1 Corinthians 12

Sikalahuli'mo Monoli'mi Amuzo Ato Ato' Lehize-ledaa' Neingumu' Nene Paulo' Lo-ngimine'

Ido' neze zuho mate, O'moso'mi Sikalahuli'mo monoli'mi amuzo ato ato' lehize-ledaa' neine' monovomu' nene gilami minikelizaze. Lo-lengemeloze. Gililo. Lingine gomu' O'mosomu' gilami nizavo gatine hizi gopo lengele'mizi vadaa vada nene nanite' nge'meti vaa' ani' neve. Lingine soza o'moso gamazi lisa'mani' initekovo' nge'meti vaa' ani' nene mo gili nizave. Ido' lingine a'mine soza o'mosovo' nge'metaa' ave nizanako ne'mo nene O'moso'mi Sikalahuli'mi monovomu' gilami nilisanako nemu' ma lo-lengemelove. Ve mali'mi lulou' O'moso'mi Sikalahuli'mo gono nodavo Izesungumu' nene dovo ledevoka ma lamoloseive. Ido' Sikalahuli'mo lulou' gono damivo minelive ne'mo nene Izesungumu' nene Guvelesi ve inite' mukito' gizebo o minive neive lo ma lamoloseive. Nemu' evene' ma ingine soza li O'moso'mi Sikalahu' aza luteu' gono nodavosa gamazi nolo-lingimune li nilavo ma nene soza nilahe lamine' nilahe nemu' gamazi'ninguti' nene ningi gili di soto' ilisave.

Monoli'mi amuzo nene ato ato' muki' neine'za a'mine amuzo lehize-ledaa' ive nene O'moso'mi Sikalahu' hamo' ne'movo' nene muki' lehize-ledaa' neive. Ido' mono' gonolo' ve nene gono ato ato' muki' nene ha dalisani'za Guvelesi ve hamokumukovo' nene gono dalisave. Ido' gono daa' amuzo nene ato ato' vai' goloso neine'za a'mine amuzo muki' do soto' ive O'moso hamo' ne'mo evenele mukito' nene do soto' o-ledavo gono've nene daa' noune. O'moso'mi Sikalahu' ne'mo leli' muki' nene lele'mize lamine' ilingumu' monoli'mi amuzo ato atokuti' nene ize' molo O'moso'mi evenele nene hamo hamo' lehize-ledaa' neive. Luvoni' ne'mino neine' nene neloti' ningo gelelesune. Ve ma nene Sikalahuli'mo hize ele' o-divo mono' gamazi nene otohato gamazi laa' neive. Ido' ve gohi ma nene a'mine Sikalahu' ne'mo mono' monovo gelaa' amuzo nene lehize-davo laa' neive. Ido' ve gohi ma nene vauve elo gele ele'vole' oga' amuzo nene a'mine Sikalahu' maloti' daa' neive. Ido' hamo' Sikalahu' ma'mo nene evene' goloso galasa do guno o-ngedaa' amuzo nene evene' ato' gohi ma nene ha emeleseive. 10 Ido' ve gohi ma nene amuzo malehe inite' do soto' oga' amuzo nene emo ma nene O'moso'mi veleti' gamazi lo soto' oga' amuzo nene emo ve gohi ma nene gamazi ato ato' ize' molo O'moso'mi Sikalahutati' soto' ine' nene do kegeso ido' atokuti' soto' ine' nene ningo do kegeso lo soto' oga' amuzo nene emo ido' ve gohi ma nene no'ine ato atokuti' laa' amuzo nene emo ve gohi ma nene a'mine no'ine ato ato' do velepe' izo laa' amuzo nene emaa' neive. 11 A'mine ne'mine amuzo ato ato' muki' nene a'mine Sikalahu' hamo' ne'movo' nene do soto' ogo ei' lulolokovo' a'mine lemelesa gala giline' amuzo nene nani'mine amuzo lemelesa gilihe nene leli' evene' hamo hamo' nene ize' molo lemaa' neive.

