Acts 4

Pita'nji Joun'njimo impe intofahumentohofofoho.

Pita'nji Joun'nji a'amu somo oso hungkunoso ulontanɨngki a'amu tajo ango syoho'njo sohwanji a'amu tajo angomjo uhwontohumayo sohwafe hwe engo so'nji a'amu Satɨyusi sohwanji i'mofapmmentohofofoho. I'mofapontɨfi sɨmano hintotohino umnɨmentisofoho. Hwapɨngoso Pita'nji Joun'nji siko a'amu somo Jisas poyo pe'nɨmentiso sohwo apa'no songo lɨka'mentisofoho lutɨhwamentisiyefoho. Oseso a'amu hopi'nono poyo pe'nɨfijoso hwangku nolɨkapitnnefoho. Sɨmano hintotohino umnɨngkahonɨngki mofehi'nyo ukwo'mokumonto yahonɨngki oso a'amu sohwa Pita'nji Joun'njimo mo'nɨngkanta hungkuno ulane'entɨfi impo'angomo intofahumentohofofoho. Oso'no a'amu Pita'nji Joun'njiye hungkuno upa'nɨmentohofoso fehohnjo sikoe hungkunomo haloho yontɨfi Anɨtumo sɨmeho hi'ntnnono uyɨmentohofofoho. Oso a'amu we'e pi'nɨngo'maho. Oso hwe huhwo sohwafaif tausen (5000) hwafoho.

Hwe yofe engo'njo sohwafe tɨmo sopo Pita'nji Joun'nji loho'mentisiyefoho.

Mo'nɨngka imɨngo'nji a'amu yofe engo'njo sohwanji, Jutafe hwe engo sohwanji a'amu honɨngkano hungkuno lutɨhwamotofo sohwanji hofɨko Jelusalem uhu'mokumentohofofoho. Hofɨko nuhu'mokontɨfi a'amu nom'ne sohwanji hungkuno lɨmentohofofoho. A'amu nom'ne sohwa ole, Anas, hwe yofe engo'njo tajo ango syoho'njo sohwo'nji, Kaiyofasɨjanji, Jounjanji, Alekɨsanta'njoho. Nom'ne a'amu Anasɨye temtitofomjo sohwa hofɨko'nji uhu'mokumentohofofoho. Hofɨko Pita'nji Joun'njimo hofɨko'njo ajwo lopo uhumajontɨfi ulɨmentohofi, Oloso pipi imasiyoto. Tɨhwoe yokumpohn'nyo'nji tɨhwoe yofe'nji umokumahnnoto, hwe wopɨngosofo. Ose ulahonɨngkofi Anɨtuye Towahuno Wopɨngo Pitafe sɨmehomo uhulo'ofahonɨngki Pita ulɨmento, Sekwo hwe engo Isɨlaelnta'ango sohwasi, olohonta sekwo a'amu sɨfe wonyo'njo sohumo wopɨngo umokumalohwoyo so'no ehonɨngkohofotaho. 10 Oseso sekwo hopi'nono huno waseyono. A'amu Isɨlael hopi'nonohinoso huno wosyafɨhupɨfe. Jisas Kɨlais Nasaletnnta'ango sohwoe yokumpohn'nyoso olo hwe lohumo wopɨngo umokahonɨngki kako nakwo'njopo lohofoho. Oso Jisas huhwo sohumo sekwo iyomo fonjinto'ofosyahonɨngkofi Anɨtu poyo pe'nyo sohumo apa'no ulɨko'mentisofoho.

11 Olo sojo engkwosaho pa'nyo ango injuwo'nɨngkohofo sohwa hofɨko wonyofoho lontɨfi ho'nao'mentohofofoho.
Oseso olohontajo olo engkwosaho loso angomo sosofitofo'ne hwapɨngohwo imo'nɨngkohoho.
A'amu hohonta hungkuno mtɨ'mokumentohofoso olo hungkuno Jisasɨmne'no mtɨ'mokumentohofofoho.
12 Nom'ne hwe nefo'mayo'ne olo hwaho lopo mohumunyoponoho. Anɨtu nom'nehumo a'amu nakwoe wonyo wayo'ne muhwosopo'mmentisofoho. O'o, Jisas kako'nohino hweho. Pita ose ulɨmentisofoho.

