakwo Poulɨmo nom'ne huno uyoso hopo'maho. Oso'no nakwo apa'no majofoho. O'o, ole ulɨmentɨhwoni, Yo'mayo Anɨtu yoneso umo'nɨmontonoho. Ose ulɨmentɨhwonefoho.

Jelusalemmjo hwe engo sohwamo Poul kakoe hungkuno ulɨmentisofoho.

15 Hwangku sohonta nakwoe ho'yango ito'no nuhu'mokontani Jelusalemne'no ulɨko'ma'mentɨhwonefoho. 16 A'amu Jisasɨmo inɨngkamotofo fehohnjo nakwo'nji umentɨhwonefoho. Hofɨko Nasounɨye angomo ipenemotawomentohofofoho. Oso hwe Saipɨlosnta'ango huhwo sohwo hohonta Jisasɨmo inɨngkamojo hweho. Nakwo kakoe angomo humamentɨhwonefoho. 17 Humamentɨhwoneso Jelusalem ango sopo i'mofopahonɨngkuhwoni a'amu Jisasɨmo inɨngkamotofoso nonahonontɨfi sɨmeho wopɨngo umo'nɨmentisofoho.

18 Mo'nɨngka nakwo Poulɨ'nji Jemɨs sohumo uhwonyo'ne umentɨhwonefoho. A'amu Jisasɨmo inɨngkamotofoso hofɨkoe hwe engo sohwanji pmmentohofofoho. 19 Poul a'amu sohwamo, Nje a'amuhwafo ulonto, yo'mayo wopɨngo Anɨtu a'amu temtitofo kengo somne'no uloho'mentiso so'no yoloho ulɨmentisofoho.

Poul kako hwe engo sohwafe hungkunomo tɨfi inɨngkawento Anɨtuye ango engo somo humentisofoho.

20 Oso hiso'no nupa'nontɨfi Anɨtumo isamoyoka ulɨmentohofofoho. Ose ulontɨfi Poulɨmo ulɨmentohofi, Nɨngkwahwo. Kɨko huno moi'wonoho. A'amu Juta pi'nɨngo engoso Jisasɨmo inɨngkamotofofoho. Oso a'amu hiso Mousesɨye honɨngkano hungkuno hohontajo somo yokumpohn'nyo mokosyohumawo'nɨngkohofɨhwafoho. 21 A'amu fehohnjo oso a'amu homo somo kikine'no hungkuno hwasyo ulɨmentohofofoho. Ole ulɨmentohofi, Poul a'amu Juta ango kengopo humamotofo somo Mousesɨye hungkuno hohontajo somo tɨfi inɨngkakutoho ulɨwo'nɨngkiso hweho. Ole ulalofi, Sekwo sekwoe mehomi sohwamo a'apaho sɨhu kolofɨkutoho. Sekwo oso honɨngkano hungkuno hohontajo somo apa'no tɨfi inɨngkakutoho. Ose ulalofoho ulɨmentohofofoho. 22 Oso'no pipi yanehwono. Poul ntopohoho upo'nantɨfeho. 23 Oseso nakwo kilalokuhwoneso kɨko tɨfi finɨngkayo. Hwe osofosofahu'nohino sohwa a'amu Jutafe yahinomo inɨngkayo so'no Anɨtumo ole ulɨmalofi, Anɨtu kɨko nehonontanɨngkiji oloso uyantane'yɨhwono. Ose ulɨmalofɨhwafoho. 24 Kɨko oso hwe sohwamo ufohi'nɨngkohoji hofɨko'nji oso yahino kiho'maso semokiyo so'no fiyɨmno. Kɨko hofɨkine'no hamniyoho ho'nasyohoji hofɨko oso yahino nɨhu'nahone ifijoso a'amu huno ole uyono. Kikine'no upa'nɨmalofoso hungkuno hwasyofoho. Kɨko Mousesɨye hungkunomo inɨngkowalokuno so'no hofɨko uhwonantɨfeho. 25 A'amu temtitofo kengoso Jisasɨmo inɨngkawowo'nɨngkohofo somne'no hungkuno nto kotoku'malohwone so'no iyoswo mtɨ'mokuyahojɨmalohwonefoho. Ole mtɨ'mokumalohwoni. Yahu yɨhufo a'amu nom'nehwo hwoso sohumo uyɨfijoso sekwo nonɨngkutoho. Honɨyoso nonyo'eno. Tongo yahu tɨ'wangomo nano jɨlɨpopijoso nonyo'eno. Yo'mayo honɨngkano akngkilɨke iyo'eno. Ose ulɨmentohofofoho. 26 Oso'no mo'nɨngkanta Poul oso hwe osofosofahu'nohino sohwamo utɨmanto oso yahino kiho'maso imokiyo so'no imentohofofoho. Ose yontɨfi hofɨko Anɨtuye ango engo somo nohotoswontɨfi hwe engo sohwamo oso yahino kiho'maso imokiyo so'no moi'wo imo'none so'no ulɨmentohofofoho. Oso sɨkuno somo Anɨtumne'no a'amu anga'no anga'nohino tongo hu'meesiyo'ne uyantɨfeho.

Anɨtuye ango engo somo a'amu Juta sohwa Poulɨmo aho kemokosyohumamentohofofoho.

