Acts 28

Ango Malɨta sopo Poul humamentisofoho.

Nakwo hwaho hopo sopo ito'no i'mofɨwentani hwaho hiso yofe Malɨtayoho upa'nɨmentɨhwonefoho. A'amu oso hwaho sopo humamotofoso nakumo wopɨngo nefo'ma'mentohofofoho. Ifoyo syahonɨngki kwongkwongo nesahonɨngki hofɨkoe a'apaho toho umokinɨfe lontɨfi toho nakumne'no enantohmmentohofofoho. Poul kako toho nomanto mefontanɨngki homa toho uhu'nɨngkahonɨngki toho mta'ni noswaponto Poulɨye ahomo toho lo'mentisofoho. A'amu hopo sopo humamotofoso homa Poulɨye ahomo lojɨjwosyowahonɨngki uhwonontɨfi lɨmentohofi, Olo hwe lohwo a'amumo fonjahumasohwolɨkeno. Kako mijomo poyo mape'nyoso'ne homa toho ulokwoho. A'amumo fonjasiyo so'no poyo pe'nyoso wopɨngofoho. Wape'nɨmtonoho. Ose lahonɨngkofi Poul homa tohomo ilojaefonto kakoe a'apaho wonyo mmo'nɨmmentisofoho. A'amuso Poul poyo pe'nyo so'no hontohumantɨfi syafɨhu'mentohofi kakoe aho engo kahwoso'no nopɨhwasi wape'nɨmtonoho. Oseso hofɨko wonyopi hontohumantɨfi Poul wopɨngo humentanɨngki uhwonontɨfi lɨmentohofi, Olo hwe lohwo kako Anɨtu pa'nyo hweho. Ose lɨmentohofofoho. Oso hwaho nakwo i'mofapmmentɨhwone sopo hwe hwaho hopi'nonohino mokosyohumayo sohwo kakoe hwahoponoho. Oso hwe huhwo sohwo kakoe yofe Papɨliyasɨyoho. Kako kakoe angomo nomenehumajonto osopo wopɨngo nelohofahonɨngki sɨkuno hufa'u sɨhune humamentɨhwonefoho. Papɨliyasɨye kanɨngkwohwo mnokino'njohwo humamentisofoho. Kakoe a'apaho tohohmtnno'njo iyoho aswo'njoho. Oseso Poul kako'njopo nowento mnokinopo aho kisusyonto Anɨtumo jomo ulonto wopɨngo umokumentisofoho. Ose yahonɨngki a'amu hwaho hopo sopo humamotofoso nuhwonontɨfi a'amu hopi'nono mnokino'njoso nopahonɨngkofi Poul a'amu hisomo wopɨngo umokumentisofoho.

Poul Molɨtanta'ango sohwo Loum i'mofamentisofoho.

10 Oso hiso'no hofɨko wopɨngo'nohini naloho'mentohofofoho. Oso hwaho hopo sopo nohumentanɨngkuhwone hamno hufa'u sɨhune neyakolo'mentisofoho. Ulɨko'ma'mentɨhwone sohonta nakwo yo'mayo umofonyo iyoso a'amu hiso hofɨko yofayokinomo hu'meehumentohofofoho. Oso yofayokino hiso ifofo engo so'no oso hwaho hopo sopo hontohumamentohofofoho. Oso yofayokino somo nokotosontani umentɨhwonefoho. Yofayokinoso ango Alekɨsantɨliyanta'angofoho. Hntole hohnta'ni anɨtu pa'nyo huyo'mango hufa'u'njoponoho. Susɨye hwomu hwa'uye huyo'mangofoho. 12 Nowekentani ango Silakiyus i'mofopontani osopo sɨkuno hufa'u sɨhune humamentɨhwonefoho. 13 Osopo nta'ni nulɨko'mentani nowentani ango Lejiyom i'mofapmmentɨhwonefoho. Mo'nɨngkanta ifofo hohujo hohnta'ni sopahonɨngki sɨkuno hufa'u memjaofahonɨngki nakwo ango Puteyouli i'mofapmmentɨhwonefoho. 14 I'mofopontani osopo a'amu Jisasɨmo inɨngkamotofo somo tɨpemahonɨngkuhwoni nalɨmentohofi sekwo nakwo'nji fosyohumamno. Ose nelahonɨngkofi Sante anga'no neyokolofahonɨngki nakwo ango Loummne'no honɨngkanomo umentɨhwonefoho. 15 A'amu Jisasɨmo inɨngkamotofo Loum mta'angoso nakwo sopontanɨngkuhwoni nupa'nontɨfi hofɨko pɨkwato lohofontɨfi ango Apiyos wopayo mpe yɨwo'nɨngkohofo Ango Fosyowe Hufa'u Sɨhune'njo sopo swo'nɨmentɨhwonefoho. Poul a'amu somo nuhwononto Anɨtumo isamoyoka ulonto sɨmeho wopɨngo umo'nɨmentisofoho.

16 Nakwo ango Loum i'mofopahonɨngkuhwoni a'amu Loum mokosyohumayo sohwa nalɨmentohofi, Poul kako'ne ango tɨpemahwosi wohumano. Hwe itokuso'njo fihwo uhwontohumayo'ne kako'nji wahumuyo. Ose nalɨmentohofofoho.

Ango Loum sopo Poul Anɨtuye hungkuno lutɨhwamentisofoho.

