1 Corinthians 9

Paulo' Aposolo Gono Daa' Monovomu' Lo-ngimine'

Ido' evene' ma nehe inite' ma nehe ne'mineti goboni ve'ine minamuvonako naza nene inite' nanite' olosa gelelohe nene ha olosuve. Naza nene Guvelesi ve'mi velemu' ogo gono daa' uve aposolo nouve. Guvetesi ve Izesu'ni nene neni' ve'nedunu' mo ningekuvoni' ve. Ido' Guvelesi ve'mi velemu' ogo gono duvoni' ne'mi gihile lengi' nene nizave. Ee, lengita gono dokuvo Guvelesi ve'mo eze evenele lolo' o-lingididi'mo naza nene aposolo gihile nouvoni' nene mo soto' o neine' nenako nemu' evene' malite nenikumu' aposolo nomive li gili nilizani' nene ti' ogo monilize. Asi neni' lengi' aposolo nouvoni' nene langise mo gili nizave.

Ido' evene' malite neni' monovo'nemu' ize' mili laa' nahe nemu' nene naza a'mido' mene ti' lo ma nolo-lingimuve: Nazasi makato' gono dunivesi volonida nene evene' ma ingine noso' nite' haza limikevo nalonido' amihe. E'e, mo ha nalonido' o neive. Ido' Petololesi Guvelesi ve'mi akunolo zuhosi aposolo linge masi ingine mono' gonolo' monada monada nene vene'inesi maka' monaa' nave. Ido' lingine mo gili nilisave. Leli' nene ne'mine olonido' mo lisihe' o noloseive. Olo. Ido' aposolo linge nene noso' nite' haza ngimikevo naa' naha leli' Banabasikisi nenikisi nene mono' gono helala do ido' helala okode losuvo'mi initekumu' nene leli' adedunu' gono do do soto' oga' nosive. Ne neiha aposolo linge ma ingine nene noso' nitekumu' gono dami haza naa' nani' nene ha neiha lelikovo' nene gono dami haza nalisido' minamasive li lingine gilaa' nahe. Ne nomive. Ido' ve ma ami pilisi ve nene gono'velo' meni imamavo asi'vevo' nene oko'no losuvo'mi inite' nene do soto' o'mo vo minelihe. Ido' ve ma aza gono doo mine zuho' ogavo o molavo a'minguti' dolizo namilihe. Ido' ve ma zaho bulumaka' gizebo ogo minelinguti' a'mine bulumakali'mi amine novozo nene asi've namilive. Ne'mine igi haza gono mo keke' mo damilisave. Ido' neni' nene eveneliti gamazilo' e'meto a'mine luvoni' gamazi mene nolive lisa nilahe. E'e, O'moso'mi lou' gamazi Mose' ma ti' lo gizine' neine' masi ne neive:

Bulumakatinelite lengi' viti gihiletine nene lisi
di ledi' ledi' nii-lingidavo ma nene
a'minguti' ha nalizado' o neize.
A'minguti' ma nikelizave li ve'nido' nene inite' ma di tili-ngidamilo.
Ido' lingine a'mine line' gamaziu' nene O'moso'mo leli' evenekumu' lamo bulumakakumukovo' lave li gili nizahe. O'ove. Leli' evenekumukisi lo neine' ma neive. Ee, gana' gono davesi ido' ne'mi gihile've do soto' olosa alinge' gono davesi ingine gonoteloti' gihile've soto' ogavo ma neloti' ha nalosune li gono dalizado' o neine' nenako nemu' a'mine gamazi nene lelikumukisi line' ma neive. Ido' ti' lo gize neine' nenako O'moso'mi lou' gamazi nesi nene neni' luvodi'mine ogo gonou' ve nene gono haza damilisave lo neine' ma neive.
11 Ido' neloti' nene lengi' lutingu' mono' nene zuho' ogosa ne'mi gihile've okode losuvo'mi inite' lengitati' ma dalone' nene mo inite' nabasi nomive. 12 Evene' ma ingine nene lengitati' oko'ine losuvo'mi inite' dalizado' lisihe' i nizahe ido' leli' nene engi' ngivile' ogosa okode losuvo'mi inite' lengitati' dalonido' lisihe' o none.

