1 Corinthians 15

Izesu' Hilinguti' Otine' Mamu' Nene Mo Gili Nizave. Nemu' Nene Lazasi Hele Noloninguti' Otelesune Lo Gele Mineloningumu' Nene Paulo' Lo-ngimine'

Neze zuhokizo, gomu' lo-lingimuvoni' mono' gamazi lamineli'mi monovomu' nene gohi lo-lengemelove. A'mine gamazi neve lo-lengemekuvo lingine gili dani' ve. Ido' a'mine gamazi neve nene idisesi ha di gili' li nizani' ve. Ido' a'mine gamazi di minani' ne'mo O'moso'mo do lungu' izelido' nene mini milisa nene nizave. Ee, ido' lingine gamazi lo-lingimuvodo' gili ele'vole' igi gili dani' nene vo haza amivo a'mine gamazi gehepeve nene di gili' li minilizani' nene O'moso'mo do lungu' izeleseive.

Ido' gomu' lo-lingimuvoni' mono' gamazi lamineli'mi monovomu' gohi lo-lengemelove luvoni' nene nemu' luve: Mono' gamazi lamine' gana' api' ogo gelo do go'zekuvonikovo' nene lo-lengemo neuti' nene dizo minine' gamazi ne'mino ve lo ti' lo lo-lingimuvoni' ve: Mono' godolou' Kilisito'nimu' gizado' e'meto leli' lihimetemu' hiline' ve. Ido' a'mine'mine ogo helavo galese izi-dikevo gamene sito hamo mino galeseuti' oteleseive li mono' godolou' polohetelite gizado' e'meto ne'mine ine' ve. Ido' galeseti' otosa nomono Petolo'ni soto' o emavo ningine'. Ido' a'midoti' nene izipahala zuho tuvelu nene soto' o ngimivo ningani' ve. Neloti' alinge' nene eze evenele zuho faef hadeti (500) ne'mine di gese' igi minadokisi eze oko'nolo' ningani' ve. Ido' a'mine Izesu' oko'nolo' ningave linge ma nene osu' li'mi vani'za vai' goloso nene ve'inesi haza nizave. Ido' neloti' nene akunolo Zakobo'ni soto' o emosa alinge' nene aposolo mukita soto' o ngimine' ve. Ido' neloti' naza nene ve goloso mino eze evenele lolo' ogo mineloni' gamene nene ivile' goloso ogo nouvo alinge' gehepeve nene aposolo gele'mize molalove lo soto' o nemavo naza a'ne'mine ve'minesi ninguvoni' ve. Ne'mino ningune' nemu' nene hilinguti' mo otani' neive lo gele ele'vole' o minelone. Ido' naza ve goloso lolo' ogo nouvodo' aposolo nele'mize molangumu' luvoni' nene naza O'moso'mi evenele zuho do goloso o-ngedaa' uve mino aposolo lolo' ogo minelodo' lisihe' amo aposolo minangu' lemo mino gize'ningu' nouvoni' nemu' nene luvoni' ve. 10 Nemu' luvoni'za idise mene aposolo lolo' ogo monovo'ne do ato' oga' nouvoni' nene O'moso'mo lulo lamine' nene lehize-nedo do lamine' o-nididi'mo nene nouve. Ido' a'mine do lamine' o-nidine' nene vo haza amive. Naza nene gono amuzo molo do aposolo linge muki' nene ngivile' ogo gono daa' uvoni' ve. Ido' ne'mine oga' nouvoni' nene neni' amuzo'nedunu' nomive. O'moso'mo ne'mino do lamine' o-nedaa' neine' ne'mo aposolo lingela nene ngivile' ogosa gono daa' nouve. 11 Ne neiha naza gono do mono' gamazi lamine' nene lo soto' olonipe aposolo lingelite li soto' ilizanipe mukito' laza Izesu' hilinguti' otive lo gomu' lo-lingimuvoni' ne'mino hamo' gamazivo' lo-lengemelesune. Ido' lingine gana' api' igi mono' gamazi gili ele'vole' ani' ma nene gamazi ato' ma gili ele'vole' ani' nomive. Mo a'mine gamazi gehepeve nene gili ele'vole' ani' ma neive.

