Revelation of John 7

A'amu Isɨlael ‘wan hantɨlet fouti-foua tausen’ (144,000) sofe hungkunofoho.

Ose uhwononji nom'ne wojo hopa uhwonɨmentoheso, a'amu ahwomomjo osofosofahu'nohino sohwa hwaho tokwajo ae sopo lohofontɨfi ifofo oso'mo so'mta'ango osofosofahu'nohino somo aho kesyohumentanɨngkofi uhwonɨmentohefoho. Oso ifofo hiso mijo ayomo hwahomo iyo oso'njo sopo muloho'mentisofoho. O'o, ifofo homo somo pɨjwahumentohofofoho. Ose uhwononji uhwonɨmentoheso, a'amu ahwomomjo nom'ne sohwo mofehi'nyo sɨ'mofapiso so'mta'ni nosaponto Anɨtu songo ne'no humayo sohwoe ifalifaliyo mtɨ'mokiyo'neso ahomo nomokosyohumanto mango engo ulɨmento, Sekwo a'amu ahwomomjo osofosofahu'nohino sohwasi sekwo hwaho'nji mijo ayo'nji wonyo imokiyo'ne yokumpohn'nyo mokosyohumalofo sohwasi we'e nehwo fohontohumamno. Sɨmo'mo nakwo Anɨtuye syoho ulohofiyo sohwafe yomohu'nyopo Anɨtu kakwo'yohwo sohwoe ifalifaliyo mtɨ'mokosyɨhwasi i osohonta sekwo hwaho'nji mijo'nji iyo'nji wonyo hmmokumno. Ose upa'nonji a'amufe yomohu'nyopo ifalifali mtɨ'mokinyo neso atofo linyoso ole upa'nɨmentoho. A'amu Isɨlael temtitofo aho hopi'nono sɨfe mta'ni hufa'uyo somta'ango a'amuwan hantɨlet fouti-foua tausen (144,000) somo Anɨtu kakwo sohwoe ifalifaliyo mtɨ'mokinyo hwafoho. Temtitofo homo homta'ango a'amutɨwelɨf tausenɨso (12,000) ma'mentohofofoho.

  • Jutafe temtitofosotɨwelɨf tausenfoho (12,000).
  • Lupenɨye temtitofosotɨwelɨf tausenfoho (12,000).
  • Ngkatɨye temtitofosotɨwelɨf tausenfoho (12,000).
  • Asyafe temtitofosotɨwelɨf tausenfoho (12,000).
  • Napɨtalaiye temtitofosotɨwelɨf tausenfoho (12,000).
  • Monaseye temtitofosotɨwelɨf tausenfoho (12,000).
  • Simeyounɨye temtitofosotɨwelɨf tausenfoho (12,000).
  • Lifaiye temtitofosotɨwelɨf tausenfoho (12,000).
  • Isokafe temtitofosotɨwelɨf tausenfoho (12,000).
  • Sepɨyulanɨye temtitofosotɨwelɨf tausenfoho (12,000).
  • Jousepɨye temtitofosotɨwelɨf tausenfoho (12,000).
  • Mpenyaminɨye temtitofosotɨwelɨf tausenfoho (12,000).
Oso a'amu hofosofe yomohu'nyopo Anɨtuye ifalifaliyo hi'njofoho.

Anɨtuye a'amu ne pi'nɨngo engoso hofɨko Anɨtuye yofe ho'nomayo'ne uhu'mokumentohofofoho.

Ose uhwononji nom'ne wojo hopa uhwonɨmentoheso hwe moya'mi pi'nɨngo engoso oso a'amu hiso a'amu hofɨko atofo joso hopo'maho. Oso a'amu hiso temtitofo homo homta'angoso hwaho kengo kengo a'apaho kengo kengo hungkuno kengo kengoso hofɨko hwapɨfe sawemo halojo inyoso Hwe Engo sohwoe epohumayo sɨmano sopo loho'mentohofofoho. Osopo lohofontɨfi Anɨtuye mango hwamo uyakolo'mentohofo so'no tohe hweho nomantɨfi sɨmonyo yontɨfi 10 mampaho engo'nji ole lɨmentohofi, Nakwoe Anɨtu epohumayopo humaso sohwo'nji Jisas nakwoe Wonyo'ne Tohino Engo Ma'mentiso sohwo'nji siko nakumo asomo netɨmahonɨngki nakwo wopɨngo humalohwono.

