Acts 7

Sɨtifen kakoe hungkuno ‘kaunɨsol’ sohwamo ulɨmentisofoho.

Hwe yofe engo'njo sohwo Sɨtifenɨmo ulɨmento, Oso hungkuno kikimne'no nalohofoso nehopitaho.

Ose ulahonɨngki Sɨtifen ulɨmento, Nje a'amu soku, sekwo upa'nɨmno. Hohonta nakwoe ajuyohwo Apɨloham kako ango Helanɨmne'no mawe'njo imentiso sohonta oso hwaho Mesopoutemiya nohumentanɨngki Anɨtu wonyoangkafo sohwo u'mahonɨngki Apɨloham nuhwonɨngkahonɨngki Anɨtu ulɨmento, Olo hwaho lo'nji jɨje a'amu so'njimo uhwatɨ'mofo. Nom'ne hwaho nokitɨhwahm'me'no osopo fohumantohoho. Ose ulahonɨngki Apɨloham oso hwaho Kalɨtiya ulɨko'manto hwaho nom'ne Helan osopo humamentisofoho. Kanɨngkwohwo poyo pe'nɨmentiso sohonta Anɨtu ulɨmento, Hwaho nom'ne kitɨhwahm'me'no mpano. Ose ulahonɨngki olo hwaho humalohwone lopo pmmentisofoho. Anɨtu Apɨlohammo olo hwaholo nutɨhwanto osohonta kako yano muyɨmmentisofoho. O'o nɨhu'no awonoho. I oso'no Anɨtu ulɨmento, Oso hwaho hiloso kɨko'nji jɨje imuhwanjimo sejapmnefoho. Ose ulɨmentisofoho. Osohonta Apɨloham kako hwomu ane hweho. Nom'ne hungkuno Anɨtu ulɨmento, Jɨje imuso a'amu kengo sofe hwahopo ufijoso osopo siki syoho ulohofɨkutnnefoho. A'amu kengoso jɨje imu somo tohino engo uyɨfitnnefoho. Soswofoua hantɨlet (400) uyokolofontanɨngkuhwosi jɨje imuso osopo humafitnnefoho. Oso a'amu kengo jɨje imu somo yokumpohn'nyo umokosyohumayo somo hungkuno tango'njo ikwolofo'ne uyɨmnefoho. Osohonta jɨje imu oso hwaho kengo sopo ulɨko'mafɨkujoso olo hwaho lopo nje yofe ho'nonɨmapɨfitnnefoho. Ose ulɨmentisofoho. Anɨtu nom'ne hungkuno Apɨlohammo uyɨmentisofoho. A'apaho sɨhu kolo'nyo'ne ulɨmentisofoho. Anɨtuye hungkuno inɨngo mamofe'ne honɨngkano hiso uyɨmentisofoho. Oseso Apɨlohamɨye hwomu Aisak imo'nɨngkahonɨngki sɨkuno aho fehohnta'ni hopi'nono nom'ne hohnta'ni hufa'u sɨhune memjaofahonɨngki Apɨloham kakoe hwomufe a'apahomo sɨhu ukolo'mentisofoho. Hwangku Aisakɨye hwomu Jekoup imo'nɨngkahonɨngki sɨhu ukolo'mentisofoho. Tɨfi sohonta Jekoupɨye hwomu aho hufa'u hopi'nono sɨfe mta'ni hufa'u imo'nɨngkahonɨngkofi sɨhu ukolo'mentisofoho. Osohwa neyakwosafoho. Oso yahino hiso ne'nohini sɨhu kolo'nɨmotofofoho.

Jekoupɨye hwomu sohwa hamnɨngkwa'wehwo Jousepɨne'no hintotohino umnɨngkahonɨngki a'amu kengo sohwa Jousepɨmo mpe uyahonɨngkofi hafila'wehwosa hamniyoho ma'mentohofofoho. 10 Yo'mayo tango so'nji Jousepɨmo u'mahonɨngki Anɨtu ufo'ma'mentisofoho. Oseso oso hwe engo hwaho Ijip mokosyohumayo osohwo Jousepmne'no joho ulahonɨngki Anɨtu Jousepɨmo huno engo wopɨngo'njo uyahonɨngki hwe engo hwaho Ijip mokosyohumayo sohwo ulɨmento. Kɨko hwe wopɨngo hwosoho. Oso'no kɨko olo hwaho Ijipɨ'nji, nje a'amu lo'nji nje ango lo'nji hopi'nono kɨko ngkine'no mokosyohumayo'ne hwosoho. Ose ulonto Jousepmmo ango'nji hwaho'nji mokosyohumayo'ne yofe engo mulɨmentisofoho.

