Romans 5

Anɨtu nakumo ole nelalofoho, Sekwo wopɨngo kuyoho nelalofoho.

Nakwo Jisas Kɨlaisɨmo sɨmeho hi'ntnnono uyɨwo'nɨngkuhwone so'no Anɨtu kako nakumo ole nelalofoho, Wopɨngo kuyoho nelalofoho. Oso'no kako nakwoe wonyomne'no sɨmeho tohinoso mumnyofoho. O'o, nakwoe Hwe Engo Jisas Kɨlais sohwo kako yo'mayo wopɨngo naloho'mentiso so'no nakwo Anɨtu'nji sɨmeho afa inalokuhwono. Nakwo Anɨtumo ufohi'nɨfitnne'ento honɨngkano namommentiso so'no Anɨtu kako nakumo wopɨngo nelohofalofoho. Oso'no nakwo sɨmonyo yontani nakwo Anɨtu'nji wopɨngopo humayo'ne hontohumalohwono. Sɨmonyoso oso'nohini miyalokuyɨhwono. O'o, yo'mayo tango ne'maso oso'ntnne'no sɨmonyo yalokuhwono. Hwapɨngoso yo'mayo tango ne'masoso nakwoe sɨmeho yokumpohn'nyo sosofito'nyo'nefoho. Yo'mayo tangoso ko ne'masoso nakwo yokumpohn'nyo lohofontanɨngkuhwasi Anɨtu kako wopɨngo kuyoho wonalɨmontonoho. Huno ose naihwoso'no nakwo Anɨtu asomo netɨmayo'ne hontohumalohwono. I yo'mayo wopɨngo so'no hontohumehwasi nakwo Anɨtumo sɨmeho hi'ntnnono ne'no uyɨhwasi nakwo wonɨmango monanonehoho. Hwapɨngoso Anɨtu kakoe hitohoso nakwoe sɨmehomo ho'nonahumentisofoho.

Nakwo wopɨngo imo'nyo'ne yokumpohn'nyo ane humentanɨngkuhwoni Jisas kako oso sɨkuno Anɨtu ho'nahumentiso somo nakwo a'amu Anɨtumo hohujo ikinjɨmo'nnyo hn'nɨmo asomo netɨmayo'ne pe'nɨmentisofoho. Jisas kako nakumo sɨmeho nejapɨwo'nɨngkiso hopaso nakwo nom'ne a'amumo uyantontaho. Hwe fihwo kako nom'nihwo honɨngkano wopɨngo'njo sohumo ufo'mayo'ne wape'nɨmontolaho. O'o, awonoho. I a'amu anga'nohino sohwo kako a'amu nɨhu'no wonyoangkafo sohune'no ufo'mayo'ne wope'nɨmontolɨkeno. Ngko huno maniyohoyohoho. I oso'no nakwo nɨhu'no wonyo nohumentanɨngkuhwoni Jisas Kɨlais kako nakumo nefo'mayo'ne pe'nɨmentisofoho. Ose imentiso so'no Anɨtu kako nakumo sɨmeho nejopalokunjo so'no utɨhwa'nyopo ujo ehontojwahumentisofoho.

Jisas nakumne'no pe'nɨmentiso so'no Anɨtu kako nakumo wopɨngo kuyoho nelalofoho. Oseso nakwo Jisas Kɨlaisɨ'nji nohumentani nakwo huno ole nayohi, Anɨtu kako tohino monejaponehoho. 10 Sɨmo'mo nakwo Anɨtuye mango hwona'ni humamotohwone sohonta Anɨtuye Hwomu sohwo nakwoe wonyo'ne pe'nɨmentiso so'no kako Anɨtuye a'amu ne namokumentisofoho. Olohonta Kɨlais kako songo humaso sohwo kako nakumo ne'no wonefo'ma'montonoho eso huno nayohoho. 11 Oseso nakwoe Hwe Engo Jisas Kɨlais kako nakumo Anɨtu'nji motonefohi'nɨngkahonɨngki nakwo Anɨtuye a'amu ne imo'nontani sɨmonyo engo yalokuhwono.

Atam'nji Kɨlaisɨ'njiye hungkunofoho.

12 Nakwo olo so'no huno nayohoho. Hwe sɨmo'mjo sohwo kako wonyo imentiso sohonta olo hwaho lopo yahino wonyoso i'mofapmmentisofoho. Poyo pe'nyoso oso yahino wonyo homo somta'ni imo'nɨmentisofoho. Oso'no nakwo hopi'nono poyo pe'nɨwo'nɨngkuhwono hwapɨngoso nakwo hopi'nono wonyo'njɨ'nwoho. 13 Anɨtuye honɨngkano hungkuno m'mofape sohonta nakwoe hwaho lopo yahino wonyoso wo'mojoponoho. I oso'no Anɨtu kako kakoe honɨngkano hungkuno muyo'njo imentiso so'no kako a'amufe yahino wonyo somne'no tohino mummentisofoho. 14 Oseso Atam nohumanto honɨngkano wonyo yonto pe'nɨmentisofoho. Oso mta'angoso ne'no mjɨmo'nɨmoponto Mousesɨye sɨkuno i'mofapmmentisofoho. Sɨmo'mo Atam Anɨtuye hungkuno ko upa'nonto hwotoho fento wonyo imentisofoho. A'amu tɨfinjoso hofɨko Anɨtuye hungkuno momaso'njoso Atam hungkuno homo somo hwotoho hmmentiso pa'nyoso ko mahmmentohofoso hofɨko huhwa wonyo yontɨfi poyo pe'nɨmentohofofoho. Atam kako sɨmo'mta'ango sohwo imentiso sohwoe yahino somo a'amu hopi'nono kakimo tɨfi inɨngkamentohofofoho. I oso'no tɨfi no'mo Jisas kakoe yahino songo a'amu tɨfi inɨngkayo'ne mojɨ'mofapmmentisofoho.

