Romans 9

Poul kako a'amu Isɨlael somne'no sɨmeho tango uyɨmentisofoho.

Ngko Poulɨ'ni Kɨlaisɨye a'amu sohwo'ni hwasyo hungkuno moselalokuyohono. O'o, ngko sekumo hungkuno nehopi'nohini selalokweno. Ngko huno niyalokunjo so'nji Anɨtuye Towahuno Wopɨngo nje sɨmeho mo'mo humaso sohwo'nji ngkimo olo so'no nehopeho ntantofoho. Nje a'amu Jutaso hofɨko Jisas Kɨlaisɨmo minɨngkayo somne'no ngko hitoho ntokwoho. Nje sɨmeho tango nɨhu'nonohinoso hofɨkine'no niyohoho. A'amu Jutaso hofɨko nje nɨngkwahwo nampohwosafoho. Hofɨko nje temtitofo mta'angofoho. Oso'no hofɨko Anɨtuye a'amu ne imo'nyo so'no nɨmo'nɨngkohoho. U honɨngkano wo'nnyopontentesi u ngko Anɨtumo olo so'no jomo ulahonɨ'mo Anɨtu kɨko nje a'amu Jutaso hofɨko jɨje a'amu ne imo'nɨfitnne'no kɨko ngkimo tɨkanomo nɨhumajo ose ulɨ'mnesohilo. Nakwo a'amu Juta hn'nwi nakwo a'amu Isɨlael sofe imu'nwoho. Anɨtu kako nakumo nahwosopo'mentiso osohwo kako nje a'amu kuyoho nalonto kakoe yofe engo so'nji yokumpohn'nyo engo so'nji netɨhwamentisofoho. Nakumo Anɨtu ole nalɨmento, Sekwo ngkimo nɨfohi'nyo'ne olo honɨngkano lomo ifijo so'no ngko wopɨngo waseloho'monnoho. Ose nalonto kakoe honɨngkano hungkuno nejapmmentisofoho. Nom'neso olenoho. Kakoe yofe somne'no kakoe tajo angomo hwomtame ulohofo'ne yahino wopɨngo nejapmmentisofoho. Yo'mayo hungkunoso ne imo'none so'no nalɨmentisofoho. Neyakwosa sohwa hofɨko hwe engo hwafoho. Nakwoe temtitofo somta'ni Anɨtu kakoe hwomu Kɨlais osohumo nefo'mayo'ne uhwosopo'mentiso sohwo kako a'amu imo'nɨmentisofoho. Anɨtu ne sohwo kako yo'mayo hopi'nonohino somo aho hulɨ'memokosyohumawo'nɨngkiso hweho. Oso'no nakwo kakoe yofe ho'nomayoso engolopohamo ne'no ne'nohini uyɨhwano. Nehopeho.

Hwe moya'mi hopi'nono Anɨtu kakine'no uhwosopo'mentisofoho.

A'amu Juta fehohnjoso Anɨtumo sɨmeho muyo'njo so'no ole wolantantaho. Anɨtuye hungkunoso ne mmo'nonehoho ose wolantantaho. O'o, awonoho. Anɨtu a'amu Juta somo kakoe mehomi imo'nyo'ne ko uhwosopo'mentisoso fehohnjoso Jutafe temtitofo ko hi hofɨko kakoe a'amu ne'maho. Apɨlohamɨye imu fehohnjo somo Anɨtu uhwononteso hofɨko Apɨlohamɨye a'amu yofe uhwoe'ne'maho. O'o, Anɨtu Apɨlohammo ulɨmento, Jɨje hwomu Aisak kakoe imu oso'nohini hofɨko jɨje temtitofo nefoho. Anɨtu Apɨlohamɨye hwomu anga'nohino sohune'no hungkuno ulahonɨngki kako hwomu anga'no tɨpema'mentiso sohwo osohwo kako Anɨtuye mehomi hweho. I nom'ne tɨpema'mentiso oso hwa hofɨkoe imuso hofɨko Anɨtuye mehomi'maho. Oso hungkuno Apɨlohammo ulɨmentiso hiso olenoho. Soswo anga'no niyakolofɨhwoso'no ngko asomo wapmmonnoho. Osohonta Sola kako hwomu aswo woma'montonoho. Ose ulɨmentisofoho.

