Acts 23

A'amu Jutafe ‘kaunɨsol’ sohwamo Poul kakoe hungkuno lutɨhwamentisofoho.

Poul a'amukaunɨsol syoho'njo sohwamo tɨmo yokumpohn'nyo uhwononto ulɨmento, Nje hwe sɨfahwe, Anɨtu nohonontanɨngki yo'mayo imoteso mjɨmɨwenji olohontajo'nji ole nnantofoho, Ngko honɨngkano wonyo'njo hwonɨ'maho. Ose nnantofoho. Ose ulahonɨngki Anonaiyas tajo ango syoho'njo yofe engo'njo sohwo kako'njo sopo humalowentanɨngkofo sohwamo ulɨmento, Poulɨye mangomo fongkupmno. Ose ulahonɨngki Poul ulɨmento, Kɨko a'apaho wopɨngo'njo hwosoho. Sɨmeho mo'mo pisakino'njo hwosoho. Anɨtu wakufonjono. Kɨko nje hungkunomne'no ito'no menɨhwajiyo'ne hwosi nohumanji honɨngkano ito'nohino somo hwotoho fenji nɨfonjohino.

Ose ulahonɨngki a'amu Poulɨ'njopo lohofontɨfi lɨmentohofi, Kɨko Anɨtuye hwe yofe engo'njo sohumo sitofo lulalokuno.

Ose ulahonɨngkofi Poul ulɨmento, Nje a'amufo. Ngko Anɨtuye hwe yofe engo'njo sohune'no huno maniyohoyohoho. Huno ole niyohoho Anɨtuye hungkuno ole nalɨmento, Sekwo a'amu semokosyohumayo somo hungkuno wonyo ujo'eno. Oso'no ngko huno niyohoho.

Ose ulonto Poul uhwonɨmentisoso, A'amukaunɨsol syoho'njo sohwa fehohnjo a'amu Satɨyusiyoho. Fehohnjo a'amu Falisiyoho. Ose uhwonontokaunɨsol a'amu sohwamo mango engo ulɨmento, Nje a'amu hwafo, ngko a'amu Falisi hwo'nyoho. Nje mpohwo a'amu Falisi hweho. A'amu poyo pe'nyoso apa'no lɨkapitnnefoho. Olo hilo so'no ngko hontohumaleno. Oso'no ngko a'amu somo oso hungkunoso lutɨhwawo'nɨngkohe hwo'nyoho. Olo hilo so'no sekwo ngkine'no hungkuno ho'nosyalokwofo.

Ose ulahonɨngki a'amu Falisi sohwanji a'amu Satɨyusi sohwanji yoka hnnontɨfi husilo'mentohofofoho. Hwapɨngoso a'amu Satɨyusi sohwa ole lɨwo'nɨngkohofi, A'amu poyo pe'nyoso apa'no molɨkapitnnohofo. A'amu ahwomo mta'ango so'nji towahuno ntnne so'nji mohumuyoho. Ose lɨwo'nɨngkohofɨhwafoho. I oso'no a'amu Falisi sohwa oso hungkuno hufa'u so'no hwasyofoho lɨwo'nɨngkohofofoho. Hofɨko olo hilo somo sɨmeho uyɨwo'nɨngkohofi, A'amu poyo pe'nyoso apa'no songo lɨkapitnnefoho. A'amu ahwomo mta'angoso towahuno ntnne'no humalofo. Ose lɨwo'nɨngkohofofoho. Oso'no hofɨkoe yokaso engo imo'nɨngkahonɨngki a'amu Falisi fehohnjo honɨngkano hungkuno mesyɨlutɨhwayo sohwa nolɨkafontɨfi yokumpohn'nyo ulɨmentohofi, Poul kako wonyo miyɨwo'nɨngkiso hweho. Hwe ahwomo mta'ango hwolɨkeno towahuno hwolɨkeno Poulɨmo ulɨmaso'manji kakoe syohofoho.