Okode losuvo'mi inite' lengitati' nene ha dalonido' lisihe' o neiha ma damo okode losuvo'mi initekumu' lolone' nene evene' olovo' ikevosa Kilisito' gamazi've lamine' nene gili dalizani' aka've hize tilalone lo a'mine inite' mukikumu' nene la'lisete geni gono gehaa' noune.
13 Ido' mono' numuno nabau' gono dave ingine noso' nite'ine nene mono' numuno nabauti' di naa' nave. Ee, mono' numuno nabau' eveneto' medeli mini O'moso inite' lehizi-daa' gono dave ingine nene O'moso lehizi-dani' noso' nitekuti' nene di naa' nave. Lingine a'mine nee mamu' gilamani' nehe. 14 Ido' a'mine'mine ogo Guvelesi ve'mi gamazi've lamine' nene di vi li soto' i ngimaa' ilizave ingine nene li soto' i ngimilizavelati' noso' nite'ine di nalisave lo asi've Guvelesi ve'mo lo hukine' ma neive. 15 Ne neine'za naza Kilisito' gamazi've lamine' nene lo soto' ogo lo-ngeme'mo vaa' nouvodo' nene lo soto' o ngemaa' uvelati' nene noso' nite' nevo'minesi ma damo haza gidini lo-ngemaa' nouve. Ido' naza luhuvo ne'mine lo nogizuvoni' nene evenelite gili noso' nite' nevo'mine ma nimilizave losa gelo luhuvo gizamuve. Naza giluvo mono' gamazi haza gidini lo-ngemaa' nouvoni' monovo'ne nene ede vive lo nolize izaa' nouve. Nemu' a'mine nolize izaa' aka'ne nene hizi tili-nidisa a'mine gono daa' nouvongumu' noso' nite' haza gidini nimamavo hazavo' mine do vo heleloni' nene mo lamine' ve lo gele nouve. 16 Nene nanitekumu' ve. Guvelesi ve aza gamazi'ne lamine' nene lo soto' ogo lo-ngeme'mo viline lo lo huko-nidine' nenako lo-ngemamoloni' nene lihime nemavo agae agae lo minalove lo a'mine gamazi've lamine' nene lo-ngemamo haza mineloni' aka'ne nomivo mino Kilisito' gamazi lamine' nene lo soto' ogo lo-ngemaa' nouvoni' nemu' nene neni' oko'ne do dizo nolize izamolosuve. 17 A'mine gono dalove lo nei' lu'ne otavosa duvodiniko neloti' nene meni'nesi ha duvodiba ne'mino nomive. Neni' lu'ne olihe otamivosa Guvelesi ve'mo a'mine gono nene nogimuze. Dozo lavo noduve. 18 Nemu' nene meni'ne nanite' daa' nouve. Ne'mino neive. Mono' gono daa' nouvodoti' nene oko'ne losuvo'mi inite' haza gidini dalodo' o neine' nene gele hulo meni dalongumu' lamo Kilisito' gamazi've lamine' nene lo soto' ogo lo-ngemelodo' meni've nomivo haza gidini lo-ngemaa' nouvongumu' nene nolize izaa' nouve. Nemu' nene naza Kilisito' gamazi lo-ngemaa' nouvodoti' meni'ne daa' nouvoni' nene a'mine nolize izaa' nouvoni' nene neive.

Paulo' Aza Evene' Ato Ato' Muki' Nene Izesuda nGele'mize Molalongumu' Ve Lo Monoku' Gelekele' Ve Lolo' Ogo Mino Engi' Aleve Gelo Minine' Monovo'vemu' Line'

19 Ne'mino neive: Naza nene meni nemaa' ilive lo evene' hamo' mali'mi gelekele' ve ne'mine minamuvoni'za evene' vai' goloso ngele'mize Izesuda molalove losa na'nise'ne nene evene' mukito' gelekele' o-ngedaa' nouve. 20 Na'nise'ne nene Zuda veti lou' gamazi Mose' gize ngimidokovo' e'metaa' aveti muliseuti' minamuvoni'za Zuda vesi ido' Zuda veti lou' gamazilo' e'metaa' ave muki' nesi nene ngele'mize Izesuda olove lo a'mine Zuda vesi ido' engi' lou' gamazilo' e'metaa' ave engi' ve'nida nazasi nene Zuda ve a'mine lou' gamazilo' e'metaa' uve gelo gono do minelesuve. 21 Ido' na'nise'ne nene O'moso'mi lou' gamazilo' e'metesa'muve minamuvoba Kilisito' lou' gamazilo' gelekele' oga' uve nouvoni'za O'moso'mi lou' gamazi di minamave heta ato' vesi nene ngele'mize Izesuda olove lo a'mine O'moso'mi lou' gamazi di minamaveti ve'nida nene nazasi engi' aleve minuvoni' gelo gono do minaa' nouve. 22 Ido' evene' monoku' amuzo milamave engi' nene ngele'mize Izesuda ogo do amuzo molo-ngedelove lo nazasi nene engi' gidini lolo' ogo mino gono daa' nouve. Ido' a'mine aleve mukikuti' nene linge ma O'moso'mo do ngu' izeline' akalo' ngele'mize molalohe lo ato ato' aleveti monovo'nido' e'meto amuzo molo gono daa' nouve. 23 Ido' inite' muki' ne'mine oga' nouvoni' nene evene' muki' nene Kilisito' gamazi've lamineto' nene gelekele' ikevosa O'moso'mo engikisi nezesi makato' do lamine' o-ledelive lo a'mine gamazi lamine' nene hize ele' olosa ne'mine oga' nouve.

Meni Dalone Lo Ma Monoku' Amuzo Molalone Lo Lo-ngimine'

24 Lingine gili nizave. Evene' loti' izi ge hulo ne hulo lilizangu' nene mukilite meni dalobe li amuzo mili loti' izilisaha evene' hamoli'mo ngivile' ogosa meni daloseive. Ido' a'mine'mine igi lingine meni daloningumu' ve li monoku' amuzo milalo. 25 Ido' ne'mine zohiku' ge hulo ne hulo lilizave ingine evene' ma ngivile' ogo meni daloningumu' ve li engi' oko'ine do gilizevo iline' monovomu' nene o've li oko'ine do amuzo molaline' monovovo' igi mili mini monovo'nido' gizebo lekeseve ilizave. Ido' ingine ne'mine ilizani' nene nani'mine meni dalisa ne'mine ilizave. Haza minevo' minevo' amiline' meni ma dalisa ne'mine ilisave. Ne neiha leli' nene monoku' amuzo molokunivo O'moso'mo minevo' minevo' meni lamine' lemelingumu' nene monovotelo' gizebo lekeseve olone. 26 Ido' nemu' gelo naza monoku' amuzo molo loti' noizuvongukisi ido' Satani lovo o emaa' nouvongu' nesi nene abeleni ogo zohi' ne'mine amo mino 27 evene' mono' lo-ngeme'mo vo minaa' uve minelonikisi na'nise'ne nene vo tolovo ogalove lo neni' oko'ne nene goloso initekumu' lanite' gelelingumu' nene amuzo molo do'mo leme-de mino a'mido' gizebo lekeseve oga' nouve.

Copyright information for `ASO