12 Ido' ne'mino neive: Leli' okode nene inite' hamokovo' neine'za a'mine okodelo' minaa' nani' inite' gizede ade nevo'mine nene gulive'ine ato atokisi vai' muki' nizave. Ido' a'mine'mine ogo laza nene evene' muki' none'za laza Kilisito' evenele zuho nene Kilisitoda gi'mizo mino ei' oko'nolo' gizene ana inite' ato ato' nevo'mine nene lolo' ogo mino oko'no ne'minosa hamo' nene none. 13 O'moso'mi Sikalahu' hamo' ne'mo leli' mukita omo holavo laza muki' nene noso holokunivo a'mine Sikalahu' hamo' nene mo lute mukiku' nene gono do minavo hamo' zuho lolo' okune. Ee, lelikuti' linge ma nene Zuda ve nonivo ma nene heta ato' ve nGiliki ve nizavo ido' ma nene evene' malo' goboni ve nizavo ma nene ne'mine ami haza minikevo none'za laza evene' ato atoli'mine minunekisi nene hamo' zuho lolo' ogo none. Ne'mino nounako nemu' laza nene ei' Kilisito' oko'no hamo' ne'minosa nene none. 14 Ido' okode nene gizede ade gote vete inite' muki' nene neive. Okode nene lingelatikovo' nomive. 15 Nemu' nene gizede ne'mo naza nene ade ne'mine nomuvonako nemu' nene okode lingelati' nomuve lo gelo gizede'mo liline' nene gosoho' loloseinako gizede nene mo okode'mi lingelati' ne neive. 16 Ido' gate ne'mo naza nene vete ne'mine nomuvonako nemu' nene okode lingelati' nomuve lo gelo gate ne'mo liline' nene gosoho' loloseinako gate nene mo okode lingelati' ne neive. Ido' a'mine'mine ogo Izesu' evenele zuho ma nete linge ma gono daa' amuzo di minani' ne'mino ma damunako Izesu' evenele zuhouti' minamo nolosune lo ma lamolosune. Lazasi nene mo Izesu' evenelevo' nene none. 17 Ido' okode muki' nene vetevo' minidiniko inite' nene zalati' gilunidine. Ido' okode muki' nene gatevo' minidiniko inite' unuvo zalati' gilunidine. Ido' a'mine'mine ogo Izesu' evenele muki' laza monoku' hamo' amuzo do hamo' gono dunidiniko ma gono nene zamote dadine. 18 Ne'mine o neine'za ne'mino nomive. O'moso ne'movo' nene gizede ade gote vete inite' mata' muki' okodelo' neine' nene gono ato atoto' hulo-ngedelesa gilido' hulo-ngede'mo vo neive. Hulo-ngede'mo vo neinako Izesu' evenele lelikisi nene a'mine'mine ogo gono ato atoto' hulo-lede'mo vo neive. 19 Ne'mine o neine'za oko'de'mi inite' ato ato' gizede ade gote vete nene hamo' initekovo' minidiniko okode nene ma minamidine. 20 Minamidiba ne'mino nomive. Asi okodelo' gizede ade gote vete inite' muki' nene neivosa okode've nene hamo' lolo' ogo neive. 21 Ido' ade nene nomidiniko vete nene lamine' ha minamidiinako nemu' nene vete ne'mo ademu' geze nene minamiline' naza nene lamine' ha minelesuve lo ma lamoloseive. Ido' godote ne'mo gizedemu' gaza minamiline' naza nene lamine' ha minelesuve lo ma lamoloseive. Nemu' nene laza a'mine'mine ogo Izesu' evenele linge mamu' lingine gono dani' ne'mo leli' nene hize ele' o-ledesa'mine' nenako lingine minamilizani' nesi ha lamine' minelesune lo ma lamolosune. 22 Mo o'ove. Ne'mine loso' nene nomive. Okode linge mamu' ninge gehe-do nge lamida neive laa' nounida nene ma minamidiniko okode nene ma mine lamine' ogo minamidine. 23 Ido' okode'mi inite' mamu' nene inite' lamine' nomive lo gelo ma nene a'mida nene okodelo' inite' ma do hito do lamine' oga' noune. Ido' okode'mo ovozo hiline' inite' nene do hito gonolise oga' noune'za 24 lovozo amine' initeta nene ha soto' igi minaa' nave. Ne neiha okodelo' gizede ade gote vete ne'mine inite' mata' muki' ingine nene ge dovo ledevo' o-nede ne dovo ledevo' o-gede li ize' milami muki' nete ge nasahili' o-nede ne nasahili' o-gede livo' minilizave lo O'moso aza okode lingela ma lamine' o guno amine' gelo minida nene lamine' i minada nene ngivile' ivosa di lamine' i-ngidilizave lo okode nene do hamo' ogo do soto' ine' ve. 26 Nemu' nene okode lingela mulumo alumo inite' ma soto' ine' nene okode muki' nene mulumo makato' gilaa' nave. Ido' okode lingela ma di naba i-di ne'mine ani' nene okode linge malasi nene di hamo' igi ngolize izaa' nave. Ido' leli' okodela soto' oga' neine' monovo ne'mino Izesu' evenele zuho lelikuti' evene' ma ingine mulumo initeli'mi lulou' nizavo ma evene' lingela lazasi nene mulumo'ine gelo hize ele' o-ngedelone. Ido' a'mine'mine ogo lelikuti' evene' mamu' di naba i-dikevo ma nene evene' lingela lazasi nene a'minemu' lolize izo minelone losa noluve.

