Revelation of John 6

Joun oso iyoswo impe mijaho'njoso lojwohofojahinyoso lokoefamo'nnyo uhwonɨmentisofoho.

Ngko nohumanji uhwonɨmentoheso Nakwoe Wonyo'ne Tohino Ma'mentiso sohwo impe mijaho'njo lojwohofojahinyo aho fehohnjo hopi'nono nom'ne mta'ni sɨmo'mjo nto lokoefoma'mentisofoho. Ose yahonɨngki songo humalofo osofosofahu'nohino somjo anga'nohino sohwo kako mampaho ahwomo yoka hopa a'amu fihumo ole ulɨmento, Oyomo. Ose ulahonɨngki uhwonɨmentoheso yahu (hous) halojo a'amu hn'nomokomɨwo'nɨngkiso sopo a'amu mekino'njo sohwo nokehumanto hwe engo sohwoe mnokino manji'mofoso nomanto nowento kakoe mango sohwamo hwotoho hmmentisofoho.

Oso impe mijaho'njo hufa'u lojwohofojahinyoso nolokoefomahonɨngki oso songo humalofo osofosofahu'nohino somjo osofeponjo sohwo nom'ne a'amu fihumo ole ulɨmento, Oyomo. Ose upo'nɨngkahonɨngko yahu (hous) honɨyo'nohino a'amu hn'nomokomɨwo'nɨngkiso sohwo i'mofapmmentisofoho. Oso a'amu yahu soponjo kehumaso sohumo a'amu hwahopo humalofo sofe sɨmeho pompenjiyoso wae yaofo'ne yokumpohn'nyo uyɨmentisofoho. Oso sɨmeho pompenjiyoso wae ihwoso'no a'amu hwahoponjoso hofɨko nolɨkafɨkuji nofonjahinɨfitnnefoho. Oso'nji hwakuhwajo engoso uyahonɨngkofi umentisofoho.

Oso impe mijaho'njo hufa'u sɨhune lojwohofojahinoso nolokoefomahonɨngki upa'nɨmentoho oso songo humalofo osofosofahu'nohino somjo hufa'u sɨhune sohwo ulɨmento, Oyomo. Ose ulahonɨngki uhwonɨmentoheso yahu a'amu hn'nomokomɨwo'nɨngkiso sɨkwo'mno sohwo i'mofapmmentisofoho. A'amu oso yahu hopo sopo kehumayo sohwo kako wosopayo yano ulofiyo'ne mtɨ'mokinyoso mokaho'nɨmentisofoho. Oso hohosohonta songo humalofo osofosofahu'nohino ajwo so'mta'ni mampaho ole ho'nɨmento, Mijoho engo nto i'mofapohoho. Oseso hwe fihwo hamniyoho syoho'njo sohwo kako sɨkuno anga'nohino syoho somjo hamniyohoso hofɨko'montohwamne'no sɨkuno anga'nohino somne'no ahu'mo wosopayo aho fehohnjo'nohino mpe uyɨmontonoho. Wosopayo engo'maho. U hwamo'manji aho hopi'nono sɨfe fehohnjo hopi'nono. I ijayo'nji humo'nji hamniyoho honje moho'naopitnnehofo. Ose ho'nɨngkahonɨngki upa'nonji wosopayo'ne hamniyoho yokintahopo imo'nɨngkohoho syafɨhu'mentohefoho.

Nakwoe Wonyo'ne Tohino Engo Ma'mentiso sohwo impe mijaho'njo lojwohofojahinyo osofosofahu'nohino somo lokoefomahonɨngki oso songo humalofo osofosofahu'nohino ae'uyo sohwoe mampaho nom'ne a'amu fihumo ole ho'nɨmento, Oyomo. Ose ulahonɨngki ngko apa'no uhwonɨmentoheso yahu a'amu kehumawo'nɨngkisohous sohwo i'mofapmmentisofoho. Nolohofahonɨngki a'amu kehumunyo sohwo kakoe yofeso a'amumo poyo imokiyo'ne hweho. Nom'nihwo tɨfinjo sohwo kakoe yofeso a'amumo tɨkanomo mɨhwajiyo'ne hweho. Oso a'amu huhwo sohwa'u nowenji a'amu hwahopo humalofo hopi'nonohino somo osofosofahu'nohino hotito'mentisiyefoho. Osofosofahu'nohino hotito'mentisiyo anga'no nomehwasi poyo imokahnne'enji yokumpohn'nyo ma'mentisiyefoho. A'amu fehohnjo hwakuhwajo'nji poyo umokanjiyoho. Fehohnjo mijoho pe'nɨngkuji poyo wope'nantɨfeho. Fehohnjo mnokino uyɨhwosi wope'nantɨfeho. Ae'uyo somo sikisɨwojo wolo'menao'mtonoho.