11 Oseso Jousep hwaho Ijip nomokosyohumentanɨngki wopayo nosyofahonɨngki mijoho engo i'mofapmmentisofoho. Neyakwosa hwaho Kenan sopo humamentohofoso mijoho uyɨmentisofoho. 12 I oso'no Jekoup kako wopayo engo Ijip weho upa'nonto neyakwosamo Ijipmne'no lɨhwatɨmentisofoho. 13 Hwangku sohonta hofɨko Ijipmne'no apa'no umentohofoso osohonta Jousep ulɨmento, Ngko Jousepɨ'nyoho. Ose ulahonɨngki hwe engo hwaho Ijip mokosyohumayo sohwo Jousepɨye a'amu sohwamne'no huno umentisofoho. 14 Oseso Jousep kanɨngkwohumne'no hungkuno lɨhwatɨmentisofoho. Jekoupɨ'montohwa hofɨkosefenti-faifɨfoho (75). Osomne'no Jousep lɨhwatɨmentisofoho. 15 Oso'no Jekoup Ijipɨne'no nowento osopo poyo pe'nɨmentisofoho. Neyakwosa osopo poyo pe'nɨmentohofofoho. 16 Hwangku sohonta hofɨkoe imuso hofɨkoe yokinoso Syekemne'no motawentɨfi oso sokimo somo yokinoso ho'nahumentohofofoho. Oso sokimo hwaho'njoso Apɨloham hohonta Hemɨye hwomu sohwamo hamniyoho uyonto mpe imentisofoho.

17 Oso hungkuno Anɨtu Apɨlohammo ulɨmentisoso ne umo'nɨmonte'no yahonɨngki a'amu Isɨlaelɨso pi'nɨngo engo imo'nɨmentohofofoho. 18 Osohonta Ijipmjo hwe yofe engo'njo sohwo Jousepmne'no huno muyofoho. 19 Oso hwe huhwo sohwo neyakwosamo wonyo ulohofahonɨngki tohino engo ma'mentohofofoho. Hwe engo sohwo ulɨmento, Sekwoe mehomi milongo imo'nɨfijoso melojwasiyo'ne'maho. Nuhwonɨngkuji foho'naofɨkuno. Osopo wape'nɨngkuhwono. Ose ulɨmentisofoho. 20 Hohosohonta Mouses hwomu wonyoangkafo sohwo imo'nɨngkahonɨngki kanɨngkwohwo'ya'u hamno hufa'u sɨhune uyakolo'mentisofoho. Hwomu sohumo angomo hiyaso mokosyohumentanɨngki 21 Mousesɨmo mempo hohnta'ni ho'nahumentisiyo sohonta hwe engo hwaho Ijip mokosyohumahoso kakoe mu Mousesɨmo uhwontohumayo ma'mentisofoho. Kakoe hwomu ne pa'nyo imo'nɨmentisofoho. 22 Ijipmjo hwe huno'njo sohwa Mousesɨmo yo'mayo so'no mesyomtɨ'mokutɨhwamentohofofoho. Mouses huno engo manto hwe engo imo'nɨmentisofoho. Kakoe syohoso hungkunoso wopɨngo'nohino hweho. 23 Mouses kakoe soswofouti (40) uyokolofahonɨngki lɨmento, Ngko nje a'amu ne Isɨlael somo uhwonamo. 24 Ose syafɨsyonto nowento uhwonɨmentisoso Hwe Ijip syoho ulohofiyo mokosyohumayo sohwo a'amu Isɨlael sohumo wonyo ulohofontanɨngki Mouses nuhwononto syafɨhu'mento, Nje a'amu Isɨlael sohumo ufo'ma'mo lonto hwe Ijipɨ'njo sohumo fonjahumentisofoho. 25 Hwe sohumo fonjasyonto Mouses huno ole syafɨsyonto, Nje a'amu Isɨlaelɨso ole huno syofɨsyalokwofo, Anɨtu Mousesɨmo nefo'mayo'ne uhwatɨmaso hweho. Ose syafɨhu'mentisofoho. I oso'no a'amu Isɨlaelɨso oso hunoso huno masyafɨsiyo'njo imentohofofoho. 26 Mo'nɨngkanta hwe Isɨlael sohwa'u ikujoho fongki'nontanɨngki Mouses nuhwononto, mtampo lohofonto ulɨmento, Nje a'amu sohwahusi, Siko'nɨkwahisoho. Siko ikujoho peho'no fongki'nalokusiyo. 27 Ose ulahonɨngki hwe fihwo konɨngkwa'wehumo wonyo ulohofo sohwo Mousesɨmo ilojaofonto ulɨmento, Nakumo nemokosyohumayo'neso. Tɨhwo kilɨmasoto. Kɨko nakwoe hungkunomo ito'no menehwajiyo'ne hwosilaho. 28 Ou, kɨko fosi hwe Ijip mta'ango sohumo fonjahumahnno hopa wofonjanɨhumonne'elaho. 29 Ose ulahonɨngki Mouses nupa'nonto hiyae wento oso hwaho Ijip ulɨko'manto hwaho nom'ne Mitiyan humamentisofoho. Osopo nohumanto hwomu hufa'u tɨpema'mentisofoho.