27 Nemu' nene Izesu' zuho lingine nene Kilisito' oko'no hamo' ne'mine mini oko'nolo' gizene ana golo vele nevo'mine inite've lili' igi ato ato' mini'mi vi mini ezemu' gono di lingine hamo hamo' ezela gi'mizi nizave. 28 Ee, ne'mine igi nizavo O'moso'mi zuhoti muliseu' gana' dizi minave nene aposolo minilizave lo O'moso'mo linge ma nene do ote-lede neive. Ido' a'midoti' nene eze veleti' gamazi li soto' iga' ave polohete nene minilizave lo linge ma nene do ote-ngede neive. Ido' a'midoti' nene Izesu' mono' apizi ngimaa' ave minilizave lo linge ma nene do ote-ngidine' ve. Ido' neloti' nene amuzo malehe suno di soto' iga' ave nene do ote-ngedo evene' goloso galasa di lamine' i-ngidaa' amuzo di minavesi do ote-ngedo ido' gonolo' gizebo lamine' ilizave nesi do ote-ngedo ido' evene' ma nene no'ine atokuti' gili lamaa' anguti' laa' ilizave nesi nene do ote-ngidine' ve. 29 Ne'mine ine'za lingine aposolo nene mukito' minani' nehe. O'moso'mi veleti' gamazi li soto' iga' ave nene mukito' minani' nehe. Ido' mono' apizi ngimaa' ave nene mukito' minani' nehe. Ido' amuzo malehe suno di soto' iga' gono nene mukito' dani' nehe. 30 Ido' evene' goloso galasa do lamine' o-ngedaa' amuzo nene mukito' di minani' nehe. Ido' no'ine atokuti' gili lamaa' anguti' nene mukito' laa' nani' nehe. Ido' a'mine gili lamaa' ani' no'ninguti' nene ma likevo mukito' di velepe' izi laa' nani' nehe. O'ove. Mo ne'mino nomive. Ne'mine mana'mine amuzo nene evene' mukito' di minamilisave. Linge nete ato' ma di minikevo ido' lingela nete nene ato' ma di minilisave. 31 Ne neiha lingine nene polohete lolo' oga' amuzo nehe mono' laa' amuzo nehe evene' do lamine' o-ngedaa' amuzo nehe ne'mine amuzo ato ato' muki' mini'mi vanguti' dizo noline' amuzo nene do minelone li amuzo milalo.

Copyright information for `ASO