Mark 7

Anɨtuye honɨngkano hungkunoso a'mane hungkuno somo yakolo'nnyofoho.

(Matɨyu 15:1-9)

A'amu Falisi sohwanji a'amu Mousesɨye honɨngkano hungkunoso lutɨhwamotofo Jelusalem mta'ango sohwanji Jisas nohumentanjopo uhu'mokontɨfi Jisasɨye inomokomoyo sohwamo uhwonɨmentohofoso hofɨko aho mijo miyotɨku'nyo'njo wopayo nɨwo'nɨngkohofofoho. Falisi sohwafe yahinoso momaso'njo hwafoho. A'amu Falisi sohwa a'amu Juta hopi'nonohino so'nji hofɨkoe yahino ole, Nakwo wopayo wonano lontɨfeso sɨmo'mo aho mijo yotɨku'nontɨfi nɨwo'nɨngkohofɨhwafoho. Hohonta homnɨngkwohwosafe yahino oloso tɨpema'mentohofofoho. Hofɨko huno ole aho miyotɨku'nyo'njo wopayo nososo ou sɨmeho mo'mo wonyo mnaweho. Ose syafɨhu'mentohofofoho. A'amu huhwo sohwa wosopayo mpe yɨwo'nɨngkohofo sopo nta'ni nopontɨfi aho mijo miyotɨku'nyo'njo'manji hofɨko wopayo manyofoho. Nom'ne yahino oso pa'nyoso pi'nɨngo weho. Hofɨkoe noswanyo, iku'yo, hwontoho yo'mayoso mijo ito'no yajɨjɨwo'nɨngkohofoso kiho'ne'maho. O'o hofɨkoe yahinofoho. Oseso a'amu Falisi sohwanji Jutafe hwe engo sohwanji Jisasɨmo ulohonɨmentohofi, Jɨje inomokomoyo sohwa neyakwosafe yahinomo minɨngkayo'njo peho'no yalokwofo. Hofɨko aho mijo miyotɨku'nyo'njo wopayo nɨwo'nɨngkohofofoho. Ose ulohonɨngkahonɨngkofi Jisas ulɨmento, Hohonta Aisaiya hwe Anɨtu hungkuno ulahonɨngki a'amumo lutɨhwamojo sohwo sekwo a'amu mango'nohino hwasyo nehopi mtɨ'mokumento,

Olo a'amu loso hofɨko mango mta'nohini ho'nonɨmawo'nɨngkohofofoho.
I, hofɨko ngkimo sɨmeho montapefoho.
Hofɨko a'amu hwahoponjo sofe hunoso nomantɨfi Anɨtu mta'angofoho lontɨfi a'amu hwaho ayo'mjo somo lutɨhwawo'nɨngkohofofoho.
Oso'no hofɨko ngkimo wonyopi jomo ntɨwo'nɨngkohofofoho.
Aisaiya ose mtɨ'mokumtisofoho.
Sekwo Anɨtuye hungkunomo haloho maposo'njo yontɨfi seyakwosafe yahinomnohini inɨngkawowo'nɨngkohofɨhwasoho.

Ou, sekwo huno ole syafɨsyɨwo'nɨngkohofi, Nakwo huno'njo hwona'nyoho. Ose lɨwo'nɨngkohofɨhwasoho. Sekwo Anɨtuye hungkunomo hwotoho fewo'nɨngkohofoso seyakwosafe yahino somo yɨwo'nngkohofɨhwasoho. 10 Mouses hohonta ole lɨmento, Kɨko jɨje mpohwo na'umo tɨfi finɨngkayo. U, a'amu fihwo kako hungkuno wonyo kanɨngkwohwo kona'wohimo uloso osohwo kako poyo wape'nono. 11 I, sekwo ole lɨwo'nɨngkohofo, Hwe fihwo kako hamniyoho hi'njo sohwo kanɨngkwohwo kona'wohimo ufo'mayo so'no, i kako sikimo ulɨmontonoho. Ngko hamniyoho yo'mayoso wosejapmmonji ko yoheso ngko ole nto lɨmalefoho. Ngko Anɨtumo uyɨmne'no yohono. 12 Oso hwe huhwo sohwo ose ulonto kanɨngkwohwo kona'wohimo mufo'maso'njo yɨwo'nɨngkiso hweho. Oso'no sekwo Falisi sohwasi wopɨngofoho lontɨfi lɨwo'nɨngkohofofoho. 13 Ose ulontɨfi Anɨtuye hungkunomo hwotoho fewo'nɨngkohofofo. Seyakwosafe hunomnohini inɨngkawo'nɨngkohofofoho. Oso yahinoso anga'nohinofoho. Pi'nɨngo oso pa'nyoso weho.