17 Sɨkuno hufa'u sɨhune memjaofahonɨngki Poul a'amu Jutafe hwe engo sohwamne'no joho ulahonɨngki hofɨko nuhu'mokahonɨngkofi Poul ulɨmento, U, Nje tatohwosafo. Ngko nakwoe a'amu Juta somo wonyo mmokiyo hwo'nyoho. Neyakwosafe honɨngkano hungkunomo hwotoho mafiyo hwo'nyoho. I a'amu Juta ango Jelusalem sopo ngkimo impe siki ntofontɨfi a'amu Loum sohwafe ahopo ho'nanɨhumentohofofoho. 18 A'amu Loumɨso nje hungkunomo nupa'nontɨfi hnnɨmentohofi, oso honɨngkanoso poyo pe'nyo'ne'maho. Oso'no hofɨko nonɨsɨkwojane'entɨfi, 19 a'amu Jutaso nakwolaho lɨmentohofofoho. Oso'no nom'ne honɨngkano ane so'no hwe engo Sisa nje hungkunomo wonɨpa'nono lɨmentohefoho. Ngko nje a'amu Juta somo hungkuno nom'ne mujo hwo'nyoho. 20 Oso hwapɨngo hiso'no sekune'no joho selohono. Ngko sekumo sehonɨ'mo hungkuno wosejapmne'no yohono. Nakwo a'amu Isɨlael so'nyuye neyakwosa hwe ahwomo mta'ango sohumne'no hontohumamotofofoho. Oso hwe huhwo sohwo nto pmmentiso so'no sɨmeho uyalokweno. Oso hiso'no olo impe hiloso ngkimo kenɨsyohumaho.

21 Ose ulahonɨngki ulɨmentohofi, A'amu Jutiyanta'angoso jɨje hungkuno so'no nakune'no iyoswo mamtɨ'mokumentohofofoho. A'amu Jutaso mapiyontɨfi kikimne'no hungkuno malonetɨhwammentohofofoho. 22 I oso'no a'amu Jisasɨmo inɨngkamotofo somne'no a'amu fihwa ango hopo hopo wonyoponoho lɨwo'nɨngkohofo so'no nakwo jɨje hungkuno jɨje mango mta'ni wokupo'nano.

23 Ose lontɨfi oso hiso'no sɨkuno ho'nahumentohofofoho. Oso sɨkuno homo somo a'amu pi'nɨngo engo ango Poul humawo'nɨngkiso sopono pmmentohofofoho. Poul Anɨtu nakumo yokumpohn'nyo nemokosyohumayo'ne lutɨhwamentisofoho. Hofɨko Jisasɨmo sɨmeho hi'ntnnono uyɨfitnne'ento Mousesɨye honɨngkano hungkuno'nji a'amu Anɨtu hungkuno uyahonɨngki lɨmotofo sohwafe hungkuno ntnne mta'ango Jisasɨmne'no lutɨhwamentisofoho. Oso hungkunoso imɨngo mta'angoso ne'no lontanɨngki mofehi'nyo nɨngku'nɨmentisofoho. 24 Oso hungkunoso a'amu fehohnjo sohwa nupa'nontɨfi sɨmeho hi'ntnnono umentohofofoho. A'amu fehohnjo sɨmeho hi'ntnnono muyofoho. 25 Oso'no hofɨko hungkuno kengo kengo hnnɨngkahonɨngkofi Poul ulɨmento Anɨtuye Towahuno Wopɨngo hohontajo hwe Aisaiya sohumo hungkuno uyahonɨngki neyakwosamo hungkuno nehopi ole ulɨmento,

26 Kɨko oso a'amu nontɨfepono uhuji ole uso, Sekwo hungkuno upa'nɨngkuji hwapɨngo neso mupa'nɨfitnnehofo.
Sekwo yo'mayo nuhwonɨngkuji neso muhwonɨfitnnohofo. Ose uso.
27 Anɨtu Aisaiyamo ulɨmento,

Oso a'amu hiso hofɨko huno anefoho.
Hofɨkoe haloho pujomokosyohumunɨmentohofofoho.
Hofɨko tɨmo pijiyo'nnyofoho.
Ose miyo'njo yontɨfijontentesi ito'no nuhwonɨngkutnnesohilo.
Hofɨko haloho mapujomokosyohumunyo'njo yontɨfijontentesi nupa'nɨngkutnnesohilo.
Oseso hofɨkoe huno ito'no uyɨhwonesohilo.
Hofɨko ikenjaofɨkuji ngkiyepono pontɨfijontentesi ngko wopɨngo umokumnesohilo.
Aisaiya ose mtɨ'mokumentisofoho.

28 Ose ulonto nom'ne hungkuno ulɨmento, Sekwo upa'nɨmno. Olo hungkunoso Anɨtu a'amufe wonyo wae yaofɨhwosi kakoe a'amu ne umokiyo so'no olohonta a'amu temtitofo kengo somne'no nto lɨhwajɨmaho. Hofɨko nupa'nɨngkuji tɨfi unɨngkafe.

29 Ose ulahonɨngki a'amu Jutaso nohumpentɨfi hungkuno ikujoho hopa hnnɨmentohofofoho.

30 Soswo hufa'u uyokolofontanɨngki Poul oso ango sopo humamentisofoho. Ango kakwo'yohwo sohumo hamniyoho uyɨwo'nɨmentisofoho. Nohumanto a'amu kakimo jomo u'mahonɨngkofi wopɨngo uloho'mojofoho. 31 Poul a'amu somo Anɨtu yokumpohn'nyo nemokosyohumayo'njo hwe engo Jisas Kɨlais ntnne'no hungkuno lutɨhwamojofoho. Kako hungkuno yokumpohn'nyo ulahonɨngki hwe nom'nehwo mopɨjumo'mmentisofoho.

Hungkuno osohopeho. Ngko Lukɨ'ni mtɨ'mokohono.

Copyright information for `APZ