Hwe nakwoe Wonyo'ne Tohino Ma'mentiso sohwo impe mijaho'njo lojwohofojahinyo aho anga'no hopi'nonohino somo lokoefomahonɨngki uhwonɨmentoheso a'amu Anɨtuye yofe'no poyo pe'nɨmentohofo sofe huyo'mango oso ijempoho yo'mayo Anɨtumne'no ho'nasyɨwo'nɨngkohofo enjwa so'mo nohumentanɨngkofi uhwonɨmentohefoho. Oso a'amu hiso hwahopo songo humamotofo sohonta hofɨko Anɨtuye hungkuno lutɨhwamotofo so'no nom'ne a'amuso hofɨkimo fonjahumentohofofoho. 10 Oso huyo'mango sofe mampaho engo'njo ole lɨmentohofi, Ou, nakwoe Hwe Engo, kɨko yo'mayo hopi'nonohino yokumpohn'nyo mokosyohumahnno sohwosi kɨko wopɨngo'nohini hwosoho. Jɨje yahino nto'nohino'njo hwosoho. Yo'mayo hungkuno lɨwo'nɨngkino so'no nakwo huno nayohoho. Ne umo'nɨmontonoho. Nakwoe honɨyo somne'no kɨko a'amu hwahoponjo somo aku tohino ntohonta umonneto. I, oso'no hofɨko hofɨkoe hungkuno somne'no ntohonta ikwolopitnneto. 11 Ose ulahonɨngkofi a'amu ahwomomjo sohwa hofɨko a'amu anga'no anga'nohino hisomo hwapɨfe halojo sawemoso uyontɨfi ulɨmentohofi, Hofahiyo. Sekwo we'enepi fohontohumamno. Hwangku Anɨtuye syoho ulohofiyo senɨngkwa'wehwosa hofɨko sekwo sapmmentohofo hopa sapɨfitnnefoho. Anɨtuye syoho ulohofiyo nom'ne somo a'amu hwahoponjoso hofɨko sekumo fonjasehumentohofo hopaso hofɨkimo fonjahufijoso sekwoe ae'uyo (nampa) sopo hopoeno imo'nɨngkuhwoso'no sekwo tohino so'no aku tohino uyonefoho.

12 Hwe nakwoe Wonyo'ne Tohino Ma'mentiso sohwo impe mijaho'njo lojwohofojahinyo aho anga'no hopi'nono nom'ne mta'ni anga'nohino somo lokoefomahonɨngki uhwonɨmentoheso hwomɨhwo mɨkunɨmposo imentisofoho. Oso hohosohonta mofehi'nyoso sɨkwo'mno titiso pa'nyo imo'nɨngkahonɨngki hamno honɨyo'nohino imo'nɨmentisofoho. 13 Osohonta hntokwaliyo ahwomo mta'ni hwahopo pɨwahu'mentisofoho. Oso hiso'no nakwo huno moi'wonoho. Ifofo engo yonto solongkoe ufo'nji mojo'nji wasyɨwo'nɨngkiso hopa hntokwaliyo pɨwahu'mentisofoho. 14 A'amu ife popojasyɨwo'nɨngkohofo hopaso ahwomo oso hopa popojonto moi'wo imo'nɨmentisofoho. Hwofɨki'nyo hwanji mijo'njo soponjo hwaho we'e sohwanji hofɨkoe angoso nulɨko'mantɨfi we'enehwo nonje ehumamentohofofoho. 15 A'amu yofe engo'njo hwaho mokosyohumayo sohwanji hwe engo hopi'nonohino sohwanji a'amu itokuso'njo sohwamo mokosyohumawo'nɨngkohofo sohwanji a'amu hamniyoho'njo sohwanji a'amu yokumpohn'nyo sohwanji a'amu syoho ulohofiyo sohwanji a'amu sikinjo so'nji a'amu hopi'nono hofɨko iyoho engo unɨngkahonɨngki lɨmentohofi, Nakwo sokimo'mo hwa'imo'mo woswantane'no ihwono. 16 Ose ulontɨfi ulɨmentohofi, Hwofɨki'nyo sohwosi, oso hwe kakoe epohumayo sopo humaso sohwo'nji hwe nom'ne nakwoe Wonyo'ne Tohino Ma'mentiso sohwo'nji siko nakumo yoka nalɨsihnnoho kɨko nofosomahoji nakumo fɨfehu'mokonasyo. 17 U, siko nakumo yoka nalɨsɨhnne sɨkunoso olohonta nto i'mofapohoho. I oso'no nakwoe wonyo somne'no siko nakumo aku nejapiso sohonta yokumpohn'nyoso tɨhwo waloho'mtolo. O'o, awonoho. Ose lɨmentohofofoho.

Copyright information for `APZ