Revelation of John 16

Solɨjwanyo aho fehohnjo hopi'nono nom'ne mta'ni hufa'uyoso Anɨtuye sɨmeho tohino wo'nnyo so'ne hungkunofoho.

Osopo nohumanji Anɨtuye ahwomomjo tajo ango engo somta'ni mampaho engo ole upanɨmentoho, Sekwo a'amu ahwomomjo aho fehohnjo hopi'nono nom'ne mta'ni hufa'uyo sohwasi sekwo solɨjwanyo Anɨtuye sɨmeho tohino wo'nnyoso nomafɨkuji hwahopo ayo yawojo'meemo fɨwontofaopmno.

Ose ulahonɨngki a'amu ahwomomjo sɨmo'mjo sohwo kako solɨjwanyo hiso hwaho ayo yawojo'meemo iwontofao'mentisofoho. Iwontofaofahonɨngki a'amu hopi'nono sikisɨwojo pa'nyo sohwo'nji kakoe huyo'mango'njimo hwomtame yɨhumantɨfi kakoe ifalifaliyo hofɨkoe a'apahopo mtɨ'mokinɨmentohofo sofe a'apahopo uyo pisakino wonyo'njoso iwongkojao'mentisofoho.

A'amu ahwomomjo hufa'uyo sohwo kako solɨjwanyo hiso mijo ayo yawojo'meemo hopi'nono iwontofaofahonɨngki mijo ayoso honɨyo hoikufe'nohini imo'nɨngkahonɨngki yo'mayo mijo ayomjoso poyo pe'nɨmentisofoho.

A'amu ahwomomjo hufa'u sɨhune sohwo kako solɨjwanyo hiso mijimomo iwontofaofahonɨngki mijoso honɨyo imo'nɨmentisofoho. Honɨmijoso nolɨfɨwahonɨngki a'amu ahwomomjo mijimo mokosyohumayo sohwo Anɨtumo ulɨmento, Kɨko ae'mta'ni humamopmmentohino sohwosi olohonta kɨko ne'no humahnno sohwosi jɨje yahino wopɨngo'nohino iwo'nɨngkino hwosoho. Kɨko olo tango loso olo a'amu lomo uyohinoso ito'nohinofoho. Hwapɨngo so'nji a'amu jɨje hungkuno ulɨmotofo sohwanjimo olo a'amulo hofɨko osohwafe honɨyo usɨhumantɨfi fonjahumentohofofoho. Oso'no kɨko hofɨkimo honɨmijo nape'nyoso uyohino ito'nohinofoho. Ose ulahonɨngki Anɨtuye ijempoho yo'mayo kakine'no ho'nasyɨwo'nɨngkohofo sopo nta'ni nom'ne mampaho ole upa'nɨmentoho, Ou, nehopeho. Hwe Engo Anɨtu Yokumpohn'nyo Hwofilo'nnyo sohwosi, kɨko a'amufe yahino somne'no ikwolofo'neso hopoenohino hwosoho.

Ose ulahonɨngki a'amu ahwomomjo osofosofahu'nohino sohwo kako solɨjwanyo hiso mofehi'nyopo iwontofaofahonɨngki Anɨtu kako mofehi'nyomo toho pa'nyo imokahonɨngki mofehi'nyo hiso a'amumo toho ulahumentisofoho. Oso mofehi'nyo hiso a'amumo toho ulosyahonɨngki a'amu hiso hofɨko Anɨtu oso tango uyo hwapɨngo sohune'no sɨfajo hungkuno ulɨmentohofofoho. Hofɨkoe honɨngkano wonyoso moho'naofe'njo yontɨfi hofɨko Anɨtuye yofeso moho'noma'mmentohofofoho.

10 A'amu ahwomomjo aho fehohnjo hopi'nonohino sohwo kako solɨjwanyo hiso a'amu sikisɨwojo pa'nyo sohwoe a'amu kakimo enjwa'mo humamotofo somo iwontofaofahonɨngki a'amu oso sɨwojo pa'nyo sohune'no hwomtame ihumawo'nɨngkohofo somo sɨkuno mjɨmofahonɨngki tohino engo tɨpemantɨfi mango kilampohu'mentohofofoho. 11 Oso tohino mɨkunɨmposo engoso ma'mopontɨfi Anɨtu ahwomomo humaso sohune'no sɨfajo hungkuno lɨmopmmentohofofoho. Hofɨko hofɨkoe wonyo somne'no tohino ko tɨpemantɨfi sɨmeho mɨwolo'mokiyofoho.

