Mark 15

Hofɨko Pailotɨyepono Jisasɨmo ipemotapmmentohofofoho.

(Matɨyu 27:1-2; Luk 23:1-5; Joun 18:28-38)

Imɨngo ne'nji a'amu tajo ango syoho'njo yofe engo'njo sohwanji a'amu Jutafe hwe engo sohwanji a'amu honɨngkano hungkuno lutɨhwamotofo sohwanjikaunɨsol a'amu hopi'nono nuhu'mokontɨfi Jisasɨmne'no hnnɨmentohofofoho. Nohnnontɨfi Jisasɨmo aho kentɨfi ahwomo nano kilofontɨfi Pailot hwe yofe engo'njo hwaho mokosyohumayo sohwoepono Jisasɨmo ipemotapmmentohofofoho. Ipemotopahonɨngkofi Pailot Jisasɨmo ulohonɨmento, Kɨko a'amu Jutafe hwe engo hwosilaho. Ose ulahonɨngki Jisas ulɨmento. Hungkuno hiso kɨko nehopi lohino. A'amu tajo ango syoho'njo yofe engo'njo sohwa Pailotɨmo hwasyo hungkuno Jisasɨmne'no mjalɨmentohofofoho. Pailot Jisasɨmo apa'no ulohonɨmento, Oso hungkuno pi'nɨngo kikine'no mjakilɨmɨhwofo upa'nɨngkinoso kɨko aku hungkuno pehofo ulɨmto. Ose ulahonɨngki Jisas nom'ne hungkuno mujo'njo yahonɨngki Pailot yomo yonto huno pi'nɨngo syafɨhu'mentisofoho.

Pailot Jisasɨne'no ulɨmento, Iyomo fonjinto'ofahumno.

(Matɨyu 27:15-26; Luk 23:13-25; Joun 18:39—19:16)

Soswo huhwo huhwi oso sɨkuno iyoho humayo engo somo Pailot kako hwe fihumo impo'ango mta'angohwo nɨhu'nahone isɨhutofɨhwatɨmojofoho. A'amu Jutaso hofɨko hwe fihwoe yofe ulahonɨngkofi Pailot hofɨkoe hungkunomo tɨfi inɨngkamojofoho. Oso hohosohonta hwe fihwa yokumpohn'nyo sohwa hofɨko hofɨkoe hwe engo a'amumo mokosyohumayo'njo sohwamo ikujoho nofonjontɨfi a'amu fehohnjo somo fonjosyahonɨngkofi impo'angomo intofahumentohofofoho. Oso hwe huhwo sohwo impo'angomo humamentiso sohwo anga'no hwe kakoe yofe Mpolapas. Hwe moya'mi pi'nɨngo engo uhu'mokontɨfi Pailotɨmo u'mantɨfi ulɨmentohofi, Olo Sɨkuno Engo lomo kɨko hwe anga'no impo'ango mta'ni usɨhutofɨhwatɨmonntaho. Oso yahinoso apa'no fiyo. Oso'no Pailot kako hwe moya'mi hopi'nonohino somo ulɨmento, Olo hwe lohwo yofe engo'njo semokosyohumayo'ne sohumo ngko usɨhutofono lasenɨngkohoho. Pailot kako huno moi'wonoho. A'amu pi'nɨngo engo Jisasɨmo isɨhutofɨhwajiyo'ne ulɨmentohofo so'no a'amu tajo ango syoho'njo sohwa Jisas ne'no sɨmano hintotohino umnɨngkahonɨngki Jisasɨmo aho ko'mentohofofoho. 11 Ose ulahonɨngki a'amu tajo ango syoho'njo sohwa hofɨko a'amu ajwo sopo lohofontɨfi a'amufe sɨmehomo ulɨkofantɨfi ulɨmentohofi, Mpolapasɨne'no ulɨmno. Jisas nakwolaho. Mpolapas usɨhutofo. Ose ulɨmno. 12 Ose ulahonɨngkofi Pailot apa'no ulohonɨmento, Olo hwe yofe engo'njo semokosyohumayo'ne lohumo ngko pipi uloho'mnehono. 13 Ose ulahonɨngki a'amu hopi'nono joho lɨmentohofi, Iyomo fonjinto'ofahumno. 14 Ose ulahonɨngkofi Pailot ulohonɨmento, Peho'neto. Olo hwe lohwo peho wonyo imaso hwolo. Ose ulahonɨngkofi a'amu joho mohm'no lɨwo'nɨmentohofi, Iyomo fonjinto'ofahumno. 15 Ose ulahonɨngkofi Pailot hofɨkoe sɨmeho wopɨngo umo'nono lonto Mpolapasɨmo isɨhutofɨhwajonto, kakoe hwe itokuso'njo sohwamo ulɨmento, Jisasɨmo impe'nji fonjɨkuji iyopo fonjinto'ofahumno. Ose ulɨmentisofoho.

