1 Timothy 5

Mono' Aleve Muki' Ogo Molo O-ngedaa' Iline' Monovomu' Paulo' Lo-imine' Gamazi

Gaza vemoho' ozoho ne'mine nene gamazi amuzonga lo-emamo gei' maho gehepeve gele neivosa gala do gamazi lo-emezo. Ido' izipe goso've nene nakuna gehepeve ne'mine gili minavosa ga'ine do gamazi lo-ngemezo. Ido' vene' ozoho neve nene gei' izamote gehepeve gili nizavo ido' vene' alu ne'mine nene gaka do zovo' zava' izalize. Aluna gehepeve gili nizavosa nene ga'ine do gamazi lo-ngemezo.

Mono' Mulise Nete Noso' Nite' nGimi Hize Ele' I-ngidilizado' Lisihe' I Minilizani' Vene' Gevonoliti Monovomu' Timoteo'ni Lo-dine'

Vene' gevono' mamu' ninganivo mono' mulise nete hize ele' i-ngidilizado' minikeve lo ningeline' nene mo guhalihali gehepeve i minani' venekumukovo' nene ningelesane. Ne neiha vene' gevono' maliti izipaha'ine nehe nga'vopilemo' nehe ma minilizani' a'mine aleve nene inite' ato' ma amisa gomu' ilizani' inite' naba ado' mono' ne'mo ize'ningine me'ninginemu' ne'mine monovo ilizave lo neine' nene ningi gili a'mido' e'meti'mi vi engi' zuho gehepeve engi' ize'ningine me'ningine golo hizi-ngidi noso' nite' nevo'mine ngimi hize ele' i-ngidilizave. Ee, ne'mine ogakumu' nene O'moso'mo lamine' gelaa' neine' nenako nemu' nene izipaha'ine ingine a'mine ize'ningine gizebo i-ngidilizave. Vene' gevono' guhalihali gehepeve ogo minaa' neine' ne'mo nene O'mosolo' gele mu'musi' o mino holuka' nehe holise' nehe gamene gamene hize ele' o-delingumu' nene O'mosola lo minaa' neive. Ne'mine ogo minaa' neiha vene' gevono' ma oko'no losuvo'mo lanite' giline' initekumukovo' gelo monaa' ine' vene' nene mo velesi ha noliha lulo've nene mo hele osu' lo vine' ne neive. Mene nolo-giduvoni' gamazi nene ma avuto' ikevo evenelite ngelemikelizaze. A'mine lo-giduvoni' gamazi meve nene lo-ngemezo. Ve ma ingine engi' zuho di guni gizebo i-ngidami minilizave muki' nene monovo goloso igi mono' huli osu' lisa Kilisito'nimu' gili ele'vole' amave nene ngivile' igi lihime daa' ave minilisave. Ne neiha ve ma engi' numu'ningu' ingaa' ave engi' zuho gehepeve di guni i-ngidami minilizave engi' neve nene engi' zuho gizebo i-ngidamaa' ave linge masi nene ngivile' igi lihime nene naba goloso gehepeve daa' ilisave.

Ido' mono' muliselite hize ele' i-ngidilizado' lisihe' i minani' vene' gonoliti gulive'ine gizelo ma nene kilisimasi fifti naeni (59) ivile' o noline' vene' vanahine hamoto' bizo minine' vene' 10 ado' evene' hize ele' o-ngedaa' gono lamine' ado' izipe do naba o-ngedaa' ine' nolihe ido' venenga ve ani' nasahili' o-ngedaa' ine' nolihe ido' eze oko'no do lemo mino gelekele' vene' ne'mine gelo O'moso'mi evenele hize ele' o-ngedaa' gono daa' ine' nolihe ido' geni initeli'mi lulou' minave hize ele' o-ngedaa' ine' nolihe ne'mine mana'mine gono lamineto' e'meto daa' ine' vene' lamine' noline' neevo' nene gulive'ine gizezo. 11 Ne neiha vene' gevono' olihe ozoho milami gosoho' gidini nizani' neti gulive'ine nene gizamozo. Nene nanitekumu' ve. Alinge' nene lu'ine Kilisitodokovo' mili minani' ma nene oko'ine losuvo'mo lanite' giline' initekumu' otavosa velo' gohi volone li amuzo mili gililizani' nenako nemu' nene gulive'ine gizamolosane. 12 Ingine gohi velo' ma vilizani' nene gana' lu'ine Kilisitodokovo' molo minelone lani' ma nene avuto' igisa lihime dalisave. 13 Ido' ma nene gono dami haza gopo minaa' monovo ningi diti' igi mini numuno mukiku' dizaa' limaa' igi moniivo' minaa' nave. Ne'mine niigisa gamazi lodonga hize eza ema igi gamazi di lulu izi evene' initekumu' dede' izi lamilizani' gamazisi nene li'mi monaa' nave. 14 Nemu' nene monoteli'mi biluva' ve nete ngemenga likelizave lo naza vene' gosoho' gevono' minani' nene velo' gohi vi izipe gidi mili numu'ine ebe'nido' nene gizebo igi minilizave losa noluve. 15 Ne'mine noluvoni' nene nanitekumu' ve. Vene' gevono' linge nene mo monokuti' limi vi Satani e'meti nivani' nenako nemu' nene noluve. 16 Ido' Kilisito' evenele mali'mi zuhou' nene vene' gevono' ma nizavo ma engi' hize ele' o-ngedaa' gono nene mono' mulise gehe-ngedamo asi've nene hize ele' o-ngedo vise' ani' inite' ngemo minelive. Ne nanitekumu' ve. Mono' mulise ne'mo nene guhalihali igi minaa' naani' vene' gevono' nene hize ele' o-ngedaa' neine' nenako hize ele' i-ngidilizani' inite' vise' ikelizave losa nemu' nene a'mine engi' zuho asi've hize ele' o-ngedelive lo noluve.