10 Ihwoni. Aisak kako imo'nonto kakoe ape Lepeka kako hufa'u mehomi imo'nɨmentisofoho. Oso hufa'u mehomi sohwa'uye kanɨngkwohwo afa hweho. Aisak huhwo sohwo kako nakwo a'amu Juta hn'nwiye neyakweho. 11 Oso hwomu hufa'u Lepekafe sɨmehomjo mnawojo oso hwa'umo Anɨtu kako kakoe huno mta'ni hwomu anga'nohino humo kakoe mehomi imo'nyo'ne uhwosopo'mentisofoho. Anɨtu kako oso hwomu sohwa'u sikoe yahino wopɨngo somne'no yano ulohmmentiso'maho. O'o, siko mmo'nyo sohonta Anɨtu kako hwomu anga'nohino sohumo kakoe mehomi imo'nyo'ne uhwosopo'mentisofoho. Oso'no nakwo huno ole nayohi, Anɨtu kako a'amufe yahino somne'no huno mosyafɨsiyo'njo yonto a'amu somo kakoe huno mta'ni mtitofonto uhwosopewo'nɨngkiso hweho. 12 Oso hwomo sohwa'u siko mmo'nyo sɨmeho mo'mo mnowentanjo sohonta Anɨtu Lepekamo ulɨmento, Oso hwomu sɨmo'mjo sohumo nom'ne jɨje hwomu tɨfinjo sohwoe syoho ulohofiyo'nehwo umo'nɨmontonoho. Ose ulɨmentisofoho. 13 Anɨtuye hungkuno mtɨ'mokumentohofo sohwa hofɨko ole mtɨ'mokumentohofi, Anɨtu ole lɨmento, Ngko Aisakɨye hwomu tɨfinjo Jekoup oso hune'no sɨmeho uyalokweno. I ngko kola'wehwo Isou sohune'no ngkilaho, ose lɨmentisofoho.

14 Oseso nakwo ole wolantantaho. Olo Anɨtuye yahino oleso nto'nohinɨ'maho. Ose wolantantaho. O'o, awonoho. 15 Anɨtu Mousesɨmo ole ulɨmento, U ngko hwe fihune'no wopɨngo wakiloho'mo ulɨ'mo u ngko kakimo wopɨngo uloho'mnoho. U ngko kakine'no hitoho wanto'mtonoho. 16 Oseso hwe fihwo kako ole malonehoho. Ngko syoho wopɨngo i'me'no Anɨtu kako ngkimo wopɨngo wantoho'montonoho. Ose malɨmnehono. O'o, Anɨtu kakoe huno mta'ni mtitofɨhwosi a'amumo wopɨngo uloho'montonoho. 17 Oso'no Anɨtu kako hwe engo hwaho Ijip mokosyohumamentiso osohumo ole ulɨmento, Ngko kikimo olo hwaho Ijip osopo mokosyohumayo'ne kuhumajɨ'mentohefoho. Hwapɨngoso ngko kikimta'ni nje a'amu Isɨlael somo utɨmahm'me'no kɨko yokumpohn'nyo imo'nɨngkohoji hahn'nyo yohojo'no ngko kikimo hwotoho kufe'mo wokiyakolo'monnoho. Oseso a'amu ango'meemjoso hofɨko nje yokumpohn'nyoso nohonɨngkuji nje yofeso woho'nonɨmantɨfeho. Ose ulɨmentisofoho. 18 Oseso nakwo huno ole nayohoho. U Anɨtu kako hwe fihune'no ngko kakine'no hitoho wantofono lɨhwosi u kakine'no hitoho ulo'montonoho. U Anɨtu kako nom'ne a'amu hune'no huno ole syafɨsyososo, Hwe fihwo kako yokumpohn'nyo umo'nono ose syafɨsyososo oso hwe huhwo sohwo kako yokumpohn'nyo umo'nɨmontonoho.