10 Ose ulahonɨngkofi yokaso mɨkunɨmposo imo'nɨngkahonɨngki hwe itokuso'njo yofe engo'njo sohwo ole syafɨhu'mento, a'amu sohwa Poulɨmo yokino yohosiyo hohnta'ni ifijo so'no wope'nɨmtonoho. Ose syafɨhu'mentiso so'no iyoho unɨngkahonɨngki kakoe a'amu itokuso'njo sohwamo ulɨmento, Sekwo oso a'amu sohwamo ajwomo'mo nowekuji Poulɨmo utɨmafɨkuji sekwoe angomno fɨpemotasɨmno. Ose ulɨmentisofoho. 11 Mo'nɨngkanta sɨkwo'miyo somo Jisas Poulɨ'njopo nolohofonto ulɨmento, Yokumpohn'nyo hmmo'nyo. Ango Jelusalem lopo ngkine'no hungkuno yokumpohn'nyo ulɨmahnnofoho. Oso pa'nyo ango Loum sopo ngkine'no apa'no ulɨmonnoho. Jisas ose ulɨmentisofoho.

A'amu Juta Poulɨmo wofonjosyano nolontɨfi hungkuno nano mtito'mentohofofoho.

12 Mo'nɨngka imɨngo ne'nji a'amu Juta nuhu'mokontɨfi hungkuno yokintahopono lontɨfi ole mtito'mentohofi, Nakwo Poulɨmo wofonjosyano. Kako songo nohumentanɨngkuhwosi nakwo wopayo'nji mijo'nji monanehwono. Ose mtito'mentohofofoho. 13 Oso a'amu huhwo sohwa oso hungkuno mtito'mentohofo sohwa a'amu we'e pi'nɨngo'maho. A'amufoutimo (40) yakolonoho. 14 Ose mtitofontɨfi hofɨko nowentɨfi a'amu tajo ango syoho'njo sohwanji hwe engo sohwanji oso hwamo ulɨmentohofi, Nakwo hungkuno yokintohopono lontani ole mtitofɨhwono, Nakwo Poulɨmo wofonjosyantane'no yɨhwono. Kako songo nohumentanɨngkuhwosi nakwo wopayohwa mijohwa monanehwono. 15 Oso'no sekwo a'amukaunɨsol syoho'njo sohwanji sekwo hwe itokuso'njo yofe engo'njo sohune'no mo'nɨngka hungkuno filɨhwatɨmno. Ole ulɨmno, Nakwo Poulɨmo nom'ne hungkuno ulohonantane'no yɨhwono. Oso'no olopo fɨpemotape. Ose ulɨmno. Oseso nakwo honɨngkanopo Poulɨne'no nohontohumehwasi fonjasyoso olopo maponehoho. Ose ulɨmentohofofoho.

16 Olo hilo so'no Poulɨye koifahwo nupa'nonto nowento a'amu itokuso'njo sohwafe angomo noswonto a'amu Juta Poulɨmo nofonjosyane'entɨfi lɨmentohofo so'no Poulɨmo ulɨmentisofoho. 17 Ose ulahonɨngki Poul a'amu mnokino manji'mofo'njo sohune'no joho ulonto ulɨmento, Olo hwomu lohwo hwe itokuso'njo yofe engo'njo sohune'no hungkuno ulɨmte'no yohoho. Osopo fipemotaso. 18 Ose ulahonɨngki hwe huhwo sohwo ipemotasonto hwe yofe engo'njo sohumo ulɨmento, Poul impo'angomjo sohwo ngkine'no joho ntonto ntohoho, Olo hwomu lohwo hwe itokuso'njo yofe engo'njo sohune'no hungkuno ulɨmte'no yohoho. Osopo fɨpemotaso. Ose ntohoho.

19 Ose ulahonɨngki hwe yofe engo'njo sohwo hwomu sohumo aho nokento siko'nohinopo ipemotawento ulohonɨmento, Pehofo wantɨmonnto. 20 Ose ulohonɨngki hwomu sohwo ulɨmento, A'amu Juta hungkuno ole mtitofohofo, Mo'nɨngkanta hungkuno ole wokilantɨfeho, Kɨkokaunɨsolɨ'njopo Poulɨmo fɨpemotape. Hofɨko Poulɨmo kakoe hungkuno hwapɨngo so'no ulane'entɨfi hwasyo poji yalokwofo. 21 Oso'no hofɨkoe hungkunomo kɨko inɨngkahutoho. Hwapɨngoso a'amufoutimo (40) hwofilo'nnyo sohwa hofɨko honɨngkanopo hiyaso humafɨkuji Poulɨmne'no wohontohumantɨfeho. Oso a'amu huhwo sohwa hofɨko ole mtitofohofi, Nakwo Poulɨmo wofonjosyano. Poul songo nohumentanɨngkuhwosi nakwo wopayohwa mijohwa monanehwono. Ose mtitofohofo. Kɨko eno ulohoji Poulɨmo uhwojɨso'manji honɨngkanopo wofonjosyantɨfeho. 22 Ose ulahonɨngki hwe yofe engo'njo sohwo hwomu lohumo yokumpohn'nyo ulɨmento, Olo hiloso ntohino so'no nom'ne a'amu somo nulohotoho. Ose ulonto hwomu sohumo uhwatɨmentisofoho.