27 Sɨkuno aho fehohnta'ni hopi'nono nom'ne mta'ni hufa'u moi'wo umo'nɨmonto yahonɨngki a'amu Juta hwaho Esiyanta'ango sohwa Poulɨmo Anɨtuye ango engo somo uhwonɨmentohofofoho. Nuhwonontɨfi hwe moya'mi hopi'nono ulɨkafontɨfi Poulɨmo aho ko'mentohofofoho. 28 Nokentɨfi hofɨko mango mohm'no lontɨfi ulɨmentohofi, Sekwo a'amu Isɨlael soku, fonefo'mapmno. Olo hwe lohwo kako ango'meemo emoyonto nakwoe yahinomne'no Mousesɨye honɨngkano hungkunomne'no olo ango engo lomne'no hungkuno wonyo lɨwo'nɨngkiso hweho. Oso'nohino'maho. O'o, olohonta kako a'amu temtitofo kengo sohwamo olo ango wopɨngo lomo ipemotapiso so'no ango wonyo kiho pa'nyo imo'nɨngkohoho. Ose ulɨmentohofofoho. 29 Oso hungkuno hiso hwapɨngo ole. Hofɨko Poulɨmo uhwonɨmentohofoso kako a'amu temtitofo kengo ango Efesosnta'ango Tɨloufimos oso hwo'nji ango Jelusalem nohumentanɨngki uhwonontɨfi hwasyo ole syafɨhu'mentohofi, Poul oso a'amu sohwanji Anɨtuye ango engo somo ipemotaswohoho. Ose lɨmentohofofo.

30 Oso'no Jelusalem mta'ango a'amu hopi'nonohino yomo yontɨfi mango engo lɨwo'nontɨfi yohoto yohotofo mjaloho'nɨmɨwentɨfi uhu'mokumentohofofoho. Hofɨko Poulɨmo aho kemotaswopahonɨngkofi Anɨtuye ango engomjo hoku'yo hopi'nono pɨjwahumentohofofoho.

Hwe itokuso'njo sohwamo mokosyohumayo yofe engo'njo sohwo Poulɨmo utɨma'mentisofoho.

31 Hofɨko Poulɨmo wofonjosyantɨfi ikujoho posontanɨngkofi hwe yofe engo'njo itokuso'njo mokosyohomayo sohumne'no hungkuno ho'nɨmentisofoho. Hofɨko ole ulɨmentohofi, A'amu Jelusalem hofɨko ikujoho fongki'nalokwofo. 32 Ose upa'nontɨfi hwe yofe engo'njo sohwo kakoe a'amu itokuso'njo sohwamo nomanto a'amu uhu'mokiyo sopo komo'no pmmentohofofoho. A'amu Jutaso hwe yofe engo'njo sohwo'nji a'amu itokuso'njo sohwanjimo uhwonontɨfi hofɨko Poulɨmo apa'no ikujoho mafongku'mentohofofoho. Hofɨko uyohohu'mentohofofoho. 33 Hwe itokuso'njo yofe engo'njo sohwo Poulɨmo aho nokento kakoe a'amu sohwamo ulɨmento, Sekwo ahwomo nano hufa'u nomafɨkuji hwe lohumo hmtofahumno. Ose ulonto ulohonɨmento. Olo hwe lohwo tɨhwolo. Peho imasoto. 34 Ose ulohonɨngkahonɨngki a'amu fehohnjo hungkuno anga'no lontanɨngkofi a'amu nom'ne sohwa hungkuno kengo joho lahonɨngkofi hungkuno engo ho'nɨmentisofoho. Hungkuno pi'nɨngo engo ho'nɨngkahonɨngki hwe yofe engo'njo sohwo yoloho hwapɨngoso mupa'nɨmmentisofoho. Oseso kako itokuso'njo sohwamo ulɨmento, Poulɨmo itokuso'njo sohwafe angomo motasɨmno. 35 Ose ulahonɨngki oso ango homo somo kotasiyo sopo nomotosahonɨngkofi a'amu pi'nɨngo engo kakimo wofonjosyano lahonɨngkofi a'amu itokuso'njo sohwa utɨmotasɨmentohofofoho. 36 A'amu pi'nɨngo engoso tɨfi inɨngkasontɨfi ulɨmentohofi, Fonjahumno.

Poul a'amu Juta somo kakoe hungkuno ulɨmentisofoho.

37 Hwe itokuso'njo sohwa hofɨkoe angomo womotoswantɨfi yahonɨngkofi Poul hwe yofe engo'njo sohumo ulɨmento, Hungkuno wakilɨmonne'no yohono. Ose ulahonɨngki hwe huhwo sohwo ulɨmento, U, Kɨko Ngkɨlik hungkuno huno'njo hwosilaho. 38 Ngko huno ole syafɨsyohono. Kɨko hwe engo Ijip mta'ango sohwosi a'amu hwaho mokosyohumayo sohwamo wafongku'monji yonji kakoe a'amu hosɨmnofoua tausen (4000) sohwanji hwaho a'amu anepono ipemotawomentohino hwosoho. 39 Ose ulahonɨngki Poul ulɨmento, Ngko a'amu Juta hwo'nyoho. Nje hwapɨngoso hwaho Silisiya ango mɨkunɨmposo Tasosnta'ango hwo'nyoho. Nje a'amuhwe, olo a'amu lohwamo ulɨmonne'no yohono. Wopɨngotaho. 40 Ose ulahonɨngki hwe yofe engo'njo sohwo eno ulahonɨngki Poul kotasiyo sopo lohofonto a'amumne'no mampi'nyo humayo'ne aho ho'noma'mentisofoho. Mampi'nyo yahonɨngkofi Poul Hipɨlu hungkuno'nji ulɨmentisofoho.

Copyright information for `APZ