Olo hungkuno loso Anɨtuye sɨmeho tohino'nji hitoho ulofoso'ne

19 Oseso Anɨtu yo'mayoso umo'nono lonte so'no oso hiso ne imo'nɨwo'nɨngkisofoho. Oso'no a'amu fehohnjoso ole wontantɨfeho. Nakwoe yahino wonyo iwo'nɨngkuhwone so'no Anɨtu kako yoka peho'no nalɨwo'nɨngkohoho. Yo'mayo imo'nɨwo'nɨngkiso so'no sɨmo'mo Anɨtu kakoe huno yo'mayoso umo'nono lonte huno syafɨsyɨwo'nɨngkiso osomo tɨhwo ulojao'montolo. 20 Ose ntɨkujo'no ngko ole ulɨmno, U, kɨko a'amu hwahoponjo fihwosi Anɨtumne'no yoka ujoso kɨko hopoenohintaho. Oseso hwakwontoho osohwo kako oso hwe mtɨ'mokoso osohumo ole ulɨmontolaho, Kɨko olo pa'nyo peho'no nɨmtɨ'mokumentohino hwo'nto. Ose ulɨmontolaho. 21 A'amu hwakwontoho syoho'njo sohwo kako hwaho nomahwosi hwontoho nom'ne wosopayo ho'nasiyo'ne mtɨ'mokuhwosi nom'ne sikinjo jopaho iwontofasiyo'ne mtɨ'mokososo wonyotaho. O'o, kako yo'mayo kakoe huno mta'ni mtɨ'mokiyoso u oso kako hwapɨngo hweho. Kakoe syohofoho.

22 Oso yahino oseso Anɨtu huhwo'njoho. Anɨtu a'amu honɨngkano wonyo imotofo so'no tohino womapɨfe lɨmentisofoho. Anɨtu kakoe yokumpohn'nyo'nji kakoe sɨmeho tohino oso'nji utɨhwa'nyopo ulɨkemokontentesi a'amu somo tohino komo'no uyɨhwonesohilo. O'o, Anɨtu kako oso a'amu somne'no hitoho ulofahonɨngki hontohumaho. I oso'no hofɨko hahn'nyo ne'no yahonɨngkofi Anɨtu kako tohino engo uyɨmentisofoho. 23 I Anɨtu kakoe yahino wopɨngo ujo ehontojwasiyo'ne so'no Anɨtu kako a'amu fehohnjo wopɨngo uloho'mne'ento uhwosopo'mentiso somo nje yofe engo so'nji nje yahino wopɨngo so'nji mapitnne'ento imentisofoho. Hwapɨngoso oso hiso'no nakune'no nto'no nto enesyohumaho. 24 Oso a'amu wopɨngo uloho'mne'ento uhwosopo'mentisoso nakwonoho. Oso hiso a'amu Juta'nohini'maho. O'o, a'amu temtitofo kengo kengo'nwoho. 25 Houseya sohumo Anɨtu hungkuno uyahonɨngki lɨmojo sohwo kako olo hungkuno loso a'amu Juta'maso, a'amu temtitofo kengo somne'no ole mtɨ'mokumentisofoho.