Hwe yofe engo'njo hwaho mokosyohumayo Felikɨs sohwoepono Poulɨmo ipemotawomentohofofoho.

23 Nuhwajonto kako hwe hufa'u mnokino manji'mofo'njo sohwa'umne'no joho ulonto ulɨmento, Siko a'amu itokuso'njotu hantɨlet (200) sohwanji nom'ne a'amu ahwomo yahuponjo kehumawo'nɨngkohofosefenti (70) sohwanji nom'ne a'amu hosɨmno'njotu hantɨlet (200) sohwanji hano iyo'ne ito'no fesyohumunyo. Olo sɨkwo'miyo lomo, (9kɨlouk), osomo sekwo ango Sisaliya sopono fɨwanɨmno. 24 Nom'ne ahwomo yahuso Poul kehumayo'ne fesyohumunyo. Sekwo Poulɨmo ito'no ipemotasokuji hwe yofe engo'njo hwaho mokosyohumayo Felikɨs sohune'no utɨmotapmno. 25 Ose ulonto kako iyoswo ifalifaliyo ole mtɨ'mokumento,

26 Ngko Kɨloutiyos Lisiyasɨ'ni olo iyoswo loso hwe wopɨngo yofe engo'njo hwaho mokosyohumayo Felikɨs sohwosɨmne'no mtɨ'mokalokweno. Nje Felikɨs. 27 A'amu Juta olo hwe Poul lohumo nokentɨfi wofonjosyano lontɨfi imalofofoho. Kako a'amu Loum hweho upa'nɨmale so'no ngko nje a'amu sohwanji nowentani utɨma'malohwonefoho. 28 A'amu Juta Poulɨmo wonyo hwosoho ulɨmalofo so'no oso hwapɨngoso huno waniyono lonji Poulɨmokaunɨsol sohwafepono ipemotawomalefoho. 29 Osopo huno ole tɨpema'male, Hofɨko hofɨkoe honɨngkano hungkuno somne'no Poulɨmo ulɨmalofofoho. I oso hiso'no poyo mape'nonehoho. Impo'angomo mintofahufitnnehofo. 30 Hungkuno ole nɨ'ma'masofoho. Hofɨko Poulɨmo wofonjosyantɨfi imalofofoho. Ose upa'nonji ngko kikiyepono komo'no uyahotɨmalefoho. A'amu Poulɨmo hungkuno ulɨmalofo sohwamne'no ulɨmalefoho. Hofɨko Poulɨmne'no hungkuno hi'njo hwa'manji hofɨko jɨje sɨmanopo walɨfe. Osohopeho.

Iyoswo ose mtɨ'mokumentisofoho.

31 A'amu itokuso'njo sohwa hwe yofe engo'njo sohwoe hungkunomo tɨfi inɨngkawentɨfi oso sɨkwo'miyo somo hofɨko Poulɨmo ango Antipatɨlis sopono ipemotawomentohofofoho. 32 Iyoho longkonɨngkahonɨngki a'amu itokuso'njo sohwa hofɨkoe angomno asomo umentohofofoho. A'amu ahwomo yahupo kehumayo'njo sohwa Poulɨmo ango Sisaliya'no ipemotawomentohofofoho. 33 Hofɨko Sisaliya i'mofawentɨfi hofɨko iyoswo motawomentohofoso hwe yofe engo'njo Felikɨs osomo uyontɨfi Poulɨmo hwe engo sohwo'njopo uhwojamentohofofoho. 34 Felikɨs iyoswo atofo lonto Poulɨmo ulɨmento, Kɨko ntɨ'mta'ango hwosilo. Ose ulahonɨngki Poul ulɨmento, Hwaho Silisiyanta'ango hwo'nyoho. 35 Ose ulahonɨngki Felikɨs ulɨmento, A'amu kikine'no hungkuno hi'njo sohwa i'mofapɨkujo'no jɨje hungkuno upa'nɨmonnoho. Ose ulonto, kakoe a'amu sohwamo ulɨmento, Heloutɨye ango engo sopo wohumano. Osopo sekwo uhwontohumamno. Ose ulɨmentisofoho.

Copyright information for `APZ