Matthew 22

Ape mantɨfi elɨjwanyo'ne pahnnɨmo hungkunofoho.

(Luk 14:16-24)

Jisas pahnnɨmo hungkuno apa'no a'amu somo ulɨmento, Anɨtu a'amumo mokosyohumayo so'no olo pa'nyofoho. Hwe yofe engo'njo kakoe hwomu ape mante elɨjwanɨwo'nɨngkohofo pa'nyofoho. Sɨmo'mo kako a'amu pi'nɨngo engo elɨjwanyo wosopayo nɨfitnne'ento uhwosopo'mentisofoho. Oso hohosohonta wopayo elɨjwanyo sɨkuno somo kakoe syoho ulohofiyo sohwamo a'amu uhwosopo'mentiso sohwa pɨfitnne'ento utɨmayo'ne lɨhwatɨmentisoso hofɨko nakwolaho ulɨmentohofofoho. Oso'no syoho ulohofiyo nom'ne sohwamo lɨhwajonto ulɨmento, A'amu uhwosopo'mentohe somo ole ulɨmno. Wopayo nto lɨku'maho. Nje yahu'nji tongo'nji fonjasyontɨfi lɨku'maho. Sekwo oyonɨmno. Ose ulɨmno.

Ose ulahonɨngki nowahonɨngkofi a'amu uhwosopo'mentisoso hahn'nyo yontɨfi hofɨko hofɨkoepi syoho'mno humpo'mentohofofoho. Nom'nihwo kakoe wopayo syohomno umentisofoho. Nom'nihwo kakoe kwope syohomno umentisofoho. Nom'neso hwe engo sohwoe syoho ulohofiyo sohwamo wonyo ulohofontɨfi fehohnjo sohwamo hwanɨngo fonjahonɨngkofi nom'ne sohwamo fonjahumentohofofoho. Oseso hwe engo sohwo sɨmeho tohino umnɨngkahonɨngki kakoe a'amu itokuso'njo sohwamo luhwatɨmento, Sekwo a'amu nje syoho ntohofiyo sohwamo fonjahumalofo somo nofonjasyɨkuji hofɨkoe ango toho fɨhm'mopmno. Ose luhwatɨmentisofoho. Ose yahonɨngkofi hwe engo sohwo kakoe syoho ulohofiyo sohwamo ulɨmento, Nje wosopayo nto lɨku'maleno. I, a'amu uhwosopo'mentohe sohwafe yahino hopo'maho. Oso'no sekwo honɨngkano'meemo humpekuji a'amu nuhwonɨngkuji nje wosopayo'ne ulɨmno. Sekwo nakwo'nji wohwano. Ose ulɨmno. 10 Ose ulahonɨngki syoho ulohofiyo sohwa honɨngkano'meemo nohumpentɨfi a'amu hopi'nono wopɨngo'nji wonyo'nji uhwonɨmentohofo somo lɨtɨmantɨfi utɨmotapmmentohofofoho. Oso'no hwe yofe engo'njo sohwoe ango somo uhu'mokumentohofofoho. Ango hiso a'amu hopo imentisofoho.

11 Hwe moya'mi angomo nohumentanɨngkofi hwe yofe engo'njo sohwo kako a'amu swahopohofo somo uhwonɨmo lonto noswonto uhwonɨmentisoso hwe fihwo kako manji'mofo wonyo'njo sohwo nohumentanɨngki uhwononto, 12 Ulɨmento, Nje a'amu sohwosi, olo sɨkuno lomo nje hwomu ape masolo'no welɨjwonantane'no yalokuhwono. Oso'no kɨko manji'mofo songo miyo'njo yonji peho'no swaponji humahnno. Ose ulahonɨngki hwe huhwo sohwo mampinyo imentisofoho. 13 Oseso hwe engo sohwo kakoe syoho ulohofiyo sohwamo ulɨmento, Olo hwe lohwo kakoe sɨfe aho nano mtitofɨkuji mempo hohnta'ni sɨkwo'mjoho so'mo foho'naopmno. Osopo a'amu humotaho engo lɨkuji hulɨngkwajingo ifaloho'nɨfitnnefoho. 14 Ose ulonto Jisas ulɨmento, Anɨtu a'amu pi'nɨngo engo somne'no woswapɨfe lonto joho ko ulonteso i, a'amu anga'no anga'nohino somo uhwosopo'mentisofoho.

A'amu sohwa hofɨko hamniyoho hwe yofe engo'njo sohumne'no ho'nasiyo'ne Jisasɨmo ulohonɨmentohofofoho.

