Matthew 25

Moya'mi aho hopi'nohino sofamne'no pahnnɨmo hungkunofoho.

Jisas kako a'amu somo ole ulɨmento, Hohosohonta Anɨtu a'amumo mokosyohumayo so'no olo pa'nyofoho. Hwe fihwo kako ape woma'mo lonto pmmentisofoho. Moya'mi aho hopi'nonohino sofa wopayo engo nyo'ne'entɨfi hofɨkoe sikiloho nomantɨfi hwe sohumo ufohonɨtɨmano lontɨfi umentohofofoho. Oso moya'mi aho hopi'nonohino hofo sofa aho fehohnjo huno anefafoho. Aho fehohnjo huno'njofafoho. Oso moya'mi huno'maso sofa hofɨko sikiloho'nohini motawentɨfi mijo'nji momotawommentohofofoho. Moya'mi huno'njo sofa hofɨko sikiloho motawentɨfi mijo nom'ne so'nji motawomentohofofoho. Oso hwe ape mayo'ne sohwo komo'no mape'njo yahonɨngki saho fosyawo'mentohofofoho.

Saho fosyowentanɨngkofi kuntoliyo sopo joho ole ho'nɨmento, Hwe ape mayo sohwo nto pohoho. Sekwo toho'nji ufohonɨtɨmamno. Ose ho'nɨngkahonɨngki moya'mi hopi'nonohino sofa nolɨkafontɨfi hofɨkoe sikiloho ito'no esyohumamentohofofoho. Moya'mi huno'maso sofa moya'mi huno'njo sofamo ulɨmentohofi, Sekwo sikiloho mijo hmnonejapmno. Nakwoe sikiloho sɨmpe'nalofoho. Ose ulahonɨngkofi moya'mi huno'njo sofa ole ulɨmentohofi, Nakwoe sikiloho'nji sekwoe'nji mijo hopo'maho. O'o sekwo nowekuji ho'yango ango mta'ni sekwo'ne mijo mpopmno. 10 Ose ulahonɨngkofi moya'mi huno'maso sofa mijo mpe'no wentanɨngkofi oso hwe ape mayo sohwo nopahonɨngki moya'mi ito'no humesyohumantohofo sofanji angomo wopayo engo wonano lontɨfi swontɨfi hoku'yo nɨhu'nahone pɨjwahumentisofoho.

11 Hwangku sohonta moya'mi nom'ne sofa i'mofapontɨfi ulɨmentohofi, Hwe Engofo, hano fonehwosampofo. 12 Ose ulahonɨngkofi hwe ape mayo sohwo ulɨmento, Ngko sekune'no huno maniyohoyohoho. Ose ulɨmentisofoho. 13 Jisas ose ulonto ulɨmento, Sekwo ito'no fohontohumamno. Sekwo oso sɨkuno somne'no huno maseyohoyohoho.

Syoho ulohofiyo sohwa hamniyoho mokosyohumayo'ne pahnnɨmo hungkunofoho.

(Luk 19:11-27)

14 Anɨtu a'amumo mokosyohumayo sohonta olo pa'nyofoho. Hwe fihwo hano emayo'ne kakoe ango ulɨko'ma'mo lonto kakoe syoho ulohofiyo somo kakoe ho'yango yo'mayoso mokosyohumayo'ne umentisofoho. 15 Hofɨkoe yahino so'no syafɨsyonto kakoe hamniyoho yano ulohmmentisofoho. Nom'nehumofaif tausen (5,000) kina uyɨmentisofoho. Nom'ne sohumotu tausen (2,000) kina uyɨmentisofoho. Nom'nehumowan tausen (1,000) kina uyɨmentisofoho. Ose uyonto umentisofoho. 16 Oso syoho ulohofiyofaif tausen (5,000) kina ma'mentiso sohwo komo'no nowento oso hamniyoho so'nji syoho engo yontofaif tausen (5,000) kina nom'ne ma'mentisofoho. 17 Syoho ulohofiyo nom'netu tausen (2,000) kina ma'mentiso sohwo kakoe hamniyoho nomanto oso'nji syoho engo yonto nom'netu tausen (2,000) kina ma'mentisofoho. 18 I, oso'no oso hwewan tausen (1,000) kina ma'mentiso sohwo kako hamniyoho nomanto pi'nɨmomo ijopijijasyonto kakoe hwe engo sohwoe hamniyoho hwahomo hiyaso ho'nahumentisofoho.