12 Ne'mine ani' ma neine'za laza Kilisito' hilinguti' kululu' izo otine' ve lo lo-lengemaa' nounivo lengikuti' linge malite lingine helakuti' gohi otaa' nene nomive li laa' nani' nene nanimu' laa' nave. 13 Helakuti' otaa' nene nomidiniko Kilisito' hilinguti' otive gamazi nene gihile minamidine. 14 Kilisito' nene hilinguti' ma otamidiniko mono' gamazi laa' noune' nene gihile nomine' minavo hazamu' lokunivo a'mine gamazi nene lingine gili ele'vole' ani' nenako mo hazamu' gili ele'vole' adine. 15 Ido' neevo' nene nomive. O'moso'mo hilave nene do ote-ngedesa'midiniko Kilisitokisi nene otelido' amivo otamidine. Nemu' nene O'moso'mo hilinguti' do ote-dine' ve laa' nounako Kilisito' hilinguti' O'moso'mo do ote-dive laa' noune' nene sozavo' minidine. Ido' nemu' nene laza O'moso'mi monovomu' soza lune' nene ha ningi giladine. 17 Ee, O'moso'mo hilave nene ma do ote-ngedesa'midiniko Kilisito'nisi nene ma do ote-damidine. Ido' Kilisito' hilinguti' nene otamo hele osu' lidiniko lingine Kilisito' lihimete hulo-lidine' ve li gili ele'vole' ani' nene gihile amivo hazamu' gilikevo lihimetine nene ha minivo minadine. 18 Ido' Kilisito'nimu' gili ele'vole' i mini hilave nesi nene mudise vi tolovo adine. 19 Ido' laza nene vetesi me misubou' mineloningu' Kilisito'ni nene e'meto vo minekunivo aza do lamine' o-ledavo hele noloninguti' gohi otosa minevo' minevo' olosune lo gelo laza gizebo ogo minaa' noune'za me misuboukovo' minevo' alevote osu' lavo mudise hele osu' lokunivo minevo' minevo' oga' nene minamaa' idiniko evene' nete lelikumu' nene ingine inite' lamine' goloso soto' o-ledeleseive li gilani'za mo soto' o-ngedamoloseive li evene' linge muki' muhele'ine ningaa' ani' ma nene ivile' ivosa lei' nene muhelete naba ningilizado' lisihe' ivosa minunidine.