(Mak 12:13-17; Luk 20:20-26)

15 A'amu Falisi sohwa nuhu'mokontɨfi hungkuno hnnɨmentohofi, Jisas nakumo hwasyo hungkuno nalone'no pipi ulohofanehwono. Hwasyo hungkuno nalɨhwoso'no impo'angomo untofosyano. Oso'no nohnnontɨfi 16 hofɨko hofɨkoe inomokomoyo fehohnjo sohwanji Helout kakoe inomokomoyo fehohnjo sohwanjimo luhwo jahonɨngkofi Jisasɨmo nu'mantɨfi ulɨmentohofi, Nakwoe Lonetɨhwayo sohwosi, kɨko hungkuno nehopi'nohini lɨwo'nɨngkino so'no nakwo huno nayohoho. Kɨko Anɨtuye yahino so'no a'amu somo ito'nohini lutɨhwawo'nɨngkino hwosoho. A'amu kikine'no huno wonyo syakufɨsiyo so'no kɨko iyoho makinyofoho. 17 Oso'no kɨko olo hilo so'no jɨje huno mta'ango fonaso. Nakwo hwe yofe engo'njo Sisa kako hwaho mokosyohumayo sohumne'no hamniyoho (takis) ho'nasiyoso wopɨngotaho.

18 Ose ulahonɨngkofi Jisas kako hofɨkoe yahino kakimo yamofo ulohofo'ne so'no huno uyahonɨngki ulɨmento, Sekwo hwasyo hungkuno hwapɨngo'njo hwasoho. Sekwo ngkimo yamofo peho'no ntohofalokwofo. 19 Sekwo ngkimo hamniyoho anga'no ntɨhwamno. Ose ulahonɨngki hofɨko hamniyoho anga'no kakiyepono motapontɨfi utɨhwamentohofofoho. 20 Oseso Jisas hamniyoho somo uhwononto ulɨmento, Olo huyo'mango lo'nji yofe lo'nji tɨhwoeto.

21 Ose ulahonɨngki ulɨmentohofi, Sisafefoho.

Ose ulahonɨngkofi Jisas ulɨmento, E'wano, Sisafe yo'mayo so'manji Sisamo uyimno. I Anɨtuye yo'mayo so'manji Anɨtumo uyɨmno.
22 Ose ulahonɨngki nupa'nontɨfi hofɨko yomo yontɨfi Jisasɨmo ulɨko'mantɨfi umentohofofoho.

Hofɨko Jisasɨmo a'amu nope'nontɨfeso songo lɨkafo so'no ulohonɨmentohofofoho

(Mak 12:18-27; Luk 28:27-40)

23 Oso sɨkuno homo somo a'amu Satɨyusi fehohnjo Jisasɨmo u'ma'mentohofofoho. Oso a'amu huhwo sohwa ole lutɨhwawo'nɨngkohofi, A'amu poyo pe'nyo sohwa hofɨko nɨhu'nahone pe'nɨwo'nɨngkohofo. Apa'no songo molɨkafe'nefoho. 24 Oso a'amu Satɨyusi Jisasɨmo ulɨmentohofi, Nakwoe Lonetɨhwayo sohwosi, Mouses ole lutɨhwamentono. Hwe fihwo mehomi ane sohwo poyo pe'nososo konɨngkwa'wehwo kakoe apemo woma'montonoho. Oso hwe huhwo sohwo kola'wehwoe pijohinomne'no konɨngkwa'wehwo mehomi wotɨpema'mtonoho. Ose lutɨhwamentono. 25 Oseso hwe aho fehohnjo hopi'nono nom'ni mta'ni hufa'u sohwa humamotofofoho. Tisɨmaso sohwo ape ma'mentisofoho. Nomanto mehomi motɨpemaso'njo pe'nɨmentisofoho. Nope'nɨngkahonɨngki konɨngkwa'wehwoe apeso ma'mentisofoho. 26 Oseso aku'mu sohwo ose imentiso so'no ose'nohini mjɨmɨwentɨfi ae usaho sohwo pe'nɨmentisofoho. 27 Oso hwe hopi'nono pe'nɨngkahonɨngkofi ape hiso kako tɨfi pe'nɨmentisofoho. 28 E'wano. Ole fonaso. A'amu poyo pe'nɨfijoso songo lɨkapijo sohonta oso homnɨngkwa'wehwo sohwa olo ape losi tɨhwo woma'montolo. Hwaho lopo hopi'nono ma'mentohofofoho.

29 Ose ulahonɨngkofi Jisas ulɨmento, Sekwo Anɨtuye hungkuno so'nji Anɨtuye yokumpohn'nyo so'ntnne'no huno maseyohoyohoho. Oso'no hwasyo hungkuno ntohofo. 30 A'amu poyo pe'nɨmentohofoso lɨkapijo sohonta hwe moya'mi ape momaso'njo ifitnnefoho. O'o, hofɨko a'amu ahwomomjo ape momaso'njo pa'nyo imo'nɨfitnnefoho.