15 Oseso Atam'nji Jisasɨ'nji siko afa sɨmo'mjo hwaswoho. I oso'no siko yahino nɨhu'no kengo kengo imo'mentisiyefoho. Atam kako wonyo engo imentiso oso mta'angoso a'amu hopi'nono hofɨko nope'nɨwo'nɨngkohofofoho. I oso'no Anɨtu sɨmeho wopɨngo mɨkunɨmposo nejapmmentisoso kakoe hwomu Jisas Kɨlais nejapmmentisofoho. Jisasɨye yahino wopɨngoso Atamɨye yahino wonyo somo nuyakolofonto nakwoe wonyoso wae enao'mentisofoho. 16 Anɨtu kakoe hwomu nakwoe hwaho lopo uhwatɨmentiso sohonta kako Atam olo hwaho lopo yahino wonyo imentiso hopa imentiso'maho. Atam kako sɨmo'mo wonyo yahonɨngki Anɨtu kako nahonɨmentisoso nakwo hopi'nono wonyo ihwasi poyo pe'nyo'ne nahonɨmentisofoho. Anɨtu ose nahononto kakoe huno mta'ni kakoe hwomu nakumo wopɨngo nalohofo'ne nejapmmentisofoho. Oso wopɨngo naloho'mentiso so'no wopɨngo kuyoho nelalofoho. 17 Hwe sɨmo'mjo Atam sohwo kako Anɨtuye hungkuno haloho maposo'njo imentiso so'no nakwo a'amu hwahoponjo hn'nwi poyo pe'noma'mentɨhwonefoho. I oso'no Anɨtu kako nakumo wopɨngo naloho'mne'ento kakoe hwomu nejapmmentisofoho. A'amu fihwo kako yo'mayo Jisas imentiso somo sɨmeho wopɨngo uyoso osohumo Anɨtu kako wopɨngo kuyoho ulɨhwosi songo ne'no humayo'neso uyɨmontonoho. Oso a'amuso kako Jisas Kɨlaisɨ'nji ne'no nohumahwosi yo'mayo somo Jisasɨ'nji mokosyohumantokutnnefoho.

18 Ihwoni, hwe anga'no kako wonyo imentiso so'no nakwo hinjoho'nwi honɨngkano wonyo'njo imo'nɨmentɨhwonefoho. Oso'no poyo wape'nɨfe nalɨmentisofoho. I, tɨfi no'mo hwe anga'no Jisas sohwo kako wopɨngo imentiso so'no kako nakwoe wonyo honɨngkano somne'no poyo pe'nyo hungkuno somta'ni nakumo isɨhutofonemanto songo humayo'neso nejapmmentisofoho. Oso'no Anɨtu kako wopɨngo kuyoho nelalofoho. 19 Ihwoni. Olenoho. Hwe anga'no kako Anɨtuye hungkunomo haloho maposo'njo imentiso so'no a'amu hopi'nonohino hn'nwi yahino wonyo imo'mentɨhwonefoho. I hwe anga'nohino nom'ne sohwo kako Anɨtuye hungkunomo haloho po'mentiso so'no Anɨtu kako a'amu pi'nɨngo engo hn'nyumo wopɨngo kuyoho nalɨmentisofoho.

20 Anɨtu a'amu hn'nyumo kakoe honɨngkano hungkuno nejapmmentiso so'no nakwo nakwoe honɨngkano wonyoso nɨhu'no wonyo honɨngkonɨmentɨhwonefoho. Nakwo wonyo engo ko yahonɨngkuhwoni Anɨtu kako nakumne'no wopɨngo mɨkunɨmposo wonyoangkafo nelohofalokunjoso nakwoe wonyo engo somo yakolo'nnyofoho. 21 Hohonta yahino wonyo engoso nakumo yokumpohn'nyo nemokosyohumanto poyo namokumojofoho. Olohonta Anɨtu kako nakumo wopɨngo nalohofonto kako wopɨngo kuyoho nalonto songo humayo'neso nejopalofoho. Hwapɨngoso nakwoe Hwe Engo Jisas Kɨlais nakwoe wonyomne'no tohino engo ma'mentisofoho.

Copyright information for `APZ