12 A'amu ahwomomjo aho fehohnjo hopi'nono nom'ne mta'ni anga'nohino sohwo kakoe solɨjwanyo kako mijo engo yofe Yufɨletis sopo iwontofaofahonɨngki mijo hiso so'na'mentisofoho. Oso mijo hiso sa'nɨmentisoso a'amu mofehi'nyo sɨ'mofapiso sohohnjo hwe engo hwaho mokosyohumawo'nɨngkohofo sohwa ikujoho'ne sapɨfitnne'ento mijo tafepo sosayoso honɨngkano imofahumentisofoho. 13 Ose uhwononji ole uhwonɨmentoho, towahuno wonyo molongo sɨmano'njo hufa'u sɨhune sohwa anga'nohinohwo kako homa mango mta'ni swapmmentisofoho. Nom'nihwo oso a'amu sikisɨwojo pa'nyo sohwoe mango mta'ni swapmmentisofoho. Nom'nihwo a'amu Anɨtuye hungkuno hwasyo lɨmojo sohwoe mango mta'ni swapmmentisofoho. 14 Oso towahuno wonyo Seten mta'ango hufa'u sɨhune sohwa hofɨko a'amu tɨfi nenɨngkape-e'ne'entɨfi yo'mayo a'amu miyɨwo'nɨngkiyohofoso itɨhwamentohofofoho. Oso towahuno wonyo sohwa hofɨko oso hwe hwaho mokosyohumawo'nɨngkohofo sohwafepono wentɨfi Anɨtumo uyokolofano lontɨfi a'amu Anɨtu'nji ikujoho fongki'nyo'ne nto'no esyohumayo'ne mɨhu'mokumentohofofoho. Oso'no hofɨko Anɨtu Yo'mayo Hwahoponjo Yokumpohn'nyo Somo Hwofilo'nnyo sohwoe Sɨkuno Engo so'no nto'no esyohumamentohofofoho.

15 Oso sɨkuno somne'no Jisas hohonta ole nalɨmento, Upa'nɨmno. Ngko a'amu hufo uyantɨfi pohofo hopaso wapmmonnoho. A'amu ngkine'no nohontohumalofoso hofɨkoe hwapɨfe wopɨngo yontɨfi nohontohumalofo. Osohonta ngko nopm'me'no hofɨko hofɨkoe hwapɨfe esyohumunyoso nje pe sohonta wonɨmango munonefoho. O'o, hofɨko sɨmonyo engo uyantɨfeho. Ose nalɨmentisofoho. Oso hwapɨfe'ne fahosɨhwoyo hungkuno neso olenoho. Honɨngkano wopɨngo moho'nasiyo'nefoho.

16 Oso towahuno wonyo huhwo sohwa a'amu hopi'nonohinoso Amaketoun sopo uhu'mokumentohofofoho. Oso hwaho yofe Amaketounɨyo eso a'amu Hipɨlu sofe hungkunofoho.

17 A'amu ahwomomjo aho fehohnjo hopi'nono nom'ne mta'ni hufa'uyo sohwo kakoe noswanyoso ifofopo iwontofao'mentisofoho. Ose uhwononji towahuno wonyo somne'no syafɨhu'mentohefoho. Ose iwontofaofahonɨngki Anɨtuye ahwomomjo tajo ango engo kako humawo'nɨngkiso epohumayo somta'ni mampaho engo ole ho'nɨmento, Tango ae'uyoso nto i'mofapohoho. Oso tangoso moi'wo esojwaofo'nefoho. 18 Ose ho'nɨngkahonɨngki emta'mɨngo'nji ahwomo yoka'nji mjoho'nɨmɨwahonɨngki hwomɨhwo mɨkunɨmposo imentisofoho. Hwomɨhwo oso pa'nyo nakwoe hwaho ayo yawojo'meemo m'mofapefoho. O'o, oso hwomɨhwo huhwo sohwo kona'wohiyoho. 19 Oso hwomɨhwo huhwo sohwo yahonɨngki pone engo Mpapiloun sopo mtɨhupento hufa'u sɨhune imo'nɨmentisofoho. Oso a'amu sikisɨwojo pa'nyo sohwo oso ango somta'ni a'amu hopi'nonohino hwaho ayo yawojo'meemjo angoso mokosyohumamojo hopo pɨwahu'mentisofoho. Oso ango engo Mpapiloun sofe honɨngkano wonyo somne'no Anɨtu huno syafɨsyonto sɨmeho tohino mɨkunɨmposo umnɨngkahonɨngki oso ango hopo sopo tohino mɨkunɨmposo engo uyɨmentisofoho. 20 Oso hwaho we'e mijo ayo'njo sohe soponjo hopi'nonohinoso moi'wo imo'nɨmentisofoho. Hwaho engo sopo hwofɨki'nyo hopi'nono nɨhu'no hopi'nono isonjahumentisofoho. Hintafo'nohino imo'nɨmentisofoho. 21 Ahwomo mta'ni sisayo mɨkunɨmposo mo'mentisofoho. Oso sisayo hiso kwope ho'yo engo pa'nyoso ahwomo mta'ni nopɨwasyonto a'amumo fonjahumentisofoho. Oso tango mɨkunɨmposo a'amu huhwo sohwamo u'ma'mentiso so'no hofɨko iyoho unɨngkahonɨngki Anɨtumne'no sifajo hungkuno ulɨmentohofofoho.

Copyright information for `APZ