20 Ne'mine unidine'za ne'mino nomive. O'mosomu' gili ele'vole' igi mini hilave muki' nene Kilisito' aza gomu' molo ngemo mo lamineto' hilinguti' otine' ve. 21 Ee, helaa' nene misubouko leli' haza velati' soto' ine' nenako helakuti' otaa' nesi a'mine'mine ogo evenetati' soto' ine' ve. 22 Ne'minemu' noluve: Adamu' aza gomu' molo lemo helaa' monovo do soto' ivo a'vopilemo' muki' laza helaa' noune' ne'mino Kilisito'ni nene helelinguti' gomu' molo lemo galeseuti' otelive lo O'moso'mo do ote-dine' nenako Kilisitoda vo gi'mizunive laza nene hele noloninguti' do ote-ledavo gohi vete gizo oto minelesune. 23 Ne neiha Kilisitokisi eze evenele zuhosi nene helakuti' nene gopo gomu' otaa' alinge' otaa' amolosune. Kilisito' nene mo gomu' molo lemo otine' nenako alinge' eze aline' gamenelo' nene evenele zuho laza nene vete gizo otelesune. 24 Neloti' nene gono've do peleline' gamene naba soto' oloseive. Ne'mine ogavo Kilisito' aza eze biluva' i-daa' ave evene' golosoliti guve'inesi vesi ido' ato ato' amuzolo' gizebo igi amuzo'inesi minavesi nene muki' ngivile' ogo do gulupese lolo' o-ngedo osu' lo eze evenele zuho nene O'moso melehi anau' molo-ledavo gizebo o-ledeleseive. 25 Ee, Guvelesi ve mino gizebo iline' amuzo eita minamiline' nene aza lovo ve've nene ngivile' amilido' mineleseinako nemu' nene ngivile' ogo do gizeneuko o-ngedosavo' alinge' nene a'mine gizebo iline' amuzo nene melehi anau' hulavo gizebo o-ledeleseive. 26 Ido' Kilisito' aza biluva've muki' nene do gulupese lolo' o-ngedosa alinge' gehepeve nene lovo o lemaa' inite' ma gulive helaa' ne'mi amuzo nene do hulo aka've hize tileleseive. 27 Ido' inite' muki' neine' inite' nemu' nene eze gizeneukovo' molavo gelekele' i-di minilisave li mono' godolou' gizi nizani' nenako a'mine inite' muki' nene gelekele' i-di minilisave li gizangu' nene a'mine inite' muki' gipelela do gelekele' o-ngidive O'moso nesi nene Kilisito'ni gelekele' o-deleseive li ma gizamani' nene mo gele none. 28 Inite' muki' nene gipele gelekele' i-di minikevo a'mine inite' muki' do gelekele' o-ngidive O'moso'mo inite' mata' mukitokisi ido' nenitokisi nene gizebo ilive lo gipele azasi nene gelekele' o-deleseive.

Mono' Gono Noduningu' Nene Helaa' Akalo' Mine Molosa Novunako Helakuti' Otaa' Nene Nomidiniko Mono' Gono Nene Ma Damunidine Lo Paulo' Lo-ngimine'

29 Ido' helakuti' otaa' nene ma nomidiniko hilavemu' ve li evene' malite noso hilaa' nani' nene nanimu' hiladine. Helakuti' otaa' nene ma nomidiniko ingine hazamu' holalosune li gili ma hilamadine. 30 Ido' laza nene gamene gamene goboni mala' malali'mi lulou' mino helaa' akalo' mine molo gono dodo novune' nene helakuti' otaa' nene nomidiniko geli geli ogo gono dodo ma vamunidine. 31 Guvetesi ve Izesu' Kilisito'nimu' gono duvoni' ne'mi gihile've lengikumu' nene nolize izaa' nouve lo lamineto' loloni' nene lingine mo gili nizave. Ido' idise mene loloni' gamazi nene a'mine'mine ogo O'moso'mi velelo' laminetokovo' lolosuve. Naza nene gamene gamene mo helo galese velelo' vokuvongutikovo' nene tine' molo oga' nouve. 32 Ido' evene' haza ve nete helakuti' otaa' nene nomive li gilado' nene nazasi a'mine'mine ogo giluvodiniko Eheso numuda mene Kilisito' gono've do nouvo evene' ize gulo loposo gili minave nete nene biluva' i-nidi nizavo amuzo molo minuvodoti' nene inite' lamine' ma ngelo dalohe. Mo damolosuko lo gelo alamuvodine. Ido' lamine' helakuti' otaa' nene ma nomidiniko geni gono ne'mine nene gehamo

aize' mo noheleso' nene mo mudise osu' lolosunako
nemu' noso' nite' luvoloni no mino lolize izovo' minuke'zo li laa' adokovo' nene gele do minunidine.
33 Ido' ne'mine laa' avela vi gi'mizikevo gotine izikelizave. Evene' golosolo' vi gi'mizilizadoti' nene lutine lengemeni dameni vo goloso oloseive li gizikani' ma nene lamine' gizi nizani' neive. 34 Nemu' nene lingine gopo' napa negi gatine nene gilami gatine gili lamine' igi mini goloso inite' nene mehedine imi lihime daa' monovo nene hulilo. Lingine gililo. Lengikuti' linge ma nene olihe O'mosomu' ngomosi ma gilamave. Ne'mine i nizangumu' nene longovozo hililizado' o neive losa noluve.

