Matthew 17

Jisasɨye a'apahoso nom'ne kengo imo'nɨmentisofoho.

(Mak 9:2-13; Luk 9:28-36)

Sɨkuno aho fehohnjo hopi'nono fehohnta'ne anga'no memjaofahonɨngki Jisas kako Pita'nji siko'nɨkwa'i Jemɨsɨ'nji Jounja oso hwa nutɨmanto hofɨko hwofɨki'nyo sawemo engo sopono kotasɨmentohofofoho. Hofɨko'nohini humamentohofofoho. Nohumantɨfi Jisasɨye a'apahoso nom'ne ulohopisahonjoso uhwonɨmentohofofoho. Kakoe sɨmo'mangoso mofehi'nyo lawo'nnyo imo'nɨmentisofoho. Kakoe manji'mofo yo'mayo hopi'nono nɨhu'no halojo imo'nɨmentisofoho. Ose uhwonontɨfi uhwonɨmentohofoso hwe hufa'u ahwomo mta'ango sohwa'u Mousesɨ'nji Ilaija'nji siko noponji Jisasɨ'nji hungkuno hnnɨmentohofofoho. Pita kako huno pi'nɨngo syofɨsikaofonto Jisasɨmo ulɨmento, Hwe Engofo, nakwo olopo humentani sehonɨngkuhwoneso wopɨngofoho. U, ngko olopo ango hufa'u sɨhune molɨmeso wopɨngotaho. Anga'no kɨko'ne, nom'ne Mousesɨmne, nom'ne Ilaijamnefoho.

Ose ulontanɨngki himo engo pomponaho pa'nyoso hofɨkimo ifeehu'mo kohumentisofoho. Oso himo homo somta'ni ole ho'nɨmento, Olohwo nje Hwomufoho. Ngko kakine'no hi nɨmo'nɨwo'nɨngkiso hweho. Kakoe yahino so'no nje sɨmeho wopɨngo nɨmo'nɨngkohoho. Kakoe hungkunomo sekwo haloho upa'nɨmno.

Ose ho'nɨngkahonɨngki Jisasɨye inomokomoyo sohwa nupa'nontɨfi iyoho unɨngkahonɨngki hofɨkoe sɨmano hwahomo mongkuto'mentohofofoho. Ose nohumentanɨngkofi Jisas hofɨko'njo tɨfone lopo noponto aho umakumentisofoho. Numakonto ulɨmento, Sekwo filɨkapmno. Iyoho ikutoho. Ose ulahonɨngki hofɨko tɨmo honontɨfi nom'ne a'amumo muhwonyofoho. O'o, hofɨko Jisas kako'nohini humentanɨngki uhwonɨmentohofofoho.

Hofɨko oso hwofɨki'nyo hopo sopo nokotapontɨfi Jisas hungkuno yokumpohn'nyo ulɨmento, Olo hiloso nuhwonɨngkohofo loso'no nom'ne a'amumo olohonta nulɨkutoho. O'o, hwangku A'amufe Hwomu sohwo poyo imo'nɨngkuhwosi apa'no songo lɨkafoso sohonta ou, sekwo filutɨhwanɨngkuno.

10 Ose ulahonɨngki kakoe inomokomoyo sohwa ulɨmentohofi, A'amu honɨngkano hungkuno lutɨhwamotofo sohwa ole lɨwo'nɨngkohofi, Ilaija kaki'no wapmmontonoho. Tɨfi sohonta Kɨlais hwe Anɨtu uhwosopo'mentiso sohwo wapmmontonoho. Oso hiso peho'no lalokwofo.

11 Ose ulahonɨngkofi Jisas ulɨmento, Ou, hungkuno nehopi lalokwofo. Ilaija kako nopɨhwosi yo'mayo hopi'nono ito'no wesyohumamtonoho. 12 I, ngko waselɨmonne'no yohono. Ilaija kako nto pmmentisofoho. Osohune'no a'amuso yofe mɨhwofe'njo yontɨfi hofɨko hofɨkoe hwahoponjo hunomnohini inɨngkawentɨfi yo'mayo wonyo uloho'mentohofofoho. Oso pa'nyo hwangku A'amufe Hwomu sohumo tohino engo uyɨfitnnefoho. 13 Jisas ose ulahonɨngki kakoe inomokomoyo sohwa huno ole uyɨmentisofo kako Joun A'amumo Mijo Kiyoma'mojo sohwo Ilaija pa'nyo sohune'no nalohoho. Ose syafɨhu'mentohofofoho.

Jisas hwomu towahuno wonyo ehuhnnamo'nnyo sohumo wopɨngo umokumentisofoho.

(Mak 9:14-29; Luk 9:37-42)

14 Oseso hwofɨki'nyopo nta'ni nokotapontɨfi a'amu pi'nɨngo engo'njo sopo ifɨwahonɨngkofi hwe fihwo kako Jisasɨmo nu'manto hwomtame ulohofonto ulɨmento, Hwe Engofo, kɨko nje hwomumne'no hitoho wakilofono. Kako nopɨwasyonteso yomo yomo iwo'nɨngkiso hweho. 15 Kakoe a'apahoso nɨhu'no wonyofoho. Sɨkuno pi'nɨngo somo kako tohomo hwafɨwo'nɨngkiso hweho. U, sɨkuno fehohnjo kako mijomo hwafitohm'mofɨwo'nɨngkiso hweho. 16 Ngko jɨje inomokomoyo sohwamo nje hwomumo uhwojahohweso. I, hofɨko wopɨngo mmokoho yohofo. Hofɨko hopo'maho.