Anɨtu ole lɨmento, Hwe moya'mi hofɨko nje a'amu Juta mmo'nyo'njo somo ngko ole ulɨmonnoho, Sekwo nje a'amu kuyoho.
A'amu ngko hofɨkimo sɨmeho muyo'njo sɨmo'mo imentohe somo ole ulɨmonnoho, Ngko sekumo sɨmeho sejopalokweno.
26 Ango'meemjo a'amu somo nje a'amu ku'maho sɨmo'mo ulɨmentohe oso ango'meemjo a'amu somo ole ulɨmonnoho.
Ngko Anɨtu songo ne'no humayo sohwo'niye a'amu kuyoho.
Houseya ose mtɨ'mokumentisofoho.

27 I Aisaiya hwe nom'nehumo Anɨtu hungkuno uyahonɨngki lɨmentiso sohwo kako a'amu juta somne'no ole mtɨ'mokumento,

A'amu Isɨlaelɨso hofɨko tafeponjo wosoho pa'nyo pi'nɨngo engo ko imo'nɨfijo somta'ni Anɨtu kako anga'no anga'nohino manefoho.
28 Hwapɨngoso a'amu honɨngkano wonyo'njo somo Anɨtu hofɨkoe yahino wonyo so'no hungkuno ulɨhwosi tohino komo'no uyonefoho.
29 Oso hungkuno Aisaiya sɨmo'mjo mtɨ'mokumentisoso olenoho.

Nakwoe Hwe Engo Anɨtu kako a'amu ahwomomjo so'nji hntokwaliyo yo'mayo so'njimo mokosyohumawo'nɨngkiso osohwo kako nakwoe temtitofo fehohnjo anga'no anga'nohino somne'no wohumafe majo'njo yontentesi nakwo a'amu hopi'nono Isɨlael hn'nɨmo Soutom'nji Ngkumoula oso pa'nyo wae enaofɨhwonesohilo.
Aisaiya ose mtɨ'mokumentisofoho.

A'amu Isɨlaelɨso hofɨko hofɨkoe yahino wopɨngo somne'no Anɨtuye a'amu ne imo'nane'entɨfi hofɨko syoho engo imentohofofoho.

30 Oseso nakwo pehofo lanehwono. Olenoho. A'amu temtitofo kengoso hofɨko nakwo Anɨtuye a'amu ne imo'nane'entɨfi syoho yokumpohn'nyo imentohofo'maho. O'o, hofɨko Jisasɨmo sɨmeho hi'ntnnono uyahonɨngkofi Anɨtu sekwo wopɨngo kuyoho ulɨmentisofoho. 31 I a'amu Jutaso hofɨko ole syafɨhu'mentohofi nakwo Anɨtuye honɨngkano hungkunomo nto'no inɨngkohwaso'no Anɨtu kako nakumo wopɨngo kuyoho wonalɨmontonoho. Ose syafɨsyontɨfi syoho engo ko imentohofo so'no Anɨtu kako wopɨngo kuyoho ose mulonehoho. 32 Hwapɨngoso hofɨko Jisasɨmo sɨmeho hi'ntnnono uyoso nakwolaho lontɨfi honɨngkano hungkuno osomo nto'no inɨngkuhwasi Anɨtuye a'amu ne umo'nano. Ose lɨmentohofofoho. Hofɨko oso sojo engkwosaho pa'nyoso Anɨtu honɨngkanopo ho'nahumentiso osomo entofomantɨfi pɨwahu'mentohofofoho. 33 A'amu Anɨtuye hungkuno mtɨ'mokumentohofo oso hwa hofɨko Jisasɨmne'no oso sojo homo somo ole mtɨ'mokumentohofi,

Upa'nɨmno. Oso hwaho ango Saiyon sopo sojo engkwosaho pa'nyo a'amu entofomayo'ne ho'nahumentohefoho.
Oso hopo sopo a'amu hofɨko entofomafɨkuji wopɨwesyantɨfeho.
I a'amu oso engkwosaho homo somo sɨmeho hi'ntnnono uyɨfijoso hofɨko wonɨmango munonehoho.
Jisasɨmne'no ose mtɨ'mokumentohofofoho.

Copyright information for `APZ