John 7

Jisas kakoe homnɨngkwa'wehwosa Jisasɨmo sɨmeho hi'ntnnono muyɨmmentohofofoho.

Oso hohosohonta Jisas kako hwaho Ngkalili sopo nowento hano emoimentisofoho. A'amu Jutafe hwe engo sohwa Jisasɨmo wofonjosyano lontɨfi yahonɨngkofi kako hwaho Jutiya sopo hano memoyo'njo imentisofoho. Oso a'amu Jutaso hofɨkoe sɨkuno iyoho humayo nom'ne engoso mofonepo umo'nɨmonto imentisofoho. Oso sɨkuno hiso a'amu Jutafe hofiyakwosa hofɨko hwapɨfe ango molontɨfi humamotofo sohonta Anɨtu hofɨkimo hofiyo mokosyohumamojo so'no huno syafɨsiyo'ne sɨkunofoho. Oseso Jisas kakoe homnɨngkwa'wehwosa kakimo sitofo hungkuno ulɨmentohofi, Kɨko olo hwaho Ngkalili lopo sopo nohumahotoho. O'o, kɨko hwaho Jutiya'ne'no sohoji osopo yo'mayo wonyoangkafo a'amu miyɨwo'nɨngkiyohofoso kɨko yohojo'no a'amu pi'nɨngoso kikimo kohonɨngkuji jɨje yofe engo umo'nɨmontonoho. Kɨko yofe engo woma'mo lohojɨ'manji olo hiyaso lo'mo peho'no humahnno. Kɨko yofe engo ne hi'njo hwosɨ'manji kɨko yo'mayo wonyoangkafoso a'amu hopi'nonohino somo fitɨhwaho. Ose ulɨmentohofofoho. Hwapɨngoso homnɨngkwa'wehwosa huhwanji Jisasɨmo sɨmeho hi'ntnnono mummentohofofoho. Jisas hofɨkimo ulɨmento, Ngko ango Jelusalemne'no utɨhwa'nyopo sɨmne sɨkunoso m'mofapefoho. I sekwo yo'mayoso uyano lɨkujɨ'manji sekwo a'amu hwahoponjo soku sɨkuno engolopohamo sekwoe sɨkunofoho. Olo hwaho loponjo hwe moya'mi hopi'nonohinoso hofɨko sekumne'no sɨmeho tohino mosejopalokuyohofo. O'o, sɨmeho tohino ngkimnohini ntopantokwofo. Hwapɨngoso yo'mayo yahino wonyo hofɨko iwo'nɨngkohofo so'no ngko lɨjwaofɨwo'nɨngkohe so'no sɨmeho tohino ntapɨwo'nɨngkohofofoho. Nje nɨngkwahwoso sohwasi sekwo nosɨkuji sekwo oso sɨkuno iyoho humayo engo somo fisɨhwonamno. I, ngko oso sɨkuno iyoho humayo engo somo mosɨhwonamnehono. Nje sɨkuno ngko siyo'neso nto'no mmo'nyofoho. Jisas kako ose ulonto oso hwaho Ngkalili sopo humamentisofoho.

Jisas kako oso Sɨkuno Engo hofiyakwosa hwapɨfe ango molɨmentohofo somo sɨhwojamentisofoho.

10 Jisas homnɨngkwa'wehwosa sohwa hofɨko oso Sɨkuno Engo somne'no sɨkwato lohofahonɨngkofi Jisas kako huhwo sɨmentisofoho. I oso'no kako utɨhwa'nyopo sɨmentiso'maho. O'o, hiyaso'mo sɨmentisofoho. 11 A'amu Jutafe hwe engo sohwa hofɨko oso Sɨkuno Engo somo humawo'nɨngkohofo sopo humantɨfi Jisasɨmne'no hafɨhafe tɨpentɨfi a'amu somo ulohonɨmentohofi, Jisas kako ntɨ'mo humaho. 12 Hwe moya'mi pi'nɨngo engoso hofɨko mtitofo mtitofo syohumolawentɨfi a'amu fehohnjoso ole lɨmentohofi, Jisas kako wopɨngo hweho. A'amu fehohnjoso ole lɨmentohofi, Jisas kako a'amumo hwasyo hungkuno lɨku'mofɨwo'nɨngkiso hweho. Ose lɨmentohofofoho. 13 I oso'no a'amu hopi'nonohino hofɨko hwe engo sohwamne'no iyoho unɨngkahonɨngki hofɨko hungkuno utɨhwa'nyopo mahnnɨmentohofofoho.

