Galatians 2

Nom'ne ‘Apousel’ Jelusalem humamotofo sohwanji Poulɨ'nji hofɨko sɨmeho afa inɨmentohofofoho.

Soswo aho hopi'nono sɨfe mta'ni osofosofahu'no nɨyakolofahonɨngki Mponopasɨ'nji Jelusalemno asomo wowaho lontai Taitasɨmo utɨmentai umentɨhwonefoho. Anɨtu kako ngkimo ntahonɨngki ngko umentohefoho. A'amu somo hwe engo mokosyohumayo sohwafe ango so'mo uhu'mokumentɨhwonefoho. Osopo ngko Anɨtuye hungkuno a'amu Juta'no'maso, o'o, a'amu temtitofo kengo kengo somo lutɨhwawo'nɨngkohe so'no oso hwe engo sohwamo lutɨhwamentohefoho. Hwapɨngoso oso syoho yɨwo'nɨngkohe so'no nakwolaho ntɨfijoso ne mmo'nonoho. Taitas ngko'nji humamentiso sohwo kako a'amu Juta hwo'maho. Kako hwaho Ngkɨliknta'ango hweho. I oso'no hwe engo sohwa hofɨko nakwo Juta sohwona'niye a'apaho sɨhu kolo'nyo yahino so'no hungkuno me-ejofoho. Oso hwe engo huhwo sohwa Taitas hwaho Ngkɨliknta'ango so'no huno ko uyahonɨngki hofɨko Taitasɨye a'apaho sɨhu wokolofano me-ejofoho. Oso ango homo somo nohumentahonɨngkuhwoni hwe nom'ne sohwa hiyaso'mo swopalokwofo. Nakwo a'amu Jutafe honɨngkanomo humentanɨngkuhwoni Jisas Kɨlaisɨye hungkunoso ikwolofonema'mentisofoho. I oso'no oso a'amu hiyaso'mo swapmmentohofo sohwa Jutafe honɨngkanomo apa'no nano hopa womekilo'mokonehumojantɨfi imentohofofoho. Hofɨko Taitasɨye a'apahomo sɨhu kolofo so'no nelahonɨngkofi nakwo eno mujo'njo imentɨhwonefoho. Nakwo hofɨkoe hungkunomo haloho muposofoho. O'o, a'amu Juta sohwafe honɨngkano hungkuno nomokokilo'mokosehumajonoho lontani nakwo yokumpohn'nyo lohofontani Jisas Kɨlaisɨye hungkuno so'nohini waho'nɨngkuhwono. Jutafe honɨngkano hungkuno so'nji mɨhu'mɨngoso nakwolaho lɨmentɨhwonefoho. Oso'no hofɨkoe hungkuno somo minɨngkayo'njo imentɨhwonefoho.

Hwe yofe engo'njo a'amu mokosyohumayo somne'no ngko iyoho mannɨmentisofoho. Hwapɨngoso Anɨtu nakwo a'amu hopi'nonohino'nnwe yahino afa'nohino nahonɨwo'nɨngkisofoho. Oso hungkuno ngko a'amu temtitofo kengo somo lutɨhwawo'nɨngkohe so'no hwe engo sohwa nom'ne hungkuno songo manjo'njo imentohofofoho. O'o, hungkuno songo manjo'njo yontɨfi huno ole umentisofoho. Ngko a'amu temtitofo kengo somo Anɨtu kakoe hungkuno lutɨhwayo'ne nɨhwosopo'mentiso hwo'nyoho. Anɨtu Pitamo a'amu Juta somo kakoe hungkuno lutɨhwayo'ne uhwosopo'mentiso hopaso ngkimo nɨhwosopo'mentiso hwo'nyoho. Ou, Anɨtu kakoe yokumpohn'nyo Pitamo uyahonɨngki Pita a'amu Juta somo Anɨtuye hungkuno lutɨhwayo'ne (apousel) syoho iwo'nɨngkiso hweho. Oso pa'nyoso Anɨtu kako ngkimo yokumpohn'nyo ntaponto a'amu Juta'ne'no'maso, o'o, a'amu temtitofo kengo kengo somo lutɨhwayo'ne (apousel) syoho ntapmmentisofoho. Hwe engo sohwa hofɨkoe yofe Jemɨsɨyo, Pitayo, Jounɨyo hofɨko huno ole uyɨmento, Anɨtu olo syoho loso ntapmmentiso so'no huno uyahonɨngki oso'no hofɨko Mponopasɨ'nji nekumo aho epentɨfi olo so'no sɨmeho afa inontani olo hungkuno loso'no nano mtito'mentɨhwono. Mponopasɨ'nji nekwo a'amu temtitofo kengo kengo somo Anɨtuye hungkuno wolutɨhwantayoho. Hofɨko a'amu Juta somo Anɨtuye hungkuno wolutɨhwantɨfeho. Oso'no syoho afa'no yɨwo'nɨngkuhwone hwona'nyoho. 10 Hungkuno anga'nohinoso nekumo huno efohoto'mentohofoso ole, a'amu yo'mayo a'apahomne'no umofonyo iyo somne'no huno syafɨsyɨkuji ufo'mapmno. Ose iyoso'no nɨmo'nɨngkahonɨngki syoho loso yokumpohn'nyo iwo'nɨngkohe hwo'nyoho.