A'amu itokuso'njo sohwa Jisasɨmo sitofo ulɨmentohofofoho.

(Matɨyu 27:27-31; Joun 19:2-3)

16 A'amu huhwo sohwa Jisasɨmo a'amu mokosyohumayo sohwoe tojo somo ipemotaswontɨfi nom'ne hwe itokuso'njo hopi'nonohino sohwamne'no joho lutɨmantɨfi uhwonɨmno ulɨmentohofofoho. 17 Nuhu'mokontɨfi manji'mofo miyo'nohino so'nji Jisasɨye sangopo ho'nasyontɨfi impe yongo'njoso nokikisontɨfi Jisasɨye mnokinopo monji'mofahumentohofofoho. 18 Ose imentohofoso, Jisasɨmo atɨfe itɨhwantɨfi sitofo ulɨmentohofi, Ou hwe engo sohwosi kɨko a'amu Juta somo mokosyohumawo'nɨngkino sohwosilaho. 19 Ose ulontɨfi nom'nehwa fo'me'nji mnokinopo hwanɨngo fonjontɨfi memijo sɨmanopo yatu'mo lohofontɨfi Jisasɨye yofe ho'nomayo'no hwomtame poji uloho'mentohofofoho. 20 Hofɨko sitofo moi'wo ulontɨfi manji'mofo miyo'nohinoso yojasyontɨfi kakoe manji'mofo uloho'mentohofofoho. Ose yontɨfi kakimo mempo hohonta'ni iyomo fonjinto'ofasiyo'ne sopono ipemotasɨmentohofofoho.

Hofɨko Jisasɨmo iyomo fonjinto'ofahumentohofofoho.

(Matɨyu 27:32-44; Luk 23:26-43; Joun 19:17-27)

21 Nosontɨfi hwe nom'nehumo uswo'nɨmentohofofoho. Oso hwe huhwo sohwoe yofe Saimoun, Sailininta'ango hweho. Alekɨsanta'nji Lufosɨyo kanɨngkwohweho. Saimoun kako syoho mta'ango sohwo Jelusalemmne'no wasɨmo lonto ko yahonɨngki hwe itokuso'njo sohwa yokumpohn'nyo ulɨmentohofi, Jisasɨye iyo hwojiyafujiyo mokaho'nyo. 22 Ose ulontɨfi Jisasɨmo hwofɨki'nyo we'e Ngkoulɨkota sopo ipemotasɨmentohofofoho. Oso yofe Ngkoulɨkota hwapɨngo olenoho. A'momnokino yokino huyo'mango pa'nyoponoho. 23 Osopo sɨ'mofontɨfi tohino umnonoho lontɨfi hofɨko ipisayo mijo iyoho'njo Jisasɨmo uyahonɨngkofi kako nɨmentiso'maho. 24 Manyo'njo yohonɨngki hofɨko Jisasɨmo iyomo fonjinto'ofahumentohofofoho. Nofonjinto'ofosyantɨfi hofɨko syohi'nyo yontɨfi Jisasɨye manji'mofo yo'mayo so'no tɨhwo woma'mtolɨkeno lontɨfi yamofo imentohofofoho.