31 I, a'amu poyo pe'nyoso songo lɨkapitnne so'no Anɨtu nalɨmentiso so'no huno maseyo'njotaho. 32 Anɨtu ole nalɨmento, Ngko Apɨlohamja Aisakɨja Jekoupɨjafe Anɨtu hwo'nyoho. Ose nalɨmentisofoho. Oso a'amu hiso ahwomomo songo humalofo. Anɨtu kako poyo pe'nyo sofe Anɨtu hwo'maho. O'o, kako a'amu songo humalofo sofe Anɨtuyoho. 33 Olo hungkuno loso ulahonɨngki hwe moya'mi hofɨko yomo imentohofofoho.

Anɨtuye hungkunomo inɨngkayoso nom'ne hungkuno somo yakolo'nnyofoho.

(Mak 12:28-31; Luk 10:25-38)

34 Olo hungkuno Jisas a'amu Satɨyusi sohwamo ulahonɨngki hofɨko hungkuno nom'ne majo. Mampi'nyo humamentohofofoho. A'amu Falisi upa'nɨmentohofoso a'amu Satɨyusi mampi'nyo humamentohofoso nupa'nontɨfi Jisasɨ'njopo uhu'mokumentohofofoho. 35 Hofɨko'njo ajwo lopo hwe fihwo honɨngkano hungkuno lutɨhwayo syoho'njo sohwo Jisasɨmo yamofo uloho'mo lonto ole ulohonɨmento, 36 Anɨtuye hungkunomo inɨngkayoso nom'ne hungkuno somo yakolo'nnyoso ntisoto.

37 Ose ulohonɨngkahonɨngki Jisas ulɨmento, Hungkuno ole, Kɨko jɨje Hwe Engo Anɨtu sohune'no sɨmeho uyohoji jɨje sɨmeho hopi'nonohinoso kakimo uyo. Kɨko jɨje Hwe Engo sohune'no jɨje sɨmeho uyohoji jɨje huyo'mango hopi'nonohinoso kakimo uyo. Kɨko jɨje Hwe Engo Anɨtu sohune'no jɨje sɨmeho uyohoji jɨje huno hopi'nonohinoso kakimo uyo. 38 Olo hungkuno loso inɨngkayoso nom'ne somo hwofilo'nnyofoho. 39 Hungkuno tɨfinjoso sɨmo'mjo pa'nyofoho. Ole, kɨko hi kumo'nonto sɨmeho kumo'nɨwo'nɨngkiso pa'nyoso a'amu nom'nemne'no kɨko'njo mofone sopo humalofo somo uyo. 40 Oso hungkuno sofa'u honɨngkano hungkuno so'nji a'amu Anɨtu hungkuno uyahonɨngki lutɨhwamotofo sohwafe hungkuno so'njimo hwapɨngo wo'nyofoho.

Jisas a'amu Falisi sohwamo Kɨlaisɨne'no ulohonɨmentisofoho.

(Mak 12:35-37; Luk 20:41-44)

41 A'amu Falisi nuhu'mokontɨfi nohumentanɨngkofi Jisas ulohonɨmento, 42 Sekwo Kɨlais Anɨtu uhwosopo'mentiso sohumne'no huno pipi seyohoho. Tɨhwoe imu hwolo. Ose ulohonɨngkahonɨngki hofɨko ulɨmentohofi, Ntefitɨye imu hweho.

43 Ose ulahonɨngkofi Jisas ulɨmento, I, Ntefit Kɨlais sohumne'no nje Hwe Engofo lɨmentiso sohonta olo hungkuno hilo so'no Anɨtuye Towahuno Ntefitɨye hunomo peho'no ho'nahumentono. Ntefit ole ulɨmento,

44 Anɨtu kako nje Hwe Engo Kɨlais.
Anɨtu nakwoe hwahopo lɨhwatɨmentiso sohumo ole ulɨmento,
Kɨko nje aho anga sohohnta'ni fosyohumaho.
Osopo kɨko nohumahoji ngko jɨje mango sohwamo jɨje sɨfɨki'nyo'mo enjwa'mo wokuhumatɨ'monnoho.
45 Oso Hwe Engo huhwo sohune'no Ntefit nje imu hweho mulɨmmentono. O'o, nje Hwe Engofo ulɨmentisofoho. Oso'no oso hwe huhwo sohwo Ntefitɨye imu'nohino hwolaho.

46 Ose ulohonɨngkahonɨngki hwe nom'ne Jisasɨye hungkunomo asomo mujo'njo imentisofoho. Oso sɨkuno somo oso a'amu Falisi sohwa Jisasɨmne'no iyoho unoma'mentisofoho. Oso'no hofɨko Jisasɨmo hungkuno nom'ne'no mujo'njo imentohofofoho.

Copyright information for `APZ