13 Ose ulahonɨngki hofɨko Pita'nji Joun'njiye yokumpohn'nyo losomo uhwonontɨfi huno syafɨhu'mentohofi, Olo hwa'u siko ifalifaliyo mamtɨ'mokiyo hwa'uyoho. We'mjo pa'nyo hwa'uyoho. I oso'no siko iyoho munɨngkohoyohoho. Jisasɨye yokumpohn'nyo ma'masiyo hwa'uyoho. 14 Ose syafɨsyontɨfi uhwonɨmentohofoso hwe wopɨngo umokumasiyo sohwo siko'nji lohofontanɨngki uhwonontɨfi hofɨko hungkuno ane hwafoho.

15 Oseso Pita'nji Joun'njimo ulɨmentohofi, Siko mempono swohosɨsi osopo fosyohumunyo. 16 Ose ulontɨfi hnnɨmentohofi, Olo hwe lohwa'umne'no pipi yanehwono. Olo hwa'u olo wonyoangkafo loso yahonɨngki a'amu hopi'nonohino Jelusalem humalofoso oloso huno uyohoho. Nakwo oloso hiyaso pipi yane'elo. Awonoho. 17 I oso'no olo hungkuno nonje nonje ho'nɨmuyo'eno. Nakwo hungkuno yokumpohn'nyo ole ulano. Nom'ne hungkuno Jisasɨmne'no nom'ne a'amu somo nulohosiloho. 18 Ose hnnontɨfi sikimne'no joho ulontɨfi ulɨmentohofi, Siko nom'ne a'amu somo Jisasɨye hungkuno nulohosiloho. Yo'mayo Jisasɨmne'no lutɨhwahosiloho.

19 Ose ulahonɨngkofi Pita'nji Joun'nji siko ulɨmentisiyo, Nekwo Anɨtuye hungkuno ho'naofososo sekwoe hungkunomo tɨfi senɨngkowasoso Anɨtu kako huno pipi uyɨmtolo. Sekwo huno pipi seyohoho. 20 Yo'mayo wonyoangkafo Jisas imentiso uhwonɨmentɨhwoyoso hungkuno wopɨngo'nohini upa'nɨmentɨhwoyoso oso hiso'no nom'ne a'amumo mujoso pipilo. Awonoho.

21 Ose ulahonɨngki hofɨko hungkuno nom'ne tango'njo ulontɨfi Mpanino ulɨmentohofofoho. Hofɨko a'amumne'no iyoho unɨmentisofoho. Hwapɨngoso a'amu hopi'nono olo hilo so'no Anɨtuye yofe ho'noma'mentohofofoho. Oso'no Pita'nji Joun'njimo tohino uyɨhwaloho. 22 Olo hwe lohwo wopɨngo umokumasiyo lohwo kako hwe engo hweho. Kakoe soswofouti (40) yakolo'noho.

A'amu Jisasɨmo inɨngkawowo'nɨngkohofoso Anɨtuye hungkuno yokumpohn'nyo lohofɨhwasi lutɨhwane'entɨfi Anɨtumne'no jomo ulɨmentohofofoho.

23 Pita'nji Joun'nji nowenji sikoe a'amu'njopo i'mofawenji oso hungkuno hiloso ulɨmentisiyefoho. 24 A'amuso nupa'nontɨfi hofɨko sɨmeho yano inontɨfi Anɨtumo isamoyoka ole ulɨmentohofi, Ou Mpohwo, kɨko enemokosyohumayo hwosoho. Kɨko ahwomo'nji hwaho'nji mtɨ'mokumentohino hwosoho. Kɨko ayo'nji yo'mayo songo humayoso mtɨ'mokumentohino hwosoho. 25 Hohonta jɨje Towahuno Wopɨngo sohwo jɨje hungkuno nakwoe ajuyohwo Ntefit jɨje syoho kilohofiyo sohwoe mangomo mufohotofahonɨngkini Ntefit ole ulɨmento,

A'amu kengo kengoso sɨmeho tohino peho'no umnalofoho.
Nakwoe a'amu huno ito'no mosyafɨsiyo'njo peho'neto.
26 Hwe yofe engo'njo sohwa hontohumamentohofofoho.
Hofɨko'nji a'amu hwaho mokosyohumayo sohwanji nuhu'mokontɨfi hungkuno nano mtitofontɨfi lɨmentohofi,
Anɨtu'nji oso hwe uhwosopo'mentiso sohwo'njiye syohomo nakwo wae uyano.
Ose lɨmentohofofoho.