14 Oso Sɨkuno Engo iyoho humayo ajwo sopo Jisas kako Anɨtuye tajo ango engo somo noswonto a'amu somo utɨhwa'nyopo hungkuno loma'mentisofoho. 15 A'amu Jutafe hwe engo sohwa hofɨko Jisasɨye hungkunomo upo'nantɨfi yomo yontɨfi ole hnnɨmentohofi, Olo hwe lohwo kako huno engo loso ntɨ'mta'ni tɨpema'masoto. Kako nakwoe sɨkule ango hungkuno atofo lutɨhwawo'nɨngkuhwone somo masyuyo hweho. 16 Ose hnnɨngkahonɨngkofi Jisas kako hofɨkimo ulɨmento, Olo hungkuno selalokwe loso nje huno mta'ango moselalokuyohono. O'o, Anɨtu kako ngkimo nɨhwatɨmentiso sohwo ntahonɨngki selalokweno. 17 A'amu fihwo kako Anɨtuye hungkunomo unɨngkamo loso sohwo kako olo nje hungkuno lomne'no kako huno ole uyono. Hungkuno loso kakoe huno mta'nɨngo'maho. O'o, Anɨtuye huno mta'nɨngofoho. Kako huno ose uyono. 18 Hwe fihwo kako kakoe huno mta'ni yo'mayo loso yoso sohwo kako yofe engo woma'mo lɨhwosi walɨmontonoho. I a'amu fihwo kako oso a'amu lɨhwatɨmentiso sohwoe yofe engoso sekwo noho'nomapitnne'ento selalokuso'manji kako hwasyo hungkuno moselalofiyoho. Honɨngkano wonyo ane hweho. 19 Jisas ose ulonto ole ulɨmento, Hohonta Mouses kako seyakwosamo Anɨtuye honɨngkano hungkuno uyɨmentisofoho. I oso'no sekwo hopi'nonohino soku oso honɨngkano hungkuno somo hwotoho fentɨfi nto'no minɨngkayo'njo imotofokuyoho. Sekwo ose imentohofo so'no sekwo ngkimo peho'no wofonjonisyantɨfe'no yalokwofo. 20 Ose ulahonɨngki hwe moya'mi hopi'nonohinoso hofɨko Jisasɨmo ulɨmentohofi, Kikimo tɨhwo wofonjakohumontolo. Awonoho. Kɨko towahuno wonyo Seten mta'angoso hi'njo hwosoho. 21 Hofɨko ose ulahonɨngkofi Jisas ulɨmento, Sɨkuno iyoho humayo fihumo ngko hwe mnokino'njo sohumo wopɨngo umokumentohe so'no sekwo sɨmeho tohino ntapɨwo'nɨngkohofofoho. I oso'no sekwo soku sɨkuno iyoho humayo somo syoho iwo'nɨngkohofokuyoho. Seyakwo Mouses sohwo honɨngkano hungkuno ole sejapmmento, Sekwo sɨkuno aho fehohnjo hopi'nonohino aho nom'ne mta'ni hufa'u memjaofɨhwoso'no mo'nɨngkanta hwomu milongo sohwamo a'apaho somo sɨhu fɨkolopmno. I Mouses oso hungkuno somne'no hwapɨngo hwo'maho. O'o, seyakwosa mta'angofoho. I oso'no oso sɨkunoso memjaofɨhwoso'no sɨkuno iyoho humayo so'manji sekwo oso sɨkuno somo syoho iwo'nɨngkohofɨhwasoho. Sekwo oso ko iwo'nɨngkohofo so'no ngko hwe sohumo wopɨngo umokumentohe oso sɨkuno somo sekwo ngkine'no sɨmeho tohino peho'ne ntopantokwofo. 24 Sekwo yo'mayo yahino somo uhwonɨngkuji wonyofoho eso komo'no lɨkutoho. O'o, sekwo sɨmo'mo hwapɨngo ne so'no huno nto'no ikwesyafɨsyɨkuji sekwoe hunoso yano nto'no mpopmno. Ose ikujo'no sekwo yahino wonyo so'nji wopɨngo so'nji huno nto'no wotɨpemantɨfeho. Ose ulɨmentisofoho.