Yo'mayo a'amumo wonyo imokuwo'nɨngkisofoho.

(Matɨyu 15:10-20)

14 Jisas hwe moya'mimo ngkiyepono wapɨfento joho ulɨmentisofoho. Nopahonɨngkofi ulɨmento, Sekwo hopi'nono ito'no nupa'nɨngkuji huno fɨsyafɨhupmno. 15 Yo'mayo nyo'neso a'amufe honɨngkano wonyo umo'nɨmonte'maho. O'o yo'mayo sɨmeho mta'angoso a'amufe hunoso wonyo hungkuno'njoso honɨngkano wonyo umo'nɨmontonoho. 16 Sekwo haloho'njoku'manji nje hungkunomo haloho popmno.

17 Jisas oso a'amu huhwo sohwamo ulɨko'manto ango nom'nemo swahonɨngki kakoe inomokomoyo sohwa ulɨmentohofi, Oso pahnnɨmo hungkuno lohinoso ne pipilo. 18 Ose ulahonɨngkofi Jisas ulɨmento, Sekwo huhwasi ngkine'no huno maseyoholiyohoho. Upa'nɨmno. Yo'mayo toho nyo'neso honɨngkano wonyo imokiyo'maho. 19 O'o wosopayo hiso sɨmehomne'no nɨkwato nɨhu'nahone ho'namo. Wopayo hiso jɨje hunomne'maho. Ose ulɨmentisofoho. Oso'no Jisas yo'mayo hopi'nono nyo'neso hano mopitofasiyo'njofoho. 20 Jisas nom'ne hungkuno ulɨmento, Yo'mayo a'amufe huno mta'angoso Anɨtuye tɨmo sopo oso hiso a'amufe honɨngkano wonyo imokiyofoho. 21 Yo'mayo huno mta'ni swaponteso ole, huno wonyo syafɨsiyo ape sikinjomo wonyo ulohofo, yo'mayoso hufo iyo, a'amumo fonjasiyo, nom'ne hwafe ape hufo iyo 22 a'amumo yo'mayo so'no hi umo'nyo, yo'mayo wonyo honɨngkano, hwasyo hungkunojo, yokumpohn'nyo, sɨmeho wonyo, sitofo hungkunojo, ngko a'amu wopɨngo'nohino syafɨsiyo'ne, yo'mayo fonɨfonyo. 23 Oso hopi'nono a'amufe hunomo mnaweho. A'amu fihwo oso wonyoso huno syafɨsyɨhwosi kako yɨhwoso'no, kakoe honɨngkano wonyo imo'nonefoho. Ose ulɨmentisofoho.

A'mu Founisiyanta'angosi Jisasɨmo sɨmeho hi'ntnnono nehopi umentisofoho.

(Matɨyu 15:21-28)

24 Osopo nta'ni Jisas nolɨkafonto, hwaho pone Taiya mofone sopo nowento osopo a'amu fihwoe angomo nohumanto a'amu ngkimo yofe manɨhwofe'njo yohofo ose kolonto a'amu Jisas humentanjoso pone'no huno moi'wo umentisofoho. 25 A'mu fisi oso ango sopo nta'ni kakoe mu we'e towahuno wonyo'njosi Jisas humaho upa'nonto komo'no noponto Jisasɨye sɨfɨlaku'nyo'mo hwomtame ehumamentisofoho. 26 Olo a'mu losi kako Juta a'mu'maho. O'o, kakoe a'amu Founisiya, hwaho Siliya nta'angiyoho. Kako Jisasɨmo jomo ulɨmento, Towahuno wonyo nje mumo humasolo wae ntohofiyo.