30 Soswofouti (40) uyakolofahonɨngki hwe ahwomo mta'ango sohwo Mousesɨmo u'ma'mentisofoho. Mouses osohonta hwofɨki'nyo Sainai mafone sopo a'amu anepo humamentisofoho. Mouses nohumanto uhwonɨhwojamentisoso iyoswo we'e so'mta'ni toho nto sijahonɨngki ose uhwononto, yomo yonto kako tɨfonepo nowento toho hwapɨngo ho'mo so'mo uhwonɨmentisoso hwe ahwomo mta'ango sohwo Mousesɨmo ulɨmento, 32 Ngko jɨje ajuyohwosa Apɨlohamja, Aisakɨja, Jekoupɨja, hofɨkoe Anɨtu hwo'nyoho. Ose ulahonɨngki Anɨtuye mampaho upa'nonto Mouses yomo yomo yonto iyoho unɨngkahonɨngki sɨmo'mango akofaho hi'nɨmentisofoho. 33 Ose yahonɨngki Anɨtu ulɨmento, Olo hwaho lopo ngko humaleno. Oso'no jɨje sɨfɨkwongo fosyo fiyojasyo. 34 A'amu Ijipɨso nje a'amu Isɨlael somo wonyo engo nolohofahonɨngkofi hofɨko tohino engo malokwofo so'no uhwonɨngkohefoho. Nje a'amufe youwo youwo upa'nɨngkohefoho. Hofɨkimne'no ufo'mayo'ne pohono. Oso'ne'no Ijipmne'no wokuhwatɨmo. Ose ulɨmentisofoho.

35 A'amu Isɨlaelɨso hofɨko Mousesɨye hungkunomo hwotoho nto hmmentohofofoho. Ole ulɨmentohofi, Kɨko nakwoe hwe engo hwosilaho. Nakwoe hungkunomo ito'no menehwajiyo hwosilaho. Mousesɨmo ose ulohonɨmentohofofoho. Huhwo sohumo Anɨtu nuhwajonto hwe engo mokosyohumayo'ne'nji ufo'mayo'ne sohumo uhwosopo'mentisofoho. Hwe ahwomo mta'ango toho we'e sohumo u'ma'mentiso sohwo Mousesɨmo sosofitofosyohumamentisofoho. 36 A'amu Isɨlael Ijip nohumentanɨngkofi Mouses yo'mayo kengo wonyoangkafoso yonto Ijip mta'ango a'amu somo ipemotasɨmentisofoho. Soswofouti (40) uyokolofontanɨngki oso hwaho a'amu ane sopo oso Mijo Ayo Sa'njo Honɨyo'nohino
7:26 Iyoswo yofoho mjoso hunguno fiso oso mijo ayo sa'njo somo Hesi'amo so'no malinyofoho.
pisongkotn'nawojo sopo Mouses yo'mayo kengo wonyoangkafoso imentisofoho.
37 Oso Mouses huhwo sohwo a'amu Isɨlael somo ulɨmento Anɨtu sekwo'njo mta'ango hwe fihumo muhwosopenefoho. Anɨtuye hungkuno selohe sohwo ngko pa'nɨngo hweho. 38 Oso Mouses huhwo sohwo a'amu Isɨlael so'nji hwaho a'amu anepo humamentohofofoho. Hwe ahwomo mta'ango sohwo hwofɨki'nyo Sainai sopo Mousesɨmo hungkuno uyɨmentisofoho. Mouses neyakwosanjopo humentanɨngki Anɨtu Mousesɨmo honɨngkano hungkuno wopɨngo uyɨmentisofoho. Oso hungkuno hiso nakwo hopi'nonohino hn'nwiyefoho.