11 Ose ulahonɨngkofi a'amu ahwomomjo sohwa Anɨtuye epohumayo somo ehofo'mokosyohumalofo sohwa hwe engo sɨfe aho hopi'nono nom'ne mta'ni osofosofahu'nohino sohwanji yo'mayo songo humalofo osofosofahu'nohino oso hwanji hofɨko Anɨtumne'no hwomtame ehumantɨfi Anɨtuye yofe ho'noma'mentohofofoho. 12 Ole lɨmentohofi, Nehopeho. Nakwo nakwoe Anɨtumne'no sɨmonyo engo uyano. Kakoe yofe engo, kakoe yokumpohn'nyo so'ntnne'no woho'nomano. Kakoe huno wopɨngo yakolo'nnyoso, kakoe yokumpohn'nyoso ne'no nowentɨhwonefoho. Oso'no nakwo kakimo isamoyoka engolopohamo ulɨhwano. Oso hungkunoso nehopeho. Ose ulɨmentohofofoho.

Oso a'amu pi'nɨngo engo sofe tohino so'no Jounɨmo lutɨhwamentisofoho.

13 Ose uhwonɨngkahonɨngko hwe engo sɨfe aho hopi'nono nom'ne mta'ni osofosofahu'no somta'ango fihwo ntɨmento, Olo a'amu hwapɨfe halojo sawemo'njo lohwa tɨhwalo. Ntɨ'mta'ango hwalo.

14 Ose ntahonɨngki ulɨmentoho, Hwe engofo, ngko huno maniyohoyohoho. Kɨko huno kiyohoho. Ose ulahonɨngko oso hwe engo huhwo sohwo kako tango mɨkunɨmposo i'mofapone so'no ole ntɨmento, Anɨtu kako oso tango mɨkunɨmpososo hwahopo uyɨmentiso sohonta a'amu hiso nohumantɨfi Anɨtumne'no yokumpohn'nyo lohofontɨfi poyo pe'nɨngkahonɨngkofi Anɨtu kako hofɨkimo olo pone'no motosahopohoho. Sɨmo'mo hofɨkoe honɨngkano wonyo somne'no hwapɨfe mijo yajɨjwohofo hopaso hofɨkoe honɨngkano wonyo somo Jisasɨye honɨyo'nji wae yao'mentisoso hwapɨfe kiho ane pa'nyo halojo imo'nɨmentisofoho. 15 Oso hiso'no hofɨko Anɨtuye epohumayo sopo lohokwofo. Sɨkuno huhwo huhwi imɨngo'nji sɨkuno'nji hinjopo hofɨko Anɨtuye ango ahwomomjo somo kakoe syoho ulohofɨwo'nɨngkohofofoho. Anɨtu kako kakoe epohumayo sopo humanto hofiyo umokosyohumawo'nɨngkisofoho. 16 Oseso hofɨko mijoho apa'no mape'nyofoho. Hofɨko mijo'no mumo'nyofoho. Mofehi'nyo hofɨkimo toho mufojiyofoho. Tohino muhmnyofoho. 17 Hwapɨngoso hwe hofɨkoe wonyo'ne tohino ma'mentiso sohwo kako Anɨtuye epohumayo sopo nohumanto hofiyo mokosyohumaho. Kako a'amu homo somo mijo tɨmo so'mo ipemotasyɨhwosi mijo songo ne'no humayo'ne nɨfitnnefoho. Osopo Anɨtu kako hofɨkoe tɨmijo wae imofɨhwosi hofɨko humotaho apa'no malɨfitnnefoho.

Copyright information for `APZ