19 Sɨkuno pi'nɨngo engo memjaofahonɨngki oso syoho ulohofiyo sofe hwe engo sohwo asomo noponto oso hamniyoho umentiso so'no hungkuno ulɨmo lonto pmmentisofoho. 20 Syoho ulohofiyofaif tausen (5,000) kina ma'mentiso sohwo nom'nefaif tausen (5,000) kina so'nji motaponto ulɨmento, Hwe engofo, osofaif tausen (5,000) kina ntapmmentohino so'nji ngko syoho engo yonji nom'nefaif tausen (5,000) kina ma'mentohefoho. Oso'noten tausen (10,000) kina olopo weho. 21 Ose ulahonɨngki hwe engo sohwo ulɨmento, Kɨko nje syoho ntohofiyo wopɨngo hwosoho. Kɨko syoho wopɨngo yonji syoho ito'nohini mokosyohumawo'nɨngkino hwosoho. Kɨko olo syoho we'e lomo wopɨngo mokosyohumawo'nɨngkino so'no ngko nom'ne syoho engo mokosyohumayo'ne wokijapmmonnoho. Kɨko ngko'njopo nopohoji ngko'nji sɨmonyo uyaho.

22 Ose ulahonɨngki syoho ulohofiyotu tausen (2,000) kina ma'mentiso sohwo nom'netu tausen (2000) kina so'nji motaponto ulɨmento, Hwe engofo, osotu tausen (2,000) kina ntapmmentohino so'nji ngko syoho engo yonji nom'netu tausen (2,000) kina ma'mentohefoho. Oso'nofoua tausen (4,000) kina olopo weho. 23 Ose ulahonɨngki hwe engo sohwo ulɨmento, Kɨko nje syoho ntohofiyo wopɨngo hwosoho. Kɨko syoho wopɨngo yonji syoho ito'nohini mokosyohumawo'nɨngkino so'no ngko nom'ne syoho engo mokosyohumayo'ne wokijapmmonnoho. Kɨko ngko'njopo nopohoji ngko'nji sɨmonyo uyaho.

24 Ose ulahonɨngki syoho ulohofiyowan tausen (1,000) kina ma'mentiso sohwo noponto ulɨmento, Hwe engofo, ngko huno moi'wonoho. Kɨko hwe yokumpohn'nyo hwosoho. Nom'ne sohwa syoho hulontɨfe somta'ni wopayo mawo'nɨngkino hwosoho. Nom'ne sohwa ufongoe fisosomokaofontɨfeso kɨko neso nomehu'meesyonji mawo'nɨngkino hwosoho. 25 Oso hiso'no huno niyahonɨngki iyoho nnɨngkahonɨngki jɨje hamniyoho nomotawenji hwahomo hiyaso mokosyohumamentohefoho. Uhwonyo. Olo jɨje hiloso kakwosi maho.

26 Ose ulahonɨngki hwe engo sohwo ulɨmento, Kɨko nje syoho ntohofiyo wonyo hwosoho. Kɨko piso'mo'nyo'njo hwosoho. Ngko nom'ne sohwa syoho hulontɨfe so'nji nom'ne sohwa fisosomokaofontɨfe somta'ni mawo'nɨngkohe so'no huno nto kiyohoho eso nto ntohino. 27 I, oso'no nje hamniyohoso kako a'amu hamniyoho mokosyohumayo sohwafe angomo moho'nanɨsiyo'njo peho'no imentohinoto. Ho'nosyontentesi nopm'mo nje hamniyoho so'nji nom'ne we'e so'nji nomahm'mnesohilo. 28 Ose ulonto ulɨmento, Olo hwe lohwoewan tausen (1,000) kina nomafɨkuji oso hweten tausen (10,000) kina mokosyohumasoso sohumo umasyɨmno. 29 Hwapɨngoso ole, a'amu yo'mayoso ito'no mokosyohumawo'nɨngkohofo somo ngko nom'ne pi'nɨngo engoso uyɨmonnoho. A'amu yo'mayoso ito'no momokosyohumayo'njo yontoso sohumta'ni oso yo'mayo we'e kako mokosyohumasoso ngko woma'monnoho. 30 Olo syoho ntohofiyo wonyo sohumo sɨkwo'mjoho hohnta'ni meho'naopmno. Osopo a'amu hulɨngkwajingo ifaloho'nɨngkuji humotaho engo lɨfitnnefoho.

A'amufe Hwomu sohwo a'amu hopi'nonohino somo yano ilofonefoho.

