1 Peter 5

Petolo' Ga'ine Dani' Gamazi Gizingu' Mene Mono' Gizebo Ve Ingine Evene'nido' Gizebo Lamine' I-ngidilizani' Monovomu' Lo-ngimine' Gamazi

Ido' lengikuti' mono' gizebo vetine minavemu' nene gamazi lolouze. Gililo. Lengi' ne'mine gizebo ve minuve ado' Kilisito' mulumo geni gehe'mo navo ningaa' ido' alinge' soto' o-ledelesa neine' inite' lamine' labana'vesi neine' nene makato' dalonivesi minuve naza gatine do ti' lo nolo-lingimuve: Lengita O'moso'mi zuho mulise nizani' neve nene lu'ine'mi noso' nite' ngimika ngimika' igi gizebo lamine' i-ngidi minilo. Ne'mine i-ngidi minilizani' nene evenelite lutingu' hizavosa nevoba asi lutine'mo ne'mine olosa gele nolidokovo' nene e'meti ilo. Ido' ma nene moni heneni inite' ma dalone li gili minisa gizebo i-ngidilizani' ne'mo nene lovozo helaa' inite' goloso ilisaze. Mo ne'mine ami asi O'moso'mo lingine a'mine gonomu' lutine mili minisa gono dalizave lo gele neido' nene e'meti gono dalo. Ido' gohi ma nene ti' lo nolo-lingimuve: A'mine gizebo i-ngidi nilizani' aleve nene amuzo mala' mala' igi gizebo i-ngidami asi O'moso'mi zuho engi' igi mili minilizani' inite' nene lingine avazaha pikisa ne'mine mini aka ngelebizi igi mili minilo. Ne'mine ikevo gizebo ve naba aza soto' ogo heteleline' gameneu' nene lingine meni dalisave. Ado' geleso osu' lamiline' palaisi labana'vesi neine' nene dalisave.

Goso've Nene Gizebo Ve Gili nGimi Nizavo Evene' Muki' Oko'ine Di'mi Limisavo' Mini Kilisito'nimu' Gili Ele'vole' Ani' Nene Di Gili' Li Mini Satani Lovo I Imi Minilizangumu' Lo-ngimine' Gamazi

Ido' mono' gizebo ve gono'ine neivo ha iga' naani' ne'mine igi goso'velite ilizani' o neine' inite' nesi nene mo ne'mino neive: Lingine nene gizebo vetinelite lilizani' gamazilo' nene ha gili ngimisa minilo. Ido' mono' godolou' O'moso'mi monovo ma ti' li gizi nizani' ma neive:

Evene' ma oko'ine di dizi minaa' nave nene
O'moso'mo biluva' o-ngedaa' neiha
evene' ma engi' oko'ine di'mi limi minaa' nave engi' nene
ninge lamine' o-ngedo nasahili' o-ngedaa' neive.
Aza ne'mine oga' neine' nenako nemu' nene evene' muki' lingine okodine di'mi limi mini ge gelekele' o-nede ne gelekele' o-gede li minilo.
Ido' O'moso neve nene ne'mine oga' neine' nenako nemu' nene lingine ei' molani' gamene soto' ilingu' nene do ote-ledelingumu' ve li lengi' okodine nene di'mi limisa O'moso'mi anau' vi mini ei' amuzo've nabalokovo' nene lehete i minisa O'moso'mo lengikumu' mulumotine gele minaa' neine' nenako nemu' nene lingine gopo gatine gilaa' nani' initetine geni ne'mine vai' nene ei' anau' huli milalo.

Lingine nene lutine gatine vo gopo'napa amivo gatine gili nge li mini ehe' igi ningisa minilo. Ado' biluvatine Satani aza loposo gulo naba laioni ne'mo ga'na helo ngebelo naline' initekumu' viseto' monaa' neine' ne'mino lengebelelesa nomonize. Ningisa minilo. Mulumo geni lengi' nigihi-lingidani' ne'mino nene lengi' zuho Kilisito' evenele misubo vaiku' mini'mi monave engikisi nene a'mine'mine igi nigihi-ngidani' nenako lingine nemu' gili mini Kilisito'nimu' gele ele'vole' iga' nani' nene di gili' li minisa a'mine biluvatine nene lovo i imivo' minilo. 10 Ne'mine igi a'mine mulumo geni nene gihi'mi vi nizavosa gamene ha'na amivo a'mine ato ato' initeku' mulumote ningo nasahili' o-ledaa' ive O'moso ado' Kilisitoda vi gi'mizisa labana'vesi minevo' minevo' oga' neine' mo'mosiku' nene imi hilalizave lo lengi' vise lo do eita ive ne'mo nene gohi do lamine' o-lengedo do ngi lo-lengedo ido' amuzo lengemo ele'vole' igi oti pehe li minilizado' lengele'mize molaloseive. 11 Amuzo muki' nene gamene gamene eitavo' minivo. Mo ne'mino minilihoo.

Petolo' Luhuvo Nite' Gize Osu' Nolo nGopo'ni Lo Gizine' Gamazi

12 Naza gamazi noluvo ezelo' gele medele minelodo' o neive lo giluve ado' leze zuho Siluvano' ne'mo hize ele' o-nedo luhuvo mene nogizivo naza a'mine gamazi noluvoni' meve nene O'moso'mo nasahili' o-ledaa' neine' monovo gihile'mi gamazi ve lo lo-lengemelesa naza hize ele' ogosa lengi' lutine nene do ngi lo-lengedo luhuvo nite' li'nibe mene nogize-lingiduze. A'mine O'moso'mi nasahiliku' nene mini gili' li minilo.

13 Ido' lengi' ne'mine aleve O'moso'mo maka' do kegese-lingidive Kilisito' evenele Babelonia numuno ebeku' mela mulise milaa' nave ingine longopo'ni nilavoo neze gipe'ne Maleko' azasi nene longopo'ni nolize. 14 Lingine nene isetine ve li lute ngemaa' monovo di soto' igi ge nabuti' ize ne gabuti' ize li adido' disa minaa' ilo.

Hongu lo lamino minaa' monovo neve nene Kilisito' evenele minave lengi' mukita minivo.

Moda a'nesi' ve.

Copyright information for `ASO