25 Mofehi'nyo imɨngo'nji (9kɨlouk) Jisasɨmo iyopo fonjinto'ofahumentohofofoho. 26 Jisas kako poyo imo'nyo so'no iyoswomo mtɨ'mokumentohofi, A'AMU JUTAFE HWE ENGO HWEHO. Oso iyoswo hiso Jisasɨye iyo mnokino sopo hofojahumentohofofoho. 27 Hwe hufa'u ikujoho'nji hufo'nji imojiyo sohwa'umo fonjinto'ofahumentohofofoho. Hwe nom'nihwo Jisasɨye aho angahohnta'ni, hwe nom'nihwo Jisasɨye aho hwonamonyo hohnta'ni fonjinto'ofahumentohofofoho. 28 [Hohonta hungkuno mtɨ'mokumentohofoso oso sɨkuno somo ne imo'nɨmentisoso ole, Kako a'amu wonyo'njopo nohumentanɨngki a'amu huhwo wonyo hweho lɨmentohofofoho.] 29 Hwe moya'miso nopohotawentɨfi mnokɨngkwa'nɨngkwa'nnyo yontɨfi sitofo ulɨmentohofi, Kɨko ole lɨwo'nɨngkini, Anɨtuye tajo ango engoso ngko wae yaohm'mo apa'no songo molɨmeso sɨkuno hufa'u sɨhune memjaofɨhwoso'no ango moi'wo umo'nɨmontonoho. Ose ulontɨfi tɨkafo jɨmentohofofoho. 30 Kɨko fo'ma'nyo. Ose ulontɨfi ulɨmentohofo, Iyopo nta'ni fɨkotape. Ose ulɨmentohofofoho. 31 A'amu tajo ango syoho'njo yofe engo'njo sohwanji a'amu honɨngkano hungkuno lutɨhwamotofo sohwanji hofɨko a'amu ajwo somo lohofontɨfi Jisasɨmo sitofo mohm'no hnnɨmentohofi, Kako a'amu nom'nemo ufo'mawo'nɨngkiso sohwo kakimo mufo'ma'nonehoho. 32 Kako Kɨlais Anɨtu uhwatɨmentiso hweho. A'amu Isɨlaelɨfe yofe engo'njo mokosyohumayo'ne hweho. Oso'no kako iyopo nta'ni kotapɨhwoso'no uhwonɨngkuhwasi nakwo sɨmeho hi'ntnnono uyantanoho. Ose lontɨfi tɨkafo jɨmentohofofoho. Oso hwe wonyo Jisasɨ'njopo fonjinto'ofahumentohofo huhwa'u'ntnne'no Jisasɨmo sitofo ulɨmentisiyefoho.

Jisas poyo imo'nɨmentisofoho.

(Matɨyu 27:45-56; Luk 23:44-49; Joun 19:28-30)

33 Hinjo ajwo kuntoliyopo sɨkuno mjaofonto mofehi'nyomo hoholo yasyonto akupo'nyo'nji (3kɨlouk) oso'nji apa'no longkonɨngkahonɨngki mofehi'nyo lɨmentisofoho. 34 Sɨkuno moi'wo imo'nɨngkahonɨngki Jisas joho mohm'no lɨmento,Eloui, Eloui, lama sapakɨtani. Oso hungkuno iwolo'mo ole, Nje Anɨtu, nje Anɨtu, peho'no nɨsɨkwojantokuno. 35 Ose lahonɨngki a'amu kako'njopo humamentohofoso upa'nontɨfi huno muyahonɨngki lɨmentohofi, Upa'nɨmno. Olo hwe lohwo kako Ilaija osohumo Anɨtu hungkuno uyahonɨngki lɨmojo sohumne'no joho lalofoho. 36 Hwe fihwo komo'no nowento hwapɨfe we'e mijo mangkinyo'njo yomanto oso hiso tokemo yamjonto Jisas wanononto nuyonto ulɨmento, Hofahiyo. Nakwo uhwontohumano. Ilaija nopɨhwosi iyo mta'ni ufo'ma'mtolɨkeno. 37 Ose ulahonɨngki Jisas joho mohm'no lonto poyo imo'nɨmentisofoho.