39 I oso'no neyakwosa kakoe hungkuno nakwolaho lɨmentohofofoho. Hungkuno homo somo hwotoho hmmentohofoso Ijipmne'no asomo wowantɨfi imentohofofoho. 40 Oseso hofɨko Elounɨmo ulɨmentohofi, Nakumo ipenemotawe'nehwo anɨtu nom'ne kengo mtɨ'mojo. Mouses Ijip mta'ni nehwajoponto kako ntɨ'mtɨkeno. Nakwo huno monaiyohoyohoho. Ose ulɨmentohofofoho. 41 Hohosohonta yahu huyo'mango hwasyo anɨtu kengo pa'nyo mtɨ'mokontɨfi yahu nom'ne nofonjasyontɨfi anɨtu huyo'mango hwasyo sohumo ulɨmentohofi, Olo yahu loso kikine'no fonjasyɨhwonefoho. Ose ulɨmentohofofoho. Olo hiloso hofɨkoe aho'nji imentohofo so'no sɨmeho wopɨngo umo'nɨmentisofoho. Oso'no hofɨko elɨjwanɨmentohofofoho. 42 Oso'no Anɨtu hofɨkimo hohujo ikinjɨmofahonɨngki hofɨko mofehi'nyo hwanji hamno hwanji hntokwaliyo hwanjimne'no hofɨko hwomtame uloho'mentohofofoho. A'amu Anɨtuye hungkuno mtɨ'mokumentohofo sohwa ole mtɨ'mokumentohofi,

A'amu Isɨlael soku, sekwo oso hwaho a'amu anepo nohumentanɨngkuji soswofouti (40) seyokolofontanɨngki ngkine'no yahu fonjahumentohofotaho. Awonoho.
43 Sekwo anɨtu hwasyo Molouk kakoe hwapɨfe ango molontɨfi motasɨmentohofofoho.
Nom'ne anɨtu hwasyo Lefan kakoe hntokwaliyo huyo'mango mtɨ'mokontɨfi motasɨmentohofofoho.
Oso hwamne'no hwomtame uloho'motofofoho.
Oso'ne'no Mpapiloun nongkihnta'ni wosehwatɨmo.
Ose mtɨ'mokumentohofofoho.

44 Oso hwaho a'amu ane sopo neyakwosa hwapɨfe ango molɨmentohofofoho. Anɨtu ne sohune'no hwomtame ulohofo'ne molɨmentohofofoho. Oso hwapɨfe ango hiso'no Anɨtu Mousesɨmo huyo'mango utɨhwanto ulɨmento, Olo pa'nyo moso. Ose ulahonɨngki hwapɨfe ango molɨmentohofofoho. 45 Neyakwosa hofiyakwosa mta'ango olo hwapɨfe ango nomantɨfi Jousyɨwa'nji motasontɨfi nom'ne a'amufe hwaho ma'mentohofofoho. A'amu nom'ne hwaho'njo somo Anɨtu wae yaofonto hwaho hopo sopo neyakwosa humamentohofofoho. Oso hwapɨfe ango hiso oso hwaho hopo sopo ne'no wentanɨngki Ntefit kakoe sɨkuno imo'nɨmentisofoho. 46 Ntefit imo'nɨngkahonɨngki Anɨtu nuhwononto lɨmento, Ntefit hwe wopɨngo hweho. Kakimne'no sɨmeho wopɨngo nɨmo'nɨngkohoho. Ose lahonɨngki Ntefit Anɨtumo jomo ulɨmento, Jekoupɨye Anɨtu hwosoho. Kɨko'ne ango wamolɨmonne'no yohono. 47 Ose ko lahonɨngki Ntefitɨye hwomu Soulomoun Anɨtuye ango molɨmentisofoho.