Hele Noloninguti' Atoli'mine Okodesi Oteloningumu' Paulo' Lo-ngimine'

35 Ido' evene' ma nete ti' li longo' ilisave: Hilave engi' nene nadi' igisa otilizave. Oko'nine gelese noloseinako nani'mine oko'inesi otilizave. 36 Ne'mine lilinive nene negike lolosane. Inite' zuho' aine' nene helosavo' nene gohi golo dizaa' neive. 37 A'mine viti zuho nehe inite' maliti zuho nehe zuho' nani' nene alinge' golo dizeline' oko'no ne'mine nene zuho' amave. Haza mo zuho inite' nene zuho' iga' nani' ma neive. Ido' gililo. A'mine'mine ogo lazasi nene helo gonoso galeseu' volone' okodesi nene otamo atoli'mine okodesi otelesune. 38 Ido' a'mine zuho inite' ato ato' nene O'moso'mo oko'ine ato atokisivo' ne'minisa minilisaze lo gilido' nene do molo do soto' o-ngedaa' neive. 39 Ido' zuho inite' ato atoli'mine minani' ne'mino eveneliti oko'ine nene atoli'mine neivo ize guloliti oko'ine nene atoli'mine neivo namaliti oko'ine nene atoli'mine neivo alahaliti oko'ine nesi atoli'mine neivo a'mine inite' muki' nene hamo' oko'inesivo' ma minamave. 40 Ido' okulumoku' nene inite' ma minikevo ido' misuboukisi nene inite' ma minikevo ne'mini nizani' nene oko'ine ato atoli'minesi nene nizave. Ee, okulumoku' minaa' nani' initeliti oko'ine'mi gonolise nene atoli'mine neivo misubou' minaa' nani' initeliti oko'ine'mi gonolise nene atoli'mine neive. 41 Ido' holi'mi labana've nene atoli'mine neivo ike'ni'mi labana've nene atoli'imine neivo sonohi' neti labana'ine nene atoli'mine neive. Ido' sonohi' neti labana'ine nesi nene hamoli'mine nomive. Labana'ine nene mo ato ato' neive.

42 Nemu' nene helo otaa' monovo nesi nene hamoli'mine ogo neive. Hilani' oko'ine galese izaa' noune' nene vo goloso ogo osu' laa' neive. Ido' hilakuti' otaa' oko'ine nene vo goloso amoloseive. 43 Ee, hilani' oko'ine nene haza inite' ve lo galese izaa' noune'za hilanguti' otilizani' nene oko'ine gonolise laminekisi otilisave. Ido' oko'ine amuzolo nomine' nene galese izekunivo otilizani' nene amuzo malehe oko'inesi otilisave. 44 Ido' helo galese izaa' okode nene misubo okode ne neive. Ido' galeseuti' otaa' okode nene Okulumo' okodesi otelesune. Ido' misubo okode neine' ne'mino Okulumo' okodesi neive. 45 Ido' mono' godolou' luhuvo ti' li gizi nizani' ma neive:

