1 Thessalonians 4

Mino Molo Nonivo O'moso'mo Gilivo Lamine' Iline' Gamazi

Neze zuho mate, gamazi mo gize lengemekuvoni'za ma neine' nene lo-lengemeloze. Gililo. Guvetesi ve Izesu' ei' velemu' ogo gatine do amuzo molo lo-lengedo lingine monoku' igi mili minilizani' ne'mo O'moso'mo gilivo lamine' iline' ne'mi monovo apize lingimune' ne'minevo' igi minilo lo nolo-lingimune. Ne'mine igi nizani'za gohi amuzo mili minilo lo nolo-lingidune. Lingine gili dalizani' gamazi Guvetesi ve Izesu' velemu' ogo gozopo' lo-lingimune' nene mo gili nizave. O'moso'mo ne'mine igi minilizave lo gelo ti' lo laa' neive: Vene' vemoho' gopo' napa' monaa' nene huli evene' kekeize ve, ve lisihe' lamine' minilizave lo laa' neive. Lingine hamo hamo' okodine di kekeize li mini evene' ve'nido' lihimetine nomivo minilizave. Evene' ato' ato' O'mosomu' gilamavete vene' alumu' ngumo helepele' ivo a'minemukovo' gili di monaa' nave. Lingine ingine iga' adi'mine amilo. Mali'mo ne'mine iline' nene ve gonoloho noso molani' nene avuto' ogo elenahine longo' ogo a'mine ve gonolohi inite've do gopo o-dalive. Ne'mine ilizave nene Guvelesi ve'mo lihime ngemeleseive lo gomu' ogo lo-lingimune' ma ve. O'moso'mo lengele'mize molani' nene vene' vemoho' gopo' napa' monanguti' lutine nene goloduvosi minilingumu' ve livoba lutine nene guluvi' lamine' lisihe' minilingumu' ve lo lengele'mize molani' ve. Nemu' nene a'mine gamazi gele hulilive ne'mo haza eveneliti gamazi gele huluhe lo O'moso'mi gamazi gele huloloseive. Ido' gamazi've gele hulilingu' nene aza O'moso nesi vasa ize-deleseive. Ee, eze Sikalahu've lamine' lengemaa' ive O'moso nene vasa' ize-deleseive.

Lutinedunu' nasahili' ge o-nede ne o-gede li minilizave lo O'moso'mo asi've monovo've lengelebizo lo lengeme neine' nenako laza luhuvo nite' gize lengemo lingine Izesu' evenele zuho linge nene lutine ngimilizave lo nanitekumu' lo-lengemelone. 10 Ido' lo-lengeme neine' ne'mine igi lingine Makedonia misubou' Izesu' evenele zuho mini'mi moni nizave muki' nene lutinedunu' nasahili' i-ngidi minaa' nave. Ne'mine igi nizani'za gohi amuzo mili li-ngimi minilo lo gatine do nolo-lingimune. 11 Ne'mine ogo gamazi ti' lo lo huko lo-lingimune': Zou lo mino evene' maliti gamazilo' nehe noso' niteto' nehe gopo domo dize dize ogo monamo leli' initetemukovo' gelo mino la'lisete adedunu' gono do minelone li ne'mine ilisavo' amuzo milalo. 12 Ne'mine ikevo nemu' evene' mono' gilamavete gilikevo monovotine lamine' mineleseive. Ido' ne'mini gono dalizadi'mo inite' matatine vai' lo minavo evene' mala initekumu' voku' voku' ma lilizado' o minamoloseive.

Guvelesi Ve Tine' Molo Ogo Do Ote-ledeline' Gamazi

13 Neze zuho mate, gililo. Mono' gilamavete ingine hilavemu' gopo ga'ine gili mo hili osu' likeve li gohi ningamolosune li ive nama iga' nave. Ingine ne'mine iga' nani'za linginesi ne'mine ikelizave lo hilavemu' nene lo-lengemelouze. Gililo. 14 Laza nene Izesu' hilinguti' gohi otine' nene gele ele'vole' o none. Nemu' ti' lo gelelone: Tine' molo aline' gameneu' nene Izesu'nimu' gili ele'vole' igi hilave inginesi O'moso'mo ngele'mizo aloseive.

15 Guvetesi line' gamazi ma lo-lengemelesune: Misubouko vetesi nonive nete Guvetesi ve aline' gameneu' nene hilave ngivile' amolosune. 16 Guvetesi ve Okulumokuti' lemelove lo amuzo molo vise lavo angeloliti guve'inesi ve naba ne'mo nolo molavo O'moso'mi pikuli've ne'mo nolo molavo lemeleseive. Nolimivo Kilisito'nimu' gili ele'vole' igi minadoti' hilave ingine gomu' mili otilisave. 17 Otikevo evenele zuho lingela laza vetesi minelonive nene O'moso'mo lele'mizo dizavo a'mido' imine' molokunivo limuso avilelo' Guvelesi vesi maka' do bizelesune. Ne'mine ogo Guvetesi vesi minevo' minevo' ogo minelesune. 18 Nemu' nene lingine gamazi mene li volelo' melo' igi gili hilavemu' mulumo gilii ma ge do hongu lo-nede ne do hongu lo-gede li minilo.

Copyright information for `ASO