Romans 4

Anɨtu Apɨloham sohumo hwe wopɨngo hwosoho ulɨmentisofoho.

A'amu fihwo kako ole wantɨmontolɨkeno. Apɨloham sohwo nakwo pa'nyo hweho. Kako nakwoe neyakweho. Oso'no kɨko kakine'no pehofo ulihnnohino. Ose wantɨmontolɨkeno. Ou, ngko ole ulɨmonnoho. Anɨtu Apɨlohammo ole mujofoho. Apɨloham jɨje honɨngkano wopɨngo yɨwo'nɨngkino so'no wopɨngo hwosoho kilalokweno. Anɨtu ose ulontentesi u, Apɨloham kakoe yofe ho'noma'nɨngkuhwonesohilo. I oso'ne'maho. O'o, a'amu Anɨtuye hungkuno mtɨ'mokumentohofo sohwa ole mtɨ'mokumentohofi, Apɨloham kako Anɨtumo sɨmeho hi'ntnnono uyɨmentiso so'no Anɨtu kako wopɨngo hwosoho Apɨlohammo ose ulɨmentisofoho. Oso'no Apɨloham kakoe honɨngkano wopɨngo so'no kakoe yofe moho'noma'nɨmmentiso hweho.

U, pahnnɨmo hungkuno upa'nɨmno. Hwe fihwo kako nom'ne humo syoho ulohofiyoso sohwo kako hamniyoho mayo sohonta siki ntapohoho eso majofoho. O'o, kakoe syohomne'nefoho. I oso'no nakwo Anɨtumo u'mayo yahinoso ose'njo'maho. Anɨtu kako a'amu honɨngkano wopɨngo iwo'nɨngkiso so'no wopɨngo hwosoho mulonehoho. O'o, a'amu Anɨtumo sɨmeho hi'ntnnono unyo sohumo kɨko wopɨngo hwosoho ulɨmontonoho. Oso hwe honɨngkano wonyo'njo sohumo Anɨtu kako wopɨngo imokiyoso hoponoho. A'amu oso homo somo sɨmeho hi'ntnnono unyoso sohumo Anɨtu kako nuhwononto yahino wopɨngo'njo pa'nyo uhwononto wopɨngo hwosoho ulɨwo'nɨngkisofoho. Hwe yofe engo'njo Ntefit a'amumo mokosyohumamojo sohwo olo hungkuno homo lomne'no mtɨ'mokumentisofoho. Hwe fihwo kako Anɨtumo u'mayo so'no syoho engo ko miyoso sohwo kako Anɨtumo unɨngkamoloso sohwo osohumo Anɨtu kako kɨko wopɨngo hwosoho uloso sohwo kako sɨmonyo uyono. Ole mtɨ'mokumento,

Anɨtu a'amu honɨngkano wonyo'njo sofe wonyoso wae imofɨhwosi hiyaso'mo nɨhu'nahone ho'nasyɨhwoso'no hofɨko sɨmonyo uyantɨfeho.
Anɨtu hwe fihwo wonyo so'no huno mosyafɨsiyo'njo yoso sohwo kako sɨmonyo uyono.
Oso sɨmonyo iyoso a'amu Juta a'apaho sɨhu kolo'nɨwo'nɨngkohofo sofe'nohinotaho. O'o, awonoho. A'amu a'apaho sɨhu makolo'nɨwo'nɨngkiyohofo so'ntnnefoho. Hwapɨngoso ole nto lɨhwone, Apɨloham Anɨtumo sɨmeho hi'ntnnono uyɨmentiso so'no Anɨtu kako Apɨlohamɨye sɨmeho hi'ntnnono uyoso yahino wopɨngo pa'nyofoho ulɨmentisofoho. 10 Oso hungkuno homo somo Apɨlohammo Anɨtu ntohonta ulɨmentisoto. A'apaho sɨhu nto kolo'nnyohonta ulɨmentisotaho. Makolo'nyohonta ulɨmentisotaho. O'o, a'apaho sɨhu makolo'nyohonta ole ulɨmento, Kɨko wopɨngo hwosoho, ose ulɨmentisofoho. 11 Ou, Apɨloham a'apaho sɨhu makolo'nyo sohonta Anɨtumo sɨmeho hi'ntnnono uyahonɨngki Anɨtu ulɨmento, Kɨko wopɨngo hwosoho ose ulɨmentisofoho. Tɨfi no'mo Anɨtu Apɨlohammo ole ulɨmento, Kɨko sɨmeho hi'ntnnono ntape so'no wopɨngo hwosoho kilɨmentohe so'no kɨko yofe kuhwoe'neso jɨje a'apaho sɨhu fɨkolo'nyo. Oso'no Apɨloham kako a'amu hopi'nono hofɨko hofɨkoe a'apahomo sɨhu makolo'nnyo ko huhwa Anɨtumo sɨmeho hi'ntnnono uyɨwo'nɨngkohofo sofe hofiyakweho. Oso a'amumo Anɨtu kako wopɨngo kuyoho ulɨmentisofoho. 12 Apɨloham kakoe a'apaho sɨhu makolo'nyo sohonta Anɨtumo sɨmeho hi'ntnnono uyɨmentiso so'no a'amu hopi'nono a'apaho sɨhu makolo'nyo so'nji a'apaho sɨhu kolo'nyo so'nji hofɨko Anɨtumo sɨmeho hi'ntnnono unyoso'no hofɨko Apɨlohamɨye imu nefoho. Hwapɨngoso hofɨko Anɨtumo sɨmeho hi'ntnnono uyoso Apɨloham pa'nyo umentohofofoho.