38 Poyo imo'nɨngkahonɨngki hohosohonta Anɨtuye tajo ango engo somjo hwapɨfe engo oso ajwopo ango we'e Anɨtu humayo'nefoho lɨmotofo sopo hoku'yopo pmpilɨpeehinyoso yokintahopo nta'ni tomonte sɨsɨmpo lohofonto hufa'u imo'nɨmentisofoho. 39 A'amu itokuso'njo sohwafe hwe engo sohwo Jisasɨye sɨmanopo lohofonto, Jisas poyo imo'nɨngkahonɨngki uhwononto ulɨmento, Olo hwe lohwo Anɨtuye Hwomu Ne hweho.

40 Moya'mi sofa ikano nonje sopo lohofontɨfi Jisasɨmo tɨmo humuhwontohumantohofofoho. Moya'mi fifa yofe ole, Maliya Makɨtola nta'angiyoho. A'mu nom'nesi kakoe yofe Maliya Jemɨs hwe songo sohwo'nji Jousepɨ'njiye kona'wohiyoho. A'mu nom'nesi Saloumiyoho. 41 Oso fanji nom'ne moya'mi sofa Jisas hwaho Ngkalili emoimojo sohonta hofɨko tɨfi inɨngkawentɨfi ufo'ma'mentohofofoho. Oso moya'mi sofa Jisasɨ'nji Jelusalemne'no pmmentohofofoho.

Hofɨko Jisasɨye pijafo sokimomo ho'nahumentohofofoho.

(Matɨyu 27:57-61; Luk 23:50-55; Joun 19:38-42)

42 Oso sɨkuno Fɨlaite somo mofehi'nyo ukwo'mokumto iyoso'nji Jousep ango Alimateyanta'ango sohwo i'mofapmmentisofoho. Kakokaunɨsol syoho'njo hweho. Kako hwe wopɨngo hweho. A'amu hopi'nono kakoe yofe ho'noma'motofofoho. Kako oso hwe Anɨtu uhwatɨmo lɨmentiso sohwe pe-e'ne sɨkuno so'no hontohumamojo hweho. Kako sɨkuno iyoho humayo'ne yo'mayo ito'no esyohumayo so'no syafɨsyonto kako iyoho we'e ko unɨngkahonɨngki yokumpohn'nyo imo'nonto Pailotɨmo u'manto Jisasɨye pijafo mayo'ne ulohonɨmentisofoho. 44 Ose ulohonɨmentisoso Pailot yomo yonto syafɨhu'mento nto kape'nɨngkohoho. Ose syafɨsyonto hwe engo itokuso'njo sohumo joho lutɨmanto ulɨmento, Jisas poyo nto limo'nɨngkohoho. 45 Ose ulahonɨngki eno ulahonɨngki Pailot Jousepɨmo ulɨmento, E'wano. Pijafoso maho. 46 Ose ulahonɨngki Jousep hwapɨfe halojo wonyoangkafo mpe yonto Jisasɨye pijafoso iyo mta'ni nomanto hwapɨfe somo ifohumpento sokimomo ho'nahumentisofoho. Oso sokimoso kako sojo engo somo imo engo ilɨ'mentisofoho. Osopo ho'nasyonto sojo engo yɨwolo'mo lohofonto sokimo hoku'yo somo pɨjwahumentisofoho. 47 Maliya ango Makɨtolanta'angosi'nji Maliya Jousisɨye kona'wohi'nji siko Jisas ho'nahumentohofo sopo uhwonɨmentisiyefoho.

Copyright information for `APZ