Poul kako Pitamo yoka ulɨmentisofoho.

11 Tɨfi sohonta nakwo Antiyouk nohumentahonɨngkuhwoni Pita none'mahonɨngki ngko a'amufe tɨmopo Pitamo kakoe sɨmanopo yoka ulɨmentohefoho. Hwapɨngoso kako huno wonyo tɨpema'mentisofoho. 12 Sɨmo'mo Jemɨs a'amu Jelusalem mta'ango uhwatɨmentiso sohwa m'mofopontanɨngkofi Pita kako a'amu temtitofo kengo kengo somjo so'nji wopayo afapo nta'ni nɨmentisofoho. I oso'no a'amu Jelusalem mta'ango huhwo sohwa nu'mofopahonɨngkofi Pita kako huno wonyo ole tɨpemanto kako a'amu temtitofo kengo kengo so'nji wosopayo manɨmmentisofoho. Hwapɨngoso a'amu kengoso hofɨko a'apaho sɨhu makolo'nyo'njo yɨwo'nɨngkohofofoho. A'amu Jelusalem mta'ango sohwa hofɨko huno ole, a'amu a'apaho sɨhu makolo'nyo'njo sohwa hofɨko Anɨtumo mu'maso'ne hwafoho. Oso'no Pita hofɨko ngkine'no huno wonyo syonɨhufɨpitnnoho lonto Pita a'amu kengo so'nji wopayo manyo'njo imentisofoho. 13 Pita ose imentiso so'no a'amu hofɨko Pitamo tɨfi inɨngkawentɨfi yahino wonyoso hofɨko ema'mentohofofoho. Oso hofɨkoe huno wonyoso Mponopas huhwo'nji nomanto a'amu temtitofo kengo kengo so'nji afapo nta'ni wopayo manɨmmentisofoho. 14 Oso huno wonyoso syofɨsyomantɨfi Jisasɨye hungkunomo minɨngkayo'njo yontanɨngkofi uhwonɨmentohe so'no ngko Pitamo a'amufe tɨmopo hungkuno yokumpohn'nyo ole ulɨmentoho, Kɨko a'amu Juta hwosoho. I oso'no kɨko a'amu temtitofo kengo somne'no ole so'no kumo'nɨngkohoho. A'amu temtitofo kengo kengoso hofɨko a'amu Jutafe yahinomo unɨngkafe. Oso'no kumo'nɨngkahonɨngki peho'no syofɨhu'mahnnoto. Kɨko huhwosi Jutafe yahinomo nto ho'nahumahnno hwosoho. Ngko Pitamo ose ulɨmentohefoho.

A'amu Jisasɨmo sɨmeho hi'ntnnono uyo sohwo kako Anɨtuye a'amu ne hweho.