A'amu fehohnjoso hofɨko ole lɨmentohofi, Olo hwe lohwo Anɨtu lɨhwatɨmentiso lohwolɨkeno.

25 Hwe moya'mi fehohnjo Jelusalem sopo humamotofoso ole hnnɨmentohofi, Olo hwe lohumo a'amu hwe engo sohwa wofonjosyano lontɨfi iwo'nɨngkohofo lohwolaho. 26 I uhwonɨmno. Kako utɨhwa'nyopo lohofonto kakoe hungkuno lontanɨngki hofɨko yoka hungkuno mulalokuyohofo. I nakwoe hwe engo sohwa hofɨko olo hwe lohumne'no Anɨtu uhwatɨmentiso hweho ose kosyofɨsyalokwofo. 27 Ose hnnontɨfi nom'niso ole hnnɨmentohofi, I oso'no olo hwe lohwoe hwaho loponjo ango ne so'no nakwo huno nayohoho. Oso hwe Anɨtu uhwatɨmonnoho nalɨmentiso so'no kako i'mofape sohonta kakoe hwapɨngo so'no nakwo huno nto'no monayonefoho. Ose hnnɨmentohofofoho.

28 Jisas kako Anɨtuye ango engo somo ajwo'mo nohumanto a'amu somo mango engo ulɨmento, Sekwo ngkine'no huno seyohoho. I sekwo nje ango sopone'no huno moi'wonoho. I oso'no nje hwapɨngo neso nje Mpohwo ngkimo nɨhwatɨmentiso sohune'no sekwo huno nto'no maseyohiyohoho. Ngko nje huno mta'ni pmmentohe hwonɨ'maho. O'o, nje Mpohwo kako nɨhwatɨmentiso sohwo kako yo'mayo yahino ne so'no hwapɨngo hweho. I sekwo kakimo huno ito'no maseyokuyoho. 29 Ngko'nohini kakine'no huno moi'wonoho. Hwapɨngoso ngko kako'nji nohumentai kako huhwo ngkimo lonɨhwatɨmentiso so'no pmmentohe hwo'nyoho.

30 Ose ulahonɨngki hofɨko kakimo impe untofantɨfi ko imentohofoso a'amu fihwo kakimo aho mokisahumentisofoho. Hwapɨngoso Jisas kakoe sɨkunoso mmo'nyofoho. 31 Hwe moya'mi pi'nɨngoso hofɨko Jisasɨmo sɨmeho hi'ntnnono uyontɨfi ole hnnɨmentohofi, Oso hwe sohumo Anɨtu uhwatɨmentiso sohwo nopɨhwoso'no kako olo hwe lohwoe yokumpohn'nyo somo uyakolo'montolaho. O'o, awonoho. Olo hwe oloho hweho. Ose hnnontɨfi tɨfi inɨngkamentohofofoho.

A'amu itokuso'njo sohwamo Jisasɨmo impe intofo'ne lɨhwatɨmentohofofoho.