27 Oso hungkuno ne imo'nɨmasofoho. Olo ango lopo Heloutɨ'nji Pountiyos Pailotɨ'nji a'amu kengo so'nji a'amu Isɨlael so'nji nuhu'mokontɨfi Jisas uhwosopo'mentohino sohumo fonjane'entɨfi imentohofofoho. 28 Oso hiso'no hohonta kɨko nohumanji yo'mayo ne imo'none so'no lɨmentohinoso olohonta oso a'amuso jɨje hungkunoso ne imokumalofofoho. 29 I olohonta Mpohwo oso hungkuno yokumpohn'nyo nalɨmalofoso upa'nɨmahnno. Jɨje hungkuno lɨwo'nyo sohwona'nɨmo yokumpohn'nyo fisosofitofonesyohumaho. Oso'no nakwo jɨje hungkuno lontanɨngkuhwasi iyoho monanonehoho. 30 I oso'no nakwo jɨje hungkuno lontanɨngkuhwaso'no kɨko a'amu mnokino'njo somo wopɨngo umojo. Yo'mayo wonyoangkafoso jɨje hwomu Jisasɨye yokumpohn'nyo'nji noho fiyo.

31 Anɨtumo ose ulahonɨngkofi oso ango humamentohofo sopo mo'mayo yonto Anɨtuye Towahuno Wopɨngo hofɨkimo ifehu'mokahumentisofoho. Ifehu'mokahumentisoso hofɨko Anɨtuye hungkuno yokumpohn'nyo ulontɨfi iyoho munɨmmentisofoho.

Jisasɨye a'amu neso hofɨko yo'mayoso inɨmentohofofoho.

32 A'amu hopi'nono Anɨtumo sɨmeho hi'ntnnono uyɨwo'nɨmentohofoso sɨmeho inontɨfi a'amu fihwo ole huno mosyafɨsiyo'njo imentisofo, Oloso nje'nohinofoho. A'amufe'maho. O'o, oloso huno mosyafɨsiyo'njo imentisofoho. Yo'mayo hopi'nononino hi'njoso a'amu somo inɨmentohofofoho. 33 Apousel sohwa a'amu somo Hwe Engo Jisas lɨka'mentiso so'ne hungkuno ne'nohino ulontɨfi Anɨtuye yokumpohn'nyo utɨhwayo'ne yo'mayo kengo wonyoangkafoso imentohofofoho. Anɨtu a'amumo wopɨngo'nohino uloho'mentisofoho. 34 Hohosohonta a'amu hiso umofonyo miyofoho. A'amu hwaho'njoso ango'njoso yo'mayo ho'yango'njoso nom'ne a'amu somo yano uyontɨfi hamniyohosoapousel sohwamo umentohofofoho. 35 Apousel sohwa oso hamniyoho nomantɨfi a'amu umofonyo iyo somo yano ulohmmentohofofoho.

36 Hwe fihwo kakoe yofe Jousepɨyoho.Apousel sohwa nom'ne yofe ole mulɨmentohofi, Mponopasɨyoho. Yofe hiso yɨwolo'mo ole, Sosofitofɨhwe hweho. 37 Olo hwe huhwo sohwo Lifaiye temtitofo mta'ango hweho. Hwaho Saipɨlos nta'ango hweho. Hwe nom'nehwo oso hwe huhwo lohwo sohwoe hwaho mpe nulohofahonɨngki hamniyohoso Mponopas nomantoapousel sohwafe sɨfɨki'nyo'mo ho'nahumentisofoho.

Copyright information for `APZ