Anɨtuye hungkunoso a'amu Anɨtumo sɨmeho hi'ntnnono uyɨwo'nɨngkohofo somnefoho.

13 Anɨtu Apɨloham kakoe imu so'ntnne'no hwaho hopi'nono wosejapmmo ulɨmentisofoho. Apɨloham kako Anɨtuye honɨngkanomo inɨngkamentiso so'no oso hungkuno hiso ulɨmentiso'maho. O'o, Apɨloham kako Anɨtumo sɨmeho hi'ntnnono uyahonɨngki Anɨtu wopɨngo hwosoho ulɨmentiso so'no oso hungkuno hiso Apɨloham kakoe imu somo ulɨmentisofoho. 14 Anɨtu Apɨloham'nji kakoe imu so'ntnne'no olo hwaho hopi'nono wosejapmmo ulɨmentiso sohonta kako a'amu Anɨtuye honɨngkano hungkunomnohini inɨngkawowo'nɨngkohofo somnohini ulɨmentiso'maho. I oso homo somnohini uyontentesi a'amu kakimo sɨmeho hi'ntnnono uyɨfijontentesi hofɨko sɨmeho hi'ntnnono siki uyɨkutnnesohilo. I Anɨtuye hungkunoso yokumpohn'nyo mmo'nɨngkuhwonesohilo. 15 Ihwoni. Honɨngkano hungkuno we-e'manji a'amu oso honɨngkano hungkuno homo somo mtɨhupeso sohwo kako tohino woma'montonoho. I honɨngkano hungkuno ane'manji a'amu fihwo mamtɨhupenohoho.

16 Oseso Anɨtumo u'mayo honɨngkano anga'nohinoso olenoho, sɨmeho hi'ntnnohino uyofoho. Oso'no a'amu hopi'nono huno ole uyono. Nakwo yo'mayo iwo'nɨngkuhwone so'no nakwo Anɨtumo mu'manehwono. O'o, Anɨtu kako nakumne'no wopɨngo naloho'mentiso so'no kakimo u'manefoho. Oseso oso hungkuno Anɨtu Apɨlohammo uyɨmentisoso Apɨlohamɨye imu hopi'nonohino somnefoho. A'amu Anɨtuye honɨngkano hungkuno hi'njo so'nji ane so'ntnnefoho. A'amu hopi'nono Anɨtumo sɨmeho hi'ntnnono Apɨlohammo hopa uyɨwo'nɨngkohofoso Apɨlohamɨye imu nefoho. 17 A'amu Anɨtuye hungkuno mtɨ'mokumentohofo sohwa ole mtɨ'mokumentohofi, Anɨtu Apɨlohammo ole ulɨmento, Ngko kikimo a'amu kengo kengo'mta'ango pi'nɨngo engo sofe hofiyakwosi wakumokumonne'no yohono. Ose ulɨmentisofoho. Anɨtu huhwo sohwo kako a'amu poyo pe'nontɨfe somo ulɨkafɨwo'nɨngkiso hweho. Yo'mayo m'mofapeso utɨhwa'nyopo nto i'mofapinyo pa'nyo uhwonɨwo'nɨngkisofoho. Oso Anɨtu huhwo sohwo kako Apɨlohammo hungkuno ulahonɨngki Apɨloham kako oso hungkuno homo somo sɨmeho hi'ntnnono umentisofoho.