17 Ose ulahonɨngki Jisas ulɨmento, Hwe moya'mi olohonta humalofo soku, sekwo Anɨtu sɨmeho hi'ntnnono muyo kuyoho. Sekwoe honɨngkano ito'nohino'maho. Oso yahino hiso ne'no weso'manji ngko sekwo'nji humayoso sɨkuno alale womemjanɨmo'montolɨkeno. Ngko sekwoe tango ngkimo nɨ'mayoso sɨkuno alale womemjanɨmo'montolɨkeno. Ngko'njo lopo hwomu huhwo sohwo uhwojapmno. 18 Ose ulonto Jisas oso towahuno wonyo sohumo yoka ulahonɨngki towahuno wonyo sohwo oso hwomu sohumo ulɨko'ma'mentisofoho. Hwomu huhwo sohwo wopɨngo komo'no imo'nɨmentisofoho.

19 Oseso kakoe inomokomoyo sohwa Jisasɨyepono nopontɨfi hofɨko'nohini nohumantɨfi ulɨmentohofi, Pipilo. Nakwo oso towahuno wonyoso wae meeofesofo.

20 Ose ulahonɨngkofi Jisas ulɨmento, Ou, ngko nehopi waselɨmonne'no yohono. Sekwo ngkimo sɨmeho hi'ntnnonohinoso montopantokuyohofo. Sekwo ngkimo nnɨngkape-eso nɨhu'no we'e patnnyo uyo pa'nɨngo'manji u, sekwo olo hwofɨki'nyo lomo kɨko nolɨkafohoji fɨwano, ose ulɨkujo'no hwofɨki'nyo sohwo wamtonoho. Sekwoe sɨmeho hi'ntnnonohinoso oso patnnyo uyo we'eso pa'nyo hi'njo hwasɨ'manji u, sekwo yo'mayo hopi'nonohinoso ikutnne hwasoho. 21 [I oso hiso'no olo towahuno wonyo loso'no wae yaofo'neso honɨngkano anga'nohino weho. Oso honɨngkanoso olenoho. Sekwo Mpohumo jomo'nohino ujo'manji wosopayo manyo'njo humayo so'ntnno ifijoso olo towahuno wonyo loso a'amumo ulɨko'mayo'nefoho.]

Jisas kakoe poyo imo'nyo so'no apa'no ulɨmentisofoho.

(Mak 9:30-32; Luk 9:43-45)

22 Jisas kakoe inomokomoyo sohwanji hwaho Ngkalili i'mofawentɨfi Jisas ulɨmento, Ngko A'amufe Hwomu sohwo'nɨmo nje mango sohwafe ahomo ho'nanɨsyɨkujo'no 23 hofɨko wofonjonɨsyantɨfeho. I oso huhwo sohwo sɨkuno hufa'u sɨhune memjaofɨhwoso'no Anɨtu apa'no songo ulɨka'montonoho. Ose ulahonɨngki inomokomoyo sohwa sɨmeho tango engo uyɨmentisofoho.

Jisas tajo angomne'no hamniyoho ho'na'mentisofoho.

24 Jisas kakoe inomokomoyo sohwanji ango Koponeyam i'mofɨwahonɨngkofi a'amu tajo angomne'no hamniyoho mawo'nɨngkohofo sohwa Pitamo nu'mantɨfi ulɨmentohofi, Sekwoe hwe engo sohwo kako tajo angomne'no hamniyoho ho'naofɨwo'nɨngkiso hwolaho.

25 Ose ulahonɨngkofi Pita ulɨmento, Ikofo.

Ose ulonto Pita angomo noswahonɨngki Jisas Pitamo kaki'no ulɨmento, Saimoun, kɨko huno peho'no kiyohoho. Olo hwaho loponjo hwe yofe engo'njo hwaho mokosyohumayo sohwa hofɨko hamniyoho yo'mayoso tɨhumta'ni mawo'nɨngkohofoto. Hofɨko'montohwa mta'nɨngotaho. A'amu kengo sohwa mta'angotaho.

26 Ose ulohonɨngkahonɨngki Pita ulɨmento, A'amu kengo sohwa mta'ango mawo'nɨngkohofofoho. Ose ulahonɨngki Jisas ulɨmento, I, ose'manji hofɨko'montohwa hamniyoho moho'naopitnnehofo. Oso'no ngko Anɨtuye hwomu sohwo'ni peho'no uyɨmonnto. 27 I oso hiso'no hofɨko nakumne'no huno wonyo nosyonafɨhupitnnoho. Kɨko mijo momɨngopono uhuji ingkuso finjasyo. Inanɨku sɨmo'mjo injwapojoso kakoe mangomo kɨko hamniyoho tajo angomne'no hopaso wotɨpema'monnoho. Oso hamniyohoso nomahoji nekumne'no tajo angomne'no foho'namofo. Ose ulɨmentisofoho.

Copyright information for `APZ