48 A'amu Anɨtuye hungkuno lɨmotofo sohwa ole lɨmentohofi, Anɨtu Yo'mayo Yo'mayo Yakolo'nnyo sohwo ango a'amu hwahoponjo sohwa molɨfijo somo mohumanehoho. 49 Anɨtu ole ulɨmento,

Ahwomo loso nje epohumayoponoho.
Hwaho hiloso nje sɨfe ikwo'ofofoho.
Ngko'ne ango pipi molɨfitnnehofo.
Ngko ntɨ'mo humamnehono.
50 Yo'mayo hwapɨngoso tɨhwolo. Ngkonoho.
Anɨtu ose ulɨmentisofoho.

51 Sekwo a'amu hahn'nyo iyo'njo kuyoho. Sekwoe sɨmeho'nji sekwoe huno so'nji a'amu nje hungkunomo haloho maposo'njo pa'nyo hwasoho. Nje Towahuno Wopɨngo somo sekwo seyakwosa hopa hwotoho fewo'nɨngkohofɨhwasoho. 52 Seyakwosa Anɨtuye hungkuno lɨmotofo hopi'nonohino sohwamo wonyoso ulohofɨwo'nɨmentohofofoho. Anɨtuye hungkuno lɨmotofo sohwa ole selɨmotofi, Hwe Wopɨngo sohwo noponefoho. Ose selahonɨngkofi sekwo hopi'nonohino somo fonjahumentohofofoho. Olohonta oso hwe wopɨngo sohwo nopahonɨngki sekwo osohumo tokoyo'ofo yontɨfi fonjahumentohofofoho. 53 A'amu huhwo sohwasi sekwo Anɨtuye honɨngkano hungkuno a'amu ahwomo mta'ni selɨmentisoso ne masewo'nyofoho. Haloho miyo hwasoho. Sɨtifen ose ulɨmentisofoho.

Sɨtifenɨmo sojo'nji fonjahumentohofofoho.

54 A'amukaunɨsol sohwa Sɨtifenɨye hungkuno nupa'nontɨfi huno nehopi ko uyahonɨngki sɨmano hintotohino umnɨngkahonɨngki mpuyo lɨmentohofofoho. 55 Oseso Anɨtuye Towahuno Sɨtifenɨmo u'mohulofahonɨngki, Sɨtifen ahwomomo uhwonɨmentisoso Anɨtuye pomponaho mofehi'nyo pa'nɨngo uhwononto Jisas Anɨtuye aho anga sohohnta'ni nohumentanɨngki uhwononto, ulɨmento, 56 Uhwonɨmno. Ahwomo mtampotoho. Anɨtuye hwomu Anɨtuye aho anga hohnta'ni lɨkofohumaho, uhwonalokweno. 57 Ose ulahonɨngki hofɨko haloho pɨku'nontɨfi mamuyo mjalɨmɨwentɨfi Sɨtifenɨmo ifeehu'mo uloho'mentohofofoho. 58 Sɨtifenɨmo aho yokumpohn'nyo nokentɨfi nomotawentɨfi angkuhwafopo mempo hohnta'ni nosutofafontɨfi sojo fongku'mentohofofoho. Oso a'amu huhwo sohwa Sɨtifenɨmne'no hwasyo hungkuno ulɨmentohofo sohwa hofɨkoe manji'mofo yojomantɨfi hwe songo Soulɨye huyo'mo ho'nahumentohofofoho. 59 Sojo ne'no ufonjontanɨngkofi Sɨtifen Anɨtumo joho ulɨmento, Hwe Engo Jisas kɨko nje huyo'mangoso nɨmaho. 60 Ose ulonto hwomtame yonto joho engo yokumpohn'nyo ulɨmento, Hwe Engofo olo wonyo ntohofohofo loso'no kɨko olo a'amu sohwamo wonyo uyohotoho. Ose ulonto nɨhu'nahone poyo pe'nɨmentisofoho.

Copyright information for `APZ