32 A'amu Falisi sohwa oso hungkuno a'amu Jisasɨmne'no hnnɨmentohofo homo somo upa'nontɨfi hofɨko'nji a'amu tajo ango syoho'njo yofe engo'njo sohwantnne'no hofɨko Anɨtuye ango engo somjo a'amu hwapɨfe tɨfo'njo sohwamo Jisasɨmo impe intofo'ne lɨhwatɨmentohofofoho. 33 Lɨhwatɨmentohofo so'no Jisas kako huno uyahonɨngki kako a'amu kako'njoponjo somo ulɨmento, Sɨkuno we'enehwo ngko sekwo'nji wosɨmonnoho. Nohumahm'mo ngko nɨhwatɨmentiso sohwoepono asomo wawomonnoho. 34 Oso hohosohonta sekwo ngkine'no hafɨhafe ko tɨpɨfijoso manohonɨfitnnehofo. Hwapɨngoso oso ango ngko nu'mo humame sopo sekwo monɨ'mapitnnefoho. 35 Ose ulahonɨngki a'amu Juta sohwafe hwe engo sohwa ole hnnɨmentohofi, Oseso olo hwe lohwo kako ntente we sopo uhwonantanto nakwo huno uhwonyosofo. Kako a'amu Ngkɨlik sohwafe hwaho sopo nowehwosi a'amu Juta oso hopo sopo humawo'nɨngkohofo so'nji a'amu temtitofo kengo Ngkɨlik so'njimo kakoe hungkunoso wolutɨhwamtolɨkeno. 36 Ole nalohi, Sekwo ngkine'no hafɨhafe ko tɨpɨfijoso manohonɨfitnnehofo. Ose nalonto ole nalohi, Sekwo ango ngko humame sopo sekwo monɨ'mapitnnefoho. Oso hungkuno nalisoso hwapɨngo neso pehomto. Ose hnnɨmentohofofoho.

Mijo songo ne'no humayo'ne hungkunofoho.

37 Oso sɨkuno nɨhu'no engo iyoho humayo ae'uyo sohonta Jisas nolɨkafonto mango engo ole ulɨmento, A'amu mijo'no umo'noso sohwo kako ngkiyepono nopɨhwosi ngkinta'ni wannono. 38 A'amu Anɨtuye hungkuno mtɨ'mokumentohofo sohwa ole mtɨ'mokumentohofi, A'amu ngkine'no sɨmeho hi'ntnnono ntaposo sohwo kakoe sɨmeho so'mo mijolɨmo hopa imo'nɨngkuhwosi oso mijo songo ne'no humayo'neso hano loho'nawo'nnyofoho. Ose mtɨ'mokumentohofofoho. 39 Mijo'no Jisas ulɨmentisoso Anɨtuye Towahuno Wopɨngo somne'no ulɨmentisofoho. A'amu sɨmeho hi'ntnnono unyo sohwa hofɨko Anɨtuye Towahuno mapitnne'no ulɨmentisofoho. I oso'no Jisas kakoe yofe engo so'nji kakoe yokumpohn'nyo hwofilo'nnyo so'nji momaso'njo oso'no Anɨtu kakoe Towahuno a'amu homo somo muyo'njo imentisofoho.

Hwe moya'mi sofanji ajwopo hotito'mentohofofoho.

