1 Thessalonians 2

Paulo' Tesalonika Ebeta Mono' Gono Dani' Gamazi

Neze zuho mate, lengita vo gono dunivo vo haza amine' nene langisetine ningi gili nizave. Ido' gomu' nene Hilipi ebeku' mulumo nite' i-lidi goboni mili-lidani' nesi langisetine ningi gili nizave. Ne'mine i-lidani'za leze O'mosote'mo hize ele' o-ledo amuzo lemavo a'mine mulumosi geni naba hiluningukisi O'moso'mi gamazi lamine' nene lovo' kiselevo' ogo lo soto' ogo lo-lingimune. Gatine do lo-lingimune' gamazi nene ladanga lo lo-lengemamune. Ido' goloso inite' daa' univete lo-lengemamune. Ido' gotine izo soza lo lo-lengemamune. O'moso'mo leze luteu' ningavo eze gamazi lamine' nene ha li-ngimilizado' neive lo ninge-lede neivo lo-lengemaa' noune. Evenelite gilikevo lamine' ilive losa nomive. O'moso luteu' ningaa' ive'mo ningivo lamine' ilive losa lo-lengemaa' noune. Lingine leze monovote gili nizave. Lengita minune' gameneu' monovote do haleko suno' mino lengi' moni henenimu' mumuzo' ogo muludingu' hizo ma lamune. O'moso'mo gele neivo nolune. Lengi' nehe evene' atolite nehe lezemu' gilikevo dizavo guvetesi ve lolo' olone losa lamune. Laza evene' naba gidini eze aposolo lili' igi minilizave lo Kilisito' aza lele'mize molanako laza amuzo molo-lengedelone' ha neive. Ha neine'za ne'mine amo ize'nibo mali'mo izipahala zou lo gizebo o-ngedo minaa' neine' ne'mino laza linginela minune' ve. Ne'mine ogo lute lengita minavo O'moso'mi gamazi lamine' nene lo-lengemelone losavo' lamune. Lingine vodelo' aleve lili' ani' nemu' nene leze minevo' alevote lengita osu' liline' nene lamine' ve lo gelo nesi lengemelone losa lune. Neze zuho mate, ele'vole' gono do labusote ilivo gono do minune' nene mo gili nizave. Linginelati' inite' ma limilizani' nene linginela nomivo geni ogalive lo holisekisi holukakisi okode losuvo'mi gono ele'vole' ogo do mino O'moso'mi gamazi lamine' nene lo-lingimune' ma neive. 10 Laza lute laminekisi mine kegese mino lute lisihekisi mino lihimete nomivo mino mono' gilaa' ave lengita ogo molo une' nene mo linginesi O'mososi ningi gili nizave. 11 Me'nibo mali'mo izipahala zuho o-ngedaa' neine' ne'mine ogo laza lingine hamo hamo' ne'mine o-lengedo minaa' une' ma ve. 12 Ne'mine ogo gatine do vodine lutine do gilingili o-lengedo lo huko ti' lo lo-lengemo minune: Ei' gizebo o neingu' mini eze labana've ningi di ti' ilizave lo O'moso'mo lengele'mize molaze. Nemu' O'moso ei' evenele zuho igi mili ilizani' o nolidokovo' igi mili minilo lo lo-lengemo minune' ma neive.

13 Ido' laza O'moso'mi gamazi lo-lingimunivo gilikevo haza eveneliti gamazi lolo' amine' ve. Lingine O'moso'mi gamazi ve li gili di go'zani' ma neive. Mo lamine' O'moso'mi gamazi neive. O'moso'mi gamazi ne'mo mono' gili gili ele'vole' i nizave lengita gono daa' neive. Nemu' nene laza gamene gamene gosele' lebelamivo O'moso opo'ni laa' noune. 14 Neze zuho mate, O'moso'mi evenele zuho Zudaia misubouko Izesu' Kilisitoda vi gi'mizave inginesi linginesi hamo' suno di nizavo mulumo inite' i-lingidi engi' nene Zuda vete goboni mala' mala' i-ngidani'. A'mine'mine igi lingi zuho malitesi goboni mili-lingidani' ve. 15 Zuda ve ingine neve gozopo' O'moso'mi gamazi li soto' iga' ave polohete nene ngibili hilani'. Ido' a'mine'mine igi Guvelesi ve Izesu'ni nesi bili hilani' ve. Ido' leze libili ga' limiselani'. A'mine Zuda vemu' O'moso'mo gilivo lamine' amine'. A'mine Zuda ve nete evene' muki' numudo' namado' ve nene lovo i ngimi minaa' nave. 16 Laza ato ato' vetida vo mono' lo-ngemekunivo gili O'moso'mo do ngu' izivo minilizave lo volosa nonivo a'mine Zuda ve ingine ne'mine igi lelikumu' nene mono' goloso laa' nanako aka hize tilelobe li lovo gani li-limaa' ani'. Ingine ne'mine ivi' ivi' igi minikevo engi' lihime eheto' eheto' ogo dize minavo O'moso'mo izebolo' molani' ne'mi lovo've nene engita mo ogo minave.

Paulo' Tesalonika Ebeta Gohi Volove Lo Gala Giline' Gamazi

17 Neze zuho mate, leli' nene gamene ngomo hulo hoto' o-lengedo sihele'ni izipe ne'mine lolo' ogo none'za hulo hoto' o-lingidune' nene lutedunu' nomive. Okode losuvodunukovo' ne'mine une. Nemu' nene lengikumu' lisivo mino lingi vo ningelone lo amuzo molo gelo aka vise' ogo minune. 18 Lengita volone lo gelo minune' nenako Paulo' naza gamene masi masi volosa okuvo Satani'mo aka hize tile-nidine'. 19 Lengikumu' ve lo lanite' gelaa' noune. Nene ne'mino neive: Guvetesi ve Izesu' heteleline' gameneu' nene zaa' vete leli' gonoli'mi gihile lili' ilizave. Langise nene leli' gonoli'mi gihile lili' ilisave. Nemu' lengikumu' lolize izo minaa' noune. 20 Lengikumu' muludeu' lamine' gelo O'moso opo'ni laa' none.

Copyright information for `ASO