31 A'amufe Hwomu sohwo yofe engo hwofilo'nnyo'njo sohwo kakoe a'amu ahwomomjo so'nji poso sohonta kako hwe engo sohwoe epohumayo wonyoangkafo sopo humanefoho. 32 Osopo nohumahwosi a'amu hopi'nonohinoso uhu'mokahonɨngkuji kako hwe yahu mokosyohumayo pa'nyo sohwo a'amu somo yano ilofonefoho. A'amu yahusipsip pa'nyo somo kengopo uhwajɨhwosi a'amu yahumeme pa'nyo somo kengopo uhwajonefoho. 33 Yahusipsip somo kakoe aho angahohnta'ni uhumajɨhwosi yahumeme somo kakoe aho hwonamonyo hohnta'ni uhumajonefoho. 34 Oso hohosohonta hwe yofe hwofilo'nnyo'njo sohwo a'amu aho angahohnta'ni humalofo somo ole ulonefoho. Nje Mpohwo yo'mayo wopɨngo sejape so'no sehwosopo'mentiso soku, hohonta hwaho songo mtɨ'mokumentiso sohonta olo ango yo'mayoso Mpohwo sekumne'no yahumentisoso nopɨkuji mapmno. 35 Hwapɨngoso ngko mijoho niyahonɨngki wopayo ntapmmentohofofoho. Ngko mijo'no nɨmo'nɨngkahonɨngki mijo ntapmmentohofofoho. Ngko ango kengopo nta'ni pahonɨngko sekwo ngkimo sekwoe angomo ipenɨmotapontɨfi wopɨngo nɨmokosyohumamentohofofoho. 36 Ngko hwapɨfe ane nohumentanɨngko sekwo yo'mayoso ntapmmentohofofoho. Ngko mnokino'nji nohumentanɨngko sekwo wopɨngo nɨmokosyohumamentohofofoho. Ngko impo'angomo nohumentanɨngko sekwo nohonapmmentohofofoho.

37 Ose ulahonɨngkuhwosi a'amu wopɨngoso ole ulɨfitnnefoho. Hwe Engofo, ntohontalo. Kɨko wosopayo mijoho kiyahonɨngki nakwo wosopayo kijapmmentɨhwoneso, ntohontalo. Kɨko mijo'no kumo'nɨngkahonɨngki nakwo mijo kijapmmentɨhwoneso. 38 Ntohontalo. Nakwo ango kengoponta'ango hwosimo kohonontani nakwoe angomne'no ipekumotamentɨhwoneso, kɨko hwapɨfe yo'mayoso ane nohumentanɨngkini ntohonta kijapmmentɨhwoneto. 39 Ntohontalo. Kɨko mnokino'nji impo'angomo humentanɨngkinoso ntohonta kohonɨmentɨhwoneto. Ose ulohonɨfitnnefoho.

40 Hwe yofe engo'njo sohwo ulonefoho. Ngko nehopi waselɨmonne'no yohono. Yo'mayoso nje a'amu yofe engo ane'njo somne'no uloho'mentohinoso ngkine'no imentohinofoho.

41 Ose ulɨhwosi a'amu hwonamonyo hohnta'nɨngo somo ulonefoho. Sekwo wonyo soku, mpanɨmno. Anɨtu sekumne'no sɨmano hintotohino umnalofoho. Sekwo ngkimo ntɨko'mafɨkuji oso toho ne'no sijalokunjoso Mpohwo kako Seten'nji kakoe a'amu so'ntnne'no ho'nahumentiso somo fɨwanɨmno. 42 Hwapɨngoso hohonta ngko mijoho niyahonɨngki wopayo montape'njo imentohofofoho. Mijo'no nɨmo'nɨngkahonɨngki mijo montape'njo imentohofofoho. 43 Ngko ango kengopo nta'ni pahonɨngko sekwo ngkimo ango mantape'njo imentohofofoho. Ngko hwapɨfe manji'mofo ane nohumentanɨngko sekwo sekwoe yo'mayoso montapmmentohofofoho. Mnokino'njo nohumentanɨngko impo'angomo nohumentanɨngko sekwo monohonayo'njo imentohofofoho.

44 Ose ulahonɨngkuhwosi ulɨfitnnefo, Hwe engofo, Ntohontalo. Kɨko mijoho'nji mijo'tnno nokumo'nɨngkahonɨngki, kɨko nom'ne angopo nta'ni ponji, kɨko hwapɨfe ane hwosi, mnokino'njo hwosi, kɨko impo'angomo nohumentanɨngkini nakwo wopɨngo makilohofe'njo ntohonta imentɨhwoneto.

45 Ose ulohonɨngkahonɨngkuji ole ulonefoho. Ngko nehopi waselɨmonne'no yohono. Nje a'amu yofe engo ane'njo somne'no yo'mayoso mulohofe'njo imentohofoso ngkine'no mantohofe'njo imentohofofoho. 46 Ose ulahonɨngkuhwosi a'amu hiso nukuji hofɨkoe wonyomne'no tohino engo ne'no nomapitnnefoho. I a'amu wopɨngoso hofɨko ango wopɨngo sopo i'mofahokuji engolopohamo songo ne'no nohumantokutnnefoho.

Copyright information for `APZ