40 Hwe moya'mi fehohnjo sofanji Jisasɨye hungkuno upa'nontɨfi ole hnnɨmentohofi, Ou, nehopeho. Oso hwe sohumo Anɨtu hungkuno uyahonɨngki nalone sohune'no hontohumawo'nɨngkuhwoneso olo huhweho. 41 Ose hnnɨngkahonɨngkofi nom'ne a'amuso ole hnnɨmentohofi, Olo Kɨlaisɨyoho. Anɨtu kako ahwomo mta'ni uhwatɨmentiso hweho. Ose lahonɨngkofi nom'neso ole hnnɨmentohofi, O'o, Kɨlais kako hwaho Ngkalili sopo m'mofaponehoho. 42 I a'amu Anɨtuye hungkuno mtɨ'mokumentohofo sohwa olo hiso'no yoloho mtɨ'mokumentohofofoho. Kɨlais kako hwe engo Ntefitɨye temtitofo i'mofapɨhwosi oso ango Mpetɨlehem Ntefit humamojo hopo sopo u'mofapmmontonoho. Olo hwe lohwo kako Ngkalili sopo i'mofapmmentisofoho. Oso huno hwasyo syafɨhu'mentohofofoho. 43 Oseso a'amu Jisasɨmne'no huno kengo kengo syafɨsyontɨfi hwe moya'mi hofɨko Jisasɨmne'no hotito'mentohofofoho. 44 A'amu fehohnjo sohwa hofɨko Jisasɨmo impe untofosyano lontɨfi ko imentohofoso a'amu fihwo Jisasɨmo aho mokisahumentisofoho.

A'amu Jutafe hwe engo sohwa hofɨko Jisasɨmo sɨmeho hi'ntnnono muyo'njo imentohofofoho.

45 Oseso a'amu hwapɨfe tɨfo'njo sohwa hofɨko a'amu Falisi sohwanji a'amu tajo ango syoho'njo yofe engo'njo sohwafe pone'no asomo nopahonɨngkofi hwe engo sohwa yoka ulɨmentohofi, Sekwo Jisasɨmo impe mintokwape pipi yohofo. 46 Ose ulahonɨngkofi hwapɨfe tɨfo'njo sohwa ulɨmentohofi, Jisas kako hungkuno wonyoangkafo lisoso nakwo hungkuno oso pa'nyoso nakwo mupa'nɨngkohoyɨhwono. 47 Ose ulahonɨngkofi a'amu Falisi sohwa ulɨmentohofi, I sekwo huhwahnnji Jisasɨmo sɨmeho uyahonɨngkofi hwasyo honɨngkanomo ipesemotasewesotaho. 48 I nakwo hwe engo sohwona'nnonji a'amu Falisi sohwona'nnontnne hwe fihwo kako Jisasɨmo sɨmeho hi'ntnnono unyo sohumo lɨhwonalokwofo. Nɨhu'no awonoho. 49 Olo a'amulo Jisasɨmo sɨmeho uyalokwofo sohwa hofɨko Mousesiye honɨngkano hungkuno somo huno muyofoho. Oso'no Anɨtu a'amu homo somo tohino uyɨmontonoho. Oso hwasyo hungkuno ulɨmentohofofoho.

50 Nikoutimos kako hohonta Jisasɨmo u'ma'mentiso sohwo kako huhwo a'amu Falisi hweho. Kako hofɨko'nji nohumanto ulɨmento, 51 Nakwoe honɨngkano hungkunoso ole nalɨwo'nɨngkisotaho. A'amufe hungkuno mupa'nyo'mta'ni tohino siki uyo. Ose nalɨwo'nɨngkisotaho. O'o, sɨmo'mo kakoe hungkuno yoloho neso upa'nɨngkuhwasi yo'mayo iwo'nɨngkiso so'no huno nto'no nayɨhwaso'no u, osohonta kako'ne hungkuno nano womtitofantanoho.

52 Ose ulahonɨngki hofɨko ulɨmentohofi, I kɨko huhwo hnnonji Ngkalili nta'ango hwosilaho. Anɨtuye hungkunomo atofo fiso. Atofo lohoji olo so'no huno wotɨpema'monnoho. A'amu Anɨtu hungkuno uyɨhwoso'no nalone sohwo hwaho Ngkalili sopo m'mofaponehoho. Oseso kɨko huno wotɨpema'monnoho. 53 Ose ulahonɨngkofi hofɨko hofɨkoe angopono humpo'mentohofofoho.

Copyright information for `APZ