1 Timothy 4

Evene' Mono' Gihile Hulisa Sikalahu' Golosolati' Mono' Gamazi Gilii Gosoho' Nasaha' Gamazi Apizi nGimilizangumu' Timoteo'ni Paulo' Hungo' Molo Lo-imine' Gamazi

Ne neiha O'moso'mi Sikalahu' ne'mo ti' lo lo soto' ogo lo-leme neine' ma neive: Alinge' nela nene evene' ma ingine mono' gihile di mini minilizanguti' nene hulisa go'ine izaa' nani' sikalahuta nene vi gi'mizi sikalahu' golosolati' minine' mono' gamazi apizi ngimaa' naado' nene e'metilisave. Ne'mine mono' goloso di soto' nave nete oko'ine losuvoloti' nene evene' lamine' gili minii sozalo' ve monovo goloso lamine' ize' mili ningi di kegesaa' ani' madu'ine di goloso ikeni' mini vene' daa' velo' vaa' nene amilizave li ido' O'moso ezemu' gili ele'vole' igi gamazi gihile gili minave O'moso'mo ei' isaa' neve li-di di nalizave lo noso' nite' do soto' ine' linge ma nene malise ilizave li-ngidaa' nave. Ido' naza O'moso isaa' neve li-di dalizave noluvoni' nene O'moso'mo do soto' ine' inite' mata' nene laminekovo' neine' nenako a'mine mukikumu' nene O'moso isaa' neve lo-dosa hamokumukisi nene o'ove lamo mo daakovo' olone' o neine' nenako nemu' nene luve. Ido' naza di naakovo' ilisave noluvoni' nene nanitekumu' ve. O'moso'mo line' gamazi ne'mosi ido' laza isaa' neve lo O'mosola lune' ne'mosi a'mine noso' nite' nene do lamine' oga' neinako nemu' nene luve.

Izesu' Kilisito' Gonolo' Ve Lamine' Mineline' Monovomu' Paulo' Timoteo'ni Gala Do Lo-dine' Gamazi

Gaza lo-giduvoni' gamazi mene leze zuho Izesu' evenele lo-ngedeline' nene mono' gamazi lamine' apize gimunido' e'meto minaine' ne'mo nene luka'mi noso' nite' lolo' ogo hize ele' o-gidivo mino mo Izesu' Kilisito' gonolo' ve gihile lamine' nene minelesane. Monoku' vo damine' gamazi heluno ne'mine gihile've nomine' getipe gamazi laa' nani' nene mehenga emaa' ozo. Ne'mine oga' noogosa monoto' monovo do hehe lovo' ogo molo iliningumu' nene ele'vole' ogo a'mine'mi gono've do ninge' ninge' ogo doka' doka' o'mo vo minezo. Ne'mine noluvoni' nene nemu' noluve. Laza okode amuzo molo ele'vole' ogo minelive lo ne'mi gono've doka' doka' o'mo vo eksesais ogo minaa' noune' ne'mo nene ngomo hize ele' o-ledaa' neive. Ne'mine oga' neiha monoto' monovo do hehe lovo' ogo amuzo molo ogo molo oga' ne'mo nene idise minevo' alevo' ogo nounidaa mene hize ele' o-ledelido' o neivosa ido' alinge' Okulumokuko minevo' minevo' ogo minelonidaasi nene hize ele' o-ledelido' o neive. Nemu' nene okode losuvomu' olone' inite' nene ivile' ivosa a'mine monoto' monovo do hehe lovo' oga' ne'mo nene mudise hize ele' gehepeve o-ledaa' neine' nenako nemu' nene noluve. Ido' gamazi meve nene gihile lamine' neine' nenako mo mudise gele dalonido' nene lisihe' o neive. 10 Nemu' nene minevo' minevo' oga' neine' O'moso aza evene' muki' do ngu' izaato' minidoti' nene ado' leli' Kilisito'nimu' gele ele'vole' oga' nounive nene do lu' izaa' ive gehepeve ne neive losa ezemu' gele mu'musi' ogo none' nenako a'nemu' nene zege' zege' goloso ogosa mulumo gono ne'mine do do dizo minaa' noune.

11 A'mine lo-giduvoni' gamazi muki' mene lo soto' ogo apize ngemezo. 12 Ido' gaza ve goso've ve li geikumu' gilikevo lemo minaaline. Nemu' nene Kilisito'nimu' gili ele'vole' igi minave nene gei' monovokalo' e'metilizado' lisihe' ilido' ogo molo ozo. Gaza gamazi liliningu' nolihe ne'mine mana'mine inite' iliningu' nolihe evene' lute ngemaa' monovolokisi ido' Guvelesi vemu' gele ele'vole' oga' monovolokisi ido' monovo goloso hamokisi ogo molo amo minaa' monovolokisi nene gaza lamino e'meto nanivo ne'mo nene ingine a'mido' e'meti igi mili ilizani' aka'ine nene ngelebizelive. 13 Naza gei' nanida olihe amuvo nanido' nene mono' godolou' gamazi nene gate ngemaa' ido' lu'ine do oto ga'ine daa' gamazi lo-ngemaa' ido' mono' monovo apize ngemaa' gono ne'mido' nene luka amuzo molo molo minoosa do do vo minezo. 14 Ido' O'moso'mi veleti' gamazi geikumu' line' nene nilavo ido' mono' gizebo ve nene gonou' gele'mizi mili a'nine godokalo' nimilavo gonou' amuzo O'moso'mo lehize-gidine' nesi nene damanivo haza minaalive. 15 Mono' gonoka do lamine' o'mo novaine' nene evene' muki' ningilizangumu' ve lo a'mine lo-giduvoni' initeto' mene luka molo mino a'mine ne'mine monovo ogatokovo' nene minezo. 16 Gei' monovokalokisi ido' evene' apize ngeme ngeme' iline' gamazilokisi nene ninge lamine' gehepeve o minezo. Gaza a'mine gamazilo' nene mo gi'mize gili' lo mineline' ne'mo nene gasika lukuvo nalinido' gele'mize molosa gei' gamazika gililizavesi nene lukuvo nalizado' ngele'mize molalosainaze. A'mine gamazilo' nene gi'mize gili' lo minezo.

Copyright information for `ASO