Gana' api' ogo soto' ive Adamu' aza nene
ve'inesi mini mili iga' monovo nene O'mosolati' dosa minine' ve.
Ido' Adamu'nimu' nene ne'mine li gizani'za Adamudo' medelo Okulumokuti' alinge' soto' ive nene minevo' minevo' lemeni dameni lemaa' ive lolo' ogo minine' ve.
46 Minevo' minevo' lemeni daa' monovo nene gomu' soto' amivo vetesi misubouko mino molo oga' monovo nene gomu' soto' ogavosa neloti' alinge' nene minevo' minevo' lemeni dameni daato' nene mine molo none. 47 Gana' soto' ive nene misubodunu' lolo' o-dine' ne'mo nene misubou' ve minine' ve. Ido' ezelo' medelo alinge' soto' ive nene misubouti' soto' amo Okulumokuti' soto' ive minine' ve. 48 Misubou' ve leli' okode nene gana' avoteho misubou' soto' ive Adamu' ei' oko'no ne'minosavo' nene none'za Okulumokuti' ve Kilisito' evenele zuho lolo' unive laza nene ei' Okulumoku' oko'no ne'mine do minelesune. 49 Ido' laza hamo hamo' misubou' gana' soto' ogo minine' ne'mine emeni damenisi none' ne'mino gamene ma alinge' lazasi Okulumokuti' limive ne'mi emeni dameni've ne'mine do minelesune.

50 Neze zuhokizo naza lamineto' noluze. Gililo. Misubou' okodesi minune' nedunu' nene O'moso'mo gizebo ingu' ngelo vo holamolosune. Misubou' okode vo tolovo iline' ne'mo vo tolovo ami inite' Okulumoku' inite' nene ngelo mo damoloseive. 51 Ne neine'za gamazi lamine' ma gomu' suno' minine' idise soto' ogo neine' nene ma lo-lengemeloze. Gililo: Leze mukito' nene linge ma hilikevo linge ma nene helamolosune'za hele nolonivesi helamolonivesi mukita nene pikuli nolo molo osu' nolivo lite' lo vete gitibulu' hamo' izaa' noune' ne'mino okode nene atoli'mine soto' o osu' loloseive. Ee, vo tolovo ogo hele vaa' okode idise mene nonivo neine' okode nesi mino O'moso'mo gizebo ingu' nene ngelo vo holamolosunako vo tolovo amaa' ido' hele vamaa' emeni dameni nene do okodelo' otuho-ledeline' o neinako pikuli izeline' leli' okode've nene atoli'mine soto' o osu' loloseive. 54 Ido' vo tolovo ogo hele vaa' okode ne'mo minevo' minevo' ogo minaa' emeni dameni daline' gameneu' nene mono' godolou' gamazi ti' li gizani' ma nene vo gihile izeleseive:

Minevo' minevo' ogo minaa' ne'mo helaa' nene ivile' o neive.
55 Ido' gaza helaa' neke livile' iline' amuzoka nene ma nomive.
Ido' gaza helaa' neke lebelaa' gavosoka nene ma nomive.
Mo mudise osu' gehepeve logane.
56 Ido' a'mine helaa' ne'mi gavoso nene lihime daa' monovo ne neive. Ido' O'moso'mi lou' gamazi've ne'mo lihime damaa' ve lo lo neivosa lute ne'mo lihime daakumu' nene otaa' neive. Ido' neloti' lihime daa' monovo nene lelita amuzo molo soto' oga' neive. 57 Ne neiha O'moso'mo lavo Guvetesi ve Izesu' Kilisito' aza hize ele' o-lidivo lihime daa' monovo nene ivile' ogo lihime damo minaa' noune' nemu' O'moso opo'ni lolone.

58 Ido' nemu' nene neze zuho lu'ne lengeme nouvoni' mate, inite' goloso mali'mo lengehuso' ogalize. Lingine monoku' nene amuzo mili ele'vole' igi oti pehe li minilo. Helakuti' otaa' nene nomidiniko Guvelesi ve'mi gono've di-daa' nani' nene hazamu' di-dadine'za helakuti' otaa' nene neine' nenako hazamu' ma di-damilisave. Nemu' lingine nene hazamu' do-dekunivo labuluvo amoloseive li gili nizani' nenaze. Guvelesi ve'mi gono nene gamene gamene vauve ili di minilo.

Copyright information for `ASO