15 Nakwo a'amu temtitofo kengo kengo yahino wonyo mta'ango hwona'nɨ'maho. O'o, nakwo Juta Mousesɨye honɨngkano hungkunomo inɨngkawowo'nɨngkohofo sohwa mta'ango hwona'nyoho. 16 I oso'no nakwo a'amu Juta Jisas Kɨlaisɨmo sɨmeho hi'ntnnono uyɨwo'nɨngkuhwone hn'nwi nakwo huno ole nayohoho. A'amu fihwo kako hungkuno Mouses lɨmentiso hopi'nonohinomo inɨngkayo sohwo osohumo Anɨtu kako ole mulonehoho. Jɨje yahino wonyoso wae weeokumo'mo. Kɨko wopɨngo hwosoho. O'o, ose mulonehoho. Hwapɨngoso honɨngkano nɨhu'no anga'nohino weho. Olenoho. A'amu fihwo Jisas Kɨlaisɨmo sɨmeho hi'ntnnono uyoso osohumo Anɨtu kako ulonefo, Jɨje yahino wonyoso wae weeokumo'mo. Nje a'amu ne hwosoho. Oso honɨngkano somnohini inɨngkowaso'manji Anɨtu ole wonalɨmtonoho. Sekwo wopɨngo kuyoho. Oso'no nakwo Jisas Kɨlaisɨmo sɨmeho hi'ntnnono uyahonɨngkuhwoni i ose'manji olohonta Anɨtu wopɨngo kuyoho nelalofoho. Hwapɨngoso nakwo honɨngkano hungkunomo inɨngkayo'netaho. O'o, awonoho. Hwapɨngoso ole, nakwo Jisas Kɨlaisɨmo sɨmeho hi'ntnnono unyo'nwoho. A'amu honɨngkano hungkunomo inɨngkayoso oso'nohinoso hopo'maho. 17 Oso'no huno naimentiso so'no Anɨtu sekwo wopɨngo kuyoho najoso'no nemo'nɨngkahonɨngki nakwo Jisas Kɨlaisɨmo sɨmeho hi'ntnnono uyɨmentɨhwonefoho. Ose imentɨhwone so'no a'amu fehohnjoso ole nalɨfijoso, Sekwo Mousesɨye honɨngkano hungkunomo hohujo ikenjaofontɨfi Jisas Kɨlaisɨmo sɨmeho uyontɨfi sekwo a'amu temtitofo kengo Mousesɨye hungkunomo minɨngkayo'njo honɨngkano wonyomo humalofoso pa'nyo sekwo imo'nalokwofo. Oso hungkuno nehopi nalɨfijo'manji u nakwo honɨngkano wonyomo humalohwone nehopi'manji nakwo ole lanetaho. Jisas Kɨlais kako nakwo wonyo iyo so'ne nefo'mayo hweho. Ose lanetaho. O'o, awonoho. Ose molanehwono. Kɨlais nefo'mahonɨngki nakwo wopɨngo imo'nalokuhwono. 18 Ihwoni. Honɨngkano hungkunoso nakwo Anɨtuye a'amu ne imo'nyo so'no monefo'mayo'manji honɨngkano hungkuno somo hwotoho fentani Jisas Kɨlaisɨmo sɨmeho uyontani Anɨtuye a'amu ne imo'nɨmalohwonefoho. I osohonta nakwo apa'no honɨngkano hungkuno somo inɨngkayo'manji nakwo honɨngkano wonyomo apa'no humalohwono. 19 I ngko honɨngkano hungkunomo atofo lonji huno ole tɨpema'mentoho, honɨngkano hungkunomo inɨngkayo so'no ngko syoho engo yonji ito'no inɨngkayoso nakwo hopo'maho. O'o, Anɨtuye a'amu ne imo'nyoso hopo'maho. I oso'no honɨngkano anga'nohinoso wo'nyofoho. Oso'no olohonta honɨngkano hungkuno hiso ngkimo momekilo'mokonɨhumajiyo'njo yalofoho. 20 O'o, Jisas Kɨlais nje wonyo'ne iyo hwojiyafɨku'nnyopo poyo pe'nɨmentiso sohonta ngko kako'nji poyo sape'nɨmentohe hwo'nyoho. Oso'no ngko songo humayo loso nje yokumpohn'nyo'njɨ'maho. O'o, Jisas Kɨlais nje sɨmeho mo'mo songo humaho. I olohonta olo hwaho lopo nje humayoso nje huno mta'ango'maho. O'o, ngko Anɨtuye hwomu sohumo sɨmeho hi'ntnnono uyonji humaleno. Hwapɨngoso olenoho. Anɨtuye hwomu huhwo sohwo kako ngkimo sɨmeho ntaponto ngkine'no poyo pe'nɨmentisofoho. 21 Anɨtu ngkimo wopɨngo ntohofoso so'no ngko hwotoho mahmnehono. Honɨngkano hungkuno somo a'amu inɨngkakuji Anɨtuye a'amu ne imo'nontentesi Jisas Kɨlais kako poyo siki pe'nɨngkuhwonesohilo. O'o, nakwoe wonyo'ne Jisas Kɨlais kako poyo pe'nɨmentiso so'no nakune'no hitoho ulofahonɨngki nakumo wopɨngo kuyoho nalɨmentisofoho.

Copyright information for `APZ