27 Ose ulahonɨngki Jisas a'amu Juta somo ufo'mayo'nehwo pahnnɨmo hungkuno ulɨmento, U, nakwo mehomife wosopayo mehwasi sɨwojomo woho'nɨmofantontaho. O'o, awonoho. A'amu sohwo mehomi somo kaki'no wopayo uyantɨfeho. 28 I ose ulahonɨngki a'musi syafɨhu'mento, Ngko a'amu Isɨlaelɨ'maho. O'o, sɨwojo pa'niyoho. Ose syafɨsyonto ulɨmento, Hwe Engofo, kɨko nehopi lohino. Oseso mehomiso wopayo paho yo'mayoso umokwajɨfijoso sɨwojo wanɨmontonoho. Oso'no kɨko ngkimo nɨfo'maho. 29 Ose ulahonɨngki Jisas yomo yonto ulɨmento, Oso hungkuno wopɨngo lohino so'no jɨje angopo nowehoji jɨje mumo uhwonjoso towahuno wonyo sohwo nto ulɨko'maso uhwonɨmonnoho. 30 Ose ulahonɨngki a'musi kakoe angopo nowento uhwonɨmentisoso kakoe mu saho fosyowentanɨngki uhwonɨmentisoso towahuno wonyo nto ulɨko'ma'mentisofoho. Hofiyo fosyowentanɨngki uhwonɨmentisofoho.

A'amu haloho pɨku'nnyo melanyo tango'njo sohumo wopɨngo umokumentisofoho.

31 Jisas ango Taiya sopo nta'ni nulɨko'manto hwaho Saitoun uyakolofonto ango pone engo aho hufa'u hopi'nonohino Ntekapolis sopo uyakolofonto Mijo Ayo Ngkalili sopo i'mofapmmentisofoho. 32 Osopo a'amu nom'neso Jisasɨmo a'amu haloho pɨku'nnyo melanyo tango'njo sohumo ipemotapontɨfi jomo ulɨmentohofi, Jɨje aho olo hwe lohumo fɨkisasyo. 33 Ose ulahonɨngkofi oso hwe huhwo sohumo Jisas utɨmanto Jisasɨ'nji we'enepi nowenji siko'nohini nohumanji Jisas kako ajo'miyoso hwe sohwoe halohomo kisahumentisofoho. Kisasyonto memijo ajo'miyomo emjoma'nonto hwe sohwoe melanyopo kisahumentisofoho. 34 Jisas kako ahwomomo uhwononto sɨmano esyaofonto ulɨmento,Efata. Hwapɨngoso ole, Haloho wokuhwosampeno. 35 Ose ulahonɨngki hwe sohwoe haloho komo'no hwosampo lohofahonɨngki kakoe melanyo wopɨngo imo'nɨngkahonɨngki hungkuno ito'no lɨmentisofoho. 36 Oseso Jisas a'amumo apa'no i'mofaponto ulɨmento, Olo yohe loso'no sekwo nulɨkutoho.

Ose ko ulahonɨngki hofɨko hahn'nyo yontɨfi a'amumo ulɨwo'nɨmentohofofoho.
37 Yo'mayo Jisas imentiso so'no hofɨko pisopisaho mjalɨmɨwentɨfi hofɨko ulɨmentohofi, Yo'mayo Jisas yɨwo'nɨngkisoso wonyoangkafo'nohinofoho. A'amu haloho pɨku'nnyoso upo'nalokwofo. A'amu ilo'nnyoso hungkuno ito'no lalokwofo. Ose lɨmentohofofoho.

Copyright information for `APZ