18 Anɨtu Apɨlohammo ulɨmento, Jɨje ape kako hwomu aswo woma'montonoho. Oso homo somta'ni jɨje imuso pi'nɨngo engo imo'nɨfitnnefoho. Ose ulahonɨngki Apɨloham kako hungkuno homo somo sɨmeho hi'ntnnono uyonto hontohumamentisofoho. Apɨloham kako Anɨtu hwomu wontapononto ne'no hontohumanto mehomi'maso nɨhu'nahone a'mane imo'nɨmentisofoho. I oso'no Apɨloham kako Anɨtu mta'ni kakoe hwomu'ne'no hontohumanto a'mane ko imo'nonto kako Anɨtumne'no hohujo ikinjɨmo'mentiso'maho. O'o, kako Anɨtumne'no sɨmeho hi'ntnnono ne'no umentiso sohwo nakwo a'amu temtitofo kengo kengo mta'ango hn'nwi neyakweho. 19 Apɨloham kakoe soswowan hantɨlet (100) uyokolofahonɨngki kakoe ape Sola ape hwonjosi sikoe a'apaho honɨngkonɨmentisiyoso poyo wape'nonji mofonepo honɨngkononji Apɨloham kako kakoe hwomumne'no Anɨtumo sɨmeho hi'ntnnono uyoso musɨkwajɨmmentisofoho. 20 Anɨtu Apɨloham yo'mayo tɨfi i'mofapone so'no ulahonɨngki Apɨloham kako huno hufa'u syafɨhu'mentiso'maho. O'o, kako Anɨtumo sɨmeho hi'ntnnono ne'no uyoso'no kakoe a'apaho yokumpohn'nyo imokinonto kako Anɨtuye yofe ho'noma'mentisofoho. 21 Hwapɨngoso olenoho. Apɨloham kako huno ole syafɨhu'mento, yo'mayo hungkuno Anɨtu ntɨmentisoso Anɨtu kako ne imokiyoso hoponoho. Apɨloham kako huno ose syafɨhu'mentisofoho. 22 Oseso Anɨtu Apɨlohamɨye sɨmeho hi'ntnnonohino uyoso'no huno syafɨsyonto lɨmento, Apɨloham kako sɨmeho hi'ntnnono ne'no ntapɨwo'nɨngkiso so'no kako hwe wopɨngo hweho. Ose lɨmentisofoho. 23 A'amu Anɨtuye hungkuno mtɨ'mokumentohofoso ole mtɨ'mokumentohofi, Apɨloham Anɨtumo sɨmeho hi'ntnnono umentiso so'no Anɨtu ulɨmento, Kɨko hwe wopɨngo hwosoho. Oso hungkuno mtɨ'mokumentohofoso Apɨlohamne'nohinɨ'maho. 24 O'o, nakwo hi'nnontnne'no mtɨ'mokumentohofofoho. Nakwoe Hwe Engo Jisas poyo imo'nɨmentiso sohumo Anɨtu kako apa'no songo ulɨka'mentiso oso Anɨtu huhwo sohumo nakwo sɨmeho hi'ntnnono uyɨmentɨhwone so'no wopɨngo kuyoho nelalofoho. 25 Anɨtu kakoe hwomu Jisas Kɨlais kako nakwoe wonyo wayo'ne uhwatɨmentisofoho. I oso'no Anɨtu kako Jisasɨmo apa'no songo ulɨka'mentiso so'no nakwo Anɨtumo sɨmeho uyɨwo'nɨngkuhwone hn'nyumo wopɨngo kuyoho nelalofoho.

Copyright information for `APZ