Mono' Gizebo Ve Meni nGemaa' Ido' Goni' O-ngedaa' Ido' Mono' Gonolo' nGele'mize Molaakumu' Timoteo'ni Lo-dine' Gamazi

17 Ido' mono' gizebo ve linge gono lamine' di minaa' nave nene meni'nido' masi imine' mili ngimilizado' lisihe' o neize. Ne'mine igi ngimilo. Ne'mine noluvoni' nene mono' gono lamine' daa' ave mukito' nene vo do neiha mono' gamazi li soto' iga' naavelokisi ido' mono' monovo apizi ngimaa' naavelokisi nene vo do gehepeve o neive. 18 A'mine noluvoni' gamazi meemu' neve nene mono' godolou' ti' lo lo neine' ma mo gele none' ma neive:

Bulumakatinelite lengi' viti gihiletine nene
lisi di ledi' ledi' nii-lingidavo ma nene
a'minguti' nevo ha nalizado' o neize.
Ma nikelizave li ve'nido' nene inite' ma di tili-ngidamilo.
Ido' ma neve nene:

Gonou' ve ingine gono'nidoti' meni'ine dalizado' lisihe' o neine' nenako
mo meni'ine dalisave.
19 Ido' evene' mali'mo mono' gizebo ve mamu' monovo goloso dave lo goni' o-delesa ma nolivo ma nene a'mine monovo goloso do noline' nemu' nene evene' sitape setohamo he ne'minete mo ne'mine ogave li hamo' gamazivo' gehepeve lamavo ma nene alamo goni' o-damolosane. 20 Ido' lihime di'mi nave nene evene' mukiliti ve'nido' nene ngelemezo. Ee, evene' linge nesi nene nemu' golise gili lihime dami hazavo' minilizangisi evene' mukiliti ve'nido' nene ngelemezo. 21 Gaza lo-giduvoni' gamazi mene e'mete gehepeve iline losa naza O'moso'mi velelokisi Izesu' Kilisito' velelokisi ido' O'moso'mo do kegese-ngidine' angelo'veti ve'nidokisi nene nolo-giduze. Goni' gamazi'ine olihe gele-ngedamo bubu izo mo lamineto' lihime dikeve ido' damave lo mo lamo ido' goniku' sisitemi nesi nene mo amo goni' neve nene mo monovo lisihetokovo' do molo gele-ngedelesane. 22 Ido' gaza evene' ma do kegeso mono' gizebo ve lolo' o-ngedelo ma nene bubu izo anga godo'nido' hito do kegese-ngedamozo. Gaza bubu izo ingine monovo'ine golososi ma nolingumu' ne'mine oganivo engi' lihime nene geita dizalize. Lihimeka nomine' mineliningisi gei' monovokalo' nene gizebo lamine' ogosa minezo. 23 Ne'mine ogo minelesaine'za gaza haza nosovo' nonaine' nene hulo haza nosovo' namo gatungau' inite' gete' geto gize do' gize do' oga' naine' nene do lamine' o-gedelingisi vaini noso ngomo ha nite' nesi malasini ne'mino noka' noka' olosane. 24 Ido' gaza bubu izamozo noluvoni' nene nanitekumu' luvoba asi evene' malite monovo goloso di lihime daa' naani' ne'mi guvele nene geto buu lo vavosa alinge' gonito' ngele'mizi milii lihime ngimaa' naani'za ve ma neve nene monovo goloso di lihime daa' nani' ne'mi lihime geto soto' amivo mino alinge' soto' oga' neive. 25 Ido' a'mine'mine ogo evene' malite monovo lamine' igi mili iga' nani' nene mo sotokovo' minaa' neive. Ido' malite monovo lamine' igi mili iga' nani' nene idise soto' amo noline' nesi nene ngelo mudise halekamoloseinako nemu' nene bubu izamaa' iline losa